رواية طفلتي الفصل الثامن8بقلم روريتا
هادي جا وكان ظاهر من وشو انو زعلان ومتضايق ما قال اي شي قعد جمبي بس وخت راسو في رجليني بقيت امسح ليهو في شعرو وقلت ليهو كل شي ح يكون بخير ما في حاجه بتستاهل زعلك يا ابو مهند لمن قلت ليهو كده قام مخلوع وقال لي ابو مهند؟؟ قلت ليهو اي قبيل مشيت مع عبير فحصت عشان اتأكد مسكني شالني ودورني قلت ليهو اقيف يا مجنون راسي بلف كده😂😂😂 قال لي اسف اسف قلت ليهو في شنو تعال احكي لي مالك قال لي ما عارف اقول ليك شنو زاتو
بس المحل حقنا اتسرق لكن لي حسن حظنا المحل القدامنا محل تلفونات عاملين ليهم كاميرات عرفنا السرق منو والشرطه مسكتهم لكن المشكله انو الخساير كتير ممكن تفلس بالمحل كلو
قلت ليهو استهدي بالله وما تشيل هم ربنا ح يعوضك وكل شي لخير وقمت قلت ليهو دقيقة بس طلعت الدهب الجابو لي وخليت دهب ابوي الاداني ليهو،،،،، قلت ليهو هاك بيعو
قال لي لا رجعي الدهب ده مكانو ده حقك انتي قلت ليهو انت هسا محتاجو لازم تتصرف بيهو وتظبط الشغل من اول وجديد وتجيب لي غيرو واحلى منو وتكون غوايشو تقال وكبار يكشكشن لمن اصلح شعري او لمن اكون بطبخ ليك يعملو غنيه عديل كشششكشششكش وما برضى الا كده سامع 😂
قعد يضحك وقال لي حاضر عيوني ليك❤️
"عبد الهادي"
صحيت بدري خليت رؤى نايمه ما صحيتها امس ساهرنا مع الحاج والحجه وعبير،،،،،، عملت شاي لنفسي وعملت ليها جهزت نفسي وطلعت للشغل وصلت لقيت الناس ملمومين جمب المحل قلت الحاصل شنو دخلت لقيت خالد ضاربنو والمحل مسروق ما ركزت مع أي شى غير اني اودي خالد المستشفى قال لي لا لا انا كويس اصريت وديناهو الفحوصات طلعت نضيفه لفو ليهو شاش في راسو وخيتو ليهو يدو فيها جرحه كبيره وغريقه شديد الله ستر عليهو بس الحمد لله وصلتو بيتهم ورجعت المحل لقيت بتاع المحل القدامنا حارس لي المحل عشان ما تتسرق منو حاجه تانيه و وراني الكاميرات العاملها قدام محلو مصوره الشارع كلو والحمد لله عرفنا السرق منو طلع واحد حاقد من المحلات القدامنا بلغنا طوالي والشرطه جات مسكتو لكن الخساير كانت كبيره غيرنا كوالين الابواب والطبل ورجعت البيت كنت زعلان شديد وما قادره احكي قعدت جمب رؤى وختيت رأسي في رجولها قعدت تمسح في شعري قالت لي حاجه ما ركزت فيها الا لمن قالت لي يا ابو مهند
وعرفت انها فحصت واتأكدت انها حامل يااخ انا الفرحه ما وسعتني تاني حكيت ليها بالخساير وجابت لي دهبها قالت لي بيعو وصلح بيهو امورك بعدين ترجعو لي ضحكتني زياده لمن قالت لي ح تجيب لي واحد جديد غوايشو يكونو كبار يكشكشو لمن اصلح شعري ولمن اطبخ ليك يعملو غنيه كشششكشششكش 😂
تاني قالت لي عارف يا هادي احلى حاجه في عيونك شنو؟
قلت ليها شنو وانا خلاص قلت الليله مرتي ح تتغزل فيني،،،،
غمضت عيونها كده قلت ما قادره تقولها معنتى خجلانه
قامت قالت لي انو عيونك فيها انعكاسي 😂
طبعاً بقيت اعاين ليها مسافه البت دي مجنونه والله يوم بتجلطني يعني اليوم القلت فيهو ح تتغزل فيني اتغزلت في نفسها والله غايتو مشكله لازم تنزل لفل النرجسية عندها شويه😂 لكن بسطتني وخلتني انسى الزعل كلو
وبعدها مشينا قعدنا شويه مع ابوي وامي وكلمناهم بالخبر وانبسطو لينا لكن ما كلمناهم بي موضوع المحل عشان ما يشغلو بالهم بالذات ابوي لانو عندو قلب وخايف تحصل ليهو حاجه.
المهم بعد فتره بسيطه وسعت الشغل والحمد لله ماشي كويس
ومشينا انا ورؤى نتابع مع دكتوره عشان نشوف الحمل ماشي كيف ونطمن على البيبي قالت لينا هم اتنين ما واحد انا ما صدقتك بدل ولد واحد حيجوني اتنين.
مرت الايام يوم ورا يوم وبدينا نجهز حاجات البيبهات جبنا السراير واشترينا ليهم ملابس وكل لوازمهم بقينا منتظرنهم بس،،،، عبير نزلت شغل اما رؤى طورت من هوايتها ك كاتبه وبقت تكتب إبداعات الحمد لله زاتو لقت حاجه تشغلها من تقعد تنكد علي اليوم كلو ده غير الدراما حقتها 😂بس اعمل شنو اتحملها غصبن عني زاتو ونكدها يكون بالنسبه لي عسل ينزل على قلبي. مشيت معاها على آخر مقابله المره دي مشينا بدري قلنا عشان نخلص سريع ونرجع شفت بالصدفه سلمى اي سلمى زاتها شكلها بدت شغل في المستشفى دي ولا ما عارف شنو عملت نفسي ما بعرفها ولا ابديت اي رده فعل رؤى برضو شافتها وعرفتها لكن عملت زيي ،،،،،،،، سلمى شافتني وكانت مصدومه
المهم دخلنا على الدكتوره فحصت رؤى والبيبيهات وقالت كويسين واحتمال تلد في اي لحظه وبعدها طلعنا رجعنا البيت كنت حاسس بي رؤى متغيره وزعلانه خليتها نامت ومشيت الشغل لمن رجعت من الشغل مشيت قعدت مع ناس امي شويه سألتهم من رؤى قالو من الصباح الليله ما جاتنا
مشيت اشوفها الوقت داك المغرب اذن لقيتها بتكتب في حاجه تقريبا روايتها الجديده ودموعها نازله قلت ليها الجميل مالو زعلان المره دي كتبتي مات البطل في الروايه ولا نهايتها ما عجبتك،،،،،،،،، قالت لي لا الروايه حلوه ونهايتها سعيده لكن ما عارفه ليه ببكي،،،، قلت ليها احتمال السبب الهرمونات واحتمال السبب موقف قبيل.
سكتت كده وقالت لي لسا بتحبها؟ قلت ليها يا هبله انا ما بحب زول غيرك انتي لا دقيقة حب شنو انتي خليتني مهووس فيك اما ديك ف بقت من الماضي وانتهى.
ضحكت وقالت لي طيب انا عايزه شبس تمشي تجيبو لي هسا
قلت ليها طيب اصلي المغرب وامشي اجيبو ليك
صليت المغرب ومشيت جبت ليها كرتونه حقت شبس
قلت ليها اتفضلي ياست الكل + عندي ليك مفاجأة
قالت اهااا وريني سريع،،،، قلت ليها حنسيني قالت لي ابيت 🌚
ف استسلمت و وريتها المفاجأة رجعت ليها الذهب البعتو وجبت ليها واحد احلى واتقل منو قالت لي وااااي يا هادي جبتو لي عشان لمن اشيل ولد يعمل كشششششكششش بحبك ياااخ انا.
قلت ليها انا اكتر يا عمري ❤️+ دقيقة انتي هسا دايره الدهب عشان تكشكشي بيهو؟؟ قالت لي ده اهم شي كمان،،،،،، قلت ليها صحي نحن ما اخترنا اسماء للتوأم لسا،،،،،، قالت لي منو القال ليك انا اخترت اسم مهند وانت اختار الاسم التاني لكن يكون بحرف الميم،،، قلت ليها بس مؤيد
اي بس ح نسميهم مهند و مؤيد قالت لي اتفقنا + ارح شغل لينا فلم نحضرو ونأكل الشبس ده قلت ليها طيب لكن ما دايرين دراما ولا رعب ولا اكشن زاتو قالت لي ليه ياخ،،،،، قلت ليها عشان ما تكملي دموعك ح نحضر فلم كوميدي احسن غايتو لكن بعد نصلي العشا واعمل ليك عصير فريش كده اتفقنا قالت لي اتفقنا خلاص.
عملت العصير وختيتو في الفريزر مع انو ما يحتاج لانو الجو بارد العشاء اذن صلينا سوا اخترنا الفلم طفينا اللمبات ختينا العصير جمبنا وكرتونه الشبس وبقينا نفتح واحد واحد ونأكل خلصنا الفلم الاول قالت لي الوقت بدري نحضر تاني واحد فعلاً شغلنا تاني واحد لكن نامت في نصو والله بيبي بالجد😂
قفلت التلفزيون ختيت باقي العصير في التلاجه غطيت طفلتي. عاينت للساعه كانت عامله 12:41 الدنيا شتاء ما جايني نوم بقيت افكر في البيبيهات الح يجوني ان شاء الله وكيف اقدر اقضي اكبر وقت ممكن معاهم وما اخليهم يحسو بغيابي .... جاني اتصال من رقم غريب ما عارفو ده منو الما عندو ذوق بتصل زي المواعيد دي طوالي كنسلت المكالمه
ما كنت عايز رؤى تصحا وتتخلع
كفايه انو الحمل متعبها الفتره الاخيره دي بالذات انوهي في آخر شهر.
شويه كدا وجاتني رساله من رقم غريب برضو محتواها كان
" عبد الهادي.... أنا سلمى شفتك قبيل مع مرتك شكلها حامل
ومع انو انت شفتني بس اتجاهلتني وما سلمت علي قلت يمكن ما قدرت تسلم علي قدام مرتك... المهم انا اشتقت ليك وندمانه على العملتو فيك وعايزاك ترجع لي".
تقريباً قريت الرساله مرتين وبقيت اتذكر في الحصل كلو من البدايه،،،،،،،،،، قطع تفكيري صوت رؤى وهي بتقول لي هادي مالك سرحان وين قلت ليها لا لا كنت بفكر في الشغل بس مسحت الرساله وحظرت الرقم ونمت.
صحيت الصباح بدري طفلتي نايمه لسا قعدت اتأمل في ملامحها البريئه خدودها وانفها وعيونها ورموشها ويدينها الزي يدين الأطفال الدايما بتكون محمره بي جوه كنت بعاين ليها كاني شفتها اول مره فجأه صحت وبقت تعاين لي وغطت وشها طوالي بالبطانية وقالت لي بتعاين لي كده ليه يا مجنون قلت ليها داير اكلك قالت لي قوم من جمبي انت وهظارك البايخ ده قوم يلا في زول بعاين لي زول كده،،،،، طردتني عديل من سريري وانا المسكين قمت ليها😂😂😂
قلت امشي اعمل الشاي اصلا ما اظن تقوم تعملو لي الليله 😂
ختيت الشاي في النار اخدت دش سريع صليت الصبح ما قدرت اقوم اصليها في وقتها بي سبب انو ساهرنا طلعت باقي الباسطه الفي التلاجه،،،، وجيت قعدت جمبها قلت ليها انتي لسا ما قمتي كانت مغطيه وشها لسا قالت لي ما دايره اقوم قلت ليها لقيت باقي باسطه في التلاجه فتحت لي وشها براحه وحمرت لي وقالت لي دي حقتي لكن قلت ليها مالي ومالك شكلي ح اكلها كلها براي قالت لي لا خلاص قايمه استناني اتسوك واغسل وشي واصلي واجي قلت ليها طيب 😂
قلت في نفسي قامت عشان الباسطه والله غايتو كتر خير الباسطه الخلتها تقوم عشان تشرب معاي الشاي 😂
المهم شربنا الشاي واتغزلت فيها زي كل يوم ودعتها وطلعت على شغلي قبل ما اصل على الشغل عبير اتصلت وقالت رؤى شكلها ح تولد تعال سريع رجعت البيت بي أقصى ما عندي ربنا ستر انو ما عملت حادث،،،، سقتها وعبير وامي وامها جو معانا اما ابوي وابوها واخوي كانو ماشين ورانا
وصلنا المستشفى دخلوها غرفه العمليات وبقينا مستنيين
بعد شويه طلعت ممرضه شايله ولدي الأول،،، والتانيه وراها شايله التاني،،،، شلت انا واحد اذنت ليهو وقلت في نفسي أخيراً ح اثبت ليك يا رؤى انو الحب من أولى نظره حقيقه
انا شفت ولدي لأول مره وحبيتو وما قادر اديهو للممرضه تغير ليهو الا بعد تعب ،،،،،،، اما التاني شالو عمو مدثر اذن ليهو وبعدها اداهو للممرضه،،،،، بعد شويه جات الدكتوره طالعه قلت ليها ح تطلعو رؤى على غرفتها متين عاينت في الارض وقالت البركه فيكم......