فتحت المدرسة وخولة نزلت سنة تالتة ومع دوام المدرسة سامي قلل جياتو عندهم وقلت عدد الحصص وزاد ليها بس زمن الحصة، بقت خولة مشغولة بيهو كتير وبتفكر فيهو طوالي وفي الحصة بتحاول بجهد انها ماتسرح فيهو وتنسى الحصة ،سامي كمان بقى راخي وبقت في ونسات جانبية لكن كل ماينتبه لي نفسو برجع للشخصية الحازمة تاني وبحاول يتجنب خولة وده خلاها اكثر إصراراً عليهو وبتحاول بكل الطرق تحوز على إنتباهو..
وهو دخل في مرحلة لوم الذات وكتير قال لنفسو : البت دي في فترة مراهقة لو حسستها بي اهتمام زايد ممكن تفسرو غلط وتتعلق بيك حاول كون جادي اكتر وقت تكون معاها عشان ماتتخطى الحدود.. بس مافطن لي إنو خولة فعلاً إحساسا تغير تجاهو وبدت تميل ليهو..
في يوم من أيام الحصص سامي جا ودرس حصتو وزاد في الزمن كتير وبعد خلصو قال ليها : خولة عايز اقول ليك شي مهم
خولة : إتفضل
سامي سكت مسافة وتاني قال: للأسف ياخولة دي حاتكون آخر حصة لي معاك و....
خولة قاطعتو : شنوووو؟ كيف يعني آخر حصة ليييه حصل مني شي عملت شي غلط؟
سامي قاطعها كمان : اهدي واسمعيني دقيقة، أنا جاتني فرصة شغل كنت مستنيها من يوم مااتخرجت، مساعد طيار في شركة طيران للنقل الداخلي ومقر الشغل بورتسودان ومضطر أسافر طبعاً
خولة بي إحباط: حاتسافر وتخليني يعني؟
سامي : للأسف نعم وأنا كلمت عم نصرالدين وأحمد أخوكي بكده عشان يتصرفو وترجعي لي دروس المجموعات تاني
خولة : بس أنا بفهم منك انت
سامي: غصباً عني والله الظرف جابرني على السفر وده كان حلمي من زمان إني اكون طيار ومابقدر اضيع الفرصة ياخولة أعذريني
قالت ليه بعد حاولت تكون عادية ومامهتمة : اوكي براحتك بالتوفيق
ووقفت على حيلا عشان تنهي الموضوع، هو كمان قام بعدها واتنحنح شوية وقال : خلي بالك من دروسك وبتمنى ليك النجاح الكبير وعارف انك قادرة تنجحي بي اعلى المجاميع ان شاء الله
صافحتو بدون اي كلام وهو بعدها ماانتظر وطلع بسرعة فات..
خولة حست بالفراغ في لحظتا وعبست وتاني قالت لي نفسها : يلا خلصت من اخو سهام أخيراً
بس ماقدرت تفرح ابداً....
وفعلاً سامي سافر بعد ماودع اهلو والجيران حضرو الوداع وطبعاً ريم في المقدمة ومسكت دموعها بالعافية عشان ماتبكي قدام الناس وتحرج نفسها... سهام قالت ليها : ابسطي ياحلوة هدا مشي يكون نفسو عشان نجي نطلبك ليهو
وبقو يضحكو سوا، سهام دايماً بتشاغلها بكده وده بجدد الأمل جواها وبفرحا انو اهل سامي عايزنها... سامي مشى يبدا مرحلة جديدة في حياتو وكلو أمل ينجح في حلمو ويبقى طيار...
___________________
نصرالدين أخيراً لقى الفيلا الكان بفتش ليها فيلا كبييرة وواسعة بتناسب وضعهم وعددهم، كان فيها ملحق خارجي للضيوف فقرر يظبطو عشان زينة تسكن فيهو هي وأمين وبكده إبتهاج ماحاتنقنق في قعاد أمين في وجود أمينة وخولة.. أما أحمد فكان في الفيلا غرفة معاها حمام خاص ومع صالة فاتحة فيها الغرفة مباشرة والصالة فيها مدخل شكل قوس فكانت منفصلة عن بقية الغرف وكانت في الدور الاول وقريبة من باب البيت، قرر يقفل القوس بي باب خشبي متحرك وبكده يكون أحمد منفصل في غرفة وصالة ليهو ومرتو...
أما البنات ليهم غرف في الطابق الفوق وهو وإبتهاج ليهم غرفة كبيرة تحت وكانت الماستر رووم واكبر واحدة في كل الفيلا..
بعد تمم البيعة واشتراها أخيراً جمع الاسرة الكريمة وبلغهم بي الخبر..
إبتهاج: أخيراً هانتحول للوساع الف حمد وشكر لك ياالله
أحمد: يعني كده جاهزة من مجاميعو؟
نصرالدين: محتاجة شوية صيانة لكن جاهزة
وبدا يوريه تفاصيل سكنتو في الفيلا وين، فهمهم على كل شي والبنات التلاتة فرحو شديد...
أحمد لما قابل سهام بلغها بي الخبر وكان مبسوط
سهام محبطة: غرفة واحدة وصالة؟ بس ده ماكان كلامك لي أول شي قلت لي حانسكن في شقة برانا
آحمد: ماتقلقي هم مفصولات وحاتاخدي راحتك لو خجلانة وبعدين ابوي معارض سكنتي بعيد منهم واشترى الفيلا دي عشانا نحن
سهام: عشانا كيف وهو مدينا غرفة وصالة بس في الفيلا العريضة دي؟ طيب كان تخليهو يدينا الملحق القلتا عليهو إنت أولى من زينة، أنا لو علي ماعندي مانع بس أنا عايزة نكون بي راحتنا أنا وانت وأحس إني حرة في بيتي معاك
أحمد قال بعد فكر في كلامها: خلاص خليني اتكلم معاه يمكن يغير رايو..
سهام: أحمد انت بقيت كبير البيت ولازم يدوك وضعك بعد ده ماأي كلام يفرضو عليك حبيبي لازم تكون صاحب الكلمة بعد أبوك..
أحمد لما رجع البيت فاتحهم في إنو يبدل زينة ويشيل الملحق هو
إبتهاج: نحن الموضوع ده مش كنا قفلناهو؟ مالك جيت مقلبن ورايك ماياهو رايك الأول
نصرالدين: ذوقياً من الأفضل زينة وراجلها هم البكونو مفصولين عشان أمين مهما كان مايجوز يقعد وسط أخواتك لكن إنت وضعك غير ومرتك بت زيهم مافيها شي لما تقعدو انتو في المكان الاخترتو ليكم
أحمد: لكن ياابوي اناااا
إبتهاج قاطعتو : أحمد! لسه حاتناقش انت؟الكلام واضح هدا قدامك أمين مابدخل على بناتي الفتوات
أحمد: مش قلتو الحتة قريبة من باب الصالة يعني حايكونو طرف ومافي شي بدخلو البيت جوة
إبتهاج: لاااااااا يبدو إنت مابراك وجاي من برا شايل الكلام؟
أحمد: قصدك شنو ياأمي؟ ياناس أنا زول كبير وعندي راي وعايز افتح بيت واكون أسرة حقو تحترموني شوية
نصرالدين قام على حيلو ماشي على اوضتهم وقال ليهو : ده الكلام العندي انت تسكن معانا وزينة في الملحق هي وراجلها..
فات بعد قال الكلمتين وأحمد زاتو قام وهو زعلان مشى غرفتو
إبتهاج محروقة منو وتشيل وتطق في كفوفها بي بعض ،جاها صوت خولة من وراها بتقول : الظاهر سهام ماعجبتا التقسيمة وحرضت أحمد على الاعتراض لأنو ولدك ماعندو الجرأة يعارض أبوي فبتكون ادتو جرعة شجاعة يقدر يتكلم بيها قدامكم..
إبتهاج الغضب تضاعف جواتا وبقت تتوعد للبت سهام دي إنو ماحاتريحا..
أمينة قالت: حمودي خلاص حايبقى دلدول مرتو ههههههه
خولة : اصلاً هو زي الشفع ماعندو راي ممكن اي زول من الشارع يأثر عليهو في اي موضوع ههههههه
إبتهاج: يابنات عيب الكلام ده هس ماتدخلو في موضوع مابخصكم
وهم بتكلمو جات زينة داخلة سلمت وقعدت في أقرب كنبة وقالت: متين الرحول خلاص تعبت من الشحططة دي ماشة جاية كل يوم
خولة : وإنتي ماتتهدي في بيتك عرسناك لييه عشان تجي ناطة لينا كل يوم؟
زينة : ظريفة هاهاها
أمينة: ماسمعتي آخر شمار أحمد قال إلا يدوهو الملحق العملو أبوي شقة ليك
زينة : اشمعنى يعني
خولة : صدرت أوامر عليا من زوجة المستقبل.
وبقو يضحكو هي وأمينة
إبتهاج: يابنات ماتنطمو إنتي وهي! كلمتكم ماتتحشرو في أي شي
زينة بي لوية بوز : خلاص دايرة تظهر لينا قرونا بدري بدري؟ حكم
إبتهاج : هو ماقال شي شايف إنو داير يكون مستقل ديكي مادخلا بي رايو
خولة : صاااااااح ههههههه
إبتهاج قامت منهم وقالت : أنا المقعدني معاكم شنو قليلات أدب بس مااكتر
فاتت خلتهم بضحكو براحة على حمقتا..
زينة : اي شي ولا ولدا ده بتغتالكم هههههه
أمينة: بكره الراجل البتحرشو مرتو
زينة : وانا بكره الراجل البتحرشو أمو ومابمشي غير بي رايا
خولة : أما أنا بكره الراجل السمييع سواء لي مرتو او لي امو، مفروض كبر وفتح بيت يعرف يشكم مرتو ويحترم امو لكن مايدخلها في حياتو في كل شاردة وواردة، الراجل لو ماكان شخصية وحضورو قوي مابشتريهو بي بصلة
أمينة: أنا مادايرة اعرس عموماً وابتلي بي وجع راس
خولة : إنتي البعرسك ده ماعاقل ذاتو
أمينة : هاها لاعاجباني إنتي يا الفالحة الرايقة، إنتي البعرسك بكون كل الناس بتكرهو وبدعو ربنا ينتقم منو فربنا ببتليهو بيك تطلعي زيتو
خولة : دي حقيقة أهههههههههه
أمينة : عويرة
خولة : متخلفة
زينة : هييييي ماتمسكو في بعض اصلاً ابوي حايفاجأكم بي عرسان يخليكم مضحكة في خشوم الناس زي العبد لله كده
أمينة: الحمدلله اولاد اخوانو واخواتو كملو وانتي اخدتي آخر واحد وريحتينا
وعدت الليلة على كده وهم مشغلنها لي بعضهم..
______________________
عدت الأيام والفيلا جهزت خلاص واتفرشت من مجاميعو ورحلت الاسرة الكريمة أخيراً، زينة رحلت في شقتا خلاص وأحمد فضل في الغرفة والصالة وفرشوهم ليهو إبتهاج وزينة وكانت سهام دايرة تطرشق وقالت ده مفروض بيتي افرشو بحريتي، وفهمت هي داخلة على ياتو نسابة..
مرت الشهور وخولة امتحنت الشهادة خلاص وانتهت أخيراً وفي انتظار النتيجة..
أحمد حنس أبوه وبدا تجهيزات العرس والحجوزات.. لكن يافرحة ماتمت إتوفى أخو نصرالدين الصغير مات في حادث وطوالي العرس إتأجل لحد اخر السنة، سهام دايرة تمووووت من المغصة وندبت حظها شديد..
مرت الأيام وتاني رجع أحمد وسهام يجهزو، طلب منها أحمد تلبس عند زينة في البيوتي سنتر لكنها أبت وقالت ليه: انت قلت لي حاتعمل لي كل شي نفسي فيهو وانا حلمي البس عند مس جودي، اشهر ميكب ارتست حالياً وأنا عايزة امشي ليها ارجوك ماتزعل مني
أحمد: مامشكلة ياسهام خلاص تمشي ليها وسوقي زينة والبنات معاكي
إمتعضت من الاقتراح لكن ماحبت ترفض فتبين ليهو انها كارهة اخواتو..
يوم المشي ساقت معاها ريم وجات زينة وخولة وأمينة كمان.. زينة بادرت واختارت ليها فستانين حلوين شديد لكن سهام أبت وقالت ده ما إستايلا وبقت هي وريم يفتشن مع بعض
أمينة قالت لزينة : إنتي عازلة ليها لي شنو ما أكيد حاترفض زوقك
زينة : عاااارفة الحتة دي عشان كده عزلت اسمح فستانين في المحل عشان متأكده إنها حاتختار غيرهم وبي كده ماحاتلبس من الفساتين الاجمل وحاتتحصر في خيارات أقل
خولة : يااااخي إنتي الشيطان يتعلم منك دروس هههههههه
أمينة : منكم خوف يابنات نصري
وفعلاً سهام خسرت الفستانين عشان المكابرة واضطرت تشيل فستان حلو لكن مابي سماحة الفساتين ديلاك.. وبقو طول فترة التجهيزات الأخوات التلاتة يضايقو سهام ويرفعو ضغطها بي تدخلاتهم في اي شي رغم انو ماكانو عايزين يفرضو رايهم قدر ماعايزين يغيظوها فقط لاغير ومامهتمين لو حاتختار بي نفسها اي شي وده حقها طبعاً...
ظهرت النتيجة أخيراً وخولة نجحت كما هو متوقع وجابت مجموع كبير دخلا كلية الهندسة حلمها القديم، كانت عايزة تدرس هندسة ديكور او تصميم داخليinterior design..
خلاص فضل أقل من شهر على العرس، زينة طلبت لي أخواتا فساتين سهرة من النت ولي نفسها صممت توب سهرة هي وأمها في ارقى محال تصميم التياب..
جا اليوم السعيد أخيراً وسهام مامصدقة وفرحانة فرح شديد والأيام الفاتت سوت حنن وبهرجة كلو على حساب أحمد طبعاً، والدخلة الليلة في افخم صالة وبرضو عاملين عرس مبالغ فيهو..
بدت الحفلة والعرسان وصلو واتزفو والفنان بدا يغني وكانت بهجة فوق الوصف.. في الفاصل خولة كانت واقفة زي الاميرات في فستان قمة في الأناقة ومحتشم لأن أبوها حزرهم يلبسو لبس شاذ زي في عرس زينة.. وهي واقفة جاها صوت من وراها بنادي : خولة! خولة
عرفت الصوت او كانت راغبة انو يطلع هو واتلفتت بسرعة ولقتو فعلاً هو ،قرب عليها وكانت ماشة جمبو ريم
سامي: خولة
خولة : سامي أخو سهام مرت أحمد أخوي
سامي إبتسم وقال : إزيك عاش من شافك
خولة : انا بخير الحمد لله
سامي: قد تكون متأخرة بس عايز اقول ليك الف مبروك وصلني خبر نجاحك كنت واثق انك شاطرة وحاتنجحي نجاح باهر
خولة : الله يبارك فيك أشكرك
ريم قالت ليها : مبروك!
خولة عاينت ليها عين فوقية كده وقالت : شكراً..
ريم قالت لي سامي : يلا نبارك للعرسان
خولة عاينت ليها فوق تحت وأبتسمت وده زعج ريم شديد وصرت وشها
سامي : نحن نستأذن
فاتو من خولة شوية وريم علقت بصوت واضح لسامي : سخيفة
سامي: قصدك خولة؟
ريم : ليه تسمح ليها تكلمك بي الاسلوب ده؟
سامي ابتسم وقال ليها : لا ياخ حرام عليك هي ماقصدها شي، ده موقف حصل بيناتنا اول مرة الاقيها فيها قلت ليها انا أخو سهام خطيبة أحمد أخوك بس مسكتا لي من الزمن داك كدعابة يعني.. تعالي يلا يلا ماتهتمي
ريم ذاد غيظا زيادة لما لقت سامي مامتضايق من تصرفات خولة دي ولاقي ليها العذر رغم إنها واضح من اسلوبا بت بايخة وسغيلة..
خولة انبسطت لي شوفة سامي الفقدتا من شهور طويلة وكان نفسها تتكلم اكتر معاهو وتتأمل قرنة حواجبو لما يتكلم بي جدية كده وتبل الشوق إلا إنها لما شافت ريم معاهو غيرت رايها وعاملتهم بي جفاف..
سامي بقى طول الحفلة مركز مع خولة ماعارف يشغل نفسو عنها وماعارف لييه مهتمي ليها كده ، إتأملا كويس طول الحفلة ،شعرها القصير الكيرلي ده مابتغيرو ابدا بتسريحة تاني بس حسي مركبة عليهو إكسسوارات شعر فقط لكنو شعرها نفسو، شاف انو لو لبست طرحة كان حاتكون احلى وأجمل، حلل مظهرها كتييير وسرح في كده ونسى ريم القاعدة جمبو وبتحاول تلفت نظرو بأي موضوع..
خولة لاحظت إنو سامي بعاين ليها كل شوية فابتسمت كده لنفسها وقالت : وحشتني ياأخو سهام، وحشني الزول الجاادي الديمة صاري حواجبو وعامل مهم، أنا خولة أعلن من هذا المنبر إنو أنت ياسامي ياأخو سهام مرت أحمد أخوي حاتكون حقي أنا من الليلة ولي قدام، عُلم وينفذ....