الفصل الثاني2
بقلم ياسمين شاكر
أحمد قعد كتير مع سهام إتونسو وضحكو ووعدها إنو يبدو يخططو ويجهزو للعرس من الإسبوع الجايي.. ووعدها بحفل اسطوري عشان خاطر عيونا وشهر عسل مفاجأة ليها..
بعد اخد قعدتو معاها ودعا وفات خلاها بتتخيل مع نفسها الجايي من حياتا هايكون كيف..
رجع أحمد البيت لقاهم كلهم في غرفهم فدخل هو كمان غرفتو قبل مايلاقي فيهم اي واحد ويصطدم معاه بالخصوص أمو....
في الصباح صحا نصرالدين أول واحد في البيت لقا البت الشغالة بادية تنضيف وقالت ليهو الشاي في الصالون فمشى على هناك، بعد شوية لحقتو مرتو لقتو كب لنفسو وبشرب وبعاين للأخبار في التلفزيون، صبحت عليهو فرد ليها من غير مايعاين ليها وفضل بعاين في التلفزيون
إبتهاج: قلت لي أمس عندك موضوع مهم بس منتظر تخلص من خطوبة أحمد؟
نصرالدين: أيوة كويس إنك فتحتي الموضوع، أمين عايز يتمم العرس في أقرب وقت وانا شايف مافي داعي للإنتظار، وري زينة وابدي جهزي من حسي كل المطلوب
إبتهاج: ووينا شيلتو ووين مهرو ولا داير يعرسا بشنو بالبركة؟
نصرالدين: مادايرين منو اي شي ود اختي دمي ولحمي والعرس انا متكفل بيهو
إبتهاج: ده كلام ياراجل؟ بتك لقيتا في الشارع عشان ترميها الرمية دي؟ معقول مايقيمها بي فتفوتة ؟ شغلتو معاك قلنا مافي مانع خطبتا ليهو البت قلنا موافقين لكن كمان يعرسا مجاني يانصري؟ ده كلام مابدخل عقل زول
نصرالدين: ماتدخلي ياإبتهاج بيني وبين أولادي أنا عارف بعمل في شنو
إبتهاج: كل مرة تسكتني ولمتين يانصري، أحمد وقع في اسوأ نسابة وأنت وافقت ليهو وجا دور زينة ماعارفة مصير الفضلو شنو عرسات زفت وطين برضو؟ طيب وولدك ماداير يعرس برضو هاتعرس ليهم الاتنين؟عندك قروش تكفي ولدك وود اختك؟ ماهو الكلام ده مامنطقي
نصرالدين بي زهج : كلامي واضح ومابغيرو ماتدخلي يا إبتهااااج...
في اللحظة دي أحمد جا داخل عليهم وكان سمع كلام امو الأخير
أحمد: منو داير يعرس معاي؟
عاينو الأتنين بي إتجاهو وأمو لقتا فرصة وقالت سرعة : تعال أسمع وأحكم، أبوك داير يعرس لي أمين ودعمتك مجاني لاقرش ولا تعريفة والولد مصر يعرس حسي في أقرب فرصة
أحمد جا قعد وقال لي أبوهو : لكن ياابوي أنا الكنت ناوي اعرس قريب وبديت اخطط فعلاً للموضوع كيف يخشو لي في النص
نصرالدين: إنت ياأحمد تنتظر شوية أولى ندخل أختك أول، أنا بقول أجل العرس سنة أكون عرست لي أختك وعندي فكرة نرحل في بيت جديد محتاج مني قروش كتيرة ومابقدر اصرف في كذا حتة
أحمد إتفاجأ من الكلام وقال : لكن ياأبوي أنا أديت خطيبتي كلمة كيف أجي أتراجع كده بس
إبتهاج : ياولد هييي ده بس ياهو همك؟ ماهماك أبوك مايدفع أمين قرش في العرسة دي؟ بس شغلك رضى ست الحسن والجمال من زعلها، أصلاً هي وأهلها ماصدقو وقعو فيك والله لو تأجلها 10 سنين ماتخليك ههه اطمن ماحاتفكك
نصرالدين قام على حيلو وعدل العراقي وقال ليهم : أنا العندي قلتو ظبطو أموركم على كده..
إبتهاج: دقيقة استنى يانصر بيت شنو ده العايز تشتريهو وليه ماجبت لي سيرة يعني؟
نصرالدين : حا أرحلكم في فيلا جديدة كبيرة تسعنا كلنا وحاتبقى حدث الموسم..
مرق خلاهم على كده ورجعو يتناقشو ومارضيانيين بي الكلام وكلو واحد في همو.. أحمد ماعجبو التأجييل الإنفرض عليهو بالطريقة دي من دون ياخد أبوهو رايو حتى.. إبتهاج حست بي شوية أمل بخصوص عرس أحمد وختت احتمالية تتفركش العرسة دي خلال السنة الحددها نصرالدين، لكن كان زاعجا موضوع ود حماتا الجايي يشيل بتها مجاني لاقرش لاتعريفة وكمان يقعد وسطهم ويشتغل في حلالهم..
صحت خولة منزعجة من الصوت العالي في الغرفة السببتو أمينة وهي بتنبش جوة دولابها وبتفتح في أكياس وبترمي في حاجات
خولة مغمضة قالت بي إستياء : يووووووه شنو عدم الزوق ده مش في ناس نايمة هنا سيادتك؟
أمينة مواصلة في البتعمل فيهو قالت : وقت النوم خلص وطلع الصباح عارفة الساعة كم حضرت جنابك؟ مامضطرة أنتظر في غرفتي والله لحد ماتصحى الأميرة الصغيرة
خولة قعدت في قلب السرير ودعكت عيونا وقالت: الليلة الجمعة يعني إجازة يعني راحة مفروض تكوني مخمودة في سريرك ده وتخلي غيرك ينوم
أمينة: اللهم طولك ياروووح خولة إتخمدي إنتي وسيبيني في حالي عليك الله
وهم شادين مع بعض فجأة سمعو أصوات عالية برا الاوضة وصوت زينة بلعلع وواضح إنها غضبانة وكانت بتقول : ليييه إن شاءالله أنا آخر من يعلم مش أنا العروس؟ هل سألتوني لو مستعدة؟ ياأمي مالكم معاي ياخ كل شي غصب غصب غصب زهجتا أنا والله من الوضع ده..
البنتين قامو بسرعة يشوفو الحاصل شنو برا طلعو الدنيا مولعة وزينة بتبكي
إبتهاج واقفة وبتقول ليها : ده أبوكي وده رايوو
زينة : وإنتي ؟وظيفتك شنو في البيت ده ماعندك راي؟
نصرالدين جا داخل ونهر زينة بعد سمع كلاما وإسلوبها مع أمها : زيييييينة! إتكلمي كويس إنتي حيوانة ولاشنو إياك صوتك يعلى جوة البيت ده تاني سامعة ولا ماسامعة؟ وختي في بالك العرس ده حايتعمل وقريب كمان أبدي جهزي نفسك بدري بدري
زينة : مابعرس أمين ود أختك إلا بشرط واحد لو مانفذتو لي يا أبوي مابعرسو لو تضبحوني وهاأعمل ليكم فضيحة يحكو بيها الناس سنين لي قدام
نصرالدين: الله الله ياسلاااام والله كبرتي وبقى عندك شروط وراي وبتهددي كمان، اها قولي عايزة شنو
زينة قشت دموعها: البيوتي سنتر الكلمتك بيهو قبل فترة إشتريهو لي وسجلو بي إسمي وأنا أعرس أمين من سكات
خولة رفعت حواجبا وإبتسمت، بالجد زينة دايماً بتبهرا بي تصيدها لي الفرص ووقفت منتظرة رد أبوها شنو..
نصرالدين: السنتر يازينة؟ بس ده همك؟ السنتر؟
زينة : أنا ماحققتا حاجة في حياتي وإنتو عايزين ترموني لي واحد عدمان وكحيان بس عشان ود أختك ومادام عايزين تخلصو مني بدري بدري يبقى تأمن لي مستقبلي أول مابخاطر والله مع ود أختك يعيشني نفس مستواي الحالي
نصرالدين هدا شوية : يابتي إنتي حياتك ماهاتتغير وماهاتبعدي مننا إنتو هاتعيشو معانا طبعاً وراجلك هايشتغل في الشركة معانا بمرتب محترم
زينة : مابكفيني برضو ،عايزة السنتر ياابوي
نصرالدين هاج تاني : يابت ده سعرو غالي شديد أنا اعرس ليك ولا اشتريهو كده ماينفع الاتنين
زينة : اشتريهو لي اول والعرس فيما بعد
نصرالدين: أمين مستعجل لكن
إبتهاج: لو مستعجل يدفع هو نص التكاليف وبكده تقدر تشتري ليها السنتر وتعرس ليها
فجأة نصر الدين عاين لي خولة كأنو بستنجد بيها لكنها فضلت ساكتة، إتنهد وقال لي زينة : بفكر وبرد ليك بعدين
طلع برا وخولة جرت وراهو بتنادي : أبوي! أبوي إستنى شوية
نصرالدين بدون مايتلفت قال ليها : خولة بعدين، أجلي اي طلبات لي بعدين مارايق أنا حسي
خولة: أسمعني دقيقة أرجوك
نصرالدين صبرو نفد: خووولة
خولة مسكتو من يدو وقالت : يا ابوي إنتظر ياخ، مالك انت هايج كده ومتضايق؟ معقول حسي الزعل ده كلو عشان أميين؟ المفروض إنو زينة هي بتك وهي البتهمك سعادتا ومادام هي عايزة الطلب ده أولى تلبيهو ليها قبال تعرس ليها
نصرالدين : خولة إنتي لسه صغيرة خليك في قرايتك احسن ليك وماتدخلي في أمور الكبار
خولة إتجاهلت كلامو ده وقالت : على فكرة ماصعب إنك تشتري البيوتي سنتر وبالتمن البريحك ماتنسى انو الببيع حاجة بكون محتاج سعرها ضروري فإنت ممكن تفرض شروطك وتشتريهو بطريقة بتريحك وتريح البايع كمان
نصرالدين إتفاجأ من كلامها وعاين ليها بطريقة زي بقول ليها كملي
خولة بفخر قالت : مافي زول بشتري كاش الزمن ده ياابوي ممكن تقنع سيد السنتر يقبل دفعات لكن تغريهو بي دفعة اُولى كبيرة ترضيهو
نصرالدين : خولة! جبتي الكلام ده من وين يابت؟ ده كلام كبار شديد عليك
خولة بفخر أكبر : أنا بت نصرالدين أذكى واحد في مجال التجارة وإدارة الأعمال وبتعلم منو من وأنا لسه طفلة وعندي خلفية لا بأس بها أحمم يعني مابنجي جمبك حاجة يا أبوي
نصرالدين مسكا حضنا شديد ودعكا في راسها وهو بضحك وعرف إنو عندو كنز وإنو بتو ماساهلة رغم انها لسه تعتبر طفلة، وقرر يعمل بنفس نصيحتا ويشتري لي زينة السنتر العايزاهو.....
_______________________
أحمد إتصل على سهام وكلمها بقرار ابوهو وزعلت شديد لكن كتمت زعلا وقالت ليهو: مامشكلة ياأحمد كلو لي خير نصبر مافي مشكلة
أحمد: لكن لسه عند وعدي وهانبدا نجهز حبة حبة تفاصيل زواجنا وعلى مهلنا
سهام: ولا يهمك أنا معاك في كل خطوة..
قفل منها بعد إتونسو شوية وهي قامت كلمت أمها والغضب ماليها وأمها قالت ليها: اصبري يابتي في النهاية بتم ان شاء الله
سهام: بس حسسي يعني حبكت يعرسو لي اختو دي؟ماهي خاطبنها من زمن طويل أحمد حكى لي، عارفاهم دايرين يخلوه يقنع بي طول المدة لكن فشرو مابسيبو مهما عملو معاي
رضية : إنتي يابتي ذاتك كربة زمانك شنو بي نسابة متل ديل والله ينشفو ريقك ويعوجو طريقك
سهام: يمى ديل مفترين وحقارين شايفين الزي حالتي دي مامن حقها تعرس زول مرتاح وعندو قروش بس عشان فقرانة وابوي ميت، لكن أحمد دايرني وده بكفيني والله مااسيبو ليهم مهما يعملو فيني ولا بهمني..
رضية : الله يتمو ليك يابتي ويكفيك شرهم
سهام: آميين ياأمي الله يخليك لي وماتهمي أنا دي شديدة عليهم ولا في يدهم شي يعملوه، سامي وين لسه مارجع البيت؟
رضية : سامي يابتي مشى لي الراجل الاشتغل عندو الشهر الفات يشيل باقي قروشو عشان يدفع الرسوم العليهو، الله يعدل طريقو شقيان وتعبان في شان يكمل قرايتو
سهام : بكرة اعرس أحمد واريحكم من عيشة الشقا والتعب ونعيش احلى عيشة
رضية : عرسي وعيشي انتي وانبسطي نحن ما ملزمين عليك وعلى راجلك
سهام سرحت بعيد بتفكر في المستقبل وحياتا الجاية شكلها كيف.....
___________________
في آخر الاسبوع يوم خميس تحديداً، طلعت سهام مع احمد يتفسحو وقضو زمن طويل مع بعض، لحد مامغربت الدنيا والزمن روح، وهم قاعدين مع بعض في كافيه ضرب تلفون عند أحمد شالو عشان يشوف منو المتصل لقاهو أبوهو فرد بسرعة : ألو أبوي إزيك
نصرالدين: انا كويس الحمد لله، انت وين؟
أحمد : طلعت مشوار وبعيد شوية
نصرالدين: أنا الصباح طلبت منك شنو؟
أحمد فكر مسافة وقال :معليش ياابوي راسي جايط ونسيت كلامك
نصرالدين: قلت ليك خولة عندها درس الساعة 4 مسا وانا برجعا الساعة 6 كل مرة وطلبت منك ترجعا انت عشان انا مضطر اسافر مشوار بتاع 3 ساعات لي فاتحة
أحمد ضرب جبهتو بكف يدو وقال : الله، والله مرق الموضوع من بالي يا أبوي أنا آسف
نصرالدين: حسي هي منتظرة ليها ساعة اتحرك طوالي امشي جيبا
أحمد : المشكلة انا بعيد مشواري بياخد ليهو ساعة
نصرالدين بي غضب : يعني بتبالغ إنت وين يعني وأختك ترجع كيف دايرني اخاطر بيها تركب براها من الشارع؟
أحمد: خلاص اهدى انا بتصرف وبرجعا ماتقلق
نصرالدين : إتصرف بسرعة البت في الشارع واقفة
أحمد: كويس كويس ولا يهمك..
قفل أحمد وهو بلعن في خولة وسنين خولة البقت ليهو في حلقو دي جيبا وديها طلعا نزلا كل شوية والتانية
سهام: مالك ياأحمد خير في شي؟
أحمد عاين ليها كده ولمعت في راسو فكرة........