رواية زواج قاصره الفصل الاول1بقلم نوسه حمد
يلا قبل اكتب الروايه دي ح تكون فيها جزء كبير من الحقيقه بس ممزوج بي خيال وان شاء الله تعجبكم
انا اسمي ميعاد من قريه من قري شرق السودان ح احكي ليكم قصتي كان عمري ١٢ سنه ولسه طفولتي م كملتها في يوم من الايام كنت بلعب مع بنات جيرانا امي نادتني كنت بتقدم في خطواتي ليها وبرتب في حالي عشان م تدقني لأننا كنا نلعب ف الارض كل همي كان انو انفض الغبار العلي ملابسي عشان امي م تشاكلني وتقول لي اتوسختي وصلتها قالت لي م لابسه طرحه ليه موش ميه مره قلت ليك م تطلعي الشارع من غير م تختي طرحه ف سدرك انا خوفتا انها تدقني لانو امي صعبه شديد اتلفت وراي لقيت صحباتي بعاينو لي وهم كانو في عمري وم لابسين طرح حسيت نفسي منكسره شديد وقلبي وجعني بس دي امي م بقدر اقول ليها حاجه مشيت معاها البيت لقيت معاها نسوان قالت لي ادخلي نظفي البيت دا انا معاي ضيوف انا كنت م بعرف انظف شديد او م بعرف ادقن الشغل وهي لمن اخلص بتجي تنبز لي شغلي وتكورك فيني وفي حين انو انا بكون اتهجمت ف الشغل وبتعلم كل مره حاجه براي كان نفسي تشيل المقشاشه وتقول لي بقشو كده واعملي كده كان نفسي تعلمني ولا تقبل بالحاجه الانا بعملها ليها بس امي طبعا صعب كل الناس بعملو ليها الف حساب حتي ابوي بتجنبها وبتجنب كلاما وانا ترتيبي ف البيت اصغر واحده كنت ي داب ف خامس اساس وطلعتني امي من المدرسه عشان اساعدها في شغله البيت ابوي م قال ليها حاجه كان نفسي ابوي اقول ليها خلي البت تكمل قرايتها بس للاسف عايشه حياه قهر وحياه مجبوره عليها شديد كنت لمن اشوف صحباتي امشو المدرسه قلبي بنقطع وببكي وبمش ناس حبوبتي ام ابوي امي امنه احن انسانه في الدنيا احن علي من امي بس امي م بتريد اهل ابوي كنت بنسرق عشان امش ليهم لانها بتحسسني اني انسانه وبتطبطب علي وانا من طبعي كتومه شديد م بحكي بالحاجه البتحصل لي بس بمش ليهم عشان اتناسا حياتي وابوي بقول لي امشي بس امي بتقول لي لو مشيتي لي ناس حبوبتك بكتلك وانا حبوبتي برتاح عندهم
مره مشيت العب مع بنات عمي َكان معاهم ولد غريب ريم بت عمي قالت لي دا اخوي كان ف السعوديه وانا م بعرفو نهااي اول مره اشوفو لمن شافني جا قال لي ريم دي منو وانا خوفتا منو لانو كان بعاين لي شديد قالت ليهو دي ميعاد بت عمي محمد قال ليها م شاء الله عمي محمد عندو بت كبيره كده قلت ليهو لا لا انا م كبيره وكنت مخلوعه وخايفه شديد قال لي بتقري ف كم ي شاطره سالني سؤال بجرحني شديد قلت ليهو لا لا انا خليت القرايه قال لي ليه ي حلوه طبعا كلامو كلَو ي حلوه ويا شاطره قلت ليهو امي قالت اساعدها ف البيت قال لي واها بتعرفي تعوسي قلت ليهو لا لا بس بعرف انظف واغسل لي امي قال لي م شاء الله بقيتي مره يعني قلت ليهو لا لا امي المره انا م مره قعد اضحك قال لي كيف دي بي كل براءه قلت ليهو امي مره عشان بتتحنن وبتدخن وبتلبس توب قال لي يعني الواحده لمن تعمل كده تبقا مره قلت ليهو اي لانو انا يوم اتحننت امي دقتني قالت لي لمن تبقى مره اتحنني اليوم كلوو سالم قعد اضحك قال لي طيب م نفسك تبقي مره قلت ليهو انا صغيره لمن ابقا كبيره قدر امي ببقا مره ومشيت البيت وجريت جري خوفت من كلام سالم واليوم كلو عايشه ف توتر وخوف وبتزكر ضحكتو وونستو وبخاف ومن دون الايام نومتا بدري شديد وم صحيت الا لمن صحتني امي قالت لي قومي انا ماشه بكا في فريق ورا اسقي اخوانك الشاي والقاك نظفتي لي البيت قلت ليها سمح كان نفسي تصحيني تقول لي قومي صلي الصبح بس للاسف صحيت شربت الشاي وقعدنا ف الارض انا واخواني نضحك ونشرب ف الشاي وابوي كان مافي بعد شويه سالم جانا انا خوفت اتزكرت كلامو امس قومت علي حيلي مشيت لبست لي طرحه قال لي الحلوه بتلبس طرحه وبتخجل يا ناس قلت ليهو بكل براءه امي قالت لي البسي طرحه غطي سدرك قال لي انت فالحه ناس امك وين قلت ليهو امي فاتت البكا وابوك فات الشغل قال لي خلاص اعملي لي قهوه قلت ليهو سمح مشيت عملت ليهو قهوه زي البعملا لي ابوي وجبتا ليهو قال لي م شاء الله احسن من ريم اختي وريم اختو اكبر مني فجاه امي جات سلمت عليهو وقالت ليهو حمد لله على السلامه جيت متين قال ليها اول امس والله وجيت قبيل لقيتك ماف وعمي ماف والبت الفالحه دي عملت لي قهوه قالت ليهو دي ميعاد بتي ومسكتني وقعدتني جنبها وكان نفسي احس الاحساس دا زمان بس طبعا قاسي قالت ليهو دي كبيره اخوانا طلعتها من المدرسه عشان تساعدني ف شغل البيت َانا مشيت منهم قلت ليها امي دايره العب قالت لي م تتاخري ومشيت خليتهم وبقيت العب مع بنات جيرانا
المغرب ابوي جا وسالم تاني جاهو راجع وانا كنت فترانه نومتا بدري وصحيت بي صوت امي كالعاده وابوي ماف وقومت اقش ف الحوش شفت سالم ماشي ف الشارع قال لي بت عمي الحلوه تقش م شاء الله قعدت اضحك وخجلت منَو قلت ليهو امي قاعده جوه ودخل البيت وانا قشيت. الحوش ودخلت سمعت سالم قال لي امي عمي م رد علي عشان انا اجازتي بسيطه عاوز اتزوج سريع قالت ليهو لو علي انا م عندي مشكله قلت ليهو سالم داير تعرس قال لي اي قلت ليهَو بتعمل لينا حفله قعد اضحك قال لي دايره حفله انتي قلت ليهو اي وقعدت اضحك ببراءه وم عارفه الجاي علي قلت ليهو عندنا دلوكه طهوري انا واخواتي بديها لي ريم عشان ندقها ونغني امي كوركت فيني قالت لي امشي العبي لعبك مشيت لقيت بنات جيرانا العبن ضيوف ضيوف قلت ليهن سالم ود عمي داير اعرس واعمل لينا حفله ولا بعزمكن وم تجننا َ َبحوربكن من اجي العرس عشان م تمشن معاي وتفضحني واحده فيهن قالت لي والله عرس ف الحله والله نجي ونجي ونجي جوه عينك وانا بقيت ابكي وقومتا دقيتا والشكله دورت امي جات جاريه قالت لي مالك ي بت قلت ليها قالن بمشن معاي عرس سالم وانا م بسوقن طبعن شين وبقعدن اتخاتفن ف الاكل ودموعي عشره عشره وكل م اتزكر كلام صحبتي قالت لي بجي جوه عينك اتلفت من امي واقول ليها ي دبه ي حشريه وامي دقتني ليك دقه اليوم داك نومت النهاريه كلها م قومتا
بعد يومين ناس ريم وسالم وابوهو جونا انا جبتا ليهم المويه امو قالت لي حلاتا مرت ولدي فالحه قلت ليها مرت ولدك منو قالت لي انتي نحنا جينا نخطبك لي سالم ولدي وعاد نعمل ليكم جنس عرس انا بقيت اعاين لي ابوي ودموعي في عيني يعني انا العروس وسالم اكبر مني قلت لي امي ماشه لي حبوبتي قالت لي امشي جريت جري لقيتا قاعده تحلب ف غنمها قلت ليها امي دايرين اعرسو لي سالم حبوبتي اللبن انكشح منها قالت لي سجمي القال كده منو قلت ليها قالو هم قالت لي جيبي لي توبي من جوه جريت جري جبتو ليها ولبستو وانا جريت وراها لقت ابوي وعمي احمدوكلهم قاعدين قالت لي ابوي محمد صحي القالتو بتك دا قال ليها بتي قالت شنو قالت ليهو صحي دايرين تعرسو ليها سالم ابوي قال ليها اي وسالم قاعد قال ليها مالك زعلانه ي حبوبتي قالت ليهو دا يوم المني ي ولدي بس البت صغيره دا كلام شنو البتعملو فيهو دا امي طوالي قالت ليها انا بتي م صغيره الحمذ لله كبيره ومعلماها علي اي شي