رواية طفلتي
الفصل الثاني2
بقلم روريتا
ابوها قال لي خير يا ولدي
قلت ليهو والله يا عمي انا فسخت الخطوبه وبتك ان شاء الله تلقى البسعدها والبكون استايلها وعاينت ليها في عيونها عشان تفهم اني كشفتها وناقش اي حاجه..... طبعاً هي منظرها بقى بايخ شديد واتحرجت ف نزلت ليها دميعات كده ودخلت البيت
ابوها قال لي يا ولدي استهدي بالله احكي لي الحصل شنو
قلت ليهو مافي شي كل الحكايه اننا ما متفاهمين وما بننفع لي بعض والاحسن نقيف هنا قلت كلامي ده ومشيت طوالي
وقفت في شارع النيل فتحت شبابيك العربيه ولعت سجارتي
وبقيت افكر معقوله انا كنت غبي للدرجه دي؟؟؟ معقوله ما حسيت انها بتستغل فيني؟؟ كيف ما لاحظت يا الله ياخ
رأسي ح ينفجر خلصت علبتين سجاير تقريباً قعدت لحدي ما العشاء اذن ورجعت البيت ما اتكلمت مع زول عبير جات تشغلها لي وتتونس معاي اتنهرت فيها ومشيت منها قعدت في الصالون مسكت تلفوني لقيت مكالمتين من سلمى ما اترددت دقيقة وحظرتها مسحت صور الخطوبه وصور تخريجها و اي حاجه بتخصها خلاص قفلت صفحتي معاها للأبد.
اتذكرت اني اتنهرت في عبير وهي ما عندها ذنب
مشيت الدكان جبت ليها اندومي وبارد مشيت ليها في غرفتها لقيتها لابسه سماعتها بتسمع في اغاني وبترقص ولمن شافتني اتخلعت 😂😂😂😂😂
غايتو البت دي يا مجنونه يا مجنونه مستحيل تكون طبيعيه وانا الكنت شايل همها وقلت بتكون زعلانه طلع ما عندها قلب 😂😂😂😂😂😂
قالت لي واااي عبودي انت عندك حمى ولا شنو لمن جايب لي بارد واندومي انت كويس
قلت ليها بطلي هبل ولا بمشي ارجعهم هسا😒
قالت لي لا لا خلاص اديني ليهم انا اصلا جيعانه
قلت ليها صافيه لبن؟
قالت لي لسا..... اهاا طيب عايزه شنو تاني؟
توصلني بكره للجامعه بسامحك.... طيب خلاص موافق
قالت لي والله انت ما طبيعي بالجد حاصل ليك شنو جايب لي اندومي وبارد وبكره ح توصلني للجامعه بديت تعجبني على فكره خليك كده دايماً 🤣🤣🤣🤣🤣🤣
احلمي دي اول واخر مره ما تتعودي بس
قلت ليها اعملي لي شاي بي نعناع... قالت لي داير تذلني يعني عشان جبت لي اندومي وبارد قلت ليها جيبيهم طيب
قالت لي لا لا خلاص ماشه اعملو ليك😂
مشيت قعدت في الصاله لقيت الحاج والحاجه اخر ونسه وضحك قلت ليهم ان شاء الله ايامك كلها سعاده ضحكونا معاكم شويتين كده يعني 😂😂😂😂
ابوي قال لي يا ولد بطل وخلي حركاتك دي
قلت ليهو خلاص خلاص 😂
بقينا نتونس وعبير الهبله جابت لي الشاي
امي قالت لي في زول بشرب شاي بعد العشاء؟
انت ما داير تنوم ولا شنو... ضحكت وقلت ليها والله انوم نوم لكن بتك الهبله دي الليله ما بتنوم من الفرحه 😂
قالت لي مالا؟
عبير : والله يا امي ولدك ده الليله ما طبيعي جاب لي اندومي وبارد واعتذر مني وقال بكره بوصلني الجامعه ما عارفه الحاصل عليهو شنو يااخ قبل كده هظر معاي عطل لي يدي يومين معليش بالغلط ما قالها ما عارفه الجده شنو
امي : احتمال داير يهتم بيك قبل يعرس وينساك
_ ما تخافي ما ح اعرس انا فسخت الخطوبه
حصلت لحظه صمت عجيبه وبعدها امي ضحكت وقالت احسن اصلا البت وامها البوبارين ديل ما كانو عاجبني والبت دي كانت بتتمايع وبتحرق لي روحي بس وافقت عشانك انت في النهايه القرار قرارك انت ودي حياتك.
ابوي : طيب السبب شنو الخلاك تفسخ الخطوبه؟!
_ كل الموضوع انو ما اتفقنا وما اتفاهمنا ف احسن كل زول يمشي في طريقو.
امي : الله يديك البتسعدك يا ولدي
_ آمين يا ستهم
عبير: يعني هسي مافي عرس قريب طيب الفستان الفصلتو اوديهو وين
_ اعمليهو قطع بتجاز من هسي لانو اسبوع لي قدام ما ح يدخل فيك بي طريقه اكلك دي😂😂😂😂
عبير : انقلع مني يا عوير امي امسكي ولدك ده عليك ياخ داير يجيب لي نفسيات😭😭😭😭
امي : كلامو صاح انت بتأكلي اكتر منو هو عامله لينا ميزانيه في البيت
عبير: حرام عليكم دايرني اصوم صاح تاني ما ح اكل زاتو 😭
ابوي : خلو لي بتي دي في حالها تأكل العايزاهو وبالطريقه العايزاها صارفين عليها انتو؟
امي : خلاص خليناها عارفنك ما بترضى فيها لكن لازم يكون عندها إتيكيت بت على شنو هي دي كان عرسوها برجعوها بجردل خبيزها ده كان ما اكلتو قبل ما تصل😂😂😂😂
_ امي خلاص كفايه عليها دي تاني شهرين لي قدام ما ح تأكل
عبير : تصبحو على خير انا ماشه انوم عندي جامعه بكره وفي زول ح يوصلني
_ والله اخليها هسي
عبير: ما بتقدر ترجع في كلامك لكن🌚
_ طيب امشي اتخمدي ومن هسا تتأخري لي بمشي وبخليكي
قالت لي ما بتقدر يا عوير وجرت غرفتها😂
اليوم التاني الصباح بدري صحتني عبير وقالت لي قوم ياااخ داير تأخرني صاح عاينت للساعه لقيتها 5 قلت ليها يابت انتي مجنونه في زول بمشي الجامعه زي المواعيد دي
قالت لي مسافه تصلي وتاخد ليك دش وتشرب الشاي الساعه 6 بتكون جايت قوم يلااا
ضربتها بالمخده وقلت ليها طيري مني
قالت لي بطير اي لكن قوم يلا😂
استغفرت وقعدت قريب نص ساعه بعاين للمروحه واللمبه ما عارف ليه بعمل كده بس بكسل اقوم من السرير الصباح بحس اني مربوط فيهو عديل 😂
بعدها قمت على حيلي اخدت دش بارد وصليت ومشيت اشرب الشاي لقيتهم عاملين كيكه شوكولاتة طبعاً الهبله دي لو ما شلت منها الصحن كان اكلتو كلو بقولو الاولاد بظلمو البنات في الاكل لكن دي لا اله الا الله ظالماني انا كتر خير الحجه البتدس لي حقي منها 😂
قلت ليهم عليكم الله كترو لينا من الحاجات دي بس
عبير قالت لي عرس خلي مرتك تطبخ ليك
قلت ليها انتي بتعملي في شنو.... قالت لي انا مخبيه مواهبي حقت الطبخ لي قره عيني
قلت ليها غايتو خجل مافي تقول دايره اعرس قدام ابوك واخوك قليله ادب
قالت لي اخجل ليه مادي الحقيقه ودي سنه الحياه بعرس وبخلي ليك البيت ده
قلت ليها عرسي بكره دي نرتاح منك ومن المزانيه العاملاها لينا دي واسكتي بالله خليني استمتع بالشاي والكيكه دي😂😂😂😂
وانا بأكل قلت للحجه يا الله تسلم يدك
قالت لي لكن انا ما عملتها.... قلت ليها طيب عملها منو؟؟!
قالت لي رسلتها رؤى بت جيرانه لينا الله يديها العافيه💜
قلت ليها ااا شكرا ليها
خلصت الشاي وقلت لي عبير ارح قدامي قالت لي اجيب شنطتي واجي استناني
قلت ليها انا في العربيه تعالي لاحقاني... قالت لي طيب.
ختيت للحاج المصاريف ومشيت طلعت استنيت الهبله دي نص ساعة عديل عشان شنطه كان يوم اسود والله اني اقول ليها داير اوصلك
طلعت واخيرا اتحركنا كده قالت لي دقيقة صحبتي رؤى دي طالعه ياداب خليني نوصلها معانا اصلانحن بنقرى في نفس الجامعه قلت ليها طيب
فتحت الشبكاك وقالت ليها ارح اركبي معانا قالت لينا شكراً
قلت ليها اتفضلي اصلا طريقنا واحد مافيها حاجه قالت طيب
ركبت ورا و عبير بقت تتونس معاها وهي بتجاوب بختصار ما بعرفها هي كده ولا عشان قدامي
لمن وصلنا رفعت رأسها لاحظت لي عيونها الكبار النعاسه وبي ابتسامه صغيره كده خلت جضومها تظهر قالت لي شكراً ونزلت..