رواية طفلتي
الفصل الاول1
بقلم روريتا
الساعه كانت عامله 12:41 الدنيا شتاء ما جايني نوم بقيت افكر في البيبيهات الح يجوني ان شاء الله وكيف اقدر اقضي اكبر وقت ممكن معاهم وما اخليهم يحسو بغيابي .... جاني اتصال من رقم غريب ما عارفو ده منو الما عندو ذوق بتصل زي المواعيد دي طوالي كنسلت المكالمه
ما كنت عايز رؤى تصحا وتتخلع
كفايه انو الحمل متعبها وهي في الشهور الأخيره
شويه كدا وجاتني رساله من رقم غريب برضو محتواها كان
" عبد الهادي.... أنا سلمى شفتك قبيل مع مرتك شكلها حامل
ومع انو انت شفتني بس اتجاهلتني وما سلمت علي قلت يمكن ما قدرت تسلم علي قدام مرتك... المهم انا اشتقت ليك وندمانه على العملتو فيك وعايزاك ترجع لي".
تقريباً قريت الرساله مرتين وقلت في نفسي من غير خجل مرسله لي وكمان هسا وبقيت اتذكر في الحصل كلو من البدايه
_ نرجع لي ورا شويه
سلمى دي كانت خطيبتي وحب حياتي ما كنت شايف وحده في الدنيا غيرها كنت مستعد اعمل اي شي عشانها بس هي خذلتني شديد واستغلتني بالجد ما لاقاني انسان اكعب منها.
اتذكرت اول يوم شوفتها فيهو كنت خريج جديد و شغال في مركز سوداني تدريب جات دايره تشتري شريحه داتا وتفعل فيها 20 قيقا ادتني رقمها الوطني طلعتها ليها فتحت شنطتها لقت قروشها مافي قعدت تبكي قعدتها في الكرسي هديتها شويه وقلت ليها حصل خير قالت لي والله دخلت القروش في الشنطه وما لقيتها شكلها وقعت مني قلت ليها قولي الحمد لله على كل حال احتمال وقعت وشالها زول محتاج ليها
قالت لي خلاص ما دايره الشريحه قدرت ما حنستها ابت تشيلها
وطلعت طوالي قلت في سري الله يعنها غايتو
واصلت شغلي لحدي ما دوامي خلص طلعت بره لقيتها قاعده
قلت ليها ما لاقيه مواصلات؟
قالت لي ابوي بجيني هسي
قلت ليها طيب مشيت خطوتين كده اتذكرت انو قروشها وقعت وانو هي ليها 3 او 4 ساعات طالعه يعني مفروض تكون مشت قبيل
رجعت ليها وقلت ليها ما عندك قروش مواصلات صاح؟
ماردت علي قلت ليها اتفضلي معاي اوصلك
قالت لي لا لا شكراً
اصريت اوصلها ما عارف ليه في النهايه اقتنعت وركبت معاي
وصفت لي بيتهم وصلتها وقالت لي شكراً وما زادت اي كلمه اليوم التاني جاتني شالت الشريحه ودفعت القروش وقالت لي شكراً ومشت
بعد فتره جمعتني صدفه تانيه معاها طلعت صحبه صحبي كنا بنتغدى في مطعم وصحبي شافها وعزمها هي و2 من صحباتها يقعدو معانا بعدها اتبادلنا الأرقام وبقينا نتواصل سوا مع انو انا ما من نوع الاولاد ده بس في حاجه قالت لي رسل ليها رغم انو ماكان عندي ليها حاجه وعادي رسايلها كنت بعلقها يومين وتلاته الا اني اتعلقت فيها وحبيتها او بالأصح اعجبت بيها...
بعد خلصت تدريب في مركز سوداني نقلوني رسمي وبي عقد وخلوني امسك صفحه السوشيال ميديا كان راتبي كويس الحمد لله.. بعد فتره ابوي تعب وبقى ما بقدر يشتغل مسكت شغلو انا اللي هو محل اسبيرات عربات كنت بفتح المحل من الصباح لحدي الساعه 1 و بعدها بمشي على دوامي الفي شركه سوداني كان من الساعه 3 لحدي 11 برجع البيت هلكان وتعبان ما داير شئ غير النوم استمريت على الوضع ده سنه كامله
لحدي ما لميت لي مبلغ كويس وسعت شغل ابوي ولقيت مافي اي لازمه لي شغلي في سوداني مع انو كنت بحبو
بس قررت اني اوقفو انتظرت عقدي ينتهي وبعدها قدمت استقالتي
بعد اسبوع بالظبط قررت اخطي خطوه جاده واخطب سلمى اصلا ما كنت شايفه غيرها او بالأصح ماداير اشوف غيرها
فعلا خطبتها واستنيت سنه كامله لحدي ما تخلص جامعه.
كان باقي لي عرسنا اربعه شهور بس حب سنتين أخيراً كنا ح نجتمع في بيت واحد كنت فرحان والدنيا ما واسعاني
اتصلت على ابوها قلت ليهو بمناسبه تخريج سلمى خطيبتي انا عازمها على الغدا وما عندي مانع لو جابت اختها او واحد من اخوانها معاها في البدايه رفض لكن بعد تحانيس وافق
مشيت اتضبطت ليك وآخر شياكه والريحه دي ما تديك الدرب
نزلت تحت لقيت عبير اختي معاها صحبتها اللي هي بت جيرانا اول ما شافتني نزلت رأسها ما بتعاين لي زول في عيونو البت دي بالجد غريبه شديد وغامضه.
عبير جات قالت لي الله على الاناقه لو كنت ما اخوي كنت انبرشت ماشي تلاقي حبيبت القلب ولا شنو😂؟
البت دي ما نصيحه والله 😂😂😂😂😂
قلت ليها اي ماشي الاقيها
قالت لي كل يومين ماشي تشوفها هسي امبارح كنت في تخريجها دي الحاله انك خاطبها بس لو عاقد عليها كان عملت شنو 🤣🤣🤣🤣🤣
قلت ليها ما عندك شغله بي خليني في حالي،،،
قبل ما اطلع لاحظت علي صحبتها الاسمها رؤى كاتمه الضحكه... كلو من اختي الهبله دي خلت الناس تضحك علينا.
طلعت ركبت عربتي شغلت اغاني ومشيت على بيتهم اتصلت عليها وقلت ليها يا جميل انا مستنيك بره شويه كده وجات طالعه مع ابوها واختها العمرها 10 سنه اسمها سبأ نزلت سلمت على ابوها وقال لي بناتي امانه عندك وياريت ما تتأخرو
قلت ليهو حاضر يا عمي فتحت لي سبأ الباب ركبت ورا ومسكت التاب حقها مع انو هي طفله بس مجنونه إلكترونيات والحاجه دي ما كويسه للأطفال لانو بلحس ليهم مخهم...
سلمى ركبت قدام وانا ركبت ودورت العربيه ومشينا على المطعم عاينت ليها وقلت ليها مافي مشتاقين ولا شنو؟؟!
ابتسمت لي ابتسامه بارده كده وقالت لي مشتاقين
استغربت فيها لانو ما من عوايدها تسكت وما تتكلم
بالعاده كلامها كتير كانت مقبله على الشباك وانا كنت بفكر وبراجع في نفسي لو عملت ليها حاجه زعلتها بس ما لقيت
بعدها وصلنا المطعم قعدنا في طاوله بعيده شويه عن الناس
سلمى قعدت في الكرسي القدامي واختها قعدت في الكرسي الجمبي اصلا هي ما مركزه في حاجه غير تابها
طلبنا الاكل وبقينا نتونس واخر ضحك
بقت تحكي لي في تفاصيل التخريج وكده
شويه وغيرنا الموضوع وفتحت ليها سيره العرس وانو مفروض نحدد موعد نجيب فيهو الشيله طبعاً وشها اتغير وجاب الوان
قالت لي انت اتفاهم مع ابوي
قلت ليها طيب وسكت
قالت لي احسن نمشي بعد ده عشان ما نتأخر قلت ليها ارح
قالت لي دقايق امشي اغسل يديني وشي واجي
قلت ليها تمام بقيت اشاغل في سبأ واقول ليها اديني العب معاك وهي تقول لي لاااا😂😂😂
ياخ صوتها بضحك عديل
بعدها تلفون سلمى اتصل عاينت للإسم لقيتو صالح استغربت طبعاً رنه رنتين كده وفصل وبعدها جاتها رساله في الواتس من نفس الشخص الفضول كتلني فتحت تلفونها وعارف الحاجه دي ما صاح لقيتو مرسل ليها لسا ما رجعتي من مشوارك مع الما بتسمى ده عاينت للرسايل القبليها
لقيتو كاتب ليها مدام انتي ما بتحبي دايره تعرسي ليه؟
هي راده عليهو وكاتبه ليهو انت عارف اني وافقت على الخطوبه دي عشان يصرف علي لحدي ما اخلص جامعه لكن هو ما استايلي استايلي انت وبس. قريت باقي الرسايل لقيتها استغفر الله بس حرفياً انصدمت فيها يعني لو وحده ما بعرفها ما بعاين ليها تاني خليها خطيبتي .... رجعت التلفون مكانو وحاولت امسك نفسي
جات سلمى طالعه قالت لي حبيبي ارح ما رديت عليها
مشيت قدامها وركبت في العربيه طبعاً حست اني متغير
ف بقت تتظارف وتتراشق وتحاول تونسني بي اي طريقه بس انا فضلت ساكت لحدي ما وصلتها هي واختها وقلت لي اختها نادي لي ابوك ما قلت لي سلمى..... فعلاً مشت نادتو قلت ليها دقيقة خليك واقفه ابوها قال لي خير يا ولدي
قلت ليهو والله يا عمي انا فسخت الخطوبه وبتك ان شاء الله تلقى البسعدها والبكون استايلها وعاينت ليها ي عيونها عشان تفهم و...