رواية توأم روحك انا
الفصل التاسع9
بقلم ياسمين شاكر
في الايام التلت العرس بقيت ماعلى بعضي دايما سرحانة وهامة ناس بيتنا حسو اني متغيرة وبقيت سكوته وده اللفت انتباه ماما لأنو بتقول عني دايماً إنو أنا رغاية..
انا ماكنت عارفة أنا مالي صراحة، عشان كده لما ماما سألتني عن إني مالي كنت صادقة لما رديت ليها إني تعبانة مااكتر ومافي شي يخليها تقلق..
التاعبني اكتر كانت نهال وزعلنا من بعض، بقينا بعاد عن بعض وبقت ماشغالة بي وعندها حق وانا كنت بايخة معاها وهي في الأخير كانت خايفة عليا، في يوم بي الليل جيت لقيتا راقدة في سريرا بتبكي، من شفتا دموعا نسيت اي شي وجيتا بسرعة وقعدتا جمبها وقلتا ليها بي قلق :نهال مالك لييه بتبكي
عاينت لي وزاد بكاها قلقت بي ذيادة فمسكتها من يدها وقلتا ليها ماتخوفيني مالك يابت ماعايزة تكلميني أنا تومتك حبيبتك وماعندك غيري ولا أنا عندي غيرك
قالت لي : محتاجة ليك يانور لكن إنتي بدلتيني بي إسلام، بقيتي ماحاسة بي ولاعايزة تنقي معاي زي زمان، بقيت ببكي انا برضو قلتا ليها أنا لا يمكن ابدلك بي زول وانتي عارفة، أعفي ليا ياخ كنت مشحونة شديد وماكنت عارفة ببرطم بقول في شنو
اتحاضنا وبقينا نبكي وتاني انا رجعتا اسألها المضايقا شنو، قالت لي مهند عقد وعرسو بعد شهر
قلتا ليها مهند الرهيب ماغيرو؟
قالت لي بي حزن مهند اتخلى عني، قلتا ليها مش قلتي لي مافي شي بيناتكم؟، قالت لي كنت بطمن نفسي بي الكلام ده لكنو اقتحمني شديد واتعودتا عليهو وكلامو ورومانسيتو معاي علقوني فيهو وجا بي بساطة خطب بت صاحب الفندق وعقدو ليهو وطبعا نكرني حطب وماكلمني وانا سمعتا من الموظفين تخيلي، انا اصلاً كده حظي في الحب صفر، حضنتها وقلتا ليها بكره بجيك البحبك وبقدرك بالجد ماتزعلي بالشكل ده، قشقشتا ليها دموعا وقلتا ليها اصلاً مواصفاتك القلتيها دي موجودة في الهند ماعندنا في السودان ده
طوالي شالت المخدة ضربتني وبقينا نضحك، وقتها حسيت إنو فعلاً حياتي بلا نهال زي العلقم مابتنطاق وده كان درس لي إنو مااخسر أختي مهما كانت الأسباب..
بعد رقدتا للنوم جاني تلفون لقيتو إسلام، فرحتا فرح لكن رديت وعملتا زعلانة عشان كرامتي، قلتا ليهو أخيراً اتزكرتا إنو في واحدة هنا راجيااك؟
قال لي: ماتخليني أرجع أقفل منك تاني
قلتا ليهو ليه يا إسلام هو أنا عملتا شنو يستاهل تعاملني كده وين إسلام القبل الخطوبة الحبيتو واتعلقتا بيهو فجأة كده اتغيرتا مني مابعرف لييه
قال لي مااتغيرتا أنا ،انتي الطلعتي غير ماكنت متخيلك، قلتا ليهو حرام عليك محسسني انك لقيتني وحش عديل
قال لي يانورهان ماطالب معاك نقة أنا متصل اتونس معاك عايزة تتونسي ولا اشوف غيرك؟
قلتا ليهو اكيد عندك البديل ماعلوية موجودة
قال لي حبيبتي بتغيري علي، قلتا ليهو طبعا بغير وماعايزاك تعرف غيري أنا واحدة تاني ولا تتونس مع غيري عايزاك حقي أنا براي
ياخوانا زول يقص لساني البكب الكلام كده براهو ده، الغريب انو إسلام مافرح بي الكلام ده وبقى يتنهر فيني وقال لي شوفي يابت الناس أنا الكلام ده مابياكل معاي حركات غيرة وكلام بالشكل ده مابتناسبني عشان كل شوية تعملي لي موضوع وأنا زول إجتماعي ومعارفي كتار حقو تفهمي النقطة دي كويس
قلتا ليهو: تصبح على خير يا إسلام امشي شوف درب علوية او غيرا بي وين انا عايزة انوم
طوالي قفل الخط فيني، حطم اعصابي البعيد، بقيت راقدة وببكي بي صمت لمن نمتا..
تاني يوم الصباح بدري مشيت القناة عشان برنامج الصباح البقيت بقدمو كل يوم وكان عندي اجتماع بخصوص برنامج جديد..
كنت قاعدة بتونس مع حمادة المصور وكان بقول لي كاس العالم المرة دي عجييب كان نتايج غير متوقعة، قلتا ليهو ماتزكرني بالله اصلا كنا منتظرين البرازيل تاخد حقها من المانيا في النهائي لكن المانيا خزلتنا واتخارجت بدري بدري والبرازيل ماوصلت النهائي أساساً، قال لي ضحكتيني والله طلعتي برازيليه يعني قلتا ليه اي هههه..
انتبهتا انو اسلام كان واقف بسمع فينا ما عبرني طبعا، كان بقول لي الكورة دي حقت الرجال انتي شابكة فيها عايزة تثبتي شنو وكلام من ده وكنت بزعل منو لكن مابعاتبو ،طبعاً فات ماسلم نظام زعلان مني، حمادة لاحظ لكن ماحب يحرجني عمل نفسو ماشافو وواصلنا كلامنا عادي..
انا قلتا امشي لي إسلام أنا ، ماخلاص اتعودتا على تعاملو الكعب معاي ،بعد خلصتا من شغلي غشيتو في الاستديو التاني في غرفة الإخراج ، وانا داخلة سمعت صوتو هو وعلوية بتناقشو :
علوية: قلتا ليك ماتستعجل في الخطوة دي انت الكنت مندفع ،صدقني نورهان دي وصولية عايزة من خلالك تنشهر سريع و انت فتحتا ليها طريق وخليتا تمثل كمان اختيارك ليها ماموفق ابداً اصلا تصرفاتا زي الشفع الصغار مافيها ربع من اخلاق جود
إسلام : ماعارف انهي الموضوع كيف، وانا ماصدقتا انو جود ترجع لي تاني بعد سابت خطيبا القدر يسرقا مني أول مرة وحسي عرفت إنو حبها لي مامات وخلتو أول ماأنا خطبتا، أنا لايمكن افرط في جود تاني انا بحبها بحبها، دبريني ياعلو كيف اسيب نورهان بشياكة بدون ماابين اني ندل
علوية: واجها عديل بعدين سوقا معاك وصلا في دربك وفهما انو بتحب واحدة تاني وخليها تفسخ الخطوبة هي عشان شكلها قدام الناس
إسلام : فكرك كده؟
علوية: اي كده احسن ماتماطل وتخليها تتعبط فيك اكتر..
تخيلو انا شكلي كان عامل كيف بعد سمعتا الكلام ده، إسلام كسر أجمل صورة رسمتها لي شكل علاقتنا جواي، حسيت إنو حصل انفجار في قلبي وانو اتفتفت عديل.. ليه اخسر حبي بي الطريقة الصاعقة دي لييه .. براااحة رجعت من محل ماجيت وجريت الحمام جري وحاولت اتنفس شهيق وزفير مسااافة عشان اتلم على بعضي وماابكي بس احساس الوجع زايد جواي لمن حسيت بطعنة في صدري.. غصبا عني نزلن كم دمعة مسحتهم سريع وبعد مسافة قدرت اتمالك نفسي.. مرقت سريع ورجعت محل كنت قاعدة مع احمد شلتا شنطتي وفريرة طلعتا من القناة.. وقفتا تكسي وقلتا ليهو وديني شارع النيل، مشيت هناك نزلتا بسرعة واخترتا لي مكان هادي وقعدتا.. كنت محتاجة ابكي لكن في شباب وبنات قاطعوني وبقو يسلمو علي وفرحانين نورهان المذيعة نورهان المذيعة وطلبو يتصورو سيلفي معاي، جد نسوني همي لي وهلة واتزكرتا اني بقيت معروفة ولازم احسب خطواتي وتصرفاتي، حسي لو بكيت كان لقيت زول صورني ونشر الصورة ومنظري ببقى بيش.. الله كريم علي غايتو
بعد فاتو بقيت قاعدة براي وطلبتا عصير ليمون بي النعناع وبقيت بغني برااحة : بموت بموت لو قلتا لي انك مفارق كيف تفارقني وتفوووت، بحبو ياناس افهموني بحبووو وماعايزة اخسرو لييه اكون انا الضحية لييه مااكون انا الحبيبة القريبة القلبو دق ورق ليها لييييه..
استغفرتا مسااافة وتاني قمتا ورجعتا بيتنا وحاولت اكون عادية ، وصلت لقيتهم رابطين المجلس بتونسو وقالو عمو ياسر ضرب ومبسوطين هو ومهرة شديد، قعدتا وسط اللمة وقدرت انسى معاهم همي، جد لمة الأهل مافي أحب منها والواحد لو حزين مايحاول يبعد عن الناس بالعكس يفضل قريب من ناسو البهمهم امرو وبهمو أمرهم ..
إسلام اتصل علي وابيت ارد ليهو وعملتا نفس الكان بعملو هو يضرب وانا مابرد..
تاني يوم مشيت الصباح بدري عشان برنامج الصباح وصورتا الحلقة وانتهيت وكنت قاعدة مع احمد زي عوايدي نتونس قام هو ومشى الحمام في اللحظة ديك جات علوية الفقرية تتقدل، واول ماشافتني ركبت ابتسامة في وشها الزي وش البومة ده استغفر الله ياربي تغفر لي، سلمت علي ازيك يانورة كيفك ياعسل، عاينت ليها عين عدم اكتراث وقلتا ليها ماعندي ليك غير جملة واحدة ياريت تقلبيها في دماغك ياعلوية، المنافقون في الدرك الاسفل.. وقمت شلتا شنطتي وطلعتا خليتا واقفة مذهولة هههه كنت محتاجة انبذا واردح ليها واتفها تف الكريهة لكن ربنا الهمني اقول ليها القلتو ليها لأنها جد منافقة وبي وشين وياريت تحزرو من النفاق ياجماعة ده موضوع خطير..
وانا طالعة لاقيت إسلام في الباب ودي مقابلة ماكنت دايراها وحسيت بي قلبي بضرب وذاد احساسي بي القهر، لكن يبدو انو المواجهة حتمية ولابد منها.. قرب مني وقال لي ازيك بي اسلوب جاف قلتا ليهو بنفس الأسلوب أهلا ، لسه قلبي بدق ليهو رغم الحصل منو لسه بحبو بعد كل السمعتو ، قال لي بتصل عليك ليه مابتردي لي قلتا ليهو ماانت مابترد لي لما اتصل نفس الشي
قال لي :الله الله بتتسدي يعني
قلت ليهو :أي حاجة زي كده
قال لي تعالي عايزك قلتا ليهو قول بسرعة انا ماشة
قام ساقني من يدي ومشينا في جنينة صغيرة ورا مبنى القناة ووقفنا هناك، قال لي بعد سكت مسااافة: نورهان يبدو انو نحن ماحنتفق وأنا شايف انووو انوو نبعد وندي نفسنا فرصة نفكر ويعنييي..
قاطعتو وقلتا ليهو: جود فسخت خطوبتا ومنتظراك وانت جايي تفسخ معاي عشان بتحبها وماقادر تعيش مع غيرا مع إنها باعتك لي حساب واحد تاني لكن الحب أعمى في الأخير وكان من الأفضل إنو تضحي بي الانسانة الحبتك وفضلتك على كل الناس..
طبعا هبط عليهو سهم الله وبقا واقف ومهجوم لمن فاتح خشمو
قلتا ليهو ماتستغرب سمعتك انت وست الحسن الصديقة الصدوقة بتتباحثو في إنو كيف تتخلص من ورطتك معاي وهديني سهلتا ليك الدرب ووفرتا عليك كلام كتير حاتفتش عليهو وماحتلقاهاو وامشي بعد ده كوس درب حبيبتك وين
في اللحظة دي قلبي اتشقق، خلاص من اللحظة دي إسلام ماحايبقى لي تاني
مشيت قبل مايقدر يفتح خشمو بي حرف وجريت الشارع ركبتا ركشة وطيران على البيت وماسكة نفسي من إنى أبكي .. كان بتصل طول الطريق وابيت أرد ، ماصدقتا وصلتا البيت وجري طلعتا فوق وبقيت ابكي بكا عجيب، الكويس انو مافي زول في البيت مابعرفهم وين، لا ماما ولا خالاتي ولا حتى حبوبة ونهال في الشغل، بكيت قدرتي لمن برجف وبصرخ لييه انا ليييه يا إسلام سبتني لييه ده انا حبيتك بدون شروط لييييه..
بكيت 3ساعات متواصلة لحد ماجات ماما لقتني بكيت وانتهيت وارتحتا شوية، بي رواقة كده كلمتها بي الحصل قلتا ليها إسلام فسخ الخطوبة لأنو عندو واحدة بحبها وعايز يرجع ليها
فاكرني يعني حااقول انا الفسختا الخطوبة؟ لكن أنا مافسختها هو الفسخا ولو بي النية بس وأنا مابضاري ليهو مالي ومالو، أمي زعلت زعل وبقت تهرج وتقول لي الله حلاك منو ده ماراجل أحسن الغار في داهية أنا أصلي لاحبيتو لا حبيت اهلو بس عليهو والخ الخ ماخلت ليهو شي هههه هم يضحك ياخ..
بعدا طوالي نزلت تحت واتصلت بي بابا وكلمتو وكلمت حبوبة، تاتاتاتااااااا حبوبة وماادراك ماحبوبة
نادتني وفهمت مني الحاصل وطوالي قالت لي ماما اتصلي بي ثريا فوراً وماما اتصلت وأنا ممحنة طبعاً حاتعمل شنو عنتر دي صعبة الله يستر
شالت التلفون وسلمت على المرا بي كل أدب وزوق وقالت ليها ولدكم فسخ الخطوبة عشان خاطر واحدة تانية ورما كلامو في وش البت، ماكان العشم والله, بتنا لامعيوبة لاناقصة وبجيها البقدرا ان شاء الله وفي أمان الله وكانت معرفة خير وأمها حاتجيب ليكم الشبكة والدبلة ان شاءالله
المرا تشيل وتتأسف وتتعذر وحبوبة اختصرتا بي زوق وقفلت الخط.. حسيت بي غصة في قلبي أنا لي قلتا ليهم وماخبيت ليه يانورهان ماقويتي على زعل قلبك كان جايز إسلام يتراجع ويرجع ليك، بحبك يا إسلام حبيتك بصدق ياريت لو كنتا حسيت بي.. نهال لما جات عرفت الحصل والغريب إنها ماقالت لي أحسن شي وكلام بالشكل ده بالعكس حضنتني وقالت لي فضفضي وابكي بترتاحي وفعلا ده الحصل..
بالليل إسلام تاني اتصل ورسل لي في الواتس فمسحت الدردشة ماقريتهم من الأساس وقفلت النت وصمتا التلفون، الغريب اني ماحظرتو كأني لسه عندي أمل نرجع سوا من جديد.. إسلام أظن أهلو عملو ليهو عمايل وشاكلوهو على الإحراج العرضهم ليهو.. عرفتا الشي ده تاني يوم لأنو جا القناة في الوقت الأنا بخلص فيهو واستناني برا ولما انا طلعتا ضرب لي بوري ولما اتلفتا نزل القزاز وناداني قال لي اركبي، قلتا ليهو البركبني معاك شنو وانت لسه فاسخ معاي، اصر شديد قلتا اختصرو قمتا ركبتا في الأخير وأنا في نفسي انو يعتذر ويحنسني نرجع سوا لكن حصل العكس ولما اتحرك اتحرك بي سرعة رهيبة وبقى يجوط فيني ويكورك وأنا ساكتة قال لي أنا تطلعني ماراجل قدام اهلي واهلك بي كل وقاحة تقولي أنا سبتك خليتيني زي الشافع قدام اهلي يشاكلو فيني، جد إنتي واحدة حقيرة
هنا انا ماسكتا تاني وقلتا ليهو: ولسه بتأكد إنك ماراجل لأنك مركبني معاك عشان تكورك فيني ومافاضل الا تمد يدك كمان وياسيدي انا قلتا الحقيقة عايزني اضاري ليك كمان واطلع انا الندلة الفسخت خطوبتا ومابعيد كمان علوية تطلع اشاعة تقول انا بعرف عليك واحد
مع قولة علوية دي النار شبت فيهو بقى يكورك ازيد وقال لي علوية البتقوليها دي ستك على الأقل طول الوقت كانت فاهماك
ضحكتا فجأة زي الضربني الجنون وقلتا ليهو يازوول؟ ستي عديل كده؟ انا الحمدلله مانافقت زول زيها بتقابلني بي وش وورا ضهري بتنم فيني وتقطعو فيني سوا وانت كمان طلعتا منافق زيها اعوذ بالله ياخسارة حبي ليك اريتني متا ولا اتنيلتا حبيت زول منافق لأنو المنافقين في الدرك الاسفل يوم القيامة لو كنت مزاكر دينك كويس وبي المناسبة في سورة كاملة في القرآن اسمها المنافقون اقراها انت والبتقول عليها ستي....
ياخ الزول ده في لحظة اتقلب وبقى مرعب بشكل ماعارفة اوصفو كيف وفجأة داس بنزين ازيد وانا بديت اتوتر وقلتا ليهو براحة انت مجنون ولاشنو وقف نزلني ياخ نزلني وفجأة آخر شي بتزكرو اني صرختا والدنيا في وشي بقت ضلام وصوت طااااااخ كان عالي واتلاشى بشويييش، ماعارفة اظن اتقلبنا كم مرة لأنو حسيت شي كده مامفهوم زي احساس الخضار في الخلاطة،
مابعرف تاني شنو حصل كل شي بقى أسود وعم السكون، كنت بحس إني في حلم وبسمع اصوات من بعييييد وهمس وأحياناً بكى وبقيت على الحال دي قدر شنو ماعارفة....
العرفتو من القالو ليا فيما بعد انو حصل لينا حادث خطير صدمتنا عربية وعربيتنا اتقلبت 5مرات في الظلط لحد ماطلعت براهو واتهرست هرس عجيب والناس الشافو الحصل كانو متأكدين انو الراكبين فيها ماتو اللي هم نحن