رواية منتصف العمر الفصل السادس6بقلم جمانه السعيدي
منتصف العمر
البارت السادس
#جمانه السعيدي
مختار....اشتغلنا اسبوع كامل اني وصالح
حسيته حيل قريب مني فعلا من دمي ولحمي
بيوم الجمعه كان عدنا عطله عن العمل
صالح...باجر عازميك على غده خالتك كل يوم تسئل عنك
مختار...ماعندي شي اجيكم
الي عرفته عن خالتي ارملة زوجها مستشهد بلحرب
سنة ٨٢ وماعدها غير صالح وبنيه ازغر منه بسنتين
عدهم راتب ابوهم عايشين منه وصالح يشتغل ويسد النقص الي عدهم
الدوله مسلمتهم قطعة أرض وسياره لان ابوهم شهيد
السياره بايعيها وخالين الفلوس بلمصرف الوكت العوز
وقطعة الأرض موجوده
خالتي مسجله القطعه بسم احلام بتها والبيت الي همه بي مسجلته بسم صالح
جمانه السعيدي
كعدت يوم الجمعه على كيفي
طبعا ابوي جان بلجيش وهديل بيت اهلها
كعدت الصبح سبحت وبدلت وأخذت فلوسي بجيبي لان مجمع خوش مبلغ واخاف هديل تجي للبيت وراي وتأخذ الفلوس
بعد مااامن بيها ابد حراميه حياله
على فكره جابت هلمره بنيه
صار عندي ثنيين خوان واخت اخوان بس بلاسم
الصدك اني مالي احد بس رب العالمين وابوي
وبيبي ابد ما تنساني
الساعه ١١ رحت على العنوان الي اخذت من صالح
تقريبا مشي نص ساعه
وصلت دكيت الباب طلع صالح
صالح...اهلا وسهلا كل الهله من الباب كام يصيح يمه
يمه تعاي هذا مختار
اجت خالتي تمشي وتلف بلفوطه على راسها كانت ملابسها كلها سوده
خالتي...هله هله بريحة العزيزه شلونك خاله
حضنتني وكامت تشم بيه يمه فدوه الهلريحه من ريحة العزيزه
ليش خاله ماتجينا ليش كاطع بينا
لو ابوك ما يقبل تجي
مختار...لا ابوي اصلا مايعرف اني اجيتكم
خالتي...هله هله بيك تفضل
دخلنا جوه قبل البيوت البناء يكون ليكدام والحوش ليوره
يعني اول ماتدخل للبيت تدخل بلهول باب الشارع يكون بلهول والغرف والمطبخ منا ومنا والاخير حوش
كعدنا بلاستقبال مفروش بسط من هاي القديمه
اجت بت خالتي حتى تسلم عليه
وكفت كالت هذا منو
خالتي..تعاي هذا ابن خالتج
البنيه شكله زين بس مبينه مو تمام اقصد اكو شويه نقص بعقلها نضيفه لا بسه ثوب كلوش قصير وبجامه كلوش ضافره شعرها كصيبه واصله الاخر ضهرها
شكله نضيف ومرتب بس استيعابها قليل شويه
تصفن هواي من امها تحجي شويه يله ترجع الجواب
اسمها احلام اجت كعدت كبالي وكامت تباوع عليه
اكبر مني بسنتين
خالتي...سلمي هذا مختار ابن خالتج
احلام....شلونك
مختار...تمام الحمد لله انتي شلونج
احلام...زينه
جمانه السعيدي
لو تشوفون فرحت خالتي بيه عبالك مدري منيين جايها
شكد سألتني عن حياتي ووضعي وشلون زوجت ابوي وياي
مختار...الحمد لله
خالتي...شكد صارو عندك اخوان
مختار....ثنيين ولد وبنيه توها صارت
خالتي...سمعت طلعتو بيت وحدكم
مختار...اي بيت اجار
خالتي...مرتاح يبعد خالتك اي واحد يضوجك تعال هنا
احنا ماعدنا احد البيت بيتك
مختار...تسلمين خاله الله يحفضج
جابو الاكل ذاك الخبز مال البيت يخيل والسمج والزلاطه والبصل شفت الاكل انفتحت نفسي صار شكد ما ماكل اكل بيت طيب
كعدنا ناكل كلنا سوا ونسولف ونضحك
حسيت براحه مو طبيعيه عبالك كاعد بيتنا
اكثر وحده كانت صافنه عليه احلام مااعرف ليش
مدري مستغربتني مدري لان اول مره تشوفني
المهم اني خلصت اكل وشربت جاي وترخصت منهم وطلعت خالتي حلفتني ارجع عليهم مره ثانيه
اني الصراحه كلش عجبتني الكعده بيتهم
كل يوم جمعه يعزمني صالح اتغده عدهم كل جمعه اروح البيتهم كمت من اروح بيت خالتي افتر بلبيت وياهم
عبالك بيتنا مو خطار
اوكف بصف التنور من خالتي تخبز ونسولف اني وياها
اساعد احلام تنقل ماي للحمام
لان ماعدهم مي بس حنفيه وحده بلباب وعليها حوض
يغسلون بي ملابس ومواعين
للحمام ينقلون الماي كنت اساعد احلام من تنقل الماي
كل مره اروح عليهم تبقى بس تباوع عليه
ماتحجي وياي شي قليل بس هواي تصفن بوجهي
الحد مااجتني اكبر صدمه بحياتي من بعد وفاة امي
قبل لا تبدي المدرسه بشهر واحد بيبي تخربطت نقلناها للمستشفى اني كعدت يمها ابد ماارجع للبيت
بيبيتي عزيزه عليه
اني اعتبره ضهري وحماي وسندي ياما وكفت وياي
ودافعت عني
اسبوع واني كاعد يمها ناس تروح وناس تجي
واني حتى مارحت اسبح كاعد يمها وساكت
اليوم الثامن ماتت بيبي شكد بجيت عليها اني مابجيت على امي من ماتت لان جنت زغير وماافتهم
بس بيبي حيل أثرت على نفسيتي
لان هي الي ربتني وتعبت عليه
كمت اعيط حالي حال النسوان تخبلت عليها
راحت امي راحت الحنينه
محد يفكدني غيرها محد يسئل عني من اضوج كبل اروح عليها لا يوم ريتني ولا كشت بوجهي
فعلا الصدر الحنيين عليه
كنت احسها المكان الأمين الي يستقبلني باي وقت
والصدر الحنيين الي يسمعني ويجبر خاطري مهما كانت مصيبتي
انهاريت عليها اول مره اعيش الحزن هيج
حتى ولدها محد بجا عليها بكدي
ابوي بس خلصت الفاتحه التحق هو وعمامي
يمكن اني حزني عليها يختلف
اني حيل متعلق بيها ابوي وعمامي عدهم غير اهتمامات
مو مثلي هي الصدر الحنيين الي يفكدني
هم عدهم جهال ونسوان ماليه حياتهم عليهم
بس اني مالي غيرها
من بعدها بس نزل ابوي مجار بدت الحيه هديل ازن على رأس ابوي
خل يبيعون البيت وناخذ حصتنا
هم كاعدين مرتاحين واحنا نص الراتب للايجار
ابوي ماقبل لان بعدنا ما طلعنا الاربعين يستحي من عمامي
بس هي ماتعرف شنو مستحه
وحده لاذمه ولا ضمير من شافت ابوي ساكت
ومادارلها بال
بس التحق راحت على عمامي
هديل... اني اليوم جايه بشغله مهمه
عمي.. كولي محتاجه شي اذا محتاجه شي كولي سليم موهنا بلجيش
هديل...اي بلجيش احنا صرنا عائله جبيره
ست نفرات وياا مختار والراتب مايكفي ندفع نصه ايجار
والنص الثاني مايكفيني مسواك
صدكو اني ٢٠ يوم ابقى ببت اهلي لان مااكدر اسوك للجهال
عمي...والمطلوب شنو كلنا نفس الوضع ترا
هديل...لا انتم مو نفس وضعنا انتم ساكنين بلاش
يعني كل واحد راتبه كافي علي
احنا نريد حصتنا من هذا البيت وهذا طلب سليم هم
بس هو يستحي يفتح وياكم الموضوع
بيعو البيت ونطونا حصتنا نشتري ببها قطعة ارض
ونبنيها ونخلص من الاجار
عمي....ميخالف خل يجي سليم ونحجي بلموضوع
هاي الخطه دبرتها هي وامها حيه من بطن حيه
من رجع ابوي وراح يشوف اخوانه وحجوله عن هديل تخبل
بقا يقسم الهم هو مادازها على هذا الموضوع
جمانه السعيدي
رجع للبيت شايط
ابوي...انتي شلوا ترحين اطلبين من اخواني يبيعون البيت انتي ماتستحين شنو احنا كاعدين بلشارع
هديل.. حقنا مابيها شي عاجبك وضعنا ست نفرات وندفع نص الراتب ايجار
ابوي...اني منقص عليج شي طلبتي شي ومااخذتي
هديل...اريد الراتب يكفينا
هم كاعدين بلاش واحنا ندفع ايجار
ابوي مايكدر الها وكحه يجيبها على راسها توكع على رجليها
واكفه بعينه وكفه
من بعدها عمامي عرضو البيت للبيع
بعد كم شهر انباع البيت وابوي اشترا بحصته قطعه ارض بس بعيده مو داخل الولايه
توزيع جديد خارجيه يله فلوسه كفن
هنا اني كنت بلثالث متوسط وحرب هديل وياي ما تنتهي
تخلق مشاكل من جوا الكاع حتى تهججني
ساعه تكول انت مخلص الماي بلتانكي
ساعه تكول اشتريلنا قنينة غاز انت خلصت الغار
ساعه تكول انت منو يبات وياك هنا خاف اجيب بنات لو ولد وهي تعرف اني انام وحدي بلبيت
لو تقفل باب المطبخ خاف استعمل الطباخ
تريدني بس اترك البيت باي طريقه
شكد حاولت وياا ابوي يسجل قطعة الأرض باسمها
حتى تطمن اني كلشي مااحصل بلمستقبل
بس ابوي ماقبل
سجلها بااسمه
وقدم على سلفه على راتبه حتى يبني البيت
صار بيت خالتي ملاذي الأمن بمكان بيت جدي
اي وقت اروح ترحب بيه وتفتحلي كلبها قبل بيتها
نجحت من الثالث بس معدلي كلش قليل
٦٥ كل الي يعرفوني اقترحو عليه اروح معهد معلمين
قبل القبول من الثالث واي معدل يقبلون
حتلو المعدل قليل هم يقبلون بي
بوقتها كنت مجمع من شغلي ١٥٠ دينار يعتبر مبلغ كلش زين لان قطعة الأرض ٢٠٠ دينار
مختار....اكلج خاله اني مجمع مبلغ زين من شغلي واذا وكع بيد مرت ابوي تاخذه
واني مقبل على دراسه بلمعهد وبعد مااكدر اشتغل بهاي الفتره واحتاج مصرف ووين اخلي
خالتي...ليش ماتشتري بي قطعه ارض
مختار.. مو احتاج مصرف
خالتي.. بكيفك اذا تريد اني هم انطكيك مصرف
مختار.. تسلمين اني عندي وإنشاء الله ابوي مايقصر وياي
جمانه السعيدي
انطتني خالتي صندوق حديد جبير كالت هذا الك
خلي بي فلوسك واوراقك المهمه
وهذا القفل والمفتاح خليهن يمك
وهاي الك خانه من كنتور صالح جيب ملابسك اذا تربد خليهن بيها
واذا تريد تجي تكعد عدنا هله بيك
انطتني مفتاح الخانه ومفتاح الصندوك
كمت اذا ابوي يلحق اروح بيت خالتي على الاقل اكل اكل طيب ولكه ملابسي مغسوله وفراش نضيف
واذا ابوي ينزل اروح بيته
طبعا اني حجيت الابوي كلشي من باب الاطمئنان
مو اكثر
سبحان الله انسد باب باب بيت جدي
انفتح باب احسن منه باب بيت خالتي
ربك مايكطع بلبشر حاشا
بس ياترى شنو الثمن الي لازم ادفعه مقابل هاي المعامله