رواية بائعة الورد الفصل الثالث3والرابع4 بقلم اسماء ابراهيم
دوما كنت أحلم بفارس يأخذني الي عالم الخيال ونحظي سويا بكثير من السعاده وتحقيق الاحلام ولازلت انتظر ذلك الفارس بجواد جامح يأخذني إليه لكي يهدأ قلبي ويخفق صوت نبضاته التي تعلو عند رؤياه فما بالك أيها الفارس انك تسكن بقلبي كشريان لا غني عنه ولم اتمكن من نزع حبك بداخلي فأظل احبك حتي الموت.
إلهام : نغم انتي يابت بقالي ساعه بنادي عليكي وانتي كيف الصنم فزي قومي شوفي لو عنديكي خلجات عايزه تتغسل الوليه ام سعيد تحت خلينا نخلصوا من الغسيل قبل ما تخلص .
نغم ابنه محمود الشناوي فتاه رقيقه رومانسيه وخجوله للغايه في العشرون من عمرها تدرس في كليه الاعلام
نغم: معلش ياماما ما وخداش بالي كنت بكتب حاجه تبع الجامعه.
إلهام: عليه عاد يابت بطني اني خابره زين ايه اللي في بالك واني بتمني يابتي يكون من حدك ونصيبك بس نقول ايه عاد كل شئ قسمه ونصيب واللي ربنا رايده هاتشوفيه.
نغم تنظر إلي والدتها بكسوف وتقول: اني هاقوم اجيبلك الهدوم وانزل اقعد في الجنينه شويه.
وبالفعل بعد أن أعطت نغم والدتها ملابسها اخذت بيدها دفترها الخاص الذي يشهد علي كل كلمه تعبر بها نغم عن حياتها وقلم ونزلت الي الجنينه جلست بمفردها كعادتها منذ سفر ياسمين فهي صديقتها بل اختها التي تعرف كل شئ عنها.
وبعد وقت ليس بقصير جاء معتصم القصر ليأخذ بعض أوراق خاصه بالمزرعه فوجد نغم جالسه عند شجره التوت وتستند بظهرها مغمضه العين فأقترب منها ووقف يتأملها ويبتسم فهو يحبها كثيرا ولكن لا يعرف كيف هي تحبه فكل منهم منتظر من الاخر أن يعبر بحبه .
تنحنح معتصم بصوت عالي قليلا ففتحت نغم عينها الخضراء وتنظر له بتوتر واضح وبصوت نبض قلبها الذي يبدو كالطبول.
معتصم: ازيك يانغم ايه يابنتي نمتي وانتي قاعده ولا ايه.
نغم: اني بخير ياولد عمي انا كنت قاعده بذاكر شويه وعيني غفلت شوي ،خير انت جاي بدري ليه.
معتصم وهو يجلس امامها ابدا عمك طاهر عايز ورق خاص بالمزرعه فاجيت اخده بنفسي ايه بقي كنتي بتذاكري ايه انا ممكن اساعدك لو تحبي.
نغم: تساعدني كيف يابشمهندس انت ناسي انا في إعلام مش زراعه.
معتصم بتفكير: امممم مش ناسي طبعا بس حبيت ارخم عليكي واقترب منها معتصم جدا ونظر في عينها دقيقة فكانت كفيله بأن تجعل نغم تذوب عشقا به ثم قامت من أمامه تجري لتصعد غرفتها وهي تلهث .
____________________________________
في القاهره عند ياسمين ويوسف كانوا يجلسون بمحل الورد الذي جهزته ياسمين لتحقق حلمها بأن تكون صاحبته
يوسف: المحل تحفه ياياسو وانواع الورد جميله ومميزه انتي عملتي كل ده امتي وازاي.
ياسمين: انا من وقت ما جيت علي دراستي هنا وانا بفكر في المشروع ده واللي شجعني اكتر أن في محلات ورد كتير بيكون ناقص عندها انواع كتير وكمان بيضطروا أنهم يستوردوا أنواع ورد من بره انا بقي فكرت ليه ماكنش انا ازرع الورد ده هنا ومع الوقت اكبر المشروع وبدل ما المحلات تستورد تاخد مني انا الورد ده.
يوسف: ياااااه ياحبيبي تفكير جميل جدا بس هانزرع الورد ده فين وازاي في انواع بتبقي عايزه مناخ معين وعنايه خاصه.
ياسمين: عارفه طبعا ودرست وبحثت عن كل حاجه وتعرف اكتر واحد هايفيدنا مين.
يوسف بتفكير اممم لا ماتقوليش معتصم وسالم صح.
ياسمين بضحكه رقيقه صح هو فيه غيرهم واحد دارس زراعه وبقي مهندس والتاني دارس طبيعه وجولوجيا يعني من حقي استغلهم.
يوسف: كل ده جميل ومعاكي فيه المشكله لو جدي ولا بابا وعمي محمود عرفوا ماتنسيش أنهم كانوا معترضين علي سفرك للجامعه اومال بقي لما يعرفوا انك عملتي مشروع والمفروض انك تستقري هنا.
ياسمين: مافيش مشكله انت ناسي ياحضره الظابط أن بعد الامتحانات خطوبتنا وانك طلبت من جدي نستقر هنا في القاهره عشان شغلك وانا اكمل دراسات عليا يعني لها حل وحياتي ياجو خلينا نفرح ومانفكرش في اي حاجه ويالا يابقي هاتخرجني فين اليوم قرب يخلص.
يوسف: ايه رأيك نروح سينما وبعدها نطلع نتغدا في الحسين وبعدها اوصلك السكن الغريب اللي قاعده فيه ما انا قولتلك في شقه جنب الجامعه بتاعت واحد صحبي وفاضيه يعني ممكن نأجرها منه.
ياسمين: ياجو الحجه وداد ست طيبه اوي وبتحبنا كلنا وانا ببقي مبسوطه وانا قاعده مع البنات وبعدين مش احسن مااكون قاعده لوحدي.
يوسف: والله انا مش عارف عمك محمود عرف مكانه منين السكن ده وإصراره علي انك تقعدي فيه .
ياسمين: مش عارفه يمكن لما كان بينزل القاهره كان بيسكن فيه أصل الحجه وداد قالت إنها كانت بتسكن فيه الناس اللي بتنزل يومين او عمال ولما كبرت وجوزها مات بقي سكن طلبات .
يوسف: ماشي حبيبي بس انا مش مقتنع بالحكايه دي ومصيري اعرف عمي محمود وراه ايه .
بفيلا مراد المرشدي رجل الأعمال المعروف كانت تقام حفله كبيره يحضرها صفوه المجتمع من رجال الأعمال والصحفيين بمناسبه عيد زواج السيد مراد المرشدي وزوجته سيده المجتمع سوزان تميم
شدوي: يعني يامامي ازاي ماتقوليش أن فيه حفله والمفروض اني انزل وارحب بالموجودين ونبان قدام الصحافه قد ايه احنا اسره سعيده وبنحب بعض.
سوزان: شدوي من فضلك بلاش اسلوب التريقه والاستهزاء واتفضلي قدامك نص ساعه وتكوني تحت ولما اروح اشوفك اخوكي هو كمان مانزلش ليه.
شدوي: مامي ممكن أسألك سؤال هو حضرتك عندك كام سنه.
سوزان: مش مهم السن وسؤالك مش مضطره اجاوب عليه بااااي ياقلبي،
تنظر شدوي علي ظل والدتها بحزن فهي لاتهتم بها ولا تعرف عنها شئ وكل اهتماماتها المظهر الاجتماعي والحفلات والجلسات في النادي برفقه زوجات رجال الأعمال.
بعدها قامت شدوي أحضرت فستان سهره لونه اسود رائع يصل الي ركبتها بحماله رفيعه جدا واسدلت شعرها الذهبي خلف ظهرها وقامت بوضع مساحيق التجميل فكانت ملكه متوجه ونزلت الي الحفل حيث خطفت الأنظار لها وفي الاعلي كانت السيده سوزان تخوض نفس المناقشه مع ابنها الأكبر فادي الذي رفض النزول الي الحفل.
فادي المرشدي هو دكتور في الجامعه التي تدرس فيها أخته شدوي ولكن لا احد يعلم بأنهم اخوات وهو بالفعل دائما يقوم بطرد أخته من المحاضره إذا قامت بشئ لا يعجبه.
سوزان: فادي من فضلك انا بقولك لازم تنزل الحفله انا تعبت اوي عشان اقنع اختك تنزل.
فادي: ماما إذا سمحتي انا ماليش في جو الحفلات والسهر ده وبعدين مش شايفه انكم كبرتوا علي حفله عيد وجوازكم.
سوزان بغضب هو فيه ايه بقي انت تقول كبرتوا وشدوي تقولي عندك كام سنه انا كده وهفضل طول عمري احب الحياه والحفلات وانت براحتك عايز تنزل انزل مش عايز خلاص.
خرجت سوزان من غرفه ابنها ولكن بداخلها حزن عليهم وبثواني رسمت ابتسامه علي وجهها ونزلت لاستكمال الحفل وبعدها بربع ساعه تفاجأت بنزول فادي ولكنه اقترب من أخته شدوي ووقف معها فهما لا يعجبهم طريقه تصرفات والدهم ووالدتهم وكان من بعيد شخص يراقب شدوي وفادي وعرف أنهم اخوات وأخذ يفكر بأن يستغل تلك المعلومه في شئ.....
#بائعه الورد
الفصل الرابع.....
في مساء اليوم وصل محمود الشناوي وابنه سالم الي قصر والده في قنا وكان في استقباله اخوه طاهر لينبهه من انفعال ابيه علي سفره بدون علمه.
طاهر: حمدالله علي سلامتك ياولد ابوي يارب تكون اتوفقت بسفريتك.
محمود: الله يسلمك يا ابو يوسف الحمدلله اتوفقنا والبضاعه اتخزنت كمان وسالم امن عليها
طاهر: الحمدلله علي ستر ربنا علينا ربنا يباركلك ياسالم ياولدي ادخل ارتاح وطمن أمك واختك عليك وانت يامحمود تعالي اتحدت معاك بكلمتين.
سالم: تسلم يا عمي وماتقلقش كل حاجه في مكانها وكله تمام عن اذنكم ادخل اطمن الجماعه بوصولنا.
دخل سالم البيت وترك والده وعمه في الجنينه وبعدها جلس كلا من طاهر ومحمود معا.
محمود: خير ياطاهر عاوز تتحدت في ايه ابوي لساه واخد علي خاطره.
طاهر: ده اكيد لكن اللي عاوز أقوله انك اول ما تدخل علي ابوي حب علي يده وراضيه بلاش قسوه قلبك دي واني قولتله انك بتعرف رجاله الجمارك ويتخلص بسرعه وكمان أن يوسف معاوزش يشتغل معانا.
محمود: هو كمان عايز يشغل يوسف وهو ابنك الكبير يفهم ايه في شغلنا مش كفايه عليه خد شغله عمه سالم واها هو الوحيد اللي نسخه منيه في الشكل والطبع ولاه هايخطب بته.
طاهر: ماتخافش ياولد ابوي يوسف مناويش يسيب شغله يعني كل حاجه في يدنا وابوك عمره ماهيفرق ما بينا سلام ياخوي .
وبعد ما ترك طاهر أخيه قام محمود بالدخول الي مكتب والده الحج قاسم الشناوي وألقي عليه السلام وقبل رأسه ويديه وقال....
محمود: كيفك يا ابوي وحقك عليه اني مارضيتش اعرفك خوفت تتعصب وتتعب واني قولت لطاهر اني هسافر ومعايا ولدي عشان نخلصوا قوام قوام وانا خابر زين دماغ يوسف معاوزش يشتغل معانا بحلفك برحمه سالم اخوي تسامحني وماتاخد علي خاطرك مني ومن سالم ولدي.
الحج قاسم: ياولدي اني واخد علي خاطري انك خبيت عليه كلكم ولادي وغلاوتكم واحده وربنا يبارك فيك وفي اخوك وولادكم.
محمود: ربنا يباركلنا في عمرك يابوي وطمن حالك استلمت الشحنه وسالم خزنها كماني هاقوم اتسبح واشوف امي احسن اتوحشتها قوي قوي.
الحج قاسم: ومرتك وبتك ماتوحشتهمش ياولد بزياداك عاد قسوه عليهم وراعي بتك نغم كبرت وعلي وش جواز خليك حنين عليها وإلهام ست طيبه واتحملت كتير روح لحالك ياولدي ربنا يهديك.
==============================
يوسف: وصلنا حبيبي يارب اليوم يكون عجبك وهتوحشيني اوي ياسمينه حياتي.
ياسمين: وانت كمان هتوحشني اوي ياجو اوعدني انك تكلمني كل يوم تطمني عليك انت هتسافر دلوقتي ولا بكره الصبح.
يوسف: الصبح ايه لا طبعا هسافر دلوقتي ده كلها يومين اجازه وارجع الشغل هسافر اطمن علي جدي وأهل البيت وارجع علي طول لان عندي مأمورية في مرسي مطروح.
ياسمين بدموع تلمع بعيونها فهي تقلق عليه كثيرا عندما تعلم بأن يوسف يخرج مأمورية تابعه لشغله: يعني افهم من كده وقت المأموريه مش هتعرف تكلمني وانا بموت من الخوف عليك.
يوسف: ياسو ياقلبي ماتخافيش وده طبيعي في شغلي انتي نسيتي ولا ايه ماهو نفس شغل عمي سالم الله يرحمه.
ياسمين: الله يرحمه ومتنساش كمان أن الشغل ده السبب في بعده عننا وانا معنديش استعداد اتحمل عليك حاجه ارجوك يوسف اوعدني تحافظ علي نفسك وترجعلي بالسلامه.
يوسف: يقترب منها ويقبلها في جبينها اوعدك ياقلب يوسف اني ارجعلك ويالا بقي اطلعي السكن عشان اطمن عليكي.
وبالفعل نزلت ياسمين من السياره وصعدت السكن وتحرك يوسف بالسياره للمطار ليلتحق بالطائره التي تتوجه الي قنا.
دخلت ياسمين السكن وألقت التحيه علي الحجه وداد والبنات وبعدها صعدت الي الطابق التي تسكن فيه وطرقت الباب وقامت أحد الفتيات بفتح الباب .
ياسمين: مساء الورد والياسمين عليكوا يابنات ازيك ياروضه
روضه: مساء الروقان ايه حضره الظابط كان هنا ولا ايه اوعدنا يارب.
ياسمين: يارب استر انتي بتقري علينا ولا ايه.
روضه: لا انا بحسد بس ربنا يسعدكم ياحبيبتي انتي تستاهلي كل خير وكفايه اوي وقوفك معايا دايما.
ياسمين: حبيبتي تسلميلي ربنا يديم المعروف الا قوليلي هي ناني هنا
روضه: اه طبعا البت دي طالعه فيها اوي مش عارفه علي ايه ولا طول النهار الهتش اللي بتقوله بابي مش عارف ايه ومامي بتعمل ايه وهي اصلا جايه من حواري اسكندريه.
ياسمين: مالناش صالح بيها عاد ربنا يبعدها عنينا وخلاص.
روضه: هههههههه اهو قلبت صعيدي اهووو متخافيش يابتي احنا رجاله وطول عمرنا بنوقف واقفه رجاله.
____________________________________
بفيلا المرشدي كانت الأجواء محتقنه بعد انتهاء الحفله فكل من فادي وشدوي لا يعجبهم تلك الاحتفالات التي تقام من وقت لآخر فبرغم من المستوي الاجتماعي المزدهر الا انهم لا يهتمون بذلك .بينما والدهم ووالدتهم معترضون علي ما يفعلوه أبنائهم.
شدوي: بابي سوري انا اخر مره احضر حفله من حفلاتكم دي
مراد: انا مش فاهم انتوا كده ازاي الحفلات دي مهمه جدا ونوع من أنواع البزنس ولازم نظهر قدام الناس كلنا .
فادي: عن اذنكم انا طالع اوضتي انام عندي محاضره الصبح تصبحوا علي خير.
مراد: استني عندك يادكتور ممكن افهم ايه وجهه نظرك
فادي: وجهه نظري مش هاتعجب حضرتك لأنك عارف كويس اوي هقول ايه وسبق وقولت لماما عليها ومعجبهاش
سوزان: شور معجبتنيش لأنها حاجه تافهه .
فادي: تمام حاجه تافهه فعلا سوري ياسوزان هانم تصبحوا علي خير.
شدوي: استني يافادي انا طالعه معاك سوري بابي عندي جامعه الصبح بدري والدكتور مصر يحرجني دايما.
مراد: سيبك منهم ياسوزان بكره يفهموا ويعرفوا أن كل ده عشانهم وأنهم يفضلوا عايشين في مستوي عالي.
سوزان: شور مراد بس قولي رأيك ايه في المشروع اللي قال عليه فؤاد الالفي ده مهم اوي الفتره الجايه وخاصه أنه منتجع سياحي في مطروح والأهم أنه علي مستوي عالي جدا.
مراد: هفكر واشوف الدنيا لان الالفي مش سهل وكل خطواته خطر ولازم اعمل الف حساب قبل الشراكه