رواية زواج قاصره الفصل الثاني والعشرون22بقلم نوسه حمد

البت بقت تحكي لي قالت لي منار دي تخصصها بنات شوارع بتجيبهن بي حجه انو هي طالبه واهلها مغتربين وانها هي براها وعاوزه واحده تغسل وتظف ليها وتخلي البت ف الشقه وتغريها  لمن تتاكذ تماما منها بتدخل  عليها راجل وبحصل البحصل والبت بتنضما لللسته بتاعت البنات 💔💔

قالت لي تاني ف واحده اسمها خالده دي صاحبه الكافي دا وهي سبب البلاوي دي كلها انا طبعا سكت م قلت ليها بعرفها قلت ليها احكي لي وحكت لي بيها قالت لي لمن الرجال الكبار ديل يقنعو من جو الخرطوم وبناتو بقولو دايرين بت بلد َبتصلو لي خالده وخالده بتصتاد ليهم من حلتها والقرى الجنبها وشغالين علي كيفهم اغيرو في البنات م بتعجبهم بت نهاي 

قالت لي تاني في امنا امنه أمنه دي تخصصها بنات ثانوي شغاله حاجه بتبيع برا  حوش المدرسه وبتدين البنات الحاجات ولمن اغلبهن السداد بقعن ف الفخ وبنات الثانوي ديل بجن براهن وماسكات الكافي دا ع حسابهن ولا بخجلن وقَويات وشخصياتهم متحرره من بنات الزمن دا ودي اخطر  واحده شغلها ساهل عشان الفئه دي نصهن متحررات وما عندهن مشكله للغلط ولا المجتمع وماسكات لينا بقت مدنيه ومفتكرات المدنيه تحرررر 

قلت ليها  تاني منو قالت لي اصحاب البقالات في كم واحد هنا معاهم ديل بشوفو  النسوان العاوزات شغل بجيبهن لينا.

قالت لي تاني في واحده اسمها نسرين ودي شغلها ووواسع قلت ليها كيف قالت لي دي عامله فيها تاجره وبتمش الاسواق تشتري بضاعه بالكميه وعلاقتها بقت متوسعه مع التجار وبتعرف كل التجار الف الاسواق والموردين وديل الهم عليهم الشغل قلت ليها كيف قالت لي التجار ديل اغلبيتهم ما من الخرطوم وقاعدين هنا وزاتهم مرضانين م بخجلو قلت ليها كيف دي😓 قالت لي ديل البقولو دايرين البنات وهي تجي تعرض ليهم البنات وكل البحكي ليك فيهو  دا بحصل في خفا نحنا م بنشوفهم بس بنسمع بيهم  وكمان الايام دي نسرين مسكت الاولاد الصغار البشتغلو ف البوتيكات وبتكون المحل م حقتهم جابوهم من البلد وشغلوهم هي بتمسكهم وتخليهم يدمنو ويدمرو وياكلو المحل وهي بتكون السبب والواحد بكون ادمن الحاجه دي لو الواحد ربنا داير اهديهو هي بتبقا لي ف العزيزه وتجري وراهو وتاني تغريهو بالبنات والاولاد مرضو ف الجنس 💔💔💔💔

قالت لي تاني في كم بت شغالين ف المولات ديل بصتادن الرجال الغنيانين والاجانب وبجيبوهن هنا الكافي

قالت لي ديل عصابه لمن راسك اشيب ومعاهن ضباط عشان الواحده لو وقعت اطلعوها زي السلام عليكم ومعاهم دكتور لمن البت تحمل بعمل ليها عمليه اجهاض

الزمن مشا وبدو الناس تجي للاحتفال العاملنو دا وانا بقيت قاعده بعاين بس ومركبه سماعتي ومحمد بقول لي عوده مالك وانا غالبني ارد حيلي مات من السمعتو وبقيت اتحسس ف الحاجات الجنبي انو دي  حقيقه ولا  انا بحلم معقوله الحاجات دي حاصله في بلدنا وليه الناس ضميرها مات والبنات بالذات وبقيت اعاين ليهن واحده واحده كان نفسي احس انهن انظلمن بس كل واحده وشها بحكي انها مبسوطه  وبدن اجن بنات الثانوي فاكات الشعر والبناطلين وديل جن من بيتهم كده م طلعن العبايه ف الشارع وانا بقيت اراغب ومدورات الشيشه وانا سدري كتم خلاص من الدخان وخالده مشت لبست ف الكوفير وجات والبنات ماسكات ليها الشيخه الشيخه وشلغو الاغاني وبقو يرقصو اولاد وبنات زي البنشوفهم ف الافلام المصريه وضحك وقله ادب انا بعد ربنا اداني قوه القصص السمعتها كسرت ضهري وبقيت قاعده في ركن وبقيت ارجف والرجال لسه م جو خالده قالت لي بت كده تعالي سوقيها جهزيها قلت ليها تعمل لي شنو قالت لي تغيري العبايه وتلبيسي فستان جبتو ليك وتمكيجك لانو خلاص الناس ديل علي وصول وكده م ح تعجبيهم قلت ليها اسمعيني دا م اتفاقنا وانا م بلبس شي وبعدين انا الجيت اختار م هم موش انتي قلتي منتظرين مني اشاره يلا بس انا  كده مرتاحه وخليهم يجو واختار  عشان انا تعبت قالت لي وين تعبتي نحنا ح نبيت هنا انا قلبي قعد ادق انا لو بريئه وم شغاله معاهم نفسي م بتسمح لي ابيت ف محل مشبوه سكت منها وم رديت محمد قال لي نحنا متحركين عليك بس ح نقيف لمن اسمع الرجال دخلو كلهم التلاته  عشان لو ف واحد م جا الخطه بتفشل

المهم انا بقيت اشيل في حيلي وغالبني نهاي بقيت استغفر واتشهد والرجال جو واتاخرو شديد قالو كانو عندهم شغل جو اتنين م بعرفهم والراجل اللاقيتو اول واحد م جا معاهم نهاي قلت لي خالده وينو الراجل اللاقيتو اول واحد قالت لي بجي وبعدين تعالي هنا انتي الراجل داك شفتيهو لو عاوزاهو م كان تعملي لينا القصص دي كلها وتعذبينا معاك وبقت ماسكاني من يدي شديد قلت ليها براحه قالت لي الليله مالك قوتك فاتت وين ولا استسلمتي للواقع قلت ليها بالظبط كده قالت لي تعالي اكرمي الضيوف انتي لانك انتي المحتفي به وانا حيلي ميت وريحه البنقو خلاص دروخت بي وبقيت شبه مخدره وامش يا الله ومحمد ف الخط قال لي الراجل التالت جا قلت ليهو لا محمد انا م قادره خالده قالت لي بتتكلمي براك ليه وختي الشنطه الطاباها من  جيتي دي انا جريت الشنطه علي عشان فيها التلفون والخط بفصل قالت لي هو عندك شنو خايفه عليهو قروش شنو البسرقنها البنات ديل البنات ديل القروش العندهن ابيعنك واشترنك بيها سكت منها ساااي وم قلت شي

ادتني قهوه قالت لي اديها ليهم وانا بقيت م شايفه عديل قلت ليها م بقدر قالت لي م بتقدري شنو انتي راسك قوي ح تتعبيني قلت ليها والله م بقدر راسي لافي قالت لي م تدلعي علي دي حركات شنو الرجال منتظرنك  شلت القهوه ومشيت ليهم انا لمن شفتهم حيلي مات زياده شكلهم  رجال اعمال كبيرين والواحد ف وشو م بتحسي انو هو قليل ادب وكبار م صغار واحد فيهم قدر ابوي وانا علي الحكاوي السمعتها والاشكال الشفتها والبنقو والشيشه  الشاماهن   راسي لفه وحيلي مات  وقلت ليهو محمد انا ح اقع وووقعتا بي القهوه الشايلاها وتاني م وعيت بي اي شي........... يتبع المره الجايه نشوف مصير ميعاد هل محمد ح يصل اول ومعاهو الضابط  ولا خالده ح تكتشف خطتهم لانو الخط فاتح والسماعه ف اضان ميعاد  واقومو يخلو  المكان ويضيع مجهود ميعاد ومحمد والضابط