رواية في حب رمضان
الفصل الرابع4
بقلم اسرار جمعة
بعد أربعة أيام...
قمت من النوم قريت أذكار الإستيقاظ
وعرفت لي معلومة إنو لمن الشخص بقوم من النوم ويقول:
لا إلهَ إلاّ اللّهُ وَحْـدَهُ لا شَـريكَ له، لهُ المُلـكُ ولهُ الحَمـد، وهوَ على كلّ شيءٍ قدير، سُـبْحانَ اللهِ، والحمْـدُ لله ، ولا إلهَ إلاّ اللهُ واللهُ أكبَر، وَلا حَولَ وَلا قوّة إلاّ باللّهِ العليّ العظيم
" وبعدين يدعي دعوته بتستجيب بأذن الله"
دعيت ربنا يبلغني الفردوس الأعلى بلا حساب ولا عذاب ويغفر لجميع المسلمين الأحياء منهم والأموات.
وكان النبي لمن يصحى بيعاين للسماء ويتأمل ويقرأ أخر 10 إيات من سورة آل عمران "إن في خلق السمـٰوات والأرض لإيات لأولى الألباب......"
قريتها وبعدين صليت أربع ركعات بحاول كل يوم أزيد عدد الركعات لمن أصل لي طريقة النبي في قيام الليل
"قوم يا صائم أمشي اتسحر
قوم يا صائم أمشي أتسحر"
رمضان جانا....
اااهلاً بي
الحلة ملانة...
ااابري"
شفع كتار جاريين وبرددوا فيها
نفس الشفع ديل جارين وقدامهم ال"مسحراتي♡
صحيت ناس البيت أتسحروا
بعد صلاة الفجر بديت في الورد لمن خلصت من الأجزاء الساعة كانت تسعة و خمس دقائق
وعدا اليوم على نفس البرنامج
أتفقنا أنا والبنات إنو اليوم نفطر عند سجى
جهزت الصواني طلعنا أنا ومعي ناس أمي.
وصلنا سلمنا عليهم وبقينا مُنتظرين الأذان
أذن أكلنا، بعدين صلينا وأتلمينا انحنا البنات بقينا نغسل العدة ونتونس
جيهان: أها يابنات ماشين كيف في رمضان والجدول متابعنوا ؟..
أنا : أي الحمد لله
سجى:تمام
جيهان: شيماء أها إنتِ ماشة كيف مع الورد، كنتِ متجرسة من الكِمية
شيماء: كنت مخلوعة ساي من العدد لكن لقيت عادي بقدر أكملهم، وقاعدة أقراهم كلهم في جلسة واحدة كمان
جيهان: كويس جِداً، أن شاء الله حبة حبة لمن نصل لي ختم المُصحف في يوم
كلنا مع بعض: إن شاء الله
سجى: أها الكُتب قريتوهم؟..
أنا: أي قريت منهم
بديت أقرا في الكتاب صفحة صفحة مرات بعيد الصفحة مرتين من شدة ما أنو كلمات الكتاب بتلامس الروح.
وبقبت أطبق ومن أقيف في المصلاية بحس برهبة غريبة شعور غير مألوف، أكبر وبقيت بصلي بصورة مختلفة غير المتعودة عليها حسب توجيهات الكُتب، بقيت بركز أنا بقرا في شنو، بطول في الركوع، بطول في السجود،
شيماء:
أحلى ♡
- شي طبعا السجود دا كأنك إنتِ ما في الارض بفضفض لي ربنا عن الجواي وعن الزاعجني من زمان ولي هسة دعيتو يحقق لي الدايراهو بنهي صلاتي وبتمناها ما تخلص
جيهان: سبحان الله الصلاة دي جميلة جداً كدا وأنا ما عارفة ياخ أنا بقيت بنتظر الأذان متين يأذن عشان أصلي
مرات بصلي ساي بدون سبب بكون مشتاقة لربنا بس، شوية شوية بقيت اركز في الإيات وأشوف ربنا قاصد شنو مرات الايات بتمس قلبي ببكي..😭
سجى:فعلاً الكُتب حِلوين جِداً حتى أنا ساعدوني.
خلصنا عملنا الشاي شربنا، سمعنا الأذان طلعنا على المسجد...
في الرجعة أشترينا أندومي والدور ده رجعنا بيت ناس سجى، عملناهم أكلنا وأتونسنا شوية بعدين طلعنا على البيت
الحمد لله بكرة ما ح يكون عندي عدة إلا صينية ناس أبوي لانو غسلناها في بيت ناس سجى، غايتو فِرحت فرح😹💃.
________________________
رمضانا دايماً غير اللمة مع الحبان ، لمة الجيران مع بعض في الشارع ، و أصوات المساجد و صلاة التراويح ، و لعب الأطفال في الشارع بعد الإفطار بي سلك اللماع اللماع😹♡ ، الفرشات الفي كل الأركان ، السهر مع الأهل و الأحباب ♡.
يااااه 😔♡
حرفياا رمضانا غير في السودان وسط الأهل و الاحباب و الجيران ، الابري و العرديب ، الكركدي و التبلدي ، التقلية و ملاح الروب ، النشا ، صلاة التهجد ، إتفاق الصحبات على أنهم يختموا المصحف ♡ ، إكرام المارة في الطريق ♡
رمضان شهر الخير و العطاء ، شهر المحبة و التقوى ، أحلى الايام بتمر علينا و نحن فرحانين بي قدومها ♡
ودايماً رمضانا غير مع الحبان ♡
*#على_هامشَّ_اللُطف💛🦋*
جامعنا نورناهو ، شارعنا زيناهو ..
يا غالي هلالك هلا كنا بنستناهو ؛ يا غالي هلالك هلا و كنا بنستناهو ♡