رواية ظلام الرعد الفصل التاسع9والعاشر10 بقلم فاطمة عيد

جلسو معاً في مكانا هادئ ليقول وهي تنظر في عينه:-

كأني غبت سنه مكانوش كام ساعه

كيان:-

كنت خايفه تفضل كده كتير

رعد:-

احم احم ...طب لازم نتكلم ف شويه حاجات مهمه

كيان:-

اتكلم

رعد:-

بصي انا قررت ابدأ من جديد بس لازم تكوني عارفه أن دي حاجه مش سهله وانتي الدافع الوحيد اللي هيخليني ابدأ

 عشان كده لو مش هتكملي معايا أو مش هتستحمليني لاي سبب بلاش من دلوقتي

كيان :-

هستحملك وهقف جنبك لحد ما تنسي كل اللي فات وبرضو هفضل جنبك

رعد:-

طب وفرق السن اللي بينا

كيان:-

في ناس شايفه أن 9 سنين فرق كبير وفي ناس تانيه شايفه أن الفرق مناسب ..... طظ فالاتنين انا بحبك

ابتسم علي جملتها وقال:-

قسوتي مش هتتغير بسهوله

كيان:-

ليه

رعد:-

نسيت ازاي ابقي شخص عادي ...بس ممكن انتي تفكيريني عادي

كيان:-

طب واللي اسمها مي انا عارفه انك علي علاقه بيها

رعد:-

رفدتها ... بس افتكري اني قولتلك قبل كده ماتتكلميش كده

كيان:-

تاني يارعد

رعد:-

قولتلك أن طبعي هيكون صعب برضو وصعب تغييري والله انا مشفق عليكي

كيان:-

عارف نفسي احضنك اوي

رعد:-

احضن ياحبيبي ميهمكش

كيان بخجل:-

لا اما نتجوز

رعد:-

الله يخربيتك انتي رقيقه ولا وحش ف نفسك ...جريئه ولا خجوله ...قويه ولا ضعيفه ما تستقري شويه

كيان بابتسامه:-

انا كل دول

رعد:-

ده اللي شدني ليكي انك بتعرفي امتي تكوني عاديه وامتي تطلعي اختلافك ....بس سؤال انتي فعلا كنتي هتروحي الحفله كده

كيان:-

بص انا هجاوبك بصراحه ..انا نفسي معرفش كنت هقدر اروح كده ولا لا انا اختارت الفستان ده عشان اغيظك واستفزك

 وأظهر جمالي واوريك اني مش غفير زي ما كنت بتقول زمان

رعد:-

يااااه علي السواد ...ده انا قولت كده من قبل ما اتجوز

كيان:-

بس انا فاكره

رعد:-

ياكيان انا عمري ما حسيت انك بتحبيني

قاطعته:-

عشان مابتحسش سهله اهي

رعد :-

طب امشي من هنا

كيان:-

لا قعدالك....بس علي فكره جدو هيفرح اوي

رعد:-

ده هيروقك أما يعرف انك خرجتي دلوقتي...وانا ولا اعرفك

كيان:-

حبيبي والله هو انا بحبك من شويه....ها هتوديني دار المسنين امتي

رعد:-

اما تبقي اربعينيه هوديكي واتجوز عليكي

كيان:-

صريح اوي

------------

دلفو الي القصر معاً ليجدوه جالساً بانتظارها لم يتوقع بأنه معاها دلفت هي اولا ليقول الجد:-

كنتي فين

دلف الآخر وراءها وقال:-

كانت معايا

سيد:-

والله عال بصفتك اي بقا مش معني انك ابن عمها تخرجو لحد دلوقتي ...انت راجل مسؤول عن نفسك وانا مسؤول عنها

رعد:-

انا عايز اتجوز كيان ياجدو

ابتسم الجد وهو يقول:-

انت بتتكلم بجد..... يعني هترجع زي زمان

رعد:-

هرجع زي الاول واحسن هي عرفتني اد اي الكل متأثر بسببي وانا لازم اكون حفيد وابن وأخ مثالي وقريب جدا زوج كمان

 عارف أنه صعب بس انتو معايا اكيد مش هيبقي اصعب من اكتئابي الفتره اللي فاتت مش لازم ابص ورايا

سيد:-

انا فخور بيك يارعد أن انت قدرت تتجاهل كل اللي فات وتبدأ خطوه جديده بس اوعدني انك هتحافظ عليها

رعد:-

اوعدك.... بس ليا طلب

سيد:-

اي هو

رعد:-

كتب الكتاب يكون بكره والفرح بعدين الوقت اللي هي تحدده

وافقه سيد فالافضل ان تكون زوجته لتجنب أي شئ وليأخذو مساحه اكبر من الخصوصيه ليتقربو أكثر الي بعضهم بعض

توترت كيان ليهمس الآخر في أذنها:-

هبقي جوزك اهو

كيان بخجل:-

روح نام واتلم

رعد:-

لا كده ممكن اعمل الفرح كله بكره

كيان:-

بس بقا ...هطلع انام شويه عشان اصحي بدري اجهز

رعد:-

اي فستان كده ولا كده اعتقد انك عرفتي العقاب وممكن المره دي يكون اسوء

كيان:-

كده هتحجب ...تصبح على خير

قالت جملتها وركضت لتذهب الي غرفتها ..تسارعت دقات قلبها فهي لا تصدق ...أهذا حلم ...لا أنه واقع ..استسلمت لشعورها بالنعاس وخلدت الي النوم

-اما الجد فقرر الذهاب الي غرفه داليا ليجدها لازالت مستيقظه ..دلف إليها وسرد لها ما حدث لتقول:-

كل ده يحصل وانا معرفش

سيد:-

يعني انا اللي كنت اعرف ...بس كده احسن ماكان يبقي غصب هو فرحان ومتحمس اوي ...ابنك بدأ يحس بوجودها ولأنه

 عارف أنه متهور قرر يتجوزها عشان ميعملش حاجه حرام

داليا:-

ابني متهور فين دورها في أنها تحافظ علي نفسها

سيد بغضب:-

بلاش الكلام ده ياداليا انتي عارفه كويس كيان وهو لو شايف انها مش كويسه مكانش طلب أيدها ...هي بتحبه ولسه صغيره

 ليه يفضلو من غير جواز وهما مش ناقصهم حاجه

داليا:-

خايفه عليهم

سيد:-

انا مش عيل صغير ياداليا انا من الاول وانا عارف ان رعد عايزها بس متردد

----------

في الصباح

دلفت الي المرحاض وأخذت حمامها الدافئ وصففت شعرها لتجد طرقات خفيفه علي الباب توترت قليلاً وتمنت أن يكون

 أحداً غيره ف لا يجب أن يراها هكذا ..ابتلعت ريقها بصعوبه وقالت:-

مين

ورد:-

الحرامي ممكن ادخل

فتحت لها وهي تقول:-

حرامي مؤدب

ورد:-

ربنا قادر علي كل شئ بقا....هو اللي سمعته بجد ...كتب كتابكم النهارده

كيان:-

انا مستغربه زيك ...بس فرحانه اوي ...انا هبقي مرات القمر ده يانهار اسود

ورد:-

مش فاهمه هي ازاي خانته انتي عارفه ده لو مش اخويا كان زماني متجوزاه بالغصب أو خطفاه ...أما القمر ده يتخان ...مازن بخه يتعمل في اي

كيان:-

اي بخه دي

ورد:-

من ساعه ما رجع من السفر وهو كل شويه يرش مايه للزرع بنفسه رافض اي حد يجي جنبهم غيره..وانتي عرفاني فاعله

 خير قولت لازم اديله لقب يليق بيه

-----

كان يجلس في الحديقه بجانب زهوره حتي اتت هي كان يغني اغنيه زي ماانتي جلست بجواره وأشارت له أن يكمل وهي

 تنظر له بحب ليكمل هو ويقول:- زي ماانتي انتي عندي زي ماانتي العفانه هي هي والنتانه مداريا

شهقت چنا علي جملته لتقول:-

اهو انت اللي نتن انا غلطانه اني جيت

مازن بابتسامه:-

خلاص انا اسف ..صباح الخير

چنا:

-صباح الزفت ...انا طالعه لورد

مازن:-

ماتطلعي لورد ولا تطلعي الارافه حتي انا مالي

چنا:-

هطلعها علي روحك

مازن:-

وماله متبقيش تنسي القرص وهاتيها نضيفه متسخسريش فيا حاجه

چنا:-

موت انت بس وانا هقوم بالواجب باي

دلفت الي القصر والقت التحيه علي داليا لتخبرها أن ورد بغرفه كيان وهي ذاهبه إليهم ...ذهبت معاها ودلفو إليهم الغرفه لتقول داليا:-

زعلانه منك ياكيان كده اعرف من جدك فجأه

كيان:-

والله انا مكنتش اعرف حاجه ..حقك عليا ..بس والله مكنتش اعرف مقصدش ازعلك

رقت لها وعانقتها وهي تقول:-

اهم حاجه انتو الاتنين تستحملو بعض انا خايفه عليكم

كيان:-

بس انا مطمنه وواثقه ف رعد

داليا:-

وانتي أدهم فين ياموكوسه

ورد:-

تصدقي نسيته خالص من الصدمه...مش باين تلاقيه خرج

داليا:-

طب روحي صحي اخوكي يلا

ورد:-

عنيا

--------

دلفت الي غرفته لتجده لا يرتدي الا شورت باللون الرمادي لتقول:-

اي الملط ده انت بتصيف ولا نايم....رعد ...رعد...انت يازعابيب باشاااااااااا

رعد بفزع:-

في اي يازفته

ورد :-

مبروك يا عريس اصحي بقا

رعد:-

انتي خليتي فيها عريس انا قطعت خلف

ورد:-

احسن .....رعد انت مش راضي عن جوازتي من أدهم دلوقتي برضو

ارتدى ملابسه وهو يقول:-

حبيبتي انا كنت خايف عليكي مش اكتر لكن انتو عايزين بعض دلوقتي يبقا اولعو

ورد:-

نولع ...طيب

رعد:-

تعالي هنا

اقتربت منه وهي تقول:-

نعم

عانقها بحب اخوي وقال:-

انا اسف على اللي حصل الفتره اللي فاتت واهمالي ليكي بس غصب عني ومن دلوقتي هبقي معاكي

ورد:-

انا مكنتش زعلانه منك بس كان واحشني اني اتكلم معاك من غير ما ابقي خايفه

رعد:-

مفيش خوف ولا عصبيه تاني وعموما انا جنبك وقت ما تحبي تتكلمي ف اي حاجه انا موجود

ورد:-

ربنا يخليك ليا يا اجمل اخ فالدنيا

--------

دلفت الي غرفه كيان مجدداً لتلتفت الي صديقتها وتقول:-

ازيك ياللي مبتسأليش

چنا:-

انتي عارفه بقا طول ما البارد اخوكي هنا مش بحب اجي

ورد:-

بتتكلمي بقلب جامد ماما فين

چنا:-

نزلت

كيان:-

بنات انا مش عارفه هلبس اي مكنتش عامله حسابي لحاجه زي كده كتب كتابي  .....نهار اسود

------

لم يفوته أمر ملابسها فاختار فستانا من زوقه باللون الوردي وقام بشراءه من online store وسيصل خلال عده دقائق

----------

ظلت تدور حول نفسها اخرجت الأخري ذلك الفستان الاسود وقالت:-

ما ده حلو اهو البسيه

كيان:-

لا لا لا ده مش هينفع خالص

اوقف حديثهم طرقاته علي الباب فتحت له وهي ترتدي روب حريري طويل باللون الاحمر ليعطيها العلبه ويقول:-

البسي ده

كيان:-

كنت لسه هقولك مفيش الا الفستان الاسود

رعد:-

عادي خليه البسيه براحتك ف اوضتك بره لا ...اجهزي يلا

ورد:-

مفيش فستان ....مفيش شراب حتي جت عند قرمط ونشفت

رعد:-

فستانك موجود انت اللي مش صابر ياقرمط

قال كلماته واعطاها علبه بها فستاناً باللون البنفسجي الغامق يناسب بشرتها ..فتحت العلبه لتقول:-

ياما جاب الغراب لامه بصحيح ذوقك حلو اوي

رعد:-

أما تلاقي بوكس ف وشك متبقيش تزعلي بقا

ورد:-

لا خلاص ياعم ايدك تقيله هتشلفط وانا فرحي قرب

ضحك الجميع عليها وذهبو ليستعدو

💖💖💖💖💖

الفصل العاشر

بارك الله لكما وبارك عليكما وجمع بينكما في خير ان شاء الله ...بالرفاء والبنين

-قال كلماته وسط تصفيق حار من أفراد العائله وسط فرحه الجميع حتي هو قلبه نبض في تلك اللحظه وكأنها المره الاولي عانقها بقوه لتهمس هي في اذنه:-

اتلم هما قاعدين

ليجيبها هو:-

تحبي نبقي لوحدنا

كيان :-

ممممم...مش عارفه

رعد:-

طب اطلعي اجهزي وهاتي هدوم زياده معاكي

كيان:-

هنروح فين

رعد:-

هتعرفي اخلصي

بارك لهما الجميع وصعدت هي لتبديل ملابسها ارتدت بنطلون جينز وبلوزه باللون الاسود تاركه لشعرها العنان اخذت نظارتها ولكن تراجعت في اللحظه الاخيره فضلت هيئتها بدونها ...اما هو فأخبر الجد بانصرافهم ليقول سيد:-

مش محتاج اقول خلي بالك منها

رعد:-

دي بقت مراتي ياجدي

سيد:-

مراتك علي خفيف ...مراتك مش اوي ياخويا

رعد:-

اي الذل ده...تحب ارجعهالك

سيد:-

لا ماصدقت خلصت منكم خدها وامشو...هكسر وراكم زير

ضحك الجميع ونزلت هي لتقول :-

انا جاهزه

رعد:-

يلا

وضع يده علي كتفها وغادرو معاً ليقول أدهم:-

مش كنا كتبنا الكتاب احنا كمان

ورد:-

ماتصبر ياادهم الفرح قرب خلاص

أدهم:-

اديني صابر

أما داليا فظهر عليها التوتر ليقول سيد:-

داليا عشان خوفك يقل اعتبري أنهم مااتجوزوش

داليا:-

خوفي مضيع فرحتي

سيد:-

مفيش داعي للخوف

---------------

وصلو الي شقته دلفت وراءه وهي في دهشه من مظهرها فهي شقه في أحدي الابراج التي تطل علي النيل مباشرهً ولكن لماذا كل شئ باللون الاسود قبل أن تسأل وجدت لوحه كبيره مكتوب عليها بخط متناسق ظلام الرعد كانت اللوحه باللون الابيض والكتابه باللون الاسود محاطه برسمه للرعد باللون الاسود لتقول له:-

انت اللي رسمها

هو رأسه بنعم لتكمل:-

هو في رعد اسود ...الرعد دايما بيلمع

رعد:-

عادي كنت عميق شويه مش لازم يكون زي الواقع

كيان:-

من ناحيه العمق ف انت عميق اوي...وعنيك حلوه ..تعرف ساعات كنت بقول ف بالي أن جمالك فتنه بيشد اوي

رعد:-

لا ده انتي واقعه

كيان:-

لازم اقع بعد ما بصيت ف عينك ده انا حاسه أنه حلم...بس ياتري ظلامك انتهي يارعد بيه ولا لسه

رعد:-

مش بالسهوله دي وده اللي خايف منه

كيان:-

من امتي وانت بتخاف

رعد:-

خايف اظلمك

كيان:-

رعد انا بقيت مراتك ....مفيش ظلم بينا أنا راضيه باي حاجه الا بعدك ده اللي هيكون ظلم بجد

رعد :-

اي المبالغه فالمشاعر دي

كيان بنعاس:-

انا تعبانه اوي محتاجه انام

رعد:-

وانا كمان ..تعالي

كيان:-

اي ده هننام ف اوضه واحده

رعد:-

فيها اي ...متخافيش مش هضايقك

كيان:-

لا ابدا مش خايفه

ابتسم بهدوء:-

ماهو واضح

كيان:-

ضحكتك حلوه اوي

رعد:-

وانتي عنيكي حلوه اوي

قال جملته وهو يقترب منها لتقول هي :-

انا بقول ننام بقا

رعد:-

نامي ياختي

وضعت رأسها علي صدره ليقول لها:-

انتي كده بتجرجريني للرزيله وانا بصراحه بحبها

كيان:-

لم نفسك ونام

حاوطها بذراعه وقرر الصمت حتي لا تنزعج ...لكن لازال لا يصدق أنه أصبح زوجها ...أدرك أن بالفعل الواقع غير مرتب ...أما هي فنامت بسلام وجودها بجواره جعلها تشعر بأنها لا تريد المغادره ابدا ...لا تريد أن تبتعد عنه ولو لعده دقائق بل أرادت الاقتراب منه ..تعالت دقات قلبه ليتنهد فهو لا يعرف لما يشعر بهذا ...عادت دقات قلبه بعد غيابها..اغمض عينيه محاولا الاستسلام للنوم

----------------

في القصر

كان يجلس بجوار المسبح لتجلس بجواره وهي تقول:-

ماخطرتش علي بالك يوم تسأل عني

أدهم:-

اسأل عنك اي ياورد احنا ف وش بعض ليل ونهار كأننا نسناسين توأم

ورد:-

أدهم انت مش رومانسي ليه

أدهم:-

بت انتي قومي انا مش ناقصك

بكت بشده وهي تقول:-

انت مبقتش تحبني

أدهم:-

الهرمونات اشتغلت مش هنخلص

ورد:-

كمان مش مستحملني

ادهم:-

خلاص حقك عليا..هقوم البس عشان هعمل انترفيو اختار منه سكرتيره جديده لرعد

ورد:-

هتقابل بنات....هتخوني ياادهم

أدهم:-

حبيبتي اكيد مش هخونك ده شغل ...روحي نامي

ورد:-

انام دلوقتي احنا العصر ...اتخمد انا عشان يخلالك الجو مش كده

أدهم:-

طب انا اقولك حاجه حلوه ...انا امشي وانتي طلعي كل كبتك ونكدك علي الواتس واما ارجع نكمل خناق

ورد:-

أدهم انا بحبك

أدهم:-

ورد انتي ملبوسه مش مجرد هرمونات

-------

_شغال تجوز فاللي رايح واللي جاي بقيت ولا الخاطبه ف زمانها ياجدو 

سيد:-

انت مش قليل الادب ....انت ماتربتش

مازن:-

ماكانوش فاضيين يربوني كانو ف اجازه

سيد:-

هتفضل طايش لحد امتي

مازن:-

انا طايش ده انا نسمه

سيد:-

ده احنا بنشوفك بالصدفه

مازن:-

بتقل عليكم عشان اوحشكم ياجدو

سيد:-

كلك وحش