#لوتعرف_الشوق 9
ياسمين شاكر
زينة وافقت مجبرة إنها تمشي لي جلال محل عايز وفعلاً إتلاقو في بيتو، كانت خايفة زول يشوفا من ناس الحي يجو يكابسوهم وتبقى فضيحة.. قلبها يودي ويجيب، المهم جلال امن ليها الطريق ودخلت البيت في أمان؟
زينة بزعل: هديني جيتك ياجلال بس ده مامعناهو اني ممكن اعمل معاك علاقة جسدية غير زواج لو بتحبني اصبر لمن اطلق أميين
جلال : لينا تلاتة سنين مع بعض ولافكرتي تطلقي شنو هو اصلو حتت راجل ماعارفة تخلعي في المحكمة؟
زينة : ياحبي اظني حكيت ليك وفهمتك مليون مرة إنو هو ود عمتي وأبوي ماراضي يخليني أنفصل منو، كل مااعمل معاهو مشكلة يجبروني أصبر و أسكت، أمين أصلاً مازول بريء ومسكين هو اسؤ و العن مني بس حريص ماقادرة اقبضو عشان يكون عندي عذر قوي اقنع بيهو أبوي
جلال فكر شوية وقال : أنا ممكن اترصدو ليك واراقبو وأعرف ليك تحركاتو وأجيب ليك دليل
إبتسمت زينة بخباثة وقالت : عرفت لييه إني بحبك شديد؟ كده هاتسهل لينا الموضوع واطلق بسرعة ونتلم أنا وإنت
جلال بهاظر فيها: حسي مافي اي تصبيرة كده ولا كده؟
زينة : جلاااااال، ماتخليني اغضب عليك أصلاً أنا لسه زعلانة من تهديدك لي وأسلوبك الرخيص معاي
جلال: كان لازم الاقيك ومالقيت طريقة غير دي بسبب عنادك
بكدة كسبت زمن مع جلال وسكتتو لكن مشكلتا أمين ماساهل تفرتق منو يبدو إنو فكرة جلال كويسة وهاتكسبا في الأخير حاجة..
________________________
أمينة لمت القروش العندها كلها ورصتا في الشنطة وجهزت وطلعت من البيت عشان تلاقي شريف..
لاقتو هو الشلة الغريبة حقتهم في حديقة عامة بتلمو فيها دايماً وبعملو حلقات نقاشية وبتبنو أفكار غريبة ونشاطاتهم مريبة شباب وبنات.. شريف اخدا على جمبة وشال منها القروش ختاهم في عربية صحبو وامنهم كويس..
بقو قاعدين وفي واحد كده اسمو يسري شغال يخطب فيهم : الطبقة البرجوازية هي سبب الفساد الحاصل في بلدنا عيشة الغنى والعز هي العلمتنا البطر وعلمتنا سفاسف الأمور، الطبقة الكادحة هي الطبقة العظيمة هي الفاهمة البلد ماشة كيف وسياستا شنو، ياإخوتي نحن خلقنا لنناضل ضد هولاء التماسيح التي لاتشبع بطونهم، دمهم حلال واموالهم حقٌ للفقراء الشرفاء
الزول ده بس شغال يسمم في عقول الناس دي بي أفكار الحقد والكراهية واغلبهم من أبناء الطبقة الغنية، خلوهم يكرهو اهلهم الظلمة الأشرار، أمينة من أيام الجامعة اتشربت منهم الأفكار دي، ومن وقتها منفصلة تماماً فكرياً عن أهلها وماعندها ليهم أي مشاعر بل بقت ناقمة على كونها بنت أهلها اغنياء..
شريف قعد بيها في ركن هادي بعيد من الشباب وبدا يقول ليها : عندي ليك هدية
أمينة : هدية شنو
شريف: جماعة اصحابي معرفة هدو لي حاجة قلت لازم ينوبك من الحب جانب
أمينة : تسلم لي ياقلبي
شريف: دي بودرة سحرية زرات منها بتخليك في عالم جميييييل وتنسيكي اي هم
أمينة : بودرة؟ مخدرات يعني ياشريف؟ لأ دي خطيرة شلتها لييه
شريف : يابت انتي هاتصدقي لي كلام المسلسلات وتهولي لي الامور ؟ دي ماخطيرة دي حاجة كدة روووعة ومامنها أضرار
أمينة : تضمن من وين انها أمان؟
شريف: ثقي فيني انا مجربا وعايزك تجربي معاي الإحساس.. أمينة خليك اوبن مايند ماتسمعي لي الأفكار القمعية البمارسها المجتمع ضد المرأة وبمنعها من أبسط مباهج الحياة بس عشان هي بت، مانفسك تعيشي حرة طليقة في العالم ده؟ لازم تطلعي من شرنقة الأهل البخنقونا بيها دي وتجربي عوالم جديدة..
أمينة : انت ساهل عليك تعمل اي شي وبقولو راجل في الأخير
شريف : لازم تنضمي للنضال الحقيقي في نشر الوعي في المجتمع، لازم البت تبقى حره زيها زي الولد تطلع تصاحب ترجع متى ماتحب تجرب العلاقات الجنسية زيها زي الولد بدون مازول يقمعها ويقول ليها انتي عار وفضيحة.. من حقك تشربي سجاير وشيشة واي شي يتمناهو قلبك لأنو البت والولد الاتنين بشر مافي زول احسن من التاني...
شريف قعد فترة طويلة يغسل دماغ أمينة بي الأفكار السوداوية دي وهي مبهورة بي عقليتو المتفتحة ومدى فهمو... وفي الاخير جربت البودرة إرضاء ليه...
___________________
في بورتسودان البنات طلعو ماخلو مكان مازاروه وسامي مرات برافقهم ومرات لأ
لينا كانت عارفة تتصرف وكيف توديهم الحتت المشوها، لحد مااتعرفت ليها على واحد هناك وبقت مهتمة بي ملاقاتو وباعت البتين وبقت بس قصاد الشاب شي تلفونات وشي طلعات وضيعت عليهم اغلب ايام الرحلة وبقو قاعدين في الفندق، ميار قضتا لابتوب وتلفون وباعت القضية، خولة بدت تلاقي سامي في البهو بتاع الفندق او الحديقة الفي الفندق ويتونسو بالساعات وتصر كل مرة هي التعزمو وتدفع القروش مهما هو اعترض هي بتمشي كلاما..
خلصت العشرة يوم وبقو راجعين خلاص وجا سامي ودعا ووعدا يفضل يتواصل معاها بي التلفون... ده كلو والعلاقة الجديدة دي ماكان ليها مسمى
سامي : توصلي بالسلامة انتي ورفيقاتك بتصل بعدين اطمن انكم وصلتو سالمين لبيوتكم
خولة : شكراً لي تخصيصك وقت لينا ماكنت مجبر عليهو
سامي : العفو واجبنا ده
خولة : مع السلامة ياسامي ياخو سهام مرت أحمد أخوي
سامي : بلغيهم سلامى وامانة عليكي تبوسي لي بهجة كتير وتديها هديتي
خولة : دي حبيبة عمتا رغم عمايل أهلها..
سافرت خولة خلاص وكل حي رجع لي حياتو..
خولة رجعت بنفسية عالية والبسمة مابتفارق شفايفا، المسا جاها تلفون من سامي مشت قعدت في الجنينة وبقت تتكلم وظاهر في وشها السعادة، سهام لمحتا وجاها فضول تعرف منو الضرب ليها خلاها فرحانة ومغتبطة كده ومشت قريب عايزة تسمع اي شي، أكيد ده حبيب ولا صاحب مبارياهو ولازم تعرف القصة شنو وتكون جاهزة عشان لو احتاجت تستخدم اي معلومة ضدها..
خولة ماسكة التلفون وبتلعب في شعرها : اهلييين........ ايوة رجعنا الحمدلله سالمين وحسي فيييي بيتنا
سامي: حمدلله على السلامه
خولة : بجد أنا ممتنة ليك على الوقت الجميل القضيناهو سوا
سهام برقت عيونا وفكرت : ايواااااا كنت واثقة انو في ولد في الموضوع وسافر معاها الا سامي ماوراني الحقيقة
خولة : ياريت اشوفك تاني قريب
سامي: وانا كمان سعدتا بي لقاك من تاني، ان شاء الله قريب نتلاقى في ساعة خير
خولة : مع السلامة يا سامي ياأخو سهام مرت أحمد أخوي..
سهام إتهجمت ولسانا اتربط: سامي؟ سامي أخوها هو الضارب لخولة؟ البت دي مشت هببت شنو هناك؟ قالت ليهو الاوقات القضيناها سوا؟ البت دي الله يكفينا شرها..
انسحبت براحة ودخلت بيتا وراسها يودي ويجيب....
خولة إتأكدت إنها دايرة سامي بأي طريقة، لايمكن تسيبو، عمرها مافي زول اسعدها بي الطريقة دي ولفت نظرا بس كمان عايزاهو هو يسعى ليها لكنو ضارب الطناش وشابكا الفرق بينا ونحن من عالمين مختلفين، تقول جايي من الفضاء؟
وهي قاعدة مع أفكارها تلمح ليك زينة جاية تتقدل بعد وقفت العربية
خولة : هيييييي! زييييينة! نحن هنا
زينة من بعيد: عدتي يا القاهر؟ هههههههه
جات عليها وقعدت معاها ورمت حاجاتا في التربيزة بتعب وهي بتتنهد
خولة : مس زينة وإرهاق العمل
زينة : اسكتيييي تعب مبالغ الليلة كان عندنا كذا عروس
خولة : شي مرة ساي صرفي اختك من الملايين النازلة ترف عليك دي
زينة : قل هو الله أحد.. خمسة وخميسة
خزلة : لزوما شنو خمسة وخميسة بعد قل هو الله احد ياجاهلة
جات رسالة في تلفون زينة فخولة تاوقت على الشاشة لكن زينة خطفتو سريع وقالت ليها: بطلي شماراتك دي
خولة لاحظت انو زينة ارتبكت وده أثار دهشتا ياربي مالا؟ عاملة زي البت الحابة جديد كده! عجيب
زينة قامت وقالت ليها: سلامات يا حلوة ماشة اغير وأرتاح
خولة : سلام انا كمان داخلة أرتاح بعد ده
زينة : مالك قاعدة في الهمبريب ده براك كنتي خالطة في التلفون؟
خولة : خالطة اي ليك شوق في حاجة؟
زينة : لا وعلى إيه سلام يابطة
واتفارقو كل واحدة على إتجاه....
_____________________
أمينة رجعت البيت دايخة وأحاسيسها مامترابطة مرة تبتسم ومرة تعبث وجري على غرفتا كايسة السرير...
شافتا سهام بي شباك غرفتهم البطل على الجنينة وقالت في نفسها : دي مالها كمان البت الغريبة دي ، غايتو ياأحمد أخواتك أخوات السجم والرماد..
رقدت في سريرا وبدت تسترجع أحداث اليوم وشريف والشلة والركن السياسي وكل شوية تتبسم، بناسبها ترتبط بي واحد زي شريف وحست انها حاتكون الأفضل حظاً بين أخواتها لما يتزوجو هي وهو...
خولة جات داخلة ليها في الاوضة وقالت عدناااا!
قامت على حيلها وبي صراخ قالت ليها : بتخشي ساي مالك مش في باب هنا؟ اطلعي برا يلااااا
خولة عاينت ليها مستغربة : بس انا دقيتو قبال أدخل وبعدين دي ملاقاتك لي بعد غياب كم يوم؟
أمينة : إزيك أهلين ومع السلامة ممكن تمشي اوضتك بعد ده؟
خولة : غلطانة أنا قلت اسلم عليك عذراً لي جنابك
طلعت منها وقفلت الباب وهي بتقول: مانصيحة بالجد ، يلا أفضل أمشي أنوم شوية وقبلها أعاكس سامي في الواتس شوية ههههه.....
سهام إتصلت لي سامي تشوف شمار خولة شنو
سهام : هاااا كيف كانت خولة معاك اكيد زهجتك
سامي : سهام لو عايزة تستفسري من شي قولي عديل، خولة جات اجازة مع صحباتا أنا حي الله وصلتهم كذا مشوار وفقدتهم كذا مرا، ماقلتو لي ابقا ليها في زمتا واخنقا في رقبتا لحد ماترجع
سهام: انا بس عايزة اتأكد هل قابلت اولاد هناك هل في اولاد سافرو معاهم؟
سامي : ياسهام مالك انتي ومالها إذا أهلها ماهاميهم السؤال ده بتنكشي وراها دايرة شنو انتي؟ احفظي بيتك وخليك في حالك مادايرك ترجعي لينا بكرة مطلقة في يدك طفلين، الفتنة أشد من القتل لو تتزكري..
سهام : خلاص عارفاك ماحاتقول لي شي
سامي : عشان هو مافي شي ارتحتي؟ اقفلي اقفلي ياخ انا مافاضي لي امور الحريم دي...
سهام خاتة راسها بي راس خولة لييه ماتعرفو بس بقت خولة مضايقاها وهي دايرة يوم موتا زي مابقولو....
_________________
أمين مارجع بيتو من الشغل مشا مشوار تاني ، مشى قابل نهال الزانة فيهو انو لازم تقابلو ضروري
أمين: دايرة شنو يانهال مالك ياخ باقية لي في العزيزة
نهال : أمين أنا حامل
أمين : شنو شنو؟ نهال العبي غيرها ماتفتكري انك كده بتجريني من رقبتي، حركات الافلام الابيض وأسود دي ماعلي أنا
نهال: أنا حامل منك وبراي مابشيل الشيلة وريتك أنا
أمين: مامني انا كنت عامل حسابي شوفي زول تاني أرمي عليهو بلاك
نهال : كلكم من تنزنقو بتقولو الجملتين ديل
أمين: نهال أنا كان قبلت عليك بفرمك، نزلي الطفل ده ولا شوفي ابوهو وين اوعك تهدديني بيهو
نهال: نشوف راي زينة أول بعدين أتصرف
أمين: ابقي مرا قربي من زينة
نهال: ببقى مرا لو انت بقيت راجل
أمين : انا ماضربتك على يدك كلو كان بي رضاك
نهال : ايوة انا معترفة باقي تعترف انت، انا حا أهد عليك المعبد لو فكرت تغدر بي، اتزوجني حتى لو في السر انا راضية لكن تحاول تخلع إنت لسه مابتعرفني بخليك تمشي تتلفت وراك وجربني لو بتتجرأ وجناي انا مابنزلو فهمتني؟
أمين إنزهل من نهال كان فاكرها لقمة سايغة ياكلها ويرميها لكن حسي مسكو منها قلق، لو زينة شمت خبر كلو شي حاينهار لازم يلقى طريقة تحلو من الشرك ده بأقصى سرعة..
أمين : خليني أفكر بالهداوة كده وأرد عليك
نهال: شوف أنا لو وريت أهلي بجرسوك انت وأهلك وقبيلتك وولدك الانت فرحان بيهو ده قصاد ولدهم والله محل يغطس مابتعرفو تاني
أمين: بتهدديني بي ولدي ياحقيرة؟لو لمستو منو شعراية بحرقكم كلكم
نهال: أخواني رباطة والله يلعبوك على الشناكل احسن ليك تجي معاي عديل
أمين: خلاص فهمنا يابت الناس بفكر في حل وبرد عليك ماتصرفي عربي كتير
نهال: هين بنتظرك لكن ماكتير
وبكدة أمين وقع في شرك عجيب والله يحلو من نفر دي وقعة......