ريم رسلت لي سامي سلمت عليهو ورد ليها طوالي وسلم، وهو في نفس الوقت كان بدردش مع خولة، كان برد لي دي شوية ولي دي شوية لحد ماخولة قالت ليه: [شكلك مشغول في مكان تاني يلا سلام]
سامي[انتظري هو شنو السلام، انا مامشغول ماتطلعي تخليني]
سامي طوالي اختصر ريم وقال ليها[آسف ياريم يرجع ليك بعدين مشغول شوية]
ورجع لي خولة يكملو كلامهم..
ريم قالت لي سهام : قال برجع لي بعدين حسي مشغول..
قفلت تلفونا لكن سهام شالت تلفونا هي وفتحت الواتس اب ولقت سامي متصل وجابت اكاونت خولة لقتها متصلة برضو، طوالي رسلت عند سامي لكنو مارد ليها بسرعة كان مندمج مع خولة والحوار ساخن جداً كانو بتناقشو في امور تخص شغل خولة...
تاني رسلت رسالة وقالت ليهو وييين ماشفتا رسالتي يعني، رد ليها أخيراً سلم عليها وقال ليها مشغول شوية
سهام[مع منو مشغول قدر ده]
سامي[ عايزة حاجة ياسهام؟]
سهام[بسلم وبفقد فيك وانت مهمشني]
سامي:[ لا والله بس كنت مشغول قلت ليك]
سهام:[ عايزاك في موضوع ضروري ممكن؟ ]
سامي[ جداً نص ساعة كده وبرجع ليك]
سهام ختت التلفون وقررت في نفسها توري سامي انها عرفت بي تواصلو مع خولة ولازم بأي طريقة تنهي الموضوع ده بيناتهم...
بعد مدة ريم اتونست مع سهام وفاتت بيتهم.. سامي إتصل بي سهام عديل بدل الدردشة وهي ردت بي لهفة، بعد السلام سامي قال : هااا كنتي دايراني في شنو؟
سهام : شوف ياسامي بدون مقدمات أنا عايزة أعرف منك هل في اي علاقة بتجمعك بي خولة حماتي؟
سامي استغرب السؤال وقال : لييه بتسألي يعني خيييير
سهام: عشان أنا عرفت الشي ده صدفة لكن عايزة أسمع منك انت
سامي : اتعلمتي الحشرية يااختي العزيزة
سهام: سامي ياريت تبعد من البت دي، مابتصلح ليك ولا انت بترضي طموحاتا، ماتصدقها دي بتلعب بيك وتمروحك بعدها تفكك
سامي: أنا زول كبير يااختي أعتقد، ماساذج لدرجة إنها تلعب علي وماافطن لي كده
سهام: يعني معترف إنك على تواصل بيها أنا متأكده إنها باهراك بي عزها وجاها
سامي: زي ما أحمد بهرك بعزو وقروشو يعني قصدك؟ بعدين أنا مانكرت عشان أرجع أعترف ايوة أنا وهي في بيناتنا بداية ارتباط
سهام: سامي اصحى لي نفسك خولة منو البتعاين ليك وتعرسك
سامي: اقفلي اقفلي الله يهديكي وماتدخلي في شؤوني لو سمحتي
رفض طبعاً يسمع منها وقفلا ماقدرت تناقشو فقررت شي تاني، أول ماترجع حاتواجه خولة وتمنعا من إنو تتواصل تاني مع أخوها...
سامي دمو فاير بسبب سهام وعباطتا وتدخلها كل شوية في حياتو.. دخل الواتس اب لقى ريم أون لاين فدخل سلم عليها واعتذر ليها إنو اختصرها قبيل..
ريم نست كل الإحراج الحستو لحظتا و إتونست معاه بي كل أريحية..
سامي أي نعم بعز ريم شديد لكن ماقادر يميل ليها ويسيب خولة البقت متحكمة في قلبو ومشاعرو.. أما ريم ختاها في منزلة الصديقة...
سهام المسا كانت في بيتهم وبقت تراقب الجنينة منتظرة تلمح خولة لكن ماطلعت الليلة قعدت زي كل يوم..
تلاتة أيام مرو وماقدرت تختلي بيها او تلاقيها صدفة حتى.. فكرت انو الإنتظار مامن صالحا لأنو كل يوم بمر بقرب خولة أكتر من سامي، قررت ترسل ليها رسالة وفعلاً رسلت ليها في الواتس انو ضروري دايراها في موضوع وقالت ليها تعالي المسا في الجنينة برا..
خولة إستلمت رسالتا واستغربت لأنو ماعندها تخالط بي سهام وبتختصرها قدر الإمكان لكن ردت وقالت ليها تمام نتلاقى ان شاء الله..
جا المسا بس خولة ماظهرت، وسهام منتظرة وزهجت من الإنتظار وذاد حنقا وغضبا على خولة..
بعد بقت الساعة 9 ونص خولة نزلت الجنينة أخيراً ولقت سهام خلاص قايمة ولما شافتا قعدت
خولة بادرت طوالي وقالت : خير يا مرة أخوي قلتي دايراني
سهام اتنهدت وقالت ليها بهدوء: اقعدي طيب
خولة : قعدنا، هاااا اتفضلي قولي
سهام اتنهدت تاني وقالت ليها بحزم : شوفي بدون لف ودوران أنا عارفة إنو في شي بينك وبين سامي أخوي ولي علمك انا سمعتك مرتين بتكلمو في التلفون سوا ، خولة مااظنك جادة في نظرتك لي سامي واظنك فاكرة المواضيع دي لعب، عليك الله ابعدي منو وماتجيبي لي ولي أخوي مشاكل مع أهلك لو عرفو بي الموضوع ده
خولة مااستغربت انها عرفت لأنو من الصفات العرفتا في سهام هي التصنت على الناس والنبيشة في حاجات مابتخصها ، إتكلمت بي لهجة جادة برضو وقالت ليها: اظنك مكبرة الموضوع، المشاكل البجيبها شنو غير تحاريشك انتي لي أحمد؟ ثم اعتقد أخوك كبير وواعي وعارف نفسو عايز شنو مامحتاج واحدة زيي تجي توجهو توجهات هو ماعايزا، انتي ياريت تخليك في حالك وتسيبينا في حالنا
سهام : يعني عايزة تقنعيني إنك بتحبيهو؟
خولة : ليه يعني سؤالك ده؟ هو سامي مابتحب؟
سهام: سامي ماغني ولا عندو ليك قروش
خولة : أنا العندي القروش وبديهو الغالي والنفيس ولا يهمك إنتي وزي ماقلت ليك ماتتحشري بيناتنا
سهام : خولة بحذرك لي اخر مرة سيبي سامي في حالو
خولة بسخرية : شكلك نسيتي نفسك ياسهام وعبرتي حدودك، إنتي بالذات ماعندك وش تتكلمي، ماتنسي جريك ورا أحمد أخوي بكل الطرق حتى بعد عرفتي إنو اهلو ماطايقنك ومادايرنك برضو عرستيهو وأنا عارفة وانتي عارفة إنك عرستي عشان قروشو والعز الهو فيهو ، فرقنا اني بحب سامي وبحبو شديد وماتفتكري بي كلامك العبيط ده حااسيبو وأبعد منو
سهام اتحرقت شديد وقررت تستخدم آخر كرت عندها فقالت ليها: سامي نحن دايرين ليهو ريم، أمي دايراها ليهو وحايخطبا هي في الأخير لأنها من توبو واخلاقا زي الالماظ
خولة ضحكت وقالت ليها : العندها اخلاق زي البتقولي عليها دي مابتمشي مع واحد لي بيت غريب وتصدقو بسهولة
سهام : هههه وانتي مش مشيتي برضو؟
خولة بسخرية : انا بت عادية لكن اخلاقي ما الماظ زايد إني بتاعة أولاد ولا نسيتي يوم حرشتي علي أحمد؟ شوفي ياسهام اختيني احسن ليك انتي مابتعرفيني كويس، علاقتي بسامي دي حاجة بتخصني أنا وهو لما يجي يشكي ليك تعالي اتكلمي
سهام : وانتي لسة مابتعرفيني برضو، سامي حايخطب ريم وحاتشوفي
خولة نهت النقاش وفاتت بهدوء وسهام بتغلي من الغضب، لامبالاة خولة عرفتا انها قدام تحدي كبير، سهام مكبرة الموضوع ولو سألوها مالها واجعا انو سامي يتقرب من خولة هي ذاتا ماعندها سبب واضح..
خولة بعد رجعت غرفتا حست بي غضب شديد، اكتر شي بضايقا في الحياة دي بقت سيرة ريم إياها.. بعد وعدت سامي تتصل عليهو كنسلت الحكاية ومااتصلت ،قام هو بعد غلبو الإنتظار إتصل هو مسافة وماردت، تاني ردت وصوتها بارد جداً
سامي : وينك يابت منتظرك أنا من قبيل
خولة بادرتو بي مفاجأة وقالت ليهو : سامي أنا ماعايزاك في حياتي بعد اليوم ودي آخر مرة اسعى ليك واتودد ليك فيها وياريت تاني ماتحاول تواصلني تمام؟
سامي اتهجم وقال : نعم؟ كده فجأة قررتي؟ ده شنو الكلام الغريب ده في شنو يعني حصل شنو
خولة : في إنو انت بتخدعني وفي نفسك نوايا تانية وللأسف مابقدر ألومك لأني أنا السعيت ليك عشان تحس اني بحبك قدر شنو ماانت البادرت
سامي: خولة اتكلمي بي وضوح شغل الالغاز ده سيبيهو، كيف يعني خدعتك
خولة شاكلتو وقالت : بتضحك علي؟ عايزك ياخولة في حياتي وبلا بلا بلا وانت خاتي عينك على ريم وعايز تتقدم ليها
سامي: خلاص قمتي لي جنونك وافكارك دي تاني؟ ريم مجرد صديقة وبت جيرنا ليه فجأة كده سويتيني حااعرسا وكمان بخدعك
خولة رجعت لي هدوئها تاني وقالت : إذا كانت سهام أختك لسه مأكده لي الموضوع وانك حاتخطب ريم وهددتني ابعد عنك بما إنو انت زول مرتبط، يلا ربنا يسعدكم وانا دي الله يربط على قلبي واقدر انساك بعد بقيت كل شي في حياتي
سامي استاء لي اقصى درجة وقال ليها : اسمعيني ممكن؟
خولة : مافي كلام يتقال بعد كده، مع السلامة ياسامي يااخو سهام مرت أحمد أخوي
قفلت الخط وبعدو قفلت التلفون..
سامي ماقدر يتوصل ليها بعد قفلت تلفونا وحاول وحاول اصلو مافتحتو تاني، خلاص اتملى فل وفي اللحظة دي لو لقى سهام قدامو كان خنقا وطلع روحا في يدينو من شدة الغضب، كان عايز يتصل بيها حسي ويشاكلا لكن قال اكيد أحمد قاعد فأجلها للصباح لكنو من الزعل مانام تاني للصباح
خولة أصابت الهدف بدقة وكانت على ثقة انو سامي حايتمسك بيها أكتر بعد الكلام ده، غبية سهام لو فاكرة انها حاتقنعها بسهولة تبعد عن سامي..
______________________
في بيت زينة، كانت الساعة 11ونص وزينة نومت ولدا وجات رقدت، بعدها بشوية جا أمين داخل وراها وجا رقد برضو، حاول يبدا معاها علاقه وبدا يملس في شعرها لمن فجأة بعدت يدو بسرعة وقالت بضيق: أمين أرجوك انا عايزة أنوم وماعندي مزاج لي شي ممكن؟
أمين اتململ وقعد في قلب السرير وقال: مالك يابت خالي في شي مضايقك مني؟ ليك يومين مامظبوطة معاي مالك؟
زينة : مافي شي يعني الا يكون في شي؟ وبعدين يادوب لاحظت من يومين؟ طبعاً ماانت مادريان بالدنيا بقيت
أمين بلع ريقو وفكر زينة كشفتو او شاكة فيهو دي مشكلة لايمكن يقدر يواجها لو اتشعبت فحاول يلطف الجوو فقال ليها: زيونتي عارف إني إنشغلت منك وده غلط كبير ارجو تسامحيني عليهو واوعدك اهتم بيك وبي ولدنا ونطلع ونتفسح ونقرب اكتر لبعض رايك شنوووو؟
زينة بالجد ماطايقاهو لكن عاملة حسابا ماتلفت نظرو لو زادت في الجفا فقررت تسكت وتعمل نفسها رضت وضحت وسلمتو نفسها وهي كارهة..
ال ضهر كده وهي طالعة على شغلها جاتا رسالة من جلال طالب منها تجي الشقة الأجرا جديد ضروري، رجعت ليهو بتلفون تستفسر وقالت : مش اتفقنا انو ملاقاة في خلوة برانا لأ؟ مابقدر اجيك في الشقة ولا شي انسى
جلال : زينة انا صبرت عليك كتير يابت الناس وماانا البتضربني مرا على قفاي وتمطوحني، غيرك في كتاااار وبإشارة واحدة اي واحدة بتجيني طايعة وببلاش كمان
زينة : شنو الأسلوب الجديد ده ياجلال أنا مابقبل تتكلم معاي كده، لو مادايرني يفتح الله يازول
جلال : لاااا ياحلوة ما بالساهل كده، شوفي يابت الناس ياتجيني حسي دي وتديني العايزو منك يااستلقي وعدك معاي.. بفضحك فضيحة ليها ضل وعندي الدليل.. فاكراني حااتفرج عليك كده كتير وانتي عايشة مع راجلك ونايمة معاهو وانا حارماني؟ وتقولي لي بحبك ياجلال بي الخشم ساي؟ لاااااا الليلة دي بحددا معاك يازينة، فوراً تقومي تجيني
زينة مصدومة منو ومن كلامو ونهرتو وقالت : ياخسارة ياجلال طلعت ندل وجبان ووهمتني بي حبك لي؟ يلا انا مابجيك مهما تقول لي ولا تهددني والعايزو اعملو
جلال : مابقول ليك بنشر وسخك في الفيس لااااا بوصل ابوكي وراجلك سوا واقعدهم وافهمهم الحاصل ، لكن لو عايزاني اتريس شوية يبقى تشخللي جيبك وتدفعي لي تمن سكوتي ياتجي زي الشطار وادخل عليك
وبقى يضحك يضحك ضحكات هبلة كده قصدو يستفزها بيها وقفل الخط..
زينة بترجف بترجف ووقعت من طولا في الشارع لمن الناس رفعوها وعلى اقرب مستشفى..
خولة فكرت تمشي لي زينة تاني في البيوتي سنتر وتعمل اي شي تغير بيهو مودا وإتصلت عليها، مسافة مافي رد لحد ماتح الخط وسمعت صوت راجل بقول الوووو؟
خولة استغربت وقالت : الووو منو معاي وين زينة؟
الصوت : يااخت هنا المستشفى وست التلفون ده جابوها قبل شوية عندها هبوط حاد وفقدت الوعي في الشارع
خولة اتهجمت وقالت بسرعة : ياتو مستشفى قول سريع
وصف ليها وقامت بسرعة خطفت شنطتا وجري على الشارع..
ماعارفة وصلت كيف وجرت تفتش على مكان زينة مرقدة لمن عترت فيها ،سألت الدكتور من الحاصل قال ليها : يبدو إنها اتعرضت لموقف حاد خلاها تفقد الوعي وحالياً اعصابا تعبانة شديد الفحوص الاجريناها ليها أكدت كده، حسي هي كويسة لكنها نايمة، انا اديتها حقنة تنومها كذا ساعة لمن ترتاح على الآخر وحاتقوم كويسة ان شاء الله اطمني تماماً..
دخلت ليها تشوفها لقتها نايمة بعمق، وقفت محتارة شنو الممكن يكون حصل يخلي زينة توصل للحتة دي؟ البت دي وراها سر ولازم تعرفو، لاحظت ليها كتير إنها ما على بعضها.. لازم تتدخل وتعرف المشكلة شنو وتقيف معاها.....
بعدها فاقت لنفسها وبسرعة إتصلت على أبوها كلمتو بالحصل لي زينة وقالت ليهو كلم أمي والباقيين، ووصفت ليهو المستشفى...
وهي قاعدة كده بتفكر جات رسالة في تلفون زينة وتاني رسالة، طوالي قامت على التلفون مع عارفة حست انو عايزة تعرف منو رسل..
التلفون مغلق برمز لكن الرسالة ظاهرة في الشاشة بإسم جلال وظاهر بدايتها بس مكتوب فيها (أرجو تكوني عقلتي وعرفتي كويس الراجي..... )
الرسالة التانية فيها (ممكن ارسل ليك التسجيل وقتها حاتعرفي إني مابهظ.......)
الباقي للأسف ماظاهر، خولة رفعت حواجبها وقالت : جلال؟
حاولت تتزكر وين سمعت الإسم ده بس ماعرفتو، محتوى الرسالة اقلقها جداً وحست في شي ماياهو، بقول ارجو تكوني عقلتي ، وشكلو الموضوع فيهو تهديد ياترى ده السبب الخلى زينة تتعب وتنهار كده؟ اخ يازينة وراك شنو يامرا وهببتي شنوو
خولة بقت تعبانة وراسا حاينفجر ماعارفة تصل لي شي ومافي غير تنتظر زينة تفوق وتبقى كويسة وتحاول تفهم منها في شنو ومنو جلال ده.....
___________________
سامي بعد قضى الليل في زعل وحيرة وقلق ماصدق الدنيا اصبحت وحدد زمن مناسب يطمن انو أحمد يكون مرق شغلو وضرب لي سهام طوالي وبهدلا : أعتقد إني حذرتك ماتدخلي في شؤوني ياسهام انتي مابتفهمي؟ مالك ومالي ارتبط بي خولة ولا بي الجن الأحمر إنتي مااااالك
سهام : لحقت شكت ليك؟ وانت جاي تتنوفش فيني؟
سامي : ماليك حق انو تتكلمي معاها بي إسمي وتفتي في موضوع ماليكي بيهو علاقة
سهام : كيف ما لي علاقة؟ خولة دي اخت راجلي، تفتكر لو عرف حايريحك؟ ولا بريحني أنا كمان
سامي: قولي خايفة على نفسك تفقدي العز اللقيتيهو ده وماخايفة علي أنا ولا شي، للأسف ياسهام إنتي عيشة الغنى والشبع غيرتك وغيرت فهمك للدنيا والناس وبقى عقلك ضيق في فهمو، لي آخر مرة بقول ليك ابعدي من طريقي، ولو فكرتي تكلمي أحمد عشان تبعديها مني بقاطعك لي الأبد وانسي إنو عندك اخو
سامي ماخلى ليها كلام حار ماقالو ليها لمن بكت وحلفت الا ما تبعد خولة الشيطانة دي منو ومابتخليها تسرق منها أخوها..
وللأسف القدر حايخدما بصورة سهلة مااتخيلت انو ممكن تحقق بالسهولة دي..
هشام ودعم خولة قرر يتقدم ليها وكلم أبوهو يمشو يتكلمو فيها مع أبوها ويطلبوها منو..
هشام خت في راسو خلاص وناوي يعرس خولة بأي طريقة لأنو عارفا مغرورة وشايفة نفسها وماحترضى بسهولة بس عمو هو المفتاح وأكيد بوصل ليها عن طريقو.....
وبكده حاتبدى سلسلة أحداث كتيرة ومثيرة ياترى ياهل ترى كيف حاتتصرف خولة في الخطوبة المرتقبة دي؟؟؟؟