عندي صاحبتي شليقه وجنها اولاد ونستها كلها شفتي فلان لابس كيف شفتي الولد دا وجيه كيف طولو لحيتو عضلاتو كلاما كلو كده انا كنت بحتار فيها وانا ما قاعده انجذب شديد للاولاد عندي الولد ياهو ولد المهم البت دي في مراهقتا مبدعه عديل لمن شاذه وملفته وهي صحبتي شديد صاحبتي من نحنا اطفال اخوي قال لي شوفي انا لو لقيتك مباريه البت الاسمها هناء دي بقطع رقبتك واخوي صعب شديد النوع اليدو والقبر وانا صحبتي دي قاعده جنبي ف الفصل وانا وهي ما بفرقنا شي لكن انا نهاي م زيها م بشتغل بي كلامها عن الاولاد ولا بشوف الهي شايفاهو لدرجه انو شكيت في نفسي ياربي انا مالي الطبيعي انجذب للجنس الاخر بس م عارفه مالي المهم مره من المرات كان في الحله عرس كاااارب وجايبين فيهو فنانين من الاذاعه الحله دي قايمه وقاعده اتجهزو البنات ديل فايرات اليوم كلو شي ف البوتيك وشي ف الكوفير وواحدات اخططن البسن شنو انا عندي فستان عبدالواحد ولونو احمر علي العليهو وشين بس م عندي غيرو اي عرس انا شاكاهو وماشه بيهو وما بحب اشحد لي بت طرحه ولا شي بس مقتنعه بي فستاني دا وصحبتي هناء كل مره تتنمر. علي اليوم داك من بالنهار قالت لي اوعا من الفستان الاحمر العرس دا كارب وفيهو اولاد من بره خلينا نصطاد لينا ولد نافع احسن من اولاد حلتنا ديل قلت ليها والله ياهو فستاني الاحمر وولد واحد بلبس ليهو ماف البسي انتي وامشي من هسي فوري مع البنات الفايرات ديل البسي ف الكوفير وفي العرس كانك م بتعرفيني انا يختي ماشه اشوف ندي القلعه واحمد الصادق وكمان عشان اوريك من جنب ندي القلعه ما زاحه قالت لي اوعك ي نوسه م تفضحينا ديل ناس اذاعه وبصوروك جنبها قلت ليها هوي انا لا ساله في اذاعه لا غيرو عاجبني غناها بس لكن ماعندي ليهم حاجه قالت لي عندي فكره رايك شنو تمشي السوق معاي في ولد بشتري منو ومعجب لي مستعد اعمل اي شي عشاني نمش نحنكو بدينا فساتين مجان قعدت اضحك قلت ليها دا منو البدي مجان انت يختي فاكه ساي تونسي في الاولاد وتقلي في ادبك عشان فستان والله يختي انتي صحبتي واي شي لكن ادخل النار بفستان لا والله ي بت دي مرحله نحنا بنعيشا زي ما نحنا م ضروري نصل لي اني ابيع روحي وانتي قايلاني انا م بفهم فاهمه اي شي امي قالت لي الولد كان اداك لبانه ساي معناتا داير شي وانا الله بيني وبين الحاجات دي قالت لي عليك الله ما تحفرينا كل مره امي قالت لي امي قالت لي زي الشافعه انا هسي امي دي في خشمي م قاعده اجيب سيرتها انتي كان مشينا حصه واتاخرنا امي بتكتلني وشابكاني بيها مدام هي بتاعت قيم ومبادي كده ما تشوف شغلتها تشتري ليك وتتمتعي زي باقي البنات شنو من حفرو البحر عندك فستان واحد هسي اها لو بقا ضيق بتقبلي علي وين قلت ليها لو ضاق ابقا دا شي تاني اكيد ح يشترو لي لكن انا امش اقول ليهم اشترو لي فستان عشان العرس لا والله مالي الدرجه دي قالت لي انتي حره انا ماشه السوق ولو بعدين شفتيني قاشره ما تغيري قلت ليها يختي بي عافيتك والله دا بعدين لو عاينت ليك انا عيني لي احمد الصادق وندي القلعه ومحمود عبدالعزيز البوديني اعاين ليك شنو ي بت العروس زاتا م اظني اعاين ليها واغير من فستانك الماشه تبيعو نفسك عشانو لا يختي ما تتوقعيني اغير منك ومشيت منها لقيت اخوي راقد في الراكوبه وامي تعمل ليهو في قوه وخاتي سفتو وخالف كراعو وكلامو كل نهي واومر من شافني ناداني قال لي قدر الله القاك ف الحفله بعدين طبعا انا م بقدر انطق حرف قبل علي امي قال ليها البت دي لو طلعت م تنتظروني انتو الاتنين امي زاتا بتخاف منو انا اتزكرت الناس والبنات اجهزن للعرس وفنانين الاذاعه اخوي يحرمني بكيت قدرتي عندي اختي شاطره ودي الله هاديها اليوم كلو تقرا لمن شافتني ابكي قعدت تضحك قالت لي هسي انتي م بتخجلي تبكي عشان حفله مفترض تفرحي انو منعوك ليها مالك شايله ليك ذنوب قلت ليها اسكتي مني واقري قرايتك ياخ ما تتكلمي معاي واليوم كلو شايلاهو بكا وخلاص الزمن مشا وعيوني ديل اتورمن من البكا والحفله دورت امي ختت سريرها بره ورقدت جيت قلت ليها يمه ماشه الحفله قالت لي الا الليله دايره ليك دقه عند اخوك مالك ي بتي دايره تفضحيني استروني الله يستركم وخليك زي اختك دي هدي صلت العشاء قبيل ورقدت نامت تعالي ارقدي جنبي وحفله شنو العايزاها قلت ليها يمه جايبين ندي القلعه قالت لي بتشوفيها ف التلفزيون ف العيد ضروري تشوفيها الليله زهجت من امي وبطني طمت بقيت افكر وابكي انا لازم امش الحفله باي فهم البحصل احصل امي مشت قفلت باب الحوش وبقت تشخر واختي غرقت غرق ف النوم واخوي اظنو فات الحفله وصوت الحفله شاقي الحله شق والساعه الندي القلعه تقول عزاز علينا شالو النوم عينينا وانا انجخ بالبكا وقاعده متربعه ف نص السرير وعقبتا ليك بي اغنيه اسلم لي عوض الليله وانا ابكي وعيوني حمر وخاته فستاني الاحمر جنبي سمعت صوت بهمس لي بالحيطه عرفتا دي هناء فتحت الباب لقيت البت كلها ترقش لابسه ليها فستان زي البنشوفو في المسلسلات المصريه وضيق وهي خلقه الله حلبيه وسمحه وشعرها دا في نص ضهرها فاكاهو ليك اظنها طلعت احلي علي العروس قلت ليها المخلوعه بعتي نفسك عشان العواليق دا قالت لي عواليق دي الغيره يختي وبعدين انتي مالك ومالي ابيع نفسي ابيع كليتي ما شغلتك وماتبقي فيها حكيمه بكره بتبقي زيي قلت ليها احلمي اي ما عشان انتي صحبتي ابقا زيك انتي مخلوعه وغاراك الدنيا استمتعي بعدين الله دا بعلقك من شعرك الماعطانا بيهو دا قالت لي انه غفور رحيم قلت ليها الدين عندك لكن غايتو الله يهديك قالت لي مالك م جيتي الحله كلها هناك واي م شفتي احمد الصادق ف الحقيقه سمح كيف طبعا غمزت ليهو والعجب محمود لمن غناء الناس الوين وين جو والحفله دي مافيها فرقه تختي فيها كراعك والحله كلها هناك كان انتو قلت ليها اخوي احماني قالت لي اخوك هداك سكران لي روحو عايز يأدبك انتي قلت ليها ياخ خليني قالت لي خليتك يختي وفاتت انا ابكي والشيطان بدا يوسوس لي وخاته ليك فستاني الاحمر جنبي وابكي وطبعا انا م عندي في حاجات البنات مكياج وفير وبدره لا لا بلبس بس وبغسل وشي وبمسحو بي زيت من الغبشه واطلع وعندي ثقه كده مفرطه ولا شغاله بي زول المهم الشيطان بدا يوسوس لي خلاص انا لازم امش واتزكر في كلام هناء انو اخوي زاتو سكران اجي يحكمني انا وبفكر وبفكر والحفله رابه والكواريك والغبار في السماء وانا اظني كان م مشيت بنتحر وندي القلعه شغاله بي ضمير تلعلع والساعه الاسمع ليك هي تقول اتفقنا واتخطبنا اتحننا واظنها بتمد المايك لبنوت الحله وصوتن في السماء والاغنيه رابه وهي شغاله بس اتفقنا اتخطبنا واتحننا وعقدنا والبنات اقولن ليها لا لا وانا الساعه الشطان ركبني وقال لي قومي ي عويره الحفله فاتتك وقمتا دخلت في فستاني الاحمر داك لمن قالت ماعلينا وما علينا مهما اقولو الناس يقولو انا دي جووووه في الداره جنب ندي القلعه وطلعت كيف والشارع مشيتو كيف والله م عارفه التقول في شيطان شالني وداني 😅 اصلو م مشيت براي وطبعا انا ندي القلعه فنانتي المفضله وانا بفستاني الاحمر داك ما اقيف الا جنبها وهي تغني وانا اشيل معاها واظنها مفتكراني مجنونه بشكلي داك وانا مبسوطه واشيل واردد معاها وهي متكيفه لقتني حافظه اغانيها كلها ونسيت ليك اخوي ونسيت ابوي ونسيت انا زاتي منو وهايجه ليك في نص الداره التقول العرس عرس ابوي والناس دي ميته بالضحك وانا الغبيه زايده زياده وشيطاني قدر م ارقص اقول لي لا ارقصي زياده لا لا م رقصتي سمح وانا اكسر ليك في رقبتي اليوم داك جاني وجع مفاصل ومتكيفه ليك من ندي القلعه وهي زاتا متكيفه مني وشبعانه ضحك غايتو فضحتا ناس حلتنا وفجاه بس اجيني ليك سوط في نص ضهري واتلفت وراي القا اخوي وعيونو شرار و اخوي بي سكرتو ديك لمه في ناس الحله الفي الداره قشطهم ليك بي ندي القلعه اداها سوط والحفله جاطت واخوي العساكر الجابوهم لي الحفله م قدرو يمسكو قدر م يمسكو هو زي التور الهايج يجي طاير فيهم وندي القلعه اظنها طوالي زعلت ودورت عربيتا فاتت والعازفين لقطو حاجاتهم وانا اخوي واقع فيني ضرب والبحجزو كلو بديهو سوط ومسكني ليك من شعري وساقني ليك دفر الباب بكل قوتو وامي زاتا دايره يمسكا يجلدها بس اتحكم في روحو اليوم داك لو م عمري طويل وقويه كان موتا في يدو وكل م يتزكر العملتو يقوم يديني قشطه بسوط العنج لدرجه انو بقيت ما بحس نومتا ودموعي في عيني ……..