رواية طفلتي
الفصل الخامس5
بقلم روريتا
قلت ليهو يا عمي من غير اي مقدمات انا طالب يد بت رؤى على سنه الله ورسوله
عمو مدثر: والله نتشرف بيك وانا ما عندي اي مانع لكن في النهايه القرار قرار البت + هي عايزه تتم قرايتها
_ خليها تأخذ وقتها وتفكري على راحتها + انا ما عندي مانع نهائياً انها تتم قرايتها
عمو مدثر : طيب استنو مننا رد خلال الاسبوع ده وان شاء الله خير
ابوي : تسلم بارك الله فيك مع السلامه 💛
" مشهد آخر"
بعد حظرت عبدالهادي ختيت التلفون في الشاحن وكسرت حنك اني ارسل لي عبير قلت بتصل ليها بكره الصباح اصلا عندنا قاب
المهم واصلت قرايتي لمن تعبت مشيت عملت لي كيكه شوكولاتة اصلا بحبها يعني لو زهجانه بعملها ولو فرحانه نفس الشيء عموماً انا بحب الطبخ عملتها اخدت معاي ساعه كده وختيتها في الفريزر قلت اكل منها بليل بي مزاج بعد اخلي لي اخواني.
بعدها العشاء اذن صليت ومسكت تلفوني وجدعت الشيتات اصلا زهجت منهم
بقيت بحضر في التيك توك ( اي عندي نت مزهجني و محرق روحي🤣)
بعدها جاني اخوي ميسره في الثانوي هو اصغر واحد فينا قال لي قالو ليك اعمل شاي لبن في ضيوف
قلت في نفسي اداب زياره مافي نهاي هسا دي مواعيد الزول يجي فيها
قمت عملت الشاي ختيت ليهم من الكيكه العملتها وبسكويت من الدكان سألت ميسره كم نفر قال لي نفرين جيرانا بالحيطه ديل
لمن قال لي كده حسيت انو صبت فيني مطره عديل احساس انا عارفه الحاجه الجايين ليها.....ختيت ليهو الكبابي والسكر ومشيت غرفتي وحاسه انو ابوي ح يجيني في اي لحظه وخلاص القعاد غلبني وحاسه لساني زاتو اتبلع
بعد ربع ساعة كده ابوي جاني اتكلم معاي وقال لي عبد الهادي ولد جيرانه اتقدم ليك وانا الصراحه شايفو زول كويس ومافيهو كلام انتي رأيك شنو...... سكت مسافه بعدها قلت ليهو يا ابوي انا دايره اتم قرايتي لكن
قال لي ومافي زول معارضك بالعكس كلنا معاك وهو اكد لينا انو ما عندو مانع المهم انتي فكري وقرري بي راحتك هو مستنين مننا رد خلال الاسبوع
هزيت لي ابوي بي رأسي وطلع خلاني
ما عرفت اعمل شنو جا على بالي استخير ما عندي حل تاني
اتوضيت واستخرت 3 مرات تقريباً
كانت اغرب ليله تمر علي في حياتي نسيت الجوع وخليت الكيكه العملتها ولا اكلتها
حاولت انوم ما جاني نوم طوالي مسكت سبحتي بقيت اسبح لحدي ما نمت،،،،، صحيت الصباح بدري اصلي الصبح واقرى
ماجاني في رأسي الا اسم عبدالهادي وكنت حاسه بي راحه كده قلت خلاص يابت ده الشخص المناسب.
"عند عبد الهادي "
طلعنا من بيت عمو مدثر ورجعنا بيتنا ابوي كان مبسوط وقال لي ان شاء الله المره دي اختيارك يكون صاح
قلت ليهو ان شاء الله
بعدها لقيت عبير ام خشم خفيف كلمت امي يعني على الاقل كان تستنى لمن نجي والله انا زعلان من هسي على الحا يعرسها يحليلو ح يقرى الفاتحه على نفسو وهو ما عارف🤣🤣🤣🤣
امي قالت لي كان تكلمنا نمشي معاك قلت ليها في الخطبه ان شاء الله.
بعد 3 يوم مشيت الشغل عادي كان يوم أربعاء اتصل علي ناصر قال لي انا جاي عليك قلت ليهو في انتظارك
جاني بعد نص ساعه سلمت عليهو وقلت لي الاخبار شنو قال لي زفت في زفت... امس مشيت السوق في امان الله اجيب حاجات زي كل مره وقفت العربيه اشتريت حاجاتي وطلعت لقيتهم سرقو لي مرايه العربيه 🙂💔
على قدر ما حاولت اواسيهو على قدر ما ضحكت فيهو😂😂😂😂😂 والله ما قدرت امسك نفسي نهاي.
قال لي اهااا عندك مرايات صاح قلت ليهو اقعد اشرب ليك شاي معاي وهدي شويه خالد بجي هسي بجيبها وبركبها ليك قال لي تمام.
بعد مسافه كده ليهو حاسيك ما طبيعي في حاجه تانيه غير موضوع العربيه ده؟
ناصر : والله اسكت ساي مواضيع كتيره حاسي رأسي ح ينفجر
_ طيب احكي احتمال ترتاح يا زول
ناصر : خليني اظبط اموري دي بس وبجي احكي ليك اي شي
يلا اشوفك بخير
_ مع السلامه.
بعد شويه كده جاني اتصال من عمو مدثر... اخدت نفس وقلت ان شاء الله خير
قلت الووو،،،، قال لي كيفك يا ولدي
قلت ليهو الحمد لله بخير وانت،،،،، قال لي عالي العال الحمدلله
داير اقول ليك انو البت موافقه وتشرفونا في اي وقت
قلت ليهو على بركه الله وقفل كميه الفرحه الكنت حاسي بيها كنت قايلها دي اقصى مرحله خلاص في الفرح ما كنت قايل في أقصى من كده.
مشيت السوق جبت الدبل ما عارف مقاس اصبعها كم لكن قلت لو طلع كبير او صغير بنرجعو
عملنا الخطوبه يوم الخميس مع انو كانت شغاله امتحانات،،، الدبله والخاتم كانو ضيقات شويه في اصبع يدها اليمين
قلت ليها نبدلهم؟؟؟ قالت لي لا في اصبع يدي الشمال ح يكون مناسب.
حددنا العرس بعد شهر اصلا من تجربتي الأولى قلت الخطوبه الطويله ما تنفع ابوها ما عارض قال اصلا هي عندها اجازه شهرين وبعدها بتنزل سنه رابعه آخر سنه ليها طبعاً
على كده اتفقنا وقلنا بنبدأ التجهيزات من بكره
اتعشينا و ودعناهم وطلعنا
" عند رؤى"
بعد تلاته يوم ابوي جا سألني تاني وقال لي رأيك شنو طبعاً الخجل كتلني عديل وشي حمر اكتفيت اني ابتسم وادنقر رأسي انا لو علي ادخل تحت الارض من الخجل😂😂😂😂
ابوي قال لي السكوت علامة الرضا نقول على بركه الله يعني 😂؟ برضو ما رديت ليهو كن مدنقره رأسي لسا.... ابوي رفع لي رأسي وباسو لي وقال لي كبرتي وح اشوفك عروس أخيراً 💜
رغم اني كنت مبتسمه ليهو لكن جاتني لي بكيه كده
بعد شويه جات امي قالت لي لو بعرف ازغرت كان سمعت ليك الحله دي كلها حضنتني وقالت لي اهااا شايفه ح تعرسي من الجيران عشان تاني ما تقول لي ان شاء الله اعرس واحد نسافر بره السودان و اتكلم معاكم 5 سنه بالإيمو هسا ح تعرسي واحد امد ليك رأسي بالحيط تجيني🤣🤣🤣🤣🤣
والله امي دي غايتو
بعد مسافه كده ابوي قال لينا جهزو نفسكم قالو دايرين يعملو الخطوبه بكره وطلع مشا السوق.
انا بقيت افكر مع نفسي واقول ديل مالم مستعجلين كده هسا اجهز للإمتحان ولا للخطوبه يااخ😭😭😭
مشيت بديت اعمل ماسكات لي وشي واغسل ده واعمل ده وبليل قعدت اقرى لحدي 1 صباحاً وبعدها نمت
الصباح صحيت صليت وجهزت للجامعه مشيت امتحنت وجيت
لقيت امي الله يديها العافيه مجهزه اي شي قالت لي اخدي ليك نومه عشان بعدين تجهزي قلت ليها اساعدك قالت لي لا بنات خالتك جايين هسا امشي نومي
فعلا مشيت نمت صحوني قريب للمغرب،،،، بنات خالتي قالو لي لو ما صحيناك كان واصلتي لليوم التاني ولا شنو 😂
قلت ليهم احتمال المهم صليت العصر وختو لي الغدا مع اني شبعان من الفرحه وما قادره اكل بس اكلت😂😂😂 المغرب اذن صليت وبعدها بت خالتي فاطمه جابت لي كوره كبيره فيها مويه تلج قالت لي دخلي وشك فيها خمسه دقايق سمعت كلامها وانا من اول خمسه ثواني حسيت وشي اتشنج وكل ما اكون داير اطلع وشي تدخلو لي تاني لحدي ما تميت 5 دقايق لكن بالنسبه لي كانو خمسه ساعات المهم لبست فستان سماوي وبنات خالتي اي وحده دايره تجرب لي مكياج لمن انتهو حسيت انو دي ما انا دي وحده تانيه طوالي قمت غسلت وشي وضبطو براي عملت قلوص خططت حواجبي عملت ايشادو الوان ترابيه كده وماسكرا وانتهينا جاني ياسر بعد شويه قال لي انتي ما انتهيتي لسا الناس ديل منتظرين من قبيل طلعنا قعدنا معاهم
لبسنا الدبل كانت ضيقه شويه في اصبعي عبد الهادي قال لي نبدلهم؟ قلت ليهو لا ح تكون مناسبه في يدي الشمال
حددو العرس بعد شهر واتعشو معانا وطلعو
الساعه 12 الا لمن جات في رقم اتصل علي فصلت فيهو المره الأولى تاني اتصل تاني فصلت فيهو وتاني اتصل برضو فصلت فيهو لحدي ما اتصل للمره السادسه قلت ده منو العبيط اللايوق ده رديت وقلت الو؟ رد علي زول قال معقوله بعد ما بقى في رابط بيناتنا عشان نتواصل تفصلي فيني؟.......