ياسمين شاكر
خوله بدات في تجهيز المكتب ودخلت معاها ميار صاحبتا شريكه وقررو يشتغلو سوا في مكان واحد وبما انو خوله دفعت الايجار هي ميار قامت بتجهيزات الديكور ودفعت حق الدعايه والاعلان .. أمينه كانت غضبانه من الموضوع ده وقالت لي خوله انا رفضتك تشاركيني تقومي تجيبي لي صحبتك معاك المكان اكيد ما بكفينا كلنا ..
خوله: يا امينه إنتي اخذتي الجزء الاكبر في كل المحل ولسه بتنقي ؟ يا زوله انت في مكان ونحن في مكان ما راح نختلف ارتاحي ..
أمينة كانت موقفه شم الهيروين لها يومين لانها ما اتلاقت مع شريف تانيي وبكدا مزاجا معكر شديد وغضبا زايد وده ما كان ليهو مبرر بالنسبه لخوله اللي ما فاهمه السبب .. وخوله اصلاً على طول شايفاها ما طبيعيه ومجنونه بعض الشيء فما مهتمه بيها كتير..
خلال ايام كانت تجهيزات المكتب على قدم وساق من خوله و ميار
وكانوا بيجرو في كل الاتجاهات عشان موضوع الدعايه لمكتب للتصميم الداخلي الحديث . ..
سامي كان مع خوله كل يوم وبدعما وبتفقدا، كان مبسوط بي القرب ده رغم انو مامبين لي خولة غير جانب بسيط، كان قصدو يسيطر على خولة ويغير من شخصها الكلو عيوب ويصلح منها...
خولة كمان مبسوطة لي درجة تطور علاقتهم ولسة بتحاول تطوقو أكتر وبتعمل جهدها عشان تحسسو بإنها بتتغير عشانو...
في يوم اتلاقي معاها وحكى ليها قصة عن صاحبو الحصل ليه حادث قبل يومين تلاتة وللاسف امو كبيره في السن ووحيده والكان بخدما ولدها وهي الان محتاجة للمساعده فطلب منها سامي انها ترافقو عشان يمشو يخدمو المرا في بيتها .. قالت ليهو خولة كيف اصدقك مش احتمال انت كذاب؟ كيف امشي معاك بيت غريب وكيف اصدق الروايه ديا انت فاكرني غبيه؟ ممكن امشي ورا كلامك بسهوله؟
سامي: كنت واثق انك حتقولي كدا ما تخافي يا اخي نحن معانا ناس تانيين و هنساعد كلنا في خدمة المرا الطيبه دي لحد ما يطلع ولدا من المستشفى تمام؟ اطمنتي خلاص
خولة: ماشي أنا حكون معاك يا سامي في اي حاجه هساعد ولا يكون عندك فكره . بس لو فكرت تاذيني بأي طريقه حتندم مفهوم؟
وبكدا اتفقو يمشو لي بيت المرا سوا اليوم .. خولة تفاجأت انو من الناس الماشين معاهم هي ريم بت جيرانهم لي سامي.. حست بغيره من ريم لانها دايما بتظهر في وشها ،ودايما إعجابا واضح وصريح، إعجابها بي سامي.. لما وصلوا سامي طلب منها تغسل للمرا العده وكان متأكد إنها ما حصل غسلتا وهي ما اخفت قرفا الشديد من الموضوع وقالت ليه : ما في جونتيات لغسيل عده هنا؟ كان بختبر صبرها ورغبتا في المساعدة وهي عايزة توريهو إنها ممكن تعمل قدرتا لو حبت..
سامي: يا بنتي انت فاكره نفسك وين هنا ما في كلام زي ده غسلي بالموية و الصابون مباشرتا فهمتي كيف؟
ريم تدخلت وقالت ليهو خليها يا سامي يمكن ما بتعرف تغسلا انا بقوم بالمهمه دي
خوله عاينت ليها وقالت: إنتي ما تدخلي انا بعرف اغسلها بالطريقة البتريحني اوكي؟ خليك في مهمتك الكلفوك بيها..
سامي ساق خولة على جنبه و قال ليها اعتقد وعدتيني تكوني لطيفه وتبطلي تشوفي حالك على الناس..
خوله بزعل : ما انت شايف انها عايزه تعمل نفسها ظريفه و خدومه اكتر مني اسكت ليها يعني؟ حركات البنات دي انت ما بتعرفا انا بعرفا كويس
سامي: برضو يا خوله ما تشتبكي معاها او مع اي زول مفهوم؟ نحن جينا لمهمه خلونا نكمل بسلام طيب علشان ما ازعل منك
خوله هزت راسا على انها موافقه لكن بدون نفس وقالت ليهو اكيد انت هاتدافع ليها مش هي صاحبتك من زمان؟ و طبيعي تغلطني أنا بس اوكي ما مشكله بسمع كلامك وما هاعمل اي مشاكل وبأدي مهمتي بسلام وامشي..
وسكتت خوله على كده ، سامي حس انه اخطأ بانه يجيبا معاهو لأنها ما متعوده تخدم بيديها و كان لسه عليها شويه ما من أول يوم حاتكون زي ماعايزا تكون، حس بي إنه احرجا قدام الشباب اصحابو ديل وبينها ليهم دلوعه ..
خلصو المهمة على أكمل وجه وسامي وصلهم هي وريم وطبعاً وصلها أول وبراحة بعيد عن أسماع ريم راضاها بكلمتين بس ما باين انها رضت وفاتت خلتهم..
ريم كانت طول اليوم مستائه و محتاره في انه سامي ليه جاب معاهو خولة وتسائلت عن السبب ووين لاقي خولة و جابا معاهم؟ و بمجرد ما وصلت لبيتهم اتصلت على سهام وحكت ليها بالموضوع و سألتا عن مدى علاقه سامي و خوله وشنو اللم الشامي على المغربي
سهام: قلتي لي جاب خوله؟ شيء غريب شنو لماهم مع بعض؟ اجي يا سامي يا اخوي؟ البت دي بت سوسه اكيد وراها شي لكن سامي اخوي مسكين وطيوب وبكون انطلت عليهو الاعيبا وعاملة ليهو بت هميمة وبتساعد وخييرة.. خليه علي لازم اعرف وراهم شنو ما بخليها تلعب في دماغو..
سهام على طول قفلت الخط واتصلت على سامي وبعد السلام قالت ليه: عرفت الليله انك كنت مع ريم و كمان معاكم خوله، شنو القصه؟
سامي: وعرفتي من ريم ان شاء الله؟ ثم تسأليني عشان شنو كنت محتاج لمساعدتم واخدتهم معاي ارتحتي؟
سهام: ريم عرفناها لكن خوله وين لميت فيها وكيف قبلت تمشي معاك وتخدم كمان دي بت مدلعة وماحصل شفتها رفعت قشة في البيت
سامي: سهام ارجوكي ما تسأليني عشان تعملي ليك موضوع من وراي خولة خليها في حالا ليه خاتاها في راسك دايماً ؟
كالعاده سهام ما طلعت بي اي عقاد نافع، لأ وكمان بدافع عنها وبقول إنها خاتاها في راسا؟ اخوها ومثاليتو طبعاً وهي عارفه كويس حماتا السوسة الصغيره هي شنو و سامي ما في لستة تطلعاتها بس اكيد عندها غرض من انه تتواصل معاهو، آخ يا سامي ياخوي انا السبب ورطتك فيها خولة البلوة دي لكن مابريحا تصبر لي بس....
________________________
زينة حنست جلال يصبر عليها وقبل ليها عشان تطمن ليهو ويقدر يحاصرا ويمسك عليها حاجات يهددها بيهم..
جلال فكر يغير السياسة ويطمن زينة أنو هو بنتظرا لاخر العمر علشان تطمن .. زينة بقت متعلقه بجلال جدا جدا وزاد كرهها لأمين جدا جدا، وخلت حذرا من جلال وبقت معاهو طول الوقت قد تكون ما فرطت في نفسها بس اخر ونسات وطلعات واكترها سهر بالتلفون خصوصاً إنو أمين مشغول بنهال وأهلها المجرمين ، اللي بدت تسحب منو القروش بعين قوية بدون خوف لانها في الموقع الاقوى.. و جلال متونس معاها مرة شات ومرة مكالمات وهو بيسجل وبحفظ كل حاجه خصوصا المكالمات كان بحفظ أول بأول وكان بحرص يتكلم معاها كلام بذيء علشان يطوقا أكتر بالجرم المجهود و بعد ما ينفذ الخطه زينه حتسلم ليه نفسها وقروشا...
زينة : انا جد مبسوطه إني تعرفت عليك وحبيتك إنت الزول البناسبني فعلاً وكنا حانكون أحلى زوجين
جلال: لسه ممكن نكون انا وانتي إذا حابة وبدون مازول يحس بينا ولحد مانظبط أمورنا
زينة: تاااني؟ فكرتك نسيت الموضوع ده
جلال: بكرة عايز أشوفك ضروري عندي ليكي مفاجأة
زينة : مابقدر ياجلال ولدي عيان وقاعدة جمبو من أمس
جلال: تعالي حكاية بتاعة ساعة بس مابأخرك حبيبتي
زينة : اممممممممم ماعارفة اذا بقدر خصوصاً أمين مافي مسافر اخليه مع منو؟
جلال : انتي عندك شغالة وساكنة مع اهلك وماعارفة تخلي مع منو؟
زينة : ياجلال ماتضغط علي أجلا الجية دي عليك الله..
جلال: زينة! ما مشكله بخليك يومين ولازم نتقابل بعد اليومين ضروري ما تروحي لي فرحه المفاجأه العاملها ليك
زينة: طيب يا جلال يصير خير يومين ما مشكله، بس ممكن اعرف المفاجاه شنو؟
جلال : لاااااااااا ماتحاولي تفسديها ياحبي كل شي في وقتو حلو....
زينة: طيب امرنا لله ننتظر ونشوف . ..
وبعدها غير الموضوع ورجعو لي ونستهم القذره اللي دائما بتونسوها ...
زينة الموية بتجري من تحتها ولا دريانة، الله يستر من الجاي بس...
سهام من ساعة ما حمواتها التلاتة اشتغلو وعملو مشاريع وهي ناقة في أحمد عايزة تشتغل هي كمان.. أحمد زهج منها خلاص واخر شي قال ليها: أنا ياسهومتي مادايرك تشتغلي افضل ليك تهتمي بينا أنا بنتك والبيبي الجايي.
سهام :انا زهجت ياخ وعايزة تعمل لي مشروع زي سنتر زينة ولا مشغل أمينة
أحمد: سهاااام، انا ماشغلتي أخواتي، أبوي موجود بي طريقتو معاهم، أنا بتهميني انتي وأنا شغل مادايرك تشتغلي وانا ما مقصر منك من احتياجاتك انتي وبنتك فشنوووو ماتفتحي السيرة دي تاني كفاية صدعتيني...
سهام: ده ظلم ياأحمد انا مااقل من أخواتك في شي.، على الاقل لو لقوني شغالة مابسخرو مني وينبزوني طول الوقت
أحمد : متين نبزوك ان شاء الله؟
سهام: أكيد من وراك ياأستاذ وقدامك الملايكة البريئين
وبدت تبكي وتنوح قام هاج فيها وقال : خلاص صمي خشمك ده حاتصحي البت، أخواتي ماتحتكي بيهم وريحي راسك تمام؟ الزمي بيتك وخلاص وسدي بابك عليكي وانسي موضوع الشغل ده تماااماً
غايتو رفض يقتنع ليها بالشغل وقام خلاها دايرة تتشرط بي الزعل وبتفكر كيف تقنعو لأنها ماحاتستسلم...
وهي قاعدة كده سمعت اصوات سلام برا وأحمد شكلو بسلم على راجل وسامعاهو بقول : كيفك ياابن عمي حمدالله على السلامة الأخبار والصحة..
الشمار حرقا عايزة تعرف ده منو لكن لو طلعت من غير ينادوها أحمد مابريحا.. بقى واقف ليها في حلقها...
الضيف كان ود اخو نصرالدين اسمو هشام وكان في السعودية وجا نهائي، وجا يسلم عليهم لي ناس عمو بعد مشو حمدو ليهو السلامة في بيتهم هناك.. قعدو معاهو كلهم ونادو سهام أخيراً تسلم عليه..
سهام جات سلمت و بدت تكشف ليه الولد الجاي ده .. هشام بدا يتونس ويهاظر في البنات خصوصاً خولة وقال ليهم: كبرتو يا بنات خليتكم شفع صغار، و انتي يا خولة بتذكر لي الآن قنابيرك ديلاك العاملات زي قنابير لوزة في المغامرون الخمسه ..
كلهم ضحكوا ماعدا خوله ابتسمت ابتسامه صفراء وقالت: حتى انت زمان كنت شكلك جعان وضعيف زي القناية ورقبتك طويله زي الجمل..
كلهم ضحكو وهشام عاين لخولة وضحك وقال : لسه في اللماضة بتاعتك دي؟
إبتهاج ضاحكة: ياها خولة ذاتها ما بتتغير..
خولة : ولا حاتغير عشان ترتاحو .
هشام اخد قعدته واتونس وفات، لكنو بيت النية في نفسو إنو عايز يعرس من بنات عمو ديل وبالتحديييد منو!
بعد ودعو هشام رجعو قعدو سوا وخولة قالت بامتعاض: هشام ده مثال للشخص الدمو تقيل، بتخفف كده قايل نفسو مضحك..
أمينة: انتي يا خولة اللي بدوس ليك على طرف لازم يكون دمو تقيل و كل العبر فيهو ما اقل من كدا..
خولة: طبعا ، ولا برحمو لعلمك وبعدين انتي مالك ومالي أنا حرة اقيم الناس بمزاجي
أحمد ضاحك : ده بس عشان كان بقول ليها ياعروسي زمان
سهام قاعده معاهم بتسمع و تقلب في عيونا وفي نفسها بتقول بنات كريهات وقليلات الأدب واخوكم دلاهة ولا هاميهو هه حكم...
في اللحظة دي تلفون خولة ضرب عاينت لقتو سامي طوالي قامت فاتت وخلتهم قاعدين.. سهام الوحيدة الركزت معاها وقلبها ماكلا نفسها تعرف منو متصل بيها...
خوله ردت وسلمت على سامي، بادلها السلام وبدو يتونسو شويه وبعدين كلما انو مسافر وراجع بورتسودان..
خولة : بسرعه كدا؟ لسه ما لحقت أشبع منك وضيعت الأيام في التجهيزات للمكتب الجديد
سامي: وأنا كمان لكن إجازتي إنتهت ولازم أرجع بس بيناتنا التلفون يا ريت نفضل متواصلين
خولة : اكيد اكيد يا سمسمي هو انا اقدر انساك؟
سامي: خلي بالك على نفسك وما تنشغلي بالشغل الجديد كتير...
خولة ودعتو وقفلو على كده...
هل البعد والمسافات الطويله دي حا تأثر على علاقتهم ببعض ؟؟...
_____________________
في الايام اللي بعد اليوم ده كان في عرس هيثم اخو هشام الكبير وكل بيت نصرالدين مستنفرين للحدث، سهام اشترت توبين غاليين شديد وزينة بخستهم ليها وقالت ليها الشغل فيهم كتير وجايط، سهام زعلت شديد ودعتها في سرها.. خولة وأمينة اشترو فساتين بي أكمام طويلة لكن أمينة ماكان نفسها تلبس بي راي أبوها ،أفكار ناس شريف السماوية مأثرة عليها، بقت شايفة إنو من حقها تلبس فستان بدون أكمام وتفك شعرها بي راحتا، قالت في نفسها مجرد مانتزوج أنا وشريف ماليهم حكم علي تاني وبعمل الفي راسي...
طبعاً الصداع بقى ملازمها بسبب الجرعة الما اخدتها وحنست شريف يشوف ليها حل وقال ليها الا بي قروش قالو ولازم تدبر ليهو اي مبلغ يتصرف بيهو ووافقت طوالي.. شريف كان قايل لي صحبو انو البنات امرهم سهل وادمانهم كنز لأنهم ببقو زي العجينة الطيعة والمكسب من وراهم ماسورة قروش مفتوحة... أمينة وقعت ضحية لي ناس عديمين الضمير ببيعو الوهم وبنشرو أفكار ضد الدين والأخلاق الحميدة.. منو ممكن ينشلها من الوحل ده قبال تغرق؟.....