رواية طفلتي الفصل السابع7بقلم روريتا
قمت على حيلي جهزت نفسي للشغل قلت امشي اشوف المحل حصل فيهو شنو في غيابي شربت الشاي وطلعت كده رؤى نادتني وقالت لي جيب معاك حاجات للبيت بعدين دايره تبدأ تطبخ واستأذنتني انها تمشي تسلم على ناس امها
قلت ليها جداً ما عندك مشكله امشي في اي وقت بريحك
ابتسمت لي وباست لي رأسي و ودعتني الحاجه دي كانت كفيله انها تخيل يومي جميل جدا جدا ❤️✨
طلعت مشيت على الشغل لقيت خالد مضبط الأمور في غيابي وممشي الشغل كويس ما قصر نهاي
"رؤى"
بعد هادي طلع على الشغل رتبت بيتي اصلا كان نضيف ختيت ملابسي وحاجاتي في الدولاب و ختيت ملابس هادي برضو
وبخرت البيت وقفلتو ومشيت اصبح على نسابتي
لقيت خالتو نسرين و عمو أحمد بشربو في الشاي سلمت عليهو وقعدت معاهم شربوني الشاي مره تانيه بالغصب سألتهم من عبير قالو لي نايمه كسلانه خلاص 😂
لا دقيقة شوفو البتكلم منو عن الكسل اخير اسكت غايتو انا🤣🤣🤣🤣🤣🤣
المهم بعد شربنا الشاي غسلت العده وعملت مع خالتو نسرين الفطور وعبير صحت نضفت البيت وفطرنا
بعد الفطور قلت لي عبير ارح معاي لي ناس امي
خالتو نسرين قالت لي في البدايه امشو الكوفير وارسمي تاني لانو رسمتك طلعت بعدين امشي قلت ليها طيب فعلاً مشينا الكوفير اتضبطت ومشيت سلمت على امي قعدت معاها كده لحدي بعد الظهر ورجعت لقيت خالتو نسرين دايره تقلى البن قلت ليها لا عليك الله خليها لي انا الليله المهم بعد تعب خلتني اعملها
عبير جهزت الكبابي و الفشار والبلح ولعت البخور وانا قليت ليك البن ده قليه تمام وعملت جبنه تكيف الكييف زاتو🤣
قعدنا كلنا في الصاله عمو أحمد قال داير يلعب شطرنج مع عبير
بدو يلعبو وكلها دقايق وعبير خسرت😂
قلت ليهو دوري دوري،،،، قال لي بتعرفي تلعبي؟
قلت ليهو اي،،،، قال لي نشوف
بدينا نلعب وانا خلاص تركيزي كلو في الفوز
قال لي خلاص خسرتي ضحكت وقلت ليهو وين كش ملك وفزت😂،،،،، طبعاً عمو أحمد ما بحب الخساره عشان كده قال لي المره دي حظك ساي تعالي نلعب تاني مره قلت ليهو طيب
تاني لعبت معاهو وبرضو فزت لكن المره دي اتعاورت وبقيت اقول ليهو فزت فزت فزتاااا😂
عبير قالت ليهو يحليلك يا ابوي زمنك داك كلو تغلب فيني تجي رؤى تغلبك مرتين ورا بعض😂
قال ليها ما مشكله الحظك المرتين دي جا معاها لكن ما ح يكون دايما معاها..... بعدها جا داخل هادي وشايل معاهو اكياس قال لينا أصوات ضحككم واصل لي باب الشارع الحكايه شنو😂
عبير قالت ليهو مرتك غلبت ابوي في الشطرنج 😂
قال لي حرام عليك ليه تغلبيهو الليله ما ح ينوم😂
عمو أحمد قال عادي الواحد ما لازم يفوز كل مره + مالك جاي بدري كده الليله؟
هادي قال ليهو خالد ماسك الشغل كويس وانا طلعت بدري مشيت السوق وجيت عشان كده
هادي مشا خت اكياس في المطبخ واكياس وداها بيتنا وقال بغير وبجي.
فعلا جا وشرب الجبنه معانا وقعدنا نتونس لحدي العصر
صلينا وخيتنا الغدا قعدنا كلنا نتغدا سوا وهادي كل شويه يقرب لي الصحانه ويخت لي عيشه وعمو أحمد و خالتو نسرين وعبير يعاينو لينا ساي وانا خلاص الخجل كتلني بقيت اعفص في رجلو عشان يفهم بس هو عبيط ياخ😂😂😂😂
بعد الغدا هادي قال ماشي ينوم وانا عملت الشاي وشربت معاهم بعدين قلت امشي اشوف الحاجات الجابها هادي
مشيت ولقيتو خاتيها في المطبخ دخلت اغلبها في التلاجه والباقيات ختيتهم في المسطبه
لقيت هادي نايم قلت اعمل لي ماسك في وشي
عملت ماسك زبده الكاكاو وشي كلو بقى اسود لكن المشكله لازم استناهو نص ساعه عشان ينشف واطلعو مسكت تلفوني قلت احضر لي حاجه في المسافات دي لقيت لا عندي نت لا عندي رصيد🙂💔
قلت خلاص افتح نت من هادي بس ما دايره اصحيهو شلت تلفونو ومسكت اصبعو براحه عشان افتحو بالبصمة صحا وقال بسم الله الرحمن الرحيم ده شنو،،،،، طبعاً انا نسيت اني عامله ماسك وقبلت ورا دايره اشوف هو بعاين لشنو قال لي ده شنو العاملاهو في وشك ده يا مجنونه😂،،،،، قلت ليهو ماسك المهم افتح لي نت،،،،، قال لي ولو قلت ليك ابيت،،،،، قلت ليهو اصلا غصباً عنك ح تبيت هنا داير تخليني براي هنا بليل اموت من الخوف صاح🤣🤣🤣🤣
قعد يضحك وقال لي خلاص عشان ضحكتيني ح افتح ليك نت لكن ما تخلصيهو😂. قلت ليهو طيب
دخلت الفيس اول شي قلت اشوف الحاصل شنو لقيت مافيهو اي شي دخلت الواتس رديت على رسايل صحباتي وسألوني ح انزل الجامعه الاسبوع الجاي ولا ح اجمد قلت ليهم ح انزل ان شاء الله
وبعدها دخلت التيك توك احضر واضحك ساااي هادي قال لي عينك قويه شديد يعني تقولي لي افتح لي نت تحضري بيهو تيك توك قلت ليهو اي اصلا لو نتك ولا نتي كلو واحد في النهاي نحن الاتنين واحد خليتو ليك يفصل🤣🤣🤣🤣🤣
وتاني قلت ليهو ح انزل جامعه الاسبوع الجاي ان شاء الله
قال لي طيب دايره تجيبي حاجات؟
قلت ليه دايره دفتر واقلام ( نظام يعني يقول عني طالبه مجتهده🤣). قال طيب حاضر
بعد اسبوع نزلت جامعه بس كانت متعبه شديد يعني الصراحه من ناحيه اني اجهز مشروع التخرج واختار ناسي المعاي لي اهتمامي بي نفسي وبيتي و مساعدتي لي خالتو نسرين كنت حاسه اني مقصره معاها يحليلها وقفت معاي انا و عبير كتير
وده كلو غير اني امشي اجامل الناس غايتو حياة الناس الكبار دي صعبه عديل يعني.
ده غير عزومات اعراس اصحاب هادي 😂
ياخ صادف مره واحد عرس الاسبوع ده الاسبوع الجاي عرس صحبو التاني.
خلصت السمستر السابع الحمد لله ❤️
باقي لي اخر سمستر اجزو لينا اسبوعين قضيتها كل نوم
نزلت السمستر التامن بس كان متعب اكتر من القبلو.
يوم ما كان عندي جامعه مشيت اساعد خالتو نسرين من الصباح اتكلمت معاي وقالت لي يا بتي انتو دايرين تقفلو الشهر الخامس ما بقيتو 3 لسا؟
قلت ليها لا يا خالتي،،،،،، قالت لي طيب امشو الدكتور احتمال في مشكله،،، قلت ليها الحاجه دي ما بيدنا بي يد ربنا وان شاء الله خير.
ما زعلت منها نهاي قلت هي اصلا في مقام امي واكيد دايره مصلحتنا.
بس الموضوع اتكرر كتير وشديد كمان
لدرجه نسوان اعمام هادي وبناتهم جو يشربو معانا الجبنه وامي زاتها جات ونسوان من الجيران.
ف بدو يتكلمو في الموضوع ويجيبوها من فقو انا ما سألتهم ولا رديت عليهم لكن زعلت هم دخلهم شنو يعني انا ما عارفه
اليوم داك وصلت حدي من الزعل وقدر ما حاولت اخبيهو ما قدرت نهاي........... هادي لمن جا وشافني زعلانه ما سألني وقال لي مالك قلت معنتى عارف الموضوع المهم قال لي ارح نمشي نأكل اسكريم احتمال الزعل يروح قلت ليهو طفله انا عشان ابرد الزعل بي اسكريم؟ قال لي اي طفلتي انا🌚
" عبدالهادي"
جيت من الشغل لقيت رؤى زعلانه عرفت السبب الزعلانه منو اصلا امي ليها كم يوم بتتكلم معاي فيهو ومن شفت نسوان اعمامي وبناتهم عرفت انهم اتكلمو في الموضوع بي طريقه مباشره او غير مباشره،،،،،،،، قلت اسوقها نأكل اسكريم
طلعنا بالدس من غير ما يشوفونا مشينا محل اسكريم قريب قالت لي دايره اكلو في العربيه قلت ليها كويس
جبت ليها الايسكريم بقت تأكل فيهو كانها طفله صغيره حسيت انو الطلعه دي غيرت معاها شديد.
"رؤى"
طلعت مع هادي من غير يشوفنا زول مشينا اكلنا اسكريم هديت شويه وانبسطت شديد الصراحه.
الايام جرت شديد والمناقشه باقي ليها ايام بس خلصنا المشروع وتعبنا فيهو انا وعبير اكتر شي لكن الولد المعانا الاسمو محمد ده دمو بقري شديد ياخ ما اشتغل معانا كتير.
يوم المناقشه التوتر عندي واصل لفل الوحش
هادي وياسر و ميسره وابوي وامي وخالتو نسرين وعمو أحمد كلهم جو يحضروها
المهم عملنا مراجعه سريعه انا وعبير ومحمد......... محمد قال ح يبدأ هو وانا بعدو واخر شي عبير.
هادي بقى يهدي فيني وقال لي اتخيلي نفسك انك بتتكلمي مع غنم وانسى اي زول في القاعه قلت ليها طيب.
دخلنا القاعه و محمد بدأ طبعا فاجأنا بي قوة شخصيتو كان بتكلم بي كل ثقه...... لمن جا دوري اتذكرت كلا هادي ومسكت الضحكه الحمد لله اني ما ضحكت قدامهم😂
بديت اتكلم عادي وكاني بتكلم مع نفسي سألوني اسئله جاوبت عليها وبعدها جا دور عبير خافت ورجفت في البدايه لكن مسكت نفسها طلعنا مبسوطين من المناقشه خلاص الحمد لله خلصنا وأخيراً باركو لينا واتصورنا ورجعنا البيت.
قررت اني ما اعمل زفه ولا تخريج هادي قدر ما حنسني قلت ليهو ما دايره جوطه قال لي راحتك
وعبير زاتها عشان انا قلت ما دايره تخريج قالت ما دايره قلت ليها ما تتقيدي بي قالت لي لا لا ما دايره انا.
" بعد مرور شهر"
صحيت الساعه 9 لقيت هادي طلع وعامل لي الشاي واااي قره عيني الحنون البحس بي❤️😂،،،،،، امس ساهرت عشان كده ما قدرت اصحى بدري قمت نضفت البيت وبخرتو ومشيت مشوار مع عبير وجيت فرحانه مستنيه هادي بس يجي الليله
قعدت احضر في التلفزيون كده هادي جا وكان ظاهر من وشو انو زعلان ومتضايق ما قال اي شي قعد جمبي بس وخت راسو في رجليني بقيت امس ليهو في شعرو وقلت ليهو كل شي ح يكون بخير ما في حاجه بتستاهل زعلك يا ابو مهند...