رواية طفلتي
الفصل الثالث3
بقلم روريتا
لمن وصلنا رفعت رأسها لاحظت لي عيونها الكبار النعاسه وبي ابتسامه صغيره كده خلت جضومها تظهر قالت لي شكراً ونزلت ما عارف الحصل لي شنو بالظبط
مع انو كانت ثواني معدوده بس حسيت نفسي مشيت في عالم تاني.... قطعت تفكيري عبير وقالت لي اديني قروش
قلت ليها شايفك اتخذتي الفرصه ما شلتي مصاريف من ابوي؟
قالت لي نسيت... المهم اديتها القروش
قالت لي ما تجيني انا بطلع الساعه 1 برجع براي قلت ليها اصلا الجاييك منو ما فاضي ليك انا زاتي عندي شغل
اتحركت ومشيت على المحل الشغال فيهو
طول الطريق انا بتذكر في نظره رؤى بالجد نظرتها غامضه شديد وكأنها بتقول ليك تعال اكتشفني عيونها سرقتني
بعدها قلت لي نفسي يا ولد اتقل وخلي امورك دي 😂
تاني حب لا ارتباط لا قفلنا الباب ده نهائياً
وصلت المحل لقيت خالد مستنيني قال لي شنو الليله يا معلم متأخر ... قلت ليهو للأسف اشتغلت ترحال لي اختي 😂
قال لي ما عجبني ليك.... قلت ليهو يلا على الشغل يلا
بعد ساعه كده اتصل علي ابو سلمى
ابوسلمى: انت في الشغل يا ولدي؟
_ اي يا عمي
ابو سلمى : طيب دقايق واكون عندك
فعلاً كلها كم دقيقه وجاني
ابو سلمى : جيت اتكلم معاك يا ولدي
_ طوالي يا عمي...... خالد جيب لينا كبايتين شاي
خالد : اوامرك يا معلم
ابو سلمى : ما عارف اقول ليك شنو يا ولدي خجلان شديد من العملتو بتي ده رغم اني ما حارمها من حاجه ما عارف هي بتودي القروش وين
_ لا العفو يا عمي الحصل حصل وما ح نقدر نغير شئ وانا قفلت الصفحه دي خلاص
ابو سلمى : بس انا ضميري ما ح يرتاح لو ما شلت القروش دي.
طبعاً مد لي شنطه فيها قروش
_ لو بتعتبرني ولدك جد جد خلي قروشك معاك
انا ما داير اي شي والله والعفو والعافيه
ابو سلمى : والله انت احرجتني شديد طيب شيل الدبله والخاتم ده وانا ما ح ارجع بيهو البيت ده لو دايرني اكون مرتاح
_ طيب بشيلهم لو بترتاح انت كده واشرب الشاي ده عليك الله برد
ابو سلمى شرب الشاي وخت لي الدبله والخاتم في الطربيزه
ومشا يحليلو كان خجلان شديد الله يعينو بالجد.
بعد خلصت دوام وقفلت المحل مشيت السوق بعت الخاتم والدبله ودي كانت اخر حاجه تذكرني بي سلمى
"بعد مرور اسبوع"
اتصل علي ناصر صحبي
ناصر: وين يا مكنه شنو يعني بقيت رافع لينا قزاز كده
_ ياخ معقوله انا لمن ارفع قزاز ارفعو ليكم انتو مشكله والله طوالي بتكسرو😂
ناصر: اخبارك وامورك يا زول وين مختفي كده عاش من سمع صوتك ياخ
_ والله بخير الحمد لله ياهو مع الشغل ونفس الروتين
ناصر : سمعت من خالد انك فسخت خطوبتك
_ اي والله ما اتفقنا بس
ناصر: كلو لخير يا زولي وان شاء الله تلقى الاحسن منها
_ اي والله كل لخير، لكن خلاص انا قفلت الباب ده نهاي
ناصر : اه كلام ساي بكره بتجي البتخليك تكسر الباب🤣
_ نشوف غايتو 😂
ناصر: المهم بكره عاملين لمه كده في مزرعه الشله الكريمه كلها جايه
_ ياسلام ياخ والله لينا زمن من الايام دي رسل لي الموقع بس
ناصر: اي برسلو ليك هسي وانت عليك تجيب الباسطه الظابطه ديك البتجيبها
_ طيب قدام
ناصر : يلا اشوف وشك على خير
_ مع السلامه
اليوم التاني مشيت الشغل عادي بس قفلت المحل بدري
رجعت البيت ارتحت شويه اخدت دش وغيرت ملابسي
وطلعت مشيت جبت 6كيلو باسطه المشكله انو الطلعه الفاتت جبتها ليهم وما كفت😂😂😂😂😂
ان شاء الله المره دي يكونو جايبين حاجات تانيه غيرها
المهم مشيت على المزرعه المغرب كان باقي ليهو ساعه تقريباً
لقيت ناصر واحمد بس القاعدين جايين كانون وفحم وكفتيرا كبيره حقت شاي وجايبن فواكه تسلمت عليهم واتونست شويه كده جو الباقيين وبرضو اي زول جاب معاهو حاجه على قدرتو
ناصر ولع الفحم في الكانون واحمد قال ليهو الشاي علي
انا واسامه رصينا الحاجات وطبعاً الفنان حقنا فيصل جا يغني لينا بي جيتارو الجديد الفرحان بيهو يا سلام عليهو بدأ يغني ونحن مندمجين معاهو طبعاً
ناصر شغلها ليهو وقال ليهو شنو لكن اغانيك كلها عن الحب دي منو الشاغله بالك🤣🤣🤣🤣🤣
قال ليهو الله يخليها لي بس😂
قلت ليهو شنو يا ابو الشباب بقيت مخبي علينا حاجات كتيره ده انت زاتك الرافض الارتباط والعرس والكلام ده 😂
شغلناها ليهو شديد وطبعاً تعرصه الاولاد حاره
لمن حسينا بيهو زعل سكتنا بعدها المغرب اذن صلى بينا اسامه بعد ما صلى بينا في البدايه ناصر وضحكنا في الصلاة غايتو ما جادي نهاي 😂😂😂😂
بعدها احمد جاب الشاي شويه كده وفيصل غنا لينا تاني اغنيه
" ليه ياحب بدق علي بابي حرام ياحب ضيعت شبابي
ليه ياحب بدق علي بابي حرام ياحب ضيعت شبابي
انا من يوم في دربك سرت ياما بكيت وياما اتعذبت ليه عايزني اعود لعذابي بعد نسيت ياحب وارتحت
انا حبيت مره وحرماني
نصيبي الكان من لي حباني
ليه عايزني اعود من تاني
بعدمابقيت ياحب وحداني
قلبي ياحب خايفك تغريهو
ارجع لدربك ويبكي عليهو
قلبي ياحب خايف
خايف اشواك دربك تدميهو
ليه ياريد بتنادي علي"
لمن خلص من الاغنيه كلنا بي صوت واحد قلنا ' اوووووووووو' الموضوع كبير كان كده والتشغيلات تاني بدت🤣🤣🤣🤣🤣🤣🤣
عدينا القعده كلها ضحك و ونسه وتشغيلات استمرينا لحدي بعد العشا كده بعدها اتعشينا كان فيصل جايب ليهو فطاير
وقمنا انا رجع معاي احمد واسامه وفيصل اما الباقيين رجعو مع ناصر بالبوكسي.
وصلت الشاب بيوتهم اصلا ما بعيد ورجعت البيت كانت الساعه 12 وحاجه تقريباً لقيتهم نايمين كلهم مشيت رقدت اصلا شبعان حتى لو ما شبعان عبير الهبله بتكون اكلت اكلي ما بتخليهو لي اكيد 😂عارفاني لو رجعت متأخر بكوت ماكل
فتحت تلفوني لقيت اشعارات كتيره دخلت الفيس لقيت فيصل منزل صورنا في الفيس وطبعاً الشله الكريمه عاملين الكومنتات قروب ونسه فضايح خلاص 🤣
لكن حرفياً القعده حقتهم كانت رهيبه شديد عموماً قعدات الشباب حلوه حتى لو ما بتونسو يحليلهم البنات ما عندهم قعدات وطلعات زي دي
اتصفحت شويه كده في الفيس لقيت بوست مكتوب فيهو" كيف تعرف انك تحب شخص ما او متعلق بشخص "
مع اني بتجاهل البوستات دي دايماً وبعتبرها سخافات وهبالات الا اني تابعت الكومنتات وقريتها لمن وصلت لي آخر كومنت
كان مكتوب فيهو اذا ما زلت تفكر في اول شخص فكرت به فأعلم انك تخطيت مرحله الحب واصبحت مجنونا به.
وانا بقرى في الكومنت ده كنت بفكر في رؤى ما عارف كيف او ليه هي بالذات بس كنت بفكر فيها هي وبس.......