رواية طفلتي
الفصل الرابع4
بقلم روريتا
لمن وصلنا رفعت رأسها لاحظت لي عيونها الكبار النعاسه وبي ابتسامه صغيره كده خلت جضومها تظهر قالت لي شكراً ونزلت ما عارف الحصل لي شنو بالظبط
مع انو كانت ثواني معدوده بس حسيت نفسي مشيت في عالم تاني.... قطعت تفكيري عبير وقالت لي اديني قروش
قلت ليها شايفك اتخذتي الفرصه ما شلتي مصاريف من ابوي؟
قالت لي نسيت... المهم اديتها القروش
قالت لي ما تجيني انا بطلع الساعه 1 برجع براي قلت ليها اصلا الجاييك منو ما فاضي ليك انا زاتي عندي شغل
اتحركت ومشيت على المحل الشغال فيهو
طول الطريق انا بتذكر في نظره رؤى بالجد نظرتها غامضه شديد وكأنها بتقول ليك تعال اكتشفني عيونها سرقتني
بعدها قلت لي نفسي يا ولد اتقل وخلي امورك دي 😂
تاني حب لا ارتباط لا قفلنا الباب ده نهائياً
وصلت المحل لقيت خالد مستنيني قال لي شنو الليله يا معلم متأخر ... قلت ليهو للأسف اشتغلت ترحال لي اختي 😂
قال لي ما عجبني ليك.... قلت ليهو يلا على الشغل يلا
بعد ساعه كده اتصل علي ابو سلمى
ابوسلمى: انت في الشغل يا ولدي؟
_ اي يا عمي
ابو سلمى : طيب دقايق واكون عندك
فعلاً كلها كم دقيقه وجاني
ابو سلمى : جيت اتكلم معاك يا ولدي
_ طوالي يا عمي...... خالد جيب لينا كبايتين شاي
خالد : اوامرك يا معلم
ابو سلمى : ما عارف اقول ليك شنو يا ولدي خجلان شديد من العملتو بتي ده رغم اني ما حارمها من حاجه ما عارف هي بتودي القروش وين
_ لا العفو يا عمي الحصل حصل وما ح نقدر نغير شئ وانا قفلت الصفحه دي خلاص
ابو سلمى : بس انا ضميري ما ح يرتاح لو ما شلت القروش دي.
طبعاً مد لي شنطه فيها قروش
_ لو بتعتبرني ولدك جد جد خلي قروشك معاك
انا ما داير اي شي والله والعفو والعافيه
ابو سلمى : والله انت احرجتني شديد طيب شيل الدبله والخاتم ده وانا ما ح ارجع بيهو البيت ده لو دايرني اكون مرتاح
_ طيب بشيلهم لو بترتاح انت كده واشرب الشاي ده عليك الله برد
ابو سلمى شرب الشاي وخت لي الدبله والخاتم في الطربيزه
ومشا يحليلو كان خجلان شديد الله يعينو بالجد.
بعد خلصت دوام وقفلت المحل مشيت السوق بعت الخاتم والدبله ودي كانت اخر حاجه تذكرني بي سلمى
"بعد مرور اسبوع"
اتصل علي ناصر صحبي
ناصر: وين يا مكنه شنو يعني بقيت رافع لينا قزاز كده
_ ياخ معقوله انا لمن ارفع قزاز ارفعو ليكم انتو مشكله والله طوالي بتكسرو😂
ناصر: اخبارك وامورك يا زول وين مختفي كده عاش من سمع صوتك ياخ
_ والله بخير الحمد لله ياهو مع الشغل ونفس الروتين
ناصر : سمعت من خالد انك فسخت خطوبتك
_ اي والله ما اتفقنا بس
ناصر: كلو لخير يا زولي وان شاء ال
كنت بفكر في رؤى ما عارف كيف او ليه هي بالذات بس كنت بفكر فيها هي وبس حسيت نفسي مشوش جداً
قلت لنفسي دي حالتها نظره بس عملت فيك كده اجمد يا زول
حاولت انوم عشان اتخلص من التفكير ده
الصباح بدري صحتني عبير قالت لي ارح وصلني الايام دي ازمه في المواصلات وح اتأخر على الامتحان ارح قوم
قلت ليها يا الله من نقتك ياخ قولي براحه بعدين في زول بصحي زول كده؟ هسا لو ضربتك ما غلطان انا
قالت لي بطل كلام وقوم هسا كان قمت قبيل و طلعنا وصلنا الجامعه وراجعت
قلت ليها طيب طيب قايم
قمت سريع صليت واخدت دش شلت كبايه الشاي وركبت في العربيه وطلعنا
وصلتها الجامعه وعلى غير العاده قلت ليها امتحانك بنتهي متين عشان ارجعك؟
طبعا كانت ح تزغرت عديل من الفرح لمن قلت ليها كده😂
قالت لي الامتحان بخلص 11 لكن انا بقعد لحدي 12 ونص عشان اراجع ماده بعد بكره قلت ليها تمام
رجعت على البيت قلت افطر واسوق الحاج المستشفى عندو مقابله مع دكتور القلب
وانا راجع لمحت ياسر ( اخو رؤى) ومعاهو رؤى واقفين في المحطه.... والمحطه زحمه شديد
دقيت ليهم بوري واشرت ليهم عشان يركبو
ياسر قال لي اختو ارح اركبي احسن من تتأخري على الامتحان ركبت ورا واخوها ركب قدام سلم علي وقال لي اخبارك شنو اتونسنا شويه وبعدها قال لي كتر خيرك واقفين ساعه ماجات اي مواصلات
قلت ليهو لو عارفكم كان سقتكم معاي قبيل وديت عبير الجامعه + الايام دي في ازمه حقت جاز وزحمه وصف طويل في الطرمبات،،،، قال لي اي والله حاله صعبه البلد دي قدر ما نقول تتصلح بتمشي لي اسوء الحمد لله بس هسا اخوي الكبير محمد ليهو اسبوع مسافر بورسودان وما قادر يرجع عشان ازمه الجاز دي
قلت ليهو الله يعيونو ياخ وان شاء الله يصلكم بالسلامة
قال لي ان شاء الله
بعدها بي مسافه كده وصلنا الجامعه قبل ما تنزل رؤى
قلت لي ياسر بعدين انا داير ارجع اختي لو ما عندك مانع اختك برضو ممكن تجي معاها قال لي ما بتقصر والله
المره دي رؤى نزلت وراسها في الارض وقالت شكراً وبس وكان ظاهر عليها التوتر والخوف تقريباً امتحانها بدأ ولا عايز يبدأ.
قلت لي ياسر ماشي السوق صاح قال لي اي
سألتو كيف الدكان معاك وكيف الشغل قال لي ماشي الحال والله
الناس ما عندها موسم معين تشتري فيهو بهارات يعني الشغل ما بقيف الحمد لله
قلت ليهو الحمد لله التجاره عموماً دايره صبر بس
قال لي اي والله
وصلتو السوق اصلا ما بعيد من الجامعه رجعت البيت تاني
الساعه كانت عامله 9 ونص الحجه ختت الفطور فطرنا
وطلعنا انا وابوي على المستشفى وصلنا على الموعيد الحمد لله
دخلنا للدكتور فحص ليهو و وقف ليهو نوع حبوب وكتب ليهو فيتامين وقال ليهو ماشي كويس الحمدلله استمر على العلاج ده والراحه اهم شي والنفسيه لازم تكون كويسه لانو نص العلاج بكون نفسيا كلو ما نفسيتك مرتاحه كل ما العلاج اثر فيك ايجابيا وتعال لي بعد شهر ونشوف البحصل شنو تاني.
قلت ليهو يدك العافيه يا دكتور وطلعنا
بعدها رجعنا تاني الجامعه نسوق عبير ورؤى ياخ انا تعب عديل من اللف الليله
قعدنا استنيناهم نص ساعه بعدها جو طالعين ابوي سألهم من الامتحان قالو ما بطال قال ليهن بالتوفيق
ابوي طول الطريق كان بسأل من أخبار عمو مدثر ( ابو رؤى)
وهي كانت بترد عليهو وهي مبتسمه لمن نسيت الطريق وبقيت مركز معاها😂😂😂😂
وصلناها لي بيتهم و رجعنا بيتنا أخيراً مشيت الصالون فتحت الشبابيك الكهرباء كانت قاطعه بس في هوا سمح رقدت في السرير جاتني ليك نومه ظابطه كده غمضت عيونو وكلها دقايق بسيطه وطارت مني بي سبب الهبله عبير ياخ انا البت دي اخنقها ولا اعمل ليها شنو؟!! غياظه شديد ياخ😂
جاتني جايبه لي كبايه قهوه لمن استغربت فيها
قلت ليها غريبه عامله لي قهوه من غير ما اطلب منك،،،، قالت لي ما عملتها انا عملت امي 🙂 قلت ليها طيب دايره شنو
قالت لي دايره اسألك انتي رؤى دي عاجباك ولا شنو
قلت ليها لا ليه السؤال ده؟ قالت لي ملاحظه لي نظراتك ليها ما تنكر قلت ليها ح اعد لي 3 لو لقيتك قاعده قدامي بخبتك
قامت دايره تجري ناديتها قلت ليها اديني رقمها
قالت لي ليه؟ قلت ليها بطلي اسئله واديني ليهو وخلي الموضوع بينا
فعلا رسلت لي الرقم ومشت
قعدت قريب الساعتين افكر اني اتصل او ارسل ليها رساله
قررت اني ارسل رساله وبرضو قعدت تاني افكر ارسل ليها شنو وكل شويه اتردد ف كسرت الحنك وقلت ما ح ارسل
لكن للأسف اتراجعت عن الموضوع سريع ورسلت ليها المغرب داير امسح الرساله لقيتها اترسلت وعملت صاحين كمان يعني خلاص الليله يا صابت يا خابت
"عند رؤى"
جيت من الجامعه كان عندي امتحان ماليه الحمد لله عدا
ان شاء الله ننجح فيهو ونتخارج من دكتورو الشوم داك
كنت نعسانه شديد امس ساهرت عشان اقرى
نمت بي ملابسي حقت الجامعه ولا غيرتها زاتو ولا حتى صليت الظهر الله يغفر لي بس جريتها نومه لحدي بعد العصر كدا
قمت اخدت دش و وقفت تحت المويه ربع ساعه عشان اصحصح بعدها صليت الظهر والعصر سوا اتغديت عملت شاي اخضر ومشيت غرفتي اقرى لي امتحان بعد بكره اصلا الماده ما صعبه قلت اقرى الليله وبكره اراجع بديت اقرى لحدي ما المغرب اذن صليت ومسكت تلفوني قلت ارسل لي عبير اشوفها قرت ولا لسا على الاقل تطمني ساي انها ما قاريه زيي😂😂😂
فتحت الواتس لقيت رساله من رقم غريب مكتوب فيها ' سلام عليكم... رؤى كيفك' رديت قلت معاي منو؟
قال لي عبد الهادي اخو عبير...... طبعاً قلبي اشتغل زي الدلوكه على قدر ما كنت مبسوطه وانو هو عاجبني واي شئ على قدر ما كنت عارفه الكلام ده حرام وانو مفروض ما اتكلم معاهو لانو مافي حاجه بتربطني بيهو
قلت ليهو خير عايز شنو؟!...... قال لي الصراحه انتي عجبتني والله وانا عايز اتعرف عليك أكثر واتونس معاك
طبعاً لمن قريت كلامو ده ما باقي لي الا ازغرت 🤣🤣🤣🤣
بس مسكت نفسي قلت ليهو تتكلم معاي بي صفتك شنو يعني؟
لو عاجباك بالجد بتجي بالباب ما بالشباك وانا اي طريق ما برضي ربنا ما بنفع معاي ولو راجل بالجد بتعرف الدرب بي وين وطوالي حظرتو ليك.
' نرجع لي عبد الهادي'
طبعاً رؤى ردت علي وقالت لي في آخر رساله
تتكلم معاي بي صفتك شنو يعني؟
لو عاجباك بالجد بتجي بالباب ما بالشباك وانا اي طريق ما برضي ربنا ما بنفع معاي ولو راجل بالجد بتعرف الدرب بي وين وطوالي حظرتني.
لو قلت ليكم انها ما كبرت في نظري اكون كذبت على نفسي
كلامها حسسني بي اهانه شديد مع انو صاح قلت لازم اتصرف.
قمت على حيلي لبست جلابتي وطاقتي وشلت شالي وقلت للحاج ارح مشورا برضو هو لبس وقلت ليهو ما تنسى العمه
طلعنا مشينا على بيت عمو مدثر الكلام ده بعد العشاء كده
دقينا الباب فتح لينا ياسر ورحب فينا وفضلنا ودخلنا الصالون شويه وجا عمو مدثر
قلت ليهو يا عمي من غير اي مقدمات انا طالب يد بت رؤى على سنه الله ورسوله....