رواية منتصف العمر الفصل الثامن8بقلم جمانه السعيدي
مختار.....متت من التفكير
مجاي الكه اي حل اهم شي بهذا الموضوع مااكدر اخسر خالتي وصلاح
أربع سنوات وهمه متحمليني وشايلين مسؤليتي
ومدللني
شلون أدير وجهي واكول مع السلامه بتكم ما تفيدني
اصير قليل اصل اذا سوت هيج
ناكر جميل خالتي تعزني وطلبت مني هيج طلب
اكيد تعزني لان بتها حتلو عدها نقص هم تبقى بتها وتحبها
ولوما تعرف اني اكثر واحد يكدر يصونها ويحافظ عليها
مجان عرضت عليه هيج عرض
نزلت من كرامتها حتى تطلب هيج طلب
محتاج احجي وياا واحد جبير ويفتهم
محتاج احد يشاركني افكاري يساعدني اختار
مختار....بليل رحت على ابوي بس شافني حس اكو شي
ابوي....هااا خير اكو شي خالتك بيها شي
مختار....لا اكو موضوع مهم محتاج احجي وياك بي
ابوي...احجي اسمعك
مختار....مو هنا مااريد هديل تسمعني
ابوي...تعال نطلع برا
طلعنا بلشارع اكو كدامهم طابوك بلشارع كل واحد خله طابوكتين وكعد عليهن
ابوي....يله اسمعك
مختار.....خالتي عرضت عليه ازوج بتها احلام
ابوي....اي شنو المشكله دقيقه اني سمعت بتها
شويه على عقلها
مختار....اي واكبر مني سنتين
بس هي نضيفه ومرتبه وتعرف شغل البيت كله
خالتي تكول خاف اموت وتتبهذل اريد تزوجها
وكل تفاصيل الزواج عليه
كلشي مااخليك تخسر
خالتي صاحبت فضل عليه لمتني وحافظت عليه
بوكت كنت اتحسر على مكان انام بي
هي فتحلي بيتها اكل اشرب بدون ما تاخذ مني شي
رغم هي تعرف اني اشتغل وعندي فلوس
بلوكت الي هديل جانت تركض وراي حتى تاخذ،شغلي وتعبي
وماتقبل ابات بلبيت
خالتي هي كانت الملجى اليه
وصالح اكثر من أخ اليه اني كلش محتار
ماكدر ارفض وازعل خالتي مني
اذا رفضت لازم اترك بيتهم ووين اعيش راتبي ما يكفي ايجار ومعيشه
واذا على شغلة الزواج بعد عشر سنوات مراح اكدر ازوج
وضعي مراح يسمحلي ازوج وافتح بيت
جمانه السعيدي
ابوي....اقبل اصلا الك حسنات بهذا الزواج
انت كلت نضيفه وتعرف كلشي وخالتك موجوده بلبيت
تكدر بعدين تلم نفسك وتزوج غيرها اذا ما عجبك الوضع
ساعتها محد راح يلومك
ازوج هسه وعدي الوقت شويه منا لمن تلم نفسك وتكدر تفتح بيت ساعته اختار تزوج وحده ثانيه
اني لو بمكان خالتك كان فكرت نفسها
لو عندي بنيه هيج وضعها وانت موجود كدامي
راح اختارك زوج الها
انت كد المسؤليه
اتوكل على الله وازوج محد يعرف الخير وين
انت ما تعرف رب العالمين شنو ضاملك بعدين
جائز هاي الزواجه تكون احسن من غيرها
هاي اني ازوجت هديل انسانه عاقله وواعيه وما ناقصها
شي
بس من عاشرتها عرفت هي من داخلها شكد حاقده
وانانيه وخبيثه وتحب بس نفسها
لاتغرك المضاهر بلناس البشر ما تعرفه اله تعاشر
اتوكل على الله ووافق
ربك يقدم كلشي بي خير جمانه السعيدي
مختار.....يمته تجي تخطبلي
ابوي....يمته ماتريد حتلو هسه ماعندي مشكله
انت أعز واحد عندي لا تتوقع لان عفتك تعيش بعيد عني مااريدك
بس الضروف خلتني اقبل بهيج وضع حتى احافظ عليك
وعلى اخوانك الدنيا خلتك بكفه واخوانك بلكفه الثانيه
حتى احافظ عليكم كان لازم اتمسك بااخوانك لان هم
عددهم اكثر اني واثق انت تكدر تتحمل البعد
وتعيش وما تفشلني
صعب اني وياك نعيش سوا وخاصه بوجود هديل
اني افتخر بيك
انت عشت بكل مكان شويه وما حصلت بيت يلمك
مع ذالك طلعت شاطر خلصت مدرستك وتعينت
وحافظت على نفسك
انت رفعت راس
شوف اخوانك يخلصون السنه سنتين امهم جانت عايشه بيت اهلها وما منتبها الهم
مستواهم الدراسي كلش موزين وواحدهم السانه شطوله
انت ربيت نفسك بنفسك وطلعت احسن منهم
انت خوش ولد وكد المسؤليه
اقبل بهاي الزواجه رب العالمين اختارك حتى تساعد هاي المسكينه
مختار....حضنت ابوي وبسته كلامه حيل ريحني
كلامه منطقي خالتي اختارتني الهاي المهمه ومستحيل اخذلها جمانه السعيدي
حددنا موعد الخطبه بعد يومين
رجعت للبيت لكيت الكل نايم
دخلت غسلت خالتي من غرفتها
خالتي....هااا يمه مختار اجيت
مختار....اي اجيت
خالتي...اتاخرت قلقت عليك
مختار...جنت يم ابوي يسلم عليج يكول الخطبه بعد يومين
سكتت شويه بعدين فتحت الباب وطلعت من الغرفه
تمشي وتسحب بلفوطه على راسها
خالتي... يااا خطبه
مختار....خطبتي اني واحلام
خالتي....تحجي صدك لو تشاقا
مختار...ليش طبعا صدك
خالتي....ابوك يجي يخطب مني احلام
مختار....اي احلام ما تستاهل شني
خالتي....تعال ابوسك انت رفعت راس عرفتك مراح
تردني فشلانه
مختار....اني اتشرف اناسبكم خالتي
حضنتني خالتي وبقت تبوس بيه
دموعها نزلن منا ومنا
مختار...ليش تبجين
خالتي....ما مصدكه من يوم صارت احلام لليوم واني شايله همه شلون هم يهد الجبل
انت هسه اجيت وزحت عني هذا الهم
الله يبارك بيك ويحفظك ويسترك دنيا وآخره مثل ما راح تستر بتي
مختار....بعد باجر الخطبه تردين مشيه لو ابوي وعمامي كافي
خالتي...بس ابوك كافي صدك اهل اصل انتم
دخلنا كل واحد بغرفته ينام هي احلام ينامن بغرفه
واني وصالح بلغرفه الثانيه
كل واحد دخل غرفته حتى ينام بس اني متاكد خالتي ما نامت من الفرح
واني هم ما نمت خايف من الجاي
مااعرف إلى متى راح ابقى خايف بحياتي وما مستقر
ثاني يوم اني طلعت للدوام وخالتي بدت ترتب بلبيت
وتعدل علمود الخطبه
اسمعها تسولف على صالح وتكله جيب فلان شي وفلان شي ومخبوصه
يمكن اني بس على فرحت خالتي هاي ادخل الجنه
مسكينه ماشافت شي من حياتها
يوم الخطبه رحت جبت ابوي وعمامي ثنيينهم واجينا
دخلنا للبيت خالتي لبست عبايته واجت كعدت يمنا هي وصالح
ابوي....شلونج ام صالح انشاء الله زينه
ام صالح...نعمه خير من الله عساكم سالمين الله يكبر قدركم مثل ماكبرتو قدرنا واجيتو زرتونا
ابوي....احنا أهل انشاء الله
خالتي....الف رحمه على روح ام مختار
ابوي...انتي تعرفين احنا على شنو جايين
جايين نطلب ايد احلام المختار
خالتي....مختار وليدي اتشرف بيكم
ابوي...عدكم طلبات تفضلي نسمعج
خالتي...ماعندي اي طلبات مختار ابني وعرسه عليه
ونعمله علبكم اجيتو وشرفتونا بهاي الزياره
ابوي....والنعم من اصلج اي طلب احنا حاضرين
بس انتي اامري بيج خير ودللي علينا
خالتي...مايأمر عليكم ضالم والنعم منكم ومن اصلكم
جمانه السعيدي
مختار...خالتي رفضت تخلي اي طلبات اوشروط
جبنا الشيخ وعقدنا بنفس الساعه
لو تشوفون فرحت خالتي ابد ما تنوصف يمكن لو خاطبه الصالح ما تفرح هيج فرحه
اما احلام تسمع بلعرس وفرحانه بس بدون فهم للتفاصيل
كل شويه وكالت اني عروسه اني عروسه حلوه
البس بدله اني عروسه البس بدله حلوه
بدت خالتي اجهز للعرس بوقتها كانت الاخبار موزينه
لان العراق حشد على الكويت
قبل لا ندخل الكويت صدام يهدد ودول الخليج تهدد
بس الصراحه ما متوقعين صدام يدخل الكويت بوقتها
بدت خالتي اجهز للعرس نقلت الغراض من غرفتها خلتهن بغرفة صالح
جابت صبغ للغرفه
مختار...اني اصبغ الغرفه لا اطلعين صباغ
خالتي...مااريدك تتعب
مختار...ماكو تعب
صبغت الغرفه خالتي اشترت غرفة نوم جديده
جابوها ونصبوها اشترت برده وفرشة جربايه ومندر
فوك الكنتور ترسته منادر ومخاد وفراشات
الاسبوع الي بعده اخذت احلام حفتلها وجها قبل ماكو صبغ وميش هي حفافه ومكياج
حددنا يوم العرس خالتي جابت طليان ثنيبن
ماعزمنا احد بس ابوي وعمامي ونسوانهم وخوالي اجو
وحدهم مااجا وياهم احد
العرس كان عائلي الكل كان عادي فرحان بلعرس
بس هديل كانت كلما تشوفني تضحك ضحكت الشماته
رغم هي السبب بهاي الزواجه
لو بس معاملتني زين جان بقبت ببت ابوي ومحد من عليه
بس هي الي شدت وياي وخلتني اتحمل منية العالم
بس وين تروح من رب العالمين
من شافتني بلزفه ضحكت وكالت تعيش وتأخذ غيرها
عروستك عاقله تستاهل
عود قصدها عروستك مخبله وانت تستاهل تاخذ وحده هيج ماتعرف احلام احسن منها الف مره
على الاقل بعمرها مااذت احد مو مثلها حية تمشي واسم بلعالم
زفوني على احلام دخلت لكيته لابسه بدله بيضه
شعرها مفتوح نازل على الجربايه
ريحته طيبه
مختار....شلونج احلام
احلام....زينه
مختار...اساعدج تنزعين البدله
احلام....استحي امي تجي تساعدني
مختار...ابدل واطلع وتجي خالتي تساعدج
احلام...اي بدل اني مااباوع عليك
مختار....باوعت عليها شكد بريئه طالعه حلوه بالثوب الابيض
بدلت وطلعت شافتني خالتي اجت عليه
خالتي...... مبروك
مختار...الله يبارك بيج ادخلي ساعدي احلام
خالتي...اي
دخلت خالتي واني طلعت سلمت على ابوي وعمامي وودعتهم
كل المعازيم طلعو البيت فرغ علينا
اجيت لكيت احلام مبدله لابسه سيت نوم ابيض وخالتي كاعده تحجي وياها
بس دخلت للغرفه خالتي طلعت
خالتي...هسه اجيبلكم احلى عشى
مختار...شكرا خالتي