رواية ظلام الرعد الفصل الثالث عشر13والرابع عشر14بقلم فاطمة عيد

في الصباح الباكر ظل متجمداً بمكانه لايريد التحرك كي لا يقلق منامها ...شارداً في مستقبله معاها هل سيستطيع والده.

 أن يفرق بينهم ..هل سيكون له تأثيره الخاص عليها .....هل سيبقي هو ثابتاً ام سيستسلم لرغبه والده تنهد بضيق وخانته

 دموعه لتسقط قطره منها علي وجهها مسح دموعه ولكنها استيقظت في ذلك الوقت ..اطلعت الي عيناه لتقول:-

عينك مالها....انت كنت بتعيط

رعد:-

اي الرخامه اللي علي الصبح دي بذمتك ده سؤال

كيان بابتسامة:-

لا

رعد:-

طب يلا اجهزي عشان نسافر ...انا مشيت الالواح اللي بره

كيان:-

مشيت الحراسه

رعد:-

فيها اي اديتهم اجازه ..مش عايز اشوف وش حد غيرك

كيان:-

خدني بوكسين....تعالي يلا..بقا دي طريقه كلام رومانسي

رعد:-

الاختلاف حلو ولا اي رايك

كيان:-

اي حاجه حلوه منك ياباشا

رعد:-

واما اي حاجه حلوه بتتكلمي ليه ماتخلنيش اديلك قفا معتبر

كيان:-

علي اي اجهز احسن

---------------

في الشركه

دلف أدهم بهيبته تفاجئ الجميع من عدم وجود رعد لاحظ في أعينهم الفضول نحو اختفائه لكنه تجاهل الأمر اتجه الي مكتبه

 وطلب السكرتيره لتدلف اليه (نرمين) السكرتيره الجديده وهي تردي فستانا رمادي قصير للغايه وتضع كميه كبيره من مساحيق التجميل ليقول هو:-

يانهارك اسود انتي نزلتي من بيتكم كده ازاي

نرمين:-

في اي بس ياادهم باشا

أدهم بضيق:-

استغفرالله العظيم يارب ...ده منظر تيجي بيه شغلك

نرمين:-

دي طريقه لبسي

أدهم:-

كانت مختلفه فالانترڤيو وبعدين انا مش فاهم دخلتي كده وسط الموظفين ازاي ده انتي شبه عريانه ياانسه

اقتربت من كرسيه وهي تقول برقه مصتنعه:-

هدي نفسك ياباشا الفستان لو مضايقك نغيره

أدهم وهو ينظر في عيناها:-

انتي جريئه اوي ..لا واي عينك دي يدب فيها الف رصاصه مش واحده بس

اقتربت منه اكثر من اللازم لتدلف الي مكتبه في ذلك الوقت ورد لتنصدم من المنظر وتقول:-

أدهم

أدهم بارتباك:-

اوعا.....طبعا لو حلفتلك اني كنت بقولها مينفعش اللبس ده فالشغل مش هتصدقي

نرمين:-

طب عن اذنكم بقا دي أمور عائليه

غادرت بينما الأخري رمقته بنظراتها الغاضبه ليقول هو بحرج:-

عارف اني غلطت أما سمحتلها تقرب كده بس الشيطان شاطر بقا

ورد:-

كنت جايه عشان نخرج شويه لكن واضح انك مش فاضي عن اذنك

قالت جملتها وغادرت دون تلقي اي اجابه منه ليتنهد الآخر بضيق ويقول:-

غبي

مرت ساعه تقريبا وعادت ورد الي القصر وعلامات الضيق واضحه علي وجهها لتقول داليا:-

راجعه بدري يعني

ورد:-

ابدا لقيت أدهم مشغول ف عديت شويه علي چنا ....هطلع انام شويه

غادرت بينما نظر إليها سيد بفخر فهو توقع أن في مشكله ما بينها وبين أدهم إخفائها لغضبها في سنها كان دليل علي انها ستكون مسؤوله وغير متهوره

-------

جلست بجواره في سيارته لتجده يغني بصوت منخفض نسبياً لتقول كيان:-

واو انت بتعرف تغني

رعد:-

كلابي كده

كيان:-

علي صوتك بليز

ابتسم وهو يرفع صوته قليلا كان يغني اغنيه Hard For Me

ظلت تتأمله بحب وهي تستمتع بصوته فهو يغنيها بشكل رائع حقا ليتنهي هو وتقول:-

مكنتش اعرف انك بتغني

رعد:-

بقالي كتير جدا مبغنيش

كيان:-

طب غني عربي

رعد:-

لا مبعرفش ..انا اجنبي وخاطفني اساسا

كيان:-

وسامتك مقويه قلبك

.

رعد بغرور:-

دي حقيقه

-----------

ارتدت بدله نسائيه تناسب عمرها باللون الجنزاري وكنزه باللون الاسود وحذاء عالي باللون الاسود عقدت خصلاتها بطريقه انيقه للغايه وأخذت حقيبتها لتقول للجد:-

هروح النادي محتاجه اغير جو شويه

سيد:-

ماشي خدي وقتك ياداليا

ابتسمت له بامتنان واتجهت الي سيارتها وانطلقت بسرعه مناسبه.....بعد مرور عده دقائق وصلت إلي النادي لتجلس علي أحدي الطاولات بمفردها منتظره رفاقها وهم من ارقي سيدات المجتمع لتجد الذي يجلس أمامها ويقول :-

وحشتيني

داليا:-

متشكره

فاروق:-

انتي شايفه ان دي الاجابه المناسبه

داليا:-

تفتكر انت اي الاجابه المناسبه

كاد أن يجيب لكنها قاطعته ليختفي شبح الابتسامه من على وجهه وهي تقول:-

فاروق الكلام ده مبقاش مسموحلك انك تنطقه وحشتك اي ....انت سيبتني انا وولادك مأخدتش الا مازن ومن كتر القاعده معاك مبقاش نافع ف حاجه .... بعد السنين دي كلها جاي تقولي وحشتك طب ليه اوحشك وانت كنت شايف اني مهمله وبارده ومعنديش مشاعر لمجرد اني كنت بربي اولادك وعايزاهم يبقو احسن ناس فالدنيا ...كان المفروض اعمل اي عشان اثبتلك اني مهتمه اتخانق معاك ..اتحايل عليك تقرب مني ...انت كنت بعيد ورغم بعدك كان بمزاجك كنت دايما تتهمني انا بالتقصير في حقك ... لو فاكر الفضل اللي بينا ابعد وسيب ابنك يبدأ حياته حياته اللي لسه معاشهاش

فاروق:-

وكان اي اللي ناقصه عشان يبقي مش عايش حياته

داليا:-

الامان...كان ناقصه أنه يطمن ..كان ناقصه أنه يحس أن في حد هياخده لبر الامان ..هو كان تايه وهي قدرت تسيطر عليه وبتحاول تخرجه من الضلمه اللي بقا فيها ....كان ناقصه أن يعرف زي ما في الحلو في الوحش

فاروق:-

رعد عملي تفكيره مش كده انا واثق

داليا:-

انت ربيته علي أنه ألة ...الشغل وبس هو اللي مهم وبعديه ممكن تعدل مزاجك بسهره حلوه كل شئ مباح ليك يارعد متنساش انت ابن مين...مش ده كان كلامك لي ...بدل ما تجوزه تشجعه علي الغلط ...واما ساب الغلط واتجوز عايز تطلقهم ..انت اناني اوي يافاروق...عايز تبقي راجع ناوي علي ضمار ابني وانا اخدك بالحضن انت بجح اوي بصحيح

💖💖💖💖

الفصل الرابع عشر

في الصباح

-جلست امام المسبح وهي شارده وكانت ترتدي فستان قصير باللون الاصفر تاركه لشعرها العنان ..جاء هو من خلفها ليقول:-

اي يابنتي مقطعه كل الورد ده ليه

أفاقت من شرودها وهي تقول:-

ها ...اسفه سرحت شويه

رعد:-

وسرحانه ف اي بقا

كيان:-

اي رد فعل عمو علي اللي حصل هعملك مشاكل مع باباك بسبب جوازنا

رعد:-

وهو انتي كنتي تعرفي المشاكل دي مثلا...ده قدر

-صمت لدقائق ليقول بعدها بتردد:-

لو مكنتش اتجوزتك كنتي هتوافقي

كيان:-

لا مكنتش هوافق ...بس بتسأل ليه

رعد بتفكير:-

لا ابدا

-----------------

في القصر

كانت جالسه في غرفتها وهي تستشيط منه غضباً لم يعود الي القصر اذاً اي هو الآن قطعت شرودها چنا وهي تدلف الي الغرفه وتقول:-

معلش انا جايه انتخ عندك يومين

ورد :-

بذمتك دي دخله ....حصل اي شكلك مايطمنش

چنا:-

ابويا وامي متخانقين

ورد:-

وهما من امتي بيتصالحو

چنا:-

المره دي مختلفه.....بابا اتجوز يا ورد

تساقطت دموعها رغماً عنها لتقول الأخري:-

اهدي بس ...امتي ده حصل

چنا:-

كان متجوزها من بدري واما اتخانق معاها شرطت أنها عشان ترجعله لازم نعرف وتعيش معانا تحت سقف واحد......ماما أما عرفت الكلام ده سابت البيت ومشيت ..كنت همشي معاها لكن هو رفض وحلف عليا مروحش معاها ...بعدها بشويه جيت هنا

قالت جملتها الاخيره بقله حيله لترتب الأخري علي كتفها وهي تقول:-

اهدي بس كل حاجه هتعدي

-------------

في منزل جده چنا

فوزيه (الجده):-

يابنتي اعقلي بقا

مشيره (والدت چنا):-

اعقل؟.....بقولك اتجوز عليا انا لا يمكن افضل علي ذمته

فوزيه:-

يابنتي انا حذرتك كتير جوزك كان علي طول بيشتكي منك

مشيره:-

اديكي قولتي كل شويه شكاوي بياكل وينكر ...ده انا مخليه البيت فله لاطلبت خدم ولا حاجه رغم أن مستوانا يسمح بس كنت بخاف علي شقاه مربيه البنت احسن تربيه ..يرجع من الشغل بيلاقي حمامه واكله جاهزين وزي الفل في اي تاني

ابتسمت الام بسخريه لتقول:-

براڤو عليكي كل ده حلو ...بس انتي دورك مش ممثل في وجبه سخنه طعمها حلو من ايدك ولا قميص مكوي ولا ترتيب بيت ده دور جانبي ...فين دورك الأساسي يابنتي يابنتي ضوافرك دي بقت ولا ضوافر الرجاله وشعرك اللي بقا سلك مواعين ووشك اللي كله تجاعيد ...من الاخر انتي اهتميتي بتفاصيل جانبيه ونسيتي نفسك

مشيره:-

وهو يعني انا صغيره للكلام ده ...انتي عارفه الحاجات دي عشان تتعمل تكلفتها كام

فوزيه:-

الاهتمام بالنفس عمره ما كان من شروطه الصرف العالي خير الامور الوسط لكن انتي مفيش خالص...وانتي كل ما حد يكلمك تقولي انا كبرت فالسن مبقتش صغيره ...بتكبري نفسك في نظره ليه ..السن مجرد رقم..اما انتي مكبره سنك انا اعمل اي اروح أدفن نفسي

مشيره:-

انتي جايه ف صفه

فوزيه:-

انا بقول كلمه حق يابنتي لكل فعل رد فعل وجوزك اللي عمله كان رد فعل علي اهمالك لنفسك ومشاعرك اللي جفت من كتر الركنه

---------------

ارتدي ملابسه وحسم أمره لتقول الأخري بدلال :-

علي فين يانبيل

نبيل بضيق:-

يمني اتمسي وادخلي جوه نامي ولا اعملي اي حاجه

قال كلماته وخرج من المنزل متجه إليها

-بعد مرور دقائق وصل إلي بيت الجده ..طرق الباب لتفتح له فوزيه وهي ترحب به وانسحبت بحجه عمل مشروب لترك لهم مجال للتحدث لتقول :-

جاي ليه

نبيل:-

مشيره انا عمري ما فكرت فالشكل والدليل يمني متوسطه الجمال مش جميله اوي.....مشيره انا كنت تايه كل يوم بصحي الصبح بلاقيكي حد تاني كل همه طبيخ وكنس .. كنت ببقي محتاج حد يسمعني مكنتش بلاقيكي...انتي عارفه كويس اوي انك كنتي منعاني من جميع حقوقي وكنت ساكت وصابر بس صبري نفذ وانا راجل مش عايز امشي فالحرام عشان كده اتجوزت

مشيره:-

حلو ليه بقا متواجهنيش

نبيل:-

عرضت عليكي اد اي اجيب واحده تساعدك في شغل البيت....كام مره كنت اقولك مخنوق واجي احكي ملاقيش غير لامبالاه كأني بكلم نفسي....انا كنت عايش لوحدي الاسم بس متجوز الفعل مفيش...بقيت بدور عليكي وانتي جنبي..فالاخر عامله مصدومه ...فالاخر هتبقي ف نظرهم الضحيه ميعرفوش أن الحيطان مداريه بلاوي وربنا وحده يعلم مين المذنب فينا اللي بعد مناهده ومحاولات يأس وقرر يدور علي راحته مع حد تاني من غير غضب ربنا ولا واحده أهملت جوزها وحقوقه

-جاءت فوزيه في هذا الوقت لتقول:-

حلال ربنا محدش يقدر يحرمه يابني خصوصاً انك معملتش كده من فراغ

مشيره:-

كنتي تقبلي بابا يعمل معاكي كده

فوزيه:-

بصي يابنتي انا كنت زوجه كويسه وكنت بعمل كل حقوقي وبرضو باخد كل واجباتي كان في احترام متبادل عشان كده هو لا عمره فكره ولا عمري كنت هسمحله لانه واخد حقوقه

----------

في القصر

ورد:-

يابنتي خلاص بقا اهدي

چنا:-

خلاص ياورد مفيش حاجه....انتي كمان شكلك مضايق

ورد:-

قلقانه علي أدهم اوي لسه مرجعش

في الاسفل...

داليا:-

البت قطعت قلبي من كتر العياط الله يخربيت ابوها ده

سيد:-

متحكميش علي حد من غير ما تعرفي سببه

داليا:-

معظمهم بياعين من غير سبب

سيد:-

اديكي قولتي معظمهم

-------------

كان جالساً بجانبها وهو يحاوطها بذراعه ويشاهدون فيلم رومانسي ليرن هاتفه ..قام بالرد وهو يقول:-

الو

فاروق:-

ايوه ياحيله ابوك ...هربان ليه زي النسوان ما تجيبها وتيجي

اشعل شرار غضبه بكلماته ليقول الاخر بهدوء مصتنع:-

من امتي بتكلمني كده

فاروق:-

انا اتكلم زي مانا عايز كفايه اني مجوزتش ورد علي مزاجي .....رعد انت مقربتش منها طلقها وانا هرجعها المانيا وكل واحد يرجع لحياته القديمه

رعد:-

مقربتش من مين بالظبط انت واخد بالك أنها مراتي ولا مش متخيل ...كيان مراتي ومش هطلقها سواء قربتلها أو لا ميخصكش لا انت ولا اي حد

فاروق:-

يخصني عشان اعرف في عده ولا لا

رعد:-

بحب طموحاتك ....انا مش هطلق وهي مش عايزه تطلق وجدي كمان الجوازه جايه علي مزاجه اوي ف ياريت تبعد وتسيبنا ف حالنا بقا

فاروق بغضب:-

تاخد كام وتخلص المسرحيه دي

رعد:-

انت مش متابع بقا .....انا عندي شركتي الخاصه مخليها تابعه لشركه الجبالي لكن هي ملكي وعلي فكره مكانتها اعلي فالسوق وانا خليتها تابعه عشان لو كانت منافسه اسم الجبالي كان زمانه فالارض...عارف ده معناه اي..املاكي أضعاف املاكك ولو العكس انا مش هبيع عرضي بالفلوس

قال كلماته واغلق الخط قبل أن يتلقي اجابه من والده

ليقول الاخر بتوعد:-

ماشي يارعد اما نشوف مين هيكسب فالاخر

اعتلت من جلستها وهي تقول:-

مكنش ينفع تقفل السكه ف وش باباك

رعد:-

كيان مش وقتك خالص انا مش طايق نفسي اوعي كده

قال كلماته واتجه الي غرفته لتتفاجئ هي من حدته معها ..قررت عدم الاقتراب منه في ذلك الوقت