رواية ابتليت بحبها الجزء الثاني2 الفصل السابع7 بقلم نجمه براقه
صدام
بابا
جاتني الكلمة دي بصوت فيروز في البداية حرصت اني مالتفتش ليها ولا اشوفها وانا علي استعداد إني اطلقها لو طلبت لأني مكنتش عايز ابان متمسك بيها بعد صدي ليها طول الوقت ولكن باقي كلامها فاجئني خلاني ابصلها بشكل لا ارادي وانا مش قادر استوعب هي لية مصممة تنفذ طلبي اللي طلبته منها رغم اسلوبي الناشف معاها
- هو مش هينفع يطلق يسرا عشان ابنه وانا مش مستعدة اطلق
- ولية، اديني سبب
سكتت ف قال
- متمسكة بيه بعد اللي عمله
- اسباب كتير مش عاوزه اقولها بس اقدر اقولك اني مش عاوزه اغامر بسمعتي وسط الناس
- سمعتك انا هحفظهالك واللي يتطاول عليكي بكلمة هقطعله لسانه انا يوم ما وافقت انه يتجوزك وافقت علشان يحميكي بعد موتي علشان كنت فاكره راجل ولأن طلاقه هو ومراته كان مسالة وقت
بصلي وقال
- وانا مش هقبل ان بنتي تتهان طول ما انا عايش، اختار دلوقتي يابنتي يا يسرا.. "
سكت وهي لتاني مره تعفيني من الحرج لما وقفت قدامه وقالت
- بابا لو سمحت لا شرع ولا دين ولا قانون بيحرم جواز الراجل من اتنين، انا معنديش مشكله وراضية ولو علي زعله ف هو هيهدا دلوقتي.. لو سمحت سيبني علي راحتي
التفتت ليا وقالت
- انا اخترت وانا متحملة نتيجة اختياري ولا ايه
تهربت من نظراتها وقولت
- انا شايف ان كده المشكله اتحلت بنسبالك ياعمي وهي قالتلك قرارها ولو لسة زعلان ياريت نأجل الكلام في الموضوع ده لوقت تاني، طالع اغير هدومي
مشيت باتجاه السلم وكملت طريقي لفوق وانا سامعه بيقول
- دافعتي عنه و واقفتي معاه علي حساب كرامتك وهو حتي مبصلكش وقالك شكراً
مردتش وانا ملتفتش ليهم تاني وبعد دقايق وانا قاعده في الاوضه دخلت عليا يسرا ومحاولتش تكلمني ولا انا، بعد اللي قالته لو كنت كلمتها كنت هضربها بس ف قومت و وقفت في الجنينة علشان ابعد عنها وبعد دقايق شوفت فيروز ماسكة المصحف وماشية بأتجاه البوابه فهمت انها رايحه المركز ودي كانت فرصة اتمنيت تيجي عشان اسمع هتقول ايه بعد الموقف ده ف ناديت عليها وطلبت منها تستنا وبعدين طلعت من الاوضه وتحت لقيت ماما بتوقف في طريقي وبتقولي بجمود
- انا مدخلتش اهو شوف هتحل مشكلتك مع جدك ازاي .. "
انهت جملتها ومشيت وانا طلعت ورا فيروز ولكن ملقتهاش ولما سألت الأمن قالولي خرجت رجعت جبت العربيه وطلعت ولقيتها ماشية علي بعد مسافة صغيره من الفيلا وقفتها وطلبت منها تدخل تجاهلتني وكملت مشي ف نزلت من العربيه مسكت دراعها وقولت
- انا مش بكلمك
بعدت ايدي عنها وقالت
- عايز ايه
- هوصلك
- عاوزه اتمشي شويه
- المشاور بعيد علي التمشية، تعالي وابقي اتمشي وقت تاني.. يلا
واقفت من غير كلام تاني ودخلنا العربيه ومرت دقايق محدش فينا قال كلمة، كنت عايز اسمع ممكن تقول ايه بس مكنش عندي الجرائه اني اتكلم ولسة الكلام اللي سمعته من ماما تاعبني لغيت هي اللي كسرت الصمت اللي بينا وقالت
- يارب مكنش فرضت نفسي عليك، انا قولت ان الوقت ده والحالة اللي احنا فيها مينفعش ناخد فيها اي قرارات
- ده السبب اللي خلاكي تتكلمي
- اه
- يعني عاوزه تطلقي بس الوقت مش مناسب للكلام في الموضوع ده؟
سكتت ف قولت
- مردتيش يعني
- اي كلام هقوله هيبقي اهانة ليا، خلينا نأجل الكلام لبعدين
- بس انا عاوز اعرف دلوقتي، واللي انتي عاوزاه هعمله
-...
- سكتي ليه
- ما انا بقولك اي كلام هقوله هيبقي اهانة ليا
- انا بقولك اللي عاوزاه هعمله فين الاهانة
- ماشي، اللي انا عاوزاه أننا ناجل الكلام لبعدين
- بردو
- اه
- ماشي زي ما تحبي
رجعنا من تاني لسكوت في الوقت اللي انا كنت محتاج اني اتكلم واقول كل اللي حاسس بيه، كنت بتمني تتكلم وتجبرني انا كمان اتكلم بس كان واضح ان محاولاتها للقرب مني انتهت وتعبت
#فيروز
مشكلتي الوحيدة اني فهماه من غير ما يقول اللي عاوزه واني للاسف بحبه وهو مش حابب نفسه.
اخترت اكمل لان هو عاوزني ومش قادر يقولها وبيعمل كل حاجه تثبت العكس.
وصلني للمركز نزلت هناك وقالي
- ابقي اتصلي عليا اجي اخدك او ابعتلك حد
- طيب
مشي وانا دخلت لقيت عدد قليل من البنات مستنين رميت عليهم السلام وقعدت اراجع بتركيز كامل اللي هسمعه لغيت ما انتبهت لصوت الشيخ وهو بيقول
- السلام عليكم
التفت ليه فوراً وقومت احتراماً ليه ف لقيت كل البنات حضروا وقعدنا كلنا وهو قعد مكانه وبدء يسمعلنا ولتالت مرة يطلب مني اقراء واسمع البنات القراة الصحيح، ومستغربتش تصرفه ده لأني لحد كبير متمكنة عنهم بصرف النظر عن اعجابه المبالغ فيه وهو بيكلمني
#حمزة
رجعت البيت في وقت متأخر وانا مقرر متكلمش مع رقية بعد الموقف اللي حصل منها وابطل محاولاتي بكسب ثقتها ولكن بمجرد ما فتحت الباب ودخلت لقيت صوت صراخها جاي من المطبخ ومالي البيت وهي بتقول
- الحقوني هيقتلني
طلعت اجري عليها وانا بتخيل ان حد محاصرها وفي ايده السكينة او مسدس ولكن لما وصلت لقيتها طالعة علي رخامة المطبخ وبتصوت بقيت ادور حوليا عن اللي مخوفها ملقتش ولكن منظرها وهي كده خوفني انا شخصياً ف قربت منها وقولت انا لسة ببص حوليا بحذر
- اهدي اهدي
- الحقني ونبي هيموتني
مسكت ايدها وقولت وانا بدور عن اللي هيقتلها
- طيب اهدي وقوليلي هو مين وفينه
قالت بصراخ وهي بتشاور علي التلاجة
- فار دخل ورا التلاجة وكان هياكلني
- نعم
- والله فار
- كان هيقتلك وهياكلك
- ايوه ايوه اصله فار كبير قوي
- اممم
- مش مصدقني طيب شوف بنفسك
- مصدقك بس مش مقتنع بياكلك دي انتي محتاجه تمساح او حوت عشان يقدروا عليكي، فزعتي امي، انزلي
- لا لا
- يابنتي انزلي انا معاكي وهحميكي منه وممكن كمان ارمي نفسي قدامك علشان ياكلني انا بدالك
مسكت ايديها وقولت
- تعالي متخافيش وبطلي عبط قطعتي خلفي ده انا قولت هلاقي عصابة
#رقية
مسكني من وسطي ونزلني وضمني ليه واحنا ماشيين وعلشان مبوظش اللي بدأته اجبرت نفسي اسكت لا وكمان امسك فيه احتماء من الفار الوهمي اللي انا اخترعته ورجعنا الاوضه قعدني علي السرير وقال بضحك
- رعبتي امي النهارده، كل الصراخ ده وهيقتلني علشان فار
- ما انا بقولك فار كبير ولقيته تحت رجليه كمان
- لا كدة حقك تخافي بس عارفه انا تفاجأت
- من ايه
- انك بتخافي، كنت فاكرك مش بتخافي من حاجه
- كل انسان في حاجه بيخاف منها
- صح طيب وبتخافي من ايه كمان
- كتير، الضلمة، والأبراص، والأسانسير وبذات الفار لو شوفته من مسافة عشرين متر بموت من الخوف وافضل اصوت
- هو يخوف انا كمان بخاف منه وبترعب انه يدخل في البنطلون بذات بس مش لدرجة انك تتخيليه هياكلك يعني
- اهو عندي فوبيا منه وخلاص، كل الناس عندها حاجه بتخاف منها مش انا لوحدي علشان متتريقش
- واتريق لية ما انا كمان في حاجات بخاف منها
- انت بتخاف؟
- اه ما انا انسان بردو
- وبتخاف من ايه
فكر لثواني وبعدين قال
- بخاف من الموت، في اوقات مبقدرش انام بسبب تفكيري فيه، بقعد اتخيل اني ميت ومدفون في قبر والناس كلهم سايبيني لوحدي، وثعبان اقرع ومنكر ونكير وكل الليلة دي
- الموت مخيف مفيش شك بس الحقيقه اننا مبنخفش من الموت نفسه احنا بس خايفين من تقصيرنا في حق ربنا ومن الذنوب اللي بنرتكبها، بس الناس القريبين من ربنا وبيستشعروا وجوده في كل حاجه بيعملوها مش بيخافوا من الموت وبتلاقيهم مستنينه كمان
- من ناحية التقصير ف انا اكيد مقصر ومش برتكب ذنوب وبس لا دي كبائر ، طيب انتي عارفه
- ايه
- اللي زيي بيخاف يسمع كلام ربنا
- يعني ايه اللي زيك
- يعني اللي حياته كلها كبائر وذنوب
- يعني معترف انك بتعمل كبائر اهو
- عمري ما قولت غير كده، شوفي انا اكتر انسان في الدنيا مصتلح مع نفسه، مش هقولك مبغلطش ولا هقولك الناس كلها بتغلط ف عادي موقفتش عليا، لا انا عارف اني بغلط، عارف ان لكل انسان صحيفته اللي بيملاها بنفسه، عارف اني مش هورد علي جنة وهو ده اللي بيخوفني من الموت
- طيب لما انت عارف كده بتخاف تسمع كلام ربنا ليه، مش يمكن لو سمعته ربنا يهديك وتمشي مستقيم
- مين قالك اني مسمعتهوش
- ما انت بتقول اهو
- بقول بخاف اسمعه بس سمعت كتير ، عندي صحابي كل ما واحد فيهم يجيله وقت يحب يقرب من ربنا ويبعد عن العيشة بتاعتنا، عقله بيقوله انصح صحابك ف بيبعتولي ايه بقا تخيلي
- ممكن دروس لعمر خالد
- ياريت
- امال ايه
- بيبعتولي خطب لواحد بيزعق ويحسسك ان القيامة هتقوم دلوقتي حالا وبيتكلم عن عذاب القبر وعن عذاب جهنم وعن ان كل حرف وكل خطوة وكل رمشة عين بتتسجل وهتحاسب عليها والابشع كمان انه بيقولك ان كل صلاة فوتها هصليها علي مصلية من نار في جهنم ولا لما يقولك، هتروح منه فيييين يا مسكين رايحله رايحله
حاولت امنع نفسي من الضحك ولكن علي قد ما حاولت كان باين عليا ف قال
- بتضحكي؟ ماهما يرعبوا صحيح، انا جسمي بيسخن لما بفكر في كلامهم، علي شويه هقوم من مكاني اروح لأمي تنيمني معاها الحكاية مش هزار خالص
- انا عارفه وانا كمان كنت بخاف في الاول
- كنتي
- ايوه
- طيب وعملتي ايه علشان تبطلي
- مبقتش افكر في الموت، بقيت بقول لنفسي ان الحياة مرحلة وهتعدي وان الحياة الحقيقية بعد الموت
- ايوه ما انا فاهم بس الحياة اللي بعد الموت دي مبنية علي الحياة اللي عايشينها دلوقتي
- صحيح، بس ربنا رحيم بعباده، مين عارف مش يمكن عملت حاجه خلتك قريب من ربنا وبيحبك
- جايز لية لا ما انا طيب كدة كدة، بس بردو منك لله
- لية انا جيت جنبك
- فتحتي السيرة، ومش هعرف انام الليلة
- لو عاوز تنام نام انا صاحية
- لا مش هقدر خلاص انا جسمي اتلبش، تيجي نعمل اي حاجه
- لا
- لا لية
- مش عاوزه اعمل اي حاجه معاك
- ده انتي سودة يا شيخة، انا كنت فاكر اننا بقينا صحاب
- امتي ده
- دلوقتي مش حكيتلك على مخاوفي وكشفتلك نقطة ضعفي نبقي صحاب ولا لا
- لا انا مبصاحبش ولاد
ابتسم بخبث وقال
- في رد على لساني مانع نفسي باعجوبة علشان مقلهوش ونختم السهرة الحلوة دي بزعل، بس انا امبسطت بالكلام معاكي مع اني مكنتش طايقك من شويه
-....
- سكتي يبقي الشعور مش متبادل؟
- لا مش متبادل
- مش بقولك سودة واحده غيرك كانت ابتسمت الابتسامة اللي بيبتسموها لما يبتدوا يغيروا فكرتهم عن الشخص اللي بيكرهوه
- لا ياشيخ، وهما اللي فكرتهم بتتغير بيبتسموا؟، ليهم ابتسامة مخصوص يعني
- اه انا ابتسمتها لما فوقت في المستشفي وافتكرت خوفك عليا لما كنتي هتقتليني..
ابتسمت بسخافة ف قام من جنبي وقال
- مش هي دي، بس انا قايم عشان هتقلب غم
- وانا بقول كده بردو
- ماشي بس خليكي صاحيه علشان تحرسيني.. "
بعد ماغير هدومه في الحمام رجع اتمدد علي الكنبة ومسك التليفون وبدء يقلب فيه وكان باين انه بيراسل حد وفي الوقت ده بصلي بصه غريبة وهو بيحك راسه وكان متردد في حاجه.
مكنتش فاهمه ماله لغيت ما شغل فويس بصوت بنت بتقوله
- مهما حاولت انساك واقنع نفسي انك مبقتش ليا مش بقدر، حرام عليك تعذبني كده ده انا بحبك.. "
بعد ما انتها الفويس وبصلي وقال
- حلها ايه دي
- معرفش، بس انت بعدت عنها ليه
- علشان شبهي
بصتله باستفهام ف قال
- شبهي
- بعدت عنها علشان شبهك
- ايوة اصلها صايعة زيي
- اهااا، بس عارف انا عاجبني فيك انا فاهم نفسك
- اه ما انا لسه قايلك مصتلح مع نفسي
- ونعم التصالح، طيب وفي شرع مين تحلل لنفسك تجوز وتستقر وهي لا
- وانا قولتلها متجوزيش يابنتي ما تجوز ولا تستقر ولا تنتحر حتي انا مالي
- مالك يعني ايه مش افسدتها
- انا مافسدتش حد هي فاسدة لوحدها احنا اتقابلنا في سهرة مع ناس زينا وهما يومين وكنا مع بعض وهي مكنتش رافضة اي حاجه حصلت بينا
- كمان، ده انت متصالح جداً ياخي
- قوي بس انا دلوقتي نفسي اتقفلت ومبقتش حابب اعرف حد زيها، وهي لزقة زي مانتي سامعة، محسساني اني ضحكت عليها
- وايه قفل نفسك ان شاءلله
- انتي
رفعت حاجبي وقولت
- افندم
- انتي
- ايووووه قول إني نكد وغم وسديت نفسك عن كل الستات وعيش دور الزوج المصري الاصيل، لا يا استاذ في الاساس كلامك ده مينطبقش علينا علشان احنا مش متجوزين وانا لو كنت اتجوزت برضايا وحابة الشخص اللي معايا كنت عرفته يعني ايه حياة سعيدة بس انت لا
ابتسم وقال
- انا امتي قولت انك نكد وغم وسديتي نفسي عن الستات
- اهو انت بتقول
- انا امتي قولت كده
- دلوقتي متطلعنيش غلطانه
اعتدل من نومته وقال
- يا حمارة افهمي
- مين دي اللي حمارة
- انتي، انا اقصد انك غيرهم، حاجه نضيفة وبنت ناس ولما عرفتك صغرت في عيني كل البنات دي وقرفت منهم
-.....
- زي ما سمعتي انتي غيرهم، بس مبحبكش علشان متاخديش كلامي علي مزاجك، انتي بنت نضيفة وبنت ناس ومتربية بس مبحبكش بقولك اهووو.. داخل الحمام
قالها وخرج من الاوضه وقتها افرجت عن ابتسامتي اللي كنت بحاول اخفيها قدامه وقولت محدثة نفسي
- ده عبيط ولا ايه.. والنعمة عبيط
قولتها ومسكت التليفون اشوف في ايه وكعادتي دخلت علي الواتساب ف لقيت محادثة سامح فتحتها وقريتها من تاني وقدرت في ثواني ترجعلي مصايبه اللي عملها معايا من اول مضايقته ليا في المكتب لغيت ما تعدا عليا من يومين وبعد دقيقه وانا بعيد قرائتها دخل عليا وقال
- بقولك ايه، تاكلي
قفلت التليفون وقولت
- لا انا هنام
- هو ده اللي هتحرسيني
- معلش بقا مليش كلمة، تصبح على خير
قولتها وتمددت على السرير وسحبت الغطاء علي نفسي بالكامل
#ياسر
دخلت اوضة هدي اتسحب خدت موبايلها ورجعت اوضتي ولما فتحت الواتس اب لقيت شات بسنت لسة موجود متحذفش ف تجرات وبعتلها
- ازيك، انا ياسر وردي عليا عايز اقولك حاجه مهمة قوي
استنيت دقيقه ورا دقيقه وهي مردتش وشكلها كانت نايمة وفجاة دخلت عليا هدي خطفت مني التليفون وقالت
- يا حرامي
- مالك يابت في ايه كنت بطمن عليكي
- تطمن عليا ولا تبعت للبنات من تليفوني
- بطلي بواخة بقا يا دودو وهاتي التليفون هقولها كلمتين وهديهولك
- لا ابعتلها من عندك
- ياجزمة ماهي مبلكاني امال انا ايه حوجني لواحدة زيك
زمة شفايفها وقالت
- طيب افهم الاول ايه العبارة حب ولا سفالة و وقاحة
- جواز
- جواز جواز ولا استعباط
- وربنا جواز بس اجس نبضها الاول قبل ما اخد ابوكي ونروح
- اوكي لو كده، احكيلي حكايتها وانا هقولك تتصرف ازاي
- حكاية ايه يابت، اتلمي لا ارقعلك سداغك
- بقاااا كده طيب مفيش تليفون
تابعت وهي بتخبيه في صدرها
-: واهو وقع في المجاري
- طيب والله لا اقول لامك علي الحركة دي
- قولها وانا هقول لبابا انك بتكلم البنات من تليفوني
قالتها وطلعت بالتليفون وانا بقيت الف حولين نفسي مش عارفه اتصرف ازاي وفجاة جه علي بالي مروان ف بعتله فوراً وقولت
- ولا يا مروان خد عايزك
- رد عليا وقال
- عايز ايه ياض
- بقولك ايه يا حبيبي عاوزك في خدمة
- مبرتحلكش بس قول
- دي خدمة صغيرة مش هتكلفك غير كود صغير
- ولااا بقلق منك، قول عايز ايه
- انت مش عندك رقمين، سلفني رقمك التاني اعمل منه واتس لساعة واحده بس
- هتعملي بيه ايه
- موزة مبلكاني عايز اكلمها، انا اخوك حبيبك اخدمني
- ياخي خد الشريحة كلها، يلا اعمل وانا هبعتلك الكود لما يوصل
- اصيل، هو ده مروان الرجولة
- ياعم اخلص معطلني
- معطلك عن ايه
- بلاغي موزة جديدة وصدقت ما بلت ريقي بكلمتين
- ماشي ماشي لما يوصلك ابعتهولي
قفلت معاه وعملت الواتس اب علي رقمه وبعد دقيقه بعتلي الكود في رساله واتصل بيا وقال
- وصلك
- اه تمام شكراً حبيبي
- لا شكر علي واجب ياخويا، بس علي فكره الواد حازم طلبه مني من يومين مرضتش ادهوله متقولهوش بقا
- ولية مدتلهوش
- حسيته هيدبسني في مشكله
- وهو ماله بيه
- مقالش
- اوكي، كده كده انا مش بحكيله حاجه اطمن
- ماشي، خليه عندك انا مش بستخدمه كتير
- ماشي حبيبي تسلم يلا بقا انقلع
- انقلعت اهو
قفلت معاه ودخلت تاني الواتس اب وبعتلها
- انا ياسر يا بسنت وربنا لو عملتي بلوك لا هجيلك البيت ومايهمني حد
بعتها واستنيت ساعه ورا ساعه لغيت ما الفجر اذن وكنت هنام ولكن لحقتني وردت
- بتهددني؟
اعتدلت من نومتي بسرعه وقولت
- بهزر معاكي متعرفيش تفرقي
- هزارك بايخ عايز ايه وايه الارقام دي كلها
- اعملك ايه مانتي اللي مبلكاني، شيلي البلوك وانا هكلمك من رقمي بس
- وايه اللي هستفاده لما تكلمني
- هتستفدي عريس كاريزما والبنات كلها بتجري وراه ومش عايز غيرك
- انت لأما عبيط لأما بتستعبط، يابني انت تعرفني ولا شايفني داقة عصافير وهصدق امور الشقط بتاعتك دي
- وربنا عارفك مش هتصدقي وانا مش داخل اتسلي انا طلبت منك تاخديلي معاد اطلب ايدك رسمي انتي اللي مردتيش
- طيب وشمعنا انا متقوليش بتحبني بس
- مش هقول، بس انا شايفك مناسبة، وانا بصراحه كده عاوز اتجوز واتلم في بيت
- تتلم في بيت؟
- اه اصل انا صايع وعلي طول مع صحابي الصيع في الشارع
- طيب ولنفترض وافقت مش يمكن تسيبني وتروح تصيع
- هو في حد يسيب القمر
- هرزعك بلوك يخرج من نفوخك احترم نفسك
- وانا اتكلمت يابنتي،.. ماشي يابسنت، امتي هاجي اقابل ابوكي
- امممم
- لا بقولك ايه متزوميش هي كلمة ورد غطاها امتي هقابل ابوكي
- ماشي ممكن اخدلك معاد ونشوف حكايتك ايه بس مش دلوقتي، انا ورايا امتحانات ومش عاوزه انشغل عنها
- طيب امتي
- احسب شهر من دلوقتي
- شهر شهر، بس بالله عليكي يا شيخة تشيلي البلوك
- اشيله لية ما انا مش هتكلم
- ياستي شيليه وكل كام يوم كلميني كلمة لله، حني علي الغلبان اللي زيي
- ايه جو الشحاتة ده
- اعمل ايه مانتي مش راضيه ترحميني وتحسي بيا وبمشاعري
- علي فكره مبكرهش في حياتي قد الولد المسهوك انشف كدة علشان انا لو قفلت منك مفيش حاجه هترجعني زي الاول
- ماشي يابسنت بلاش سهوكة بس شيلي البلوك ولو ضايقتك بلكيني تاني، مفيش اسهل من كده
- امممم
- فكري.. ده انتي كده هتعرفيني وهتطمني
- وممكن اعرفك واقلق بردو
- وارد جدا ، واهو تكوني عرفتيني مش بدل ما تدبسي فيه واطلع مش مناسب
- هههههههه ممكن لية لا
- الله ضحكتك حلوه
- ضحكتي
- اه مش ضحكة دي ولا حبل معقد
- طيب ولما اعملك بلوك دلوقتي
- يخربيت اللي مسكك تليفون.. خلاص يابنتي اهو مفيش هزار ولا سهوكة شيلي البلوك بقا
- ماشي بس مش عاوزه كل شويه تن تن انا بنت ناس وبابا ممكن يعلقني
- وصلت
- تمام يلا روح صلي الفجر يمكن ربنا يهديك ويتوب عليك
#ياسين
نزلت من فوق لقيت الكل علي السفرة بما فيهم رحمة اللي قاعدة بتقلب في الطبق ومبتاكلش ف قعدت ولاحظت ان الكل كده مكنش حد بيقرب لاكله ف قولت
- مالكم مبتاكلوش لية
قالت مرات عمي
- بناكل اهو كل
- هو فين ده، في حاجه حصلت انا معرفهاش
- مفيش حاجه مهمة
قالت كاميليا
- صدام رجع يسرا وعمك زعلان
- رجعها لية، وهما فين
- هو راح المستشفى وهي فوق، وبيقولوا انها حامل
- ده بجد
قال عمي
- بيقول، بس الاصول بتقول انه يعرفنا واحنا نختار فيروز تكمل ولا تنهي المهزلة دي
قالت كاميليا
- فيروز اختارت ياعمي
قال وعينه علي فيروز
- وهي شافت ايه علشان تختار، امال لو كان معتبرها مراته هو انا اعمي ومش فاهم ان كل واحد فيهم بينام في اوضة، انا الغلطان من البداية اني وافقت علي الوضع ده
قالت مرات عمي وهي بتربت علي كتفه
- وحد الله يانبيل الولد زعلان علي ابوه محدش ياخد عليه دلوقتي وفيروز صح في اللي عملته، مكنش ينفع تزعل أبداً في الحالة دي.. سيبوهم براحتهم لما تشتكيلك ابقي ازعل
قولت
- عندها حق ياعمي وفيروز صح، ده مش وقت يتاخد فيه اي قرارات نستنا يكون عدت الازمة دي وبعدين نتكلم..
- وانا لية كلمة ماهي سكتتني وقالتلي متدخلش
قالت فيروز
- انا مقولتش كده يا بابا، بس انا مش عاوزه اتطلق وزي ما قال عمي ياسين نستنا يكون عدت الازمة.. عن اذنكم
قالتها وقامت واستمر عمي في الكلام واعتراضه عن الوضع ده ومن ناحية تانية رحمة كانت قاعده شاردة مبتتكلمش وتقريبا مكنتش واخده بالها مني لغيت ما قولت
- مبتكليش لية يا رحمة
انتبهت ليا وقالت
- نعم؟!
- مبتكليش لية
- شبعت
قالت مرات عمي
- انتي مكلتيش طبقك زي ماهو
- شبعت الحمدلله
همت انها تقوم ف قال عمي
- انتي علي طول كده شبعانة وعاوزة تقعدي لوحدك ولا ايه حكايتك معانا
- شبعت وهقوم فيها ايه دي، انا نفسي اعرف انت لية زعلان منى علي طول كده
قالت كاميليا
- اسمها حضرتك، عيب تقولي انت، وجدك عايزك تاكلي ايه مزعلك
- لا هو متضايق مني، وشكله شاكك فيه ولو المعاملة هتفضل كده انا همشي
قولت
- عيب تتكلمي كده مع جدك
- وانا اتكلمت ازاي، هو اللي متضايق مني وانا مقبلش اعيش تقيلة علي حد
قالت مرات عمي
- تقيلة مين يا عبيطة ده بيتك واحنا اهلك
- مقولناش حاجه بس هو متضايق مني وتقريبا كده شاكك اني نصابة لكن انا لا شوفتكم ولا عرفت انتوا مين غير لما ياسين قالي عليكم وهو اللي جابني انا مجتش
قال عمي
- وانا مقولتش نصابة اقعدي عيب اللي بتعمليه ده
- لا انا عاوزه اتمشي شويه
قالتها ومشيت ف قالت مرات عمي
- ما براحة علي البنت يا نبيل ميصحش كده
قالت كاميليا
- ما ردها يزعل بردو يا نادية، يعني مش شيفاها بتتكلم ازاي في وجودنا كلنا ومش مراعية اننا كبار
- وهو اسلوبه يزعل، نبيل شاكك انها مش بنت داليا مع انها شبها
قولت
- صحيح الكلام ده ياعمي
- انا مقولتش كده، بس البنت دي وراها حاجه ومش راضية تقولها
قالت كاميليا
- حاجه ايه يعني ياعمي
- ما انا مش عارف بس انا حاسس بكدة، قدامك يا ياسين لما جبنا سيرة امها اتهربت، تتهرب لية غير لو كانت مخبية حاجة
قولت
- ياعمي انت بتسالها امها ماتت ازاي وهي مش عاوزه تفتكر عشان بتتعب
- ايه اللي يتعبها لو قالت انها ماتت في حادثة، انا مش هرتاح غير لما تتكلم
- براحة، خلوا بالكم
جاتنا الكلمة دي بصوت صدام التفتنا عليه كلنا لقيناه هو وحمزة داخلين علينا هما واتنين تاني شايلين زيدان علي سرير متحرك ودخلوه الاوضه بتاعته وريحوه علي سريره وبعد ما مشيوا مفضلش غير ممرضة تراعيه قال صدام
- الدكتور قال أننا نقدر نخليه في البيت ف جيبناه يكون وسطنا
قالت كاميليا
- احسن حاجه عملتوها، كده هنطمن عليه اكتر
قولت
- الله ينور، يلا نسيبه يرتاح الدوشة غلط عليه
طلعنا كلنا وانا روحت الجنينة لقيت رحمة قاعده هي وسيكا هناك وبيتكلموا ولما حسوا بقربي منهم سكتوا وهو رجع الاستراحة وانا قفت عندها وقولت
- قاعده هنا ليه
- كده، ولو هتزعل تانى من وقفتي مع سيكا همشي، انا مش محتاجه منكم حاجه علشان تعاملوني كده
- ده انتي زعلانه قوي، بس تمشي تروحي فين
- ارض الله واسعة، بس انا مينفعش اتعامل كده لاي سبب، انا لا حرامية ولا نصابة
- ماشي بس احنا عاملناكي ازاي، لو علي جدك ف هو حقه يقلق، وانا لو اعترضت علي روحتك لسيكا ف ده من حقي متنسيش انك تعتبري مراتي.. ولا انا غلطان
- لا بس انت عارف من الاول ان سيكا يهمني، ومفيش بيني وبينه حاجه من اللي في دماغك
- وانا مقولتش بينكم حاجه، وماشي خليه بس انا مش طالب غير تخلي بالك مني شويه
سكتت ف قولت
- متزعليش منى انا بس...
- بس ايه
ترددت كتير قبل ما اقول
- يعني.. بغير عليكي، وبتضايق من اهتمامك بحد تاني
- اه
- اه؟ تبقي لسة زعلانه، طيب ايه رايك اصالحك بفسحة حلوة النهارده
- مش هينفع النهارده خليها يوم تاني
- ماشي، واهو اليوم ده نقضية مع العيلة
- تمام
- هتصل بحسن يجيب جيهان وسعد ونتلم كلنا
قولتلها واستدرت وانا بتصل علي حسن ف جاني صوتها وهي بتقولي
- هو انت عرفت طريقنا ازاي صحيح
التفت ليها وقولت
- لية السؤال ده
- حابة اعرف
- ااه.. طيب لحظة بس هخلص المكالمة
خلصت الرنة ولسة حسن مردش ف رجعت اتصلت ب جيهان وردت عليا وقالت
- ايوه يا ياسين
- انتي فين
- في البيت بنجهز عشان نروح المستشفى
- جابوا زيدان علي البيت تعالوا هنا
- بجد ونبي
- ايوة.. امال فين حسن بتصل عليه مبيردش
- بيستحما علشان يوصلنا
- اه طيب ابقوا تعالوا هنتعشا النهارده مع بعض
- حاضر
انهيت معاها المكالمة ورجعت لرحمة وقولت
- كنتي بتقولي ايه بقا
- كنت بقول عرفت طريقنا ازاي
- وصلني ان حد شاف ابوكي في المنطقة اللي كنتوا فيها ف بعت حسن يتأكد
- وبعدين؟
- واتأكد انكم هناك وبلغني وبعدين انا جيتلكم، بس كده
- اه... يعني هو عرف بيتنا
- اه بس مشافكمش، ولا انتي شوفتيه؟
- اية
- ايه؟
- لا لا مشوفتهوش غير هنا، بس ازاي عرف مكانا وهو مشفناش ولا قابل حد فينا
- عرف بيتكم بعد ما سأل عنكم.. وكمان مكنش متأكد وانا لما روحت وشوفت صورة ابوكي وامك عرفت
- اه فهمت
#سيكا
بعد دقايق وانا شايفهم واقفين بيتكلموا دخل ياسين جوه وهي فضلت واقفة مكانها رجعت عندها وقولت
- في ايه
- مفيش
- امال ايه مزعلك
- كتير اللي مزعلني، جدي ده اللي شكله فاكرني نصابة، وياسين اللي طمعان اهتم بيه من دلوقتي، وحسن اللي انا مش فاهمه ايه حكايته
- ماله تاني
- ياسين بيقول انه عرف عنوانا بس مشفناش، يعني لسة مخبي عنه انه يعرفنا وانا هتجنن واعرف هو ليه مخبي.. "
كان صعب عليا اقول حاجه زي دي بس بعد كلامها معايا بقيت اقنع نفسي انها متنفعش ليا في كل الاحوال وحبيت اريحها لو شوية صغيرين
- يمكن عشان بيحبك
التفت ليا بتفاجيء وقالت
- اية.. انت اللي بتقول كده
- اه
- واشمعنا دلوقتي
- انا بقول كده، ماهو لو مكنش هو ده السبب، ف ممكن يكون حصل بينكم حاجه هو مش عايز يقول عشانها
- حاجه ايه انت اتهبلت، انا يحصل بيني وبين حد حاجه
- لا، وادام مفيش حاجه حصلت بينكم، يبقي مفيش سبب تاني غير انه بيحبك
شردت في صمت ف قولت
- ما تطلبي الطلاق من ياسين
- لية
- كل ده ومش عارفه لية
- واية اللي حصل يعني، انا وهو محصلش بينا حاجه اخاف تتعرف، وهو مقاليش ولا وعدني بحاجة علشان اطلق
- بلاش حصل بينكم حاجه ، خليها عشان بتحبيه وهو ابن اخت جوزك ويمكن هو كمان بيحبك ولو هتكملي جوازك من ياسين مش بعيد تخونوه
- بتتكلم كأنك متأكد انه بيحبني مش هو ده اللي كان بيكلم بنات وسابني وراحلهم، وبعدين يحبني علي ايه، هيسيب كل البنات اللي حوليه ويحبني انا الكحيانة العفريتة
- مفيش بنت علي وش الارض تسواكي يا ابلة، انتي تتحبي زي مانتي كده
سكتت مكنتش قادره تبصلي وكأنها فاهمه احساسي ناحيتها، وانا كمان سكت ورجعت تاني الاستراحة جنب برق وبعد وقت وانا بفكر ايه اللي مفروض اعمله عشانها دخل عليا حسن من غير ما يقول ولا كلمة وقعد علي الكنبة ومرت دقايق محدش فينا كلم التاني، بس انا كنت فاهم سكوته وسبب قعدته معايا وعدم دخوله جوه ف قولت
- انا هقولها اني كدبت عليها وانت اتصرف وخلي خالك يطلقها واتجوزها
رفع وشه وقال بسخرية
- لا ياشيخ، نسيتها ولا دي حركة واطية من بتوعك
- متتمألسش عليا ونبي يا باشا، رحمة عمرها ما هتشوفني غير اخ، هي مش هتقدر تعيش من غيري بس علي إني اخوها هي قالتهالي بالعربي كده
- طيب واشمعنا دلوقتي قررت تقولها
- علشان هي مبتبطلش تسأل، عاوزه تعرف ازاي روحت شرم الشيخ وازاي كنت في الكويت، وعاوزة تعرف لية مخبي انكم تعرفنا
- وقولتلها ايه
- قولتلها ايه يعني.. قولتله بيحبك علشان كده مخبي
فزع من مكانه وقال
- قولتلها ايه
- قولتلها بيحبك
مسك فيا وقال بانفعال
- انت في حاجه في مخك، مين قالك انت اني بحبها، انا جبتلك سيرة
- من غير ما تقولها صريحة هي باينة
بعدت ايده عني وقولت
- ومتتحمقش قوي كده انا قولت يمممكن بيحبك ماكدتش يعني،، وكمان مش طبيعي انك تخبي معرفتك بينا، ده ولا كان حصل بينكم حاجه وخايف تقول
قال بغضب
- وانت مال اهلك يلعن **** ياض واقسم بالله انا كرهتك انت مش بني ادم، انت موجود بس علشان تبوظ الدنيا، اعمل ايه انا دلوقتي ابص لخالي وليها ازاي
- بص زي ما تبص ميشغلنيش، وانت بتحبها امال مش قايل لية غير لو كنت خايف من حاجه
- انت طلعتلي منين
- انت اللي طلعتلي، احنا كنا مرتاحين قبل ما نشوفك ده حتي جيت وجت معاك البلاوي ومتقفشناش غير لما طليت علينا، دي حتي البت ابوها اتقتل زي امها
- تعرف تخرس.. وفوراً تبعتلها وتصلح اللي انت هببته، انا لا بحبها ولا بحب غيرها
- بقولك قولت يمكن
- يمكن!!.. اقسم بالله غبي وعمل اسود وقع في طريقي.. انا كان ايه خلاني اوافق اقعد عندك، انا ايه وداني عندكم اصلا
- حظي الهباب
- حظك انت؟ تعرف تخرس دلوقتي
سكت وهو قعد علي الكنبة في حيرة ف قولت
- انت فاكر سهل عليا اقول كده ولا اشوفها بتجوز، انا اكتر واحد قلبه واجعه دلوقتي ياباشا انت متعرفش رحمة تكونلي ايه
- ده انت مش بس غبي لا وكمان ناسي نفسك وبتتكلم معايا عن حب ومشاعر لمرات خالي، انت عارف اني ممكن اضربك دلوقتي
- سيكا
قالتها رحمة اثناء دخولها علينا فجاة ولما شافته سكتت و وقفت مكانها وهو عينيه وتعلقت نظراتها بيها لثواني قبل ما يستجمع نفسه ويقوم ويقول
- كويس انك جيتي
-....
- الواد ده هيجبلنا مصيبة، انا مقولتش لخالي اني شوفتكم علشان هو كان بعتني لمهمة محددة ولو عرف اني سيبتها ومشيت معاكم في مصايبكم اللي كنتوا تعملوها كان هيزعل مني، وانا مجبتلهوش سيرتكم من الاول ف مينفعش اجي بعدين اقوله ده انا كنت عارفهم وعامل عصابة معاهم، هو هيعدي اننا كنا عصابة بس هيقولي لية خبيت ويظن فيا ظن مش تمام وانتي اكيد فاهمة انا اقصد اية
- طيب وانت مين قالك ان دي يهمنا
- ده هو اللي قال انك شاغلة نفسك وبتسألي مخبي لية.. واديني قولتلك اسبابي، انا مقولتش علشان خالي لو عرف اني ساعدتكم هيزعل مني جامد، ف من فضلكم انتوا الاتنين نقفل علي الموضوع ده كدة
- احنا محاولناش نفتحه اصلا
- يكون احسن، اه ومتزعليش مني اني مشيت ، صحابي كلموني واصروا اني اروح معاهم شرم وحبيبتي كانت معاهم مكنتش عايز ازعلها.. داخل اشوف خالي
قالها ومشي باتجاها وقف قصادها وقال
- اعدي
بعدت عن طريقه ومشي ف التفتت ليا وقالت ودموعها بتنساب علي خدها
- يمكن بيحبني مش كده، اهو ريحنا من الحيرة اللي كنا فيها وجابلنا كل حاجه علي بلاطة يا سيكا
#حسن
دخلت جوه لقيت الكل قاعد في الصالون بما فيهم يسرا وصدام اللي اول ما شافني توجه ليها بنظرات حادة ف قامت علشان تمشي ولكن كاميليا مرات خالى وقفتها وقالت
- علي فين اقعدي محدش هيقوم النهارده كلنا هنتجمع سوا، واحشتنا القعدة دي مقعدنهاش من زمان ولا ايه يا جماعة
قال صدام
- يسرا لازم ترتاح الحمل تاعبها
كانت مفاجأة ولكن مهتمتش كتير وقعدت جنب جدي متجاهل الحوار اللي انتهي بأنها تقعد بعد ما مرات خالي اصرت انها متمشيش وبعد ثواني رحمة جت وقعدت جنب خالي حاولت انشغل عنها بالكلام مع جدي ولكن غصب عني كانت عيني بتروح ليها بمجرد ما المحها بتتهامس معاه وبتبتسم وبتضحك علي كل كلمة يقولها بشكل مبالغ فيه وكأنها قاصدة توصلي انها حباه ومبسوطة والحقيقة انها نجحت في استفزازي، في الاساس مجرد التفكير انها لحد تاني بيضايقني ولكن قدرت اتظاهر بالامبالاة وساعدني علي ده سؤال مرات خالي وهي بتقولي
- هو انت مش ناوي تتأهل ولا ايه ياحسن
الكل التفت ليا بما فيهم هي وانا برد واقول
- لولا الظروف اللي احنا فيها كان زماني اتجوزت
- يعني حاطط عينك علي حد
- يعني
راحت عيني ليها لقيت ابتسامتها راحت والحزن ملي وشها وفجاة وانا كل تركيزي معاها جاتني كلمة ماما اللي هزتني وخلت جسمي كله يتلبش
- اه يختي حاطط عينه وناوي يجبلنا خط الصعيد
قومت من مكاني مسكت ايدها وانا بقول
- ماما عاوزك
قال خالي
- مالك يابني
- مفيش يلا يا ماما
- يا واد ايدي هتتخلع في ايدك
- طيب قومي بس
خدتها وطلعت في الجنينة وقولت بعصبية
- ايه اللي انتي قولتيه ده انا مش قايلك غيرت رايي
- مش باين
- وهو بيبان ازاي، يا ماما ابوس ايدك ارحميني، خلتيني اندم اني اتكلمت معاكي
- كمان هتندم.. طيب ياحبيب امك هي مين اللي حاطط عينك عليها مش البلطجية بردو
- غيرت رايي ومفيش حد والمصحف ما هتجوز وهقعدلك بس ارحميني وانسي اي حاجه قولتها.. ابوس ايدك تنسي
- ومالك بتقولها كده، مالك يا واد فيك حالك بقا مايل
قولت بنرفزة
- مالي يا ماما، حرام عليكي مش كده انا اتخنقت
- اتخنقت مني ياحسن
- اتخنقت من نفسي.. ممكن لو سمحتي لو صح بتعتبريني ابنك ومش عاوزني اهج ومتعرفليش طريق تنسي الكلام اللي قولته.. ممكن ولا اهج
- يالهوي يا واد مالك
- يووة دي هتقولي مالك.. مش هتكلم تاني يا ماما بس انا بقولك اهو لو السيرة دي اتفتحت قدام مخلوق وبذات خالي والله ما هتعرفيلي طريق عمرك كله
#كاميليا
محدش كان فاهم ماله ولا لية اتخض من كلام امه بشكل ده وفي وقت تسأؤل الكل عن السبب رجعت جيهان لوحدها من غيره ف قولت
- فين حسن
- روح
قال ياسين
- روح يعني ايه مش قولنا هنتعشا سوا، هو الولد دي في حاجه في دماغه
قالت
- سيبه براحته هو حر
- تبقي زعلتوا مع بعض انا عارفكم متقدروش تقعدوا يومين مصتلحين هتصل بيه
قالها وقام ف قولت
- باين في حاجه مزعلاه اول مره يزعل كده ويمشي
- معرفش بقا مبيقولش
- عاوزك يا ماما
قالهالي صدام ف قولت
- بعدين
- عاوزك شويه
- وانا بقول بعدين مش هنسيب الناس ونقعد نحكي لوحدنا
كنت عارفاه عاوز يتكلم في طلبي ان يسرا تقعد ف استغليت زعلي منه ومرضتش اروح وبعد وقت طلعت فوق ف جه ورايا وقال
- ايه لازمته اللي انتي عملتيه ده
التفت ليه وقولت
- قدرت تيجي ورايا
- ومقدرش لية، انا عايز افهم ايه معني اللي عملتيه تحت مانتي عارفه اني مبحبش اخلي يسرا تقعد معاه
- خايف لتخونك زي ما انا خونت ابوك، لا تكون معيوب زيه
- ماما من فضلك
- ولا كلمة بلا من فضلك بلا بطيخ، جاي بكل بجاحة تتكلم معايا وانت متهمني في شرفي
- كنت فاهم غلط ودلوقتي فهمت الصح وانا اللي موجوع دلوقتي بعد اللي عرفته ومفيش غيرك ينفع اروحله بس اهو انتي زعلانه وكمان وقعتي كلمتي قدام حسن علشان توجعيني اكتر
- طيب ما تتوجع مانت كلامك وجعني وقهر قلبي، مفكرتش احساسي هيكون ايه وابني بيشكك فيه
طيب ماقولتش لنفسك انت غلطان يا واد دي امي بميت راجل وعمرها ما كان ليها في المياصة بتاعت النسوان.. مقولتش دي استحملت وضيعت عمرها مع ابويا اللي راكنها عشاني.. "
- انا اسف، ما انا بردو كنت صغير وخدت فكرة كبرت معايا.. متزعليش
- لا زعلانه ومش راضيه عنك ياصدام
مسك ايدي وقال
- علشان خاطري متزعليش، حقك عليا
باس ايدي وقال
- عمري ما هفهمك غلط تاني
شديت ايدي منه وديرتله ضهري ف قال
- طيب اعمل ايه علشان ترضي
- لما ترجع ابني اللي اعرفه ابقا افكر.. انت مش بس اتهمتني في شرفي لا وكمان عصيتني
- عمري ما هعصاكي تاني، كل اللي هتقوليه هعمله
- اما نشوف
- هتشوفي.. بس قوليلي بقا ليه خليتي يسرا تقعد وحسن موجود.. انا عارف ان في سبب لكدة
- لا ده انت تجيلي بقا.. انت ازاي ترجعها من غير ما تقولي
- ما طلعت حامل هسيبها ازاي
- ولو، ازاي متقوليش
- اهو كنت متضايق ومليش خلق اسأل حد
- متضايق علي امك، مش بقولك بتعصاني
- يا ماما انا امتي عصيتك دي ام ابني
- ابنك!!، مش هي دي اللي كنت بتحطلها مانع حمل علشان متخلفش منها، لا ومفكرتش دقيقه انه يكون مش ابنك وجابته من حد تاني
- ابني يا ماما، انا في الفترة الاخيره مكنتش بحطلها الحبوب وحملت بتحصل
- ومكنتش تحطلها الحبوب لية يا روح ماما
- كنت بنسا ومش موضوعنا انا عايز اعرف عملتي كده لية
- علشان متطلعش قدامهم مهزئ ومعندكش ثقة بنفسك، مفيش راجل بيخبي مراته غير الناقص واللى خايف تروح لغيره
- يا ماما بلاش كلام يزعل، مانتي عارفه اللي فيها
- واية هو اللي فيها انسا ياحبيبي، كله نسي الا انت
- ودي تيجى ازاي مانتي عارفه انها الاكس بتاعت
- ده هيقولي اكس وزد، واد انت مكرهش قد اللي بيلت ويعجن، قولتلك انسا وشوف هقولك اية
- ايه
- عاوزاك تفوقلي الفترة الجاية
- لية
- حاجة كده. قولي الاول، هتدخل امتي؟
- ادخل فين
- مش فاهم تدخل فين
- فاهم بس ادخل فين بالظبط
- الصبر من عندك يارب ياغبي يابن الغبية، ياولد احنا عملنا ايه لما انت مش هتدخل علي مراتك وكمان بتزن علشان ابوها يطلقها منك
- اهاا.. لا يا ماما خلاص انا مش هدخل علي حد، مليش نفس
- نعم ياحبيبي يعني ايه ملكش نفس، والفلوس يا ابن الهبلة لا بقولك ايه ورحم امي اتاويك،.. اكرها ياحبيبي متبصش في خلقتها بس الجوازة دي متنتهيش غير والفلوس كلها في ايدك ان شاءلله تبتزها بيهم، قال مليش نفس قال
- يا ماما لو سمحتي انا مش هقرب لبنت اللي رقدت ابويا وشلته
- ماهو علشان كده انت لازم تكمل لغيت تاخد الفلوس
- لا هشوف اي طريقة تانيه الا اني اقربلها.. وبعدين انتي هتدوخيني لية مش انتي كنتي زعلانه اني هقربلها
- انا مزعلتش علشان هتقربلها انا كنت خايفه تضحك عليك بس دلوقتي الوضع اتغير واللي هتعمله انتقام من امها
- بردو مش عايز
- حبيبي افهمني، اكبر غلط ممكن تعمله هو انك تضعف لاي سبب الضعف بيعطلك عن حياتك وعن اهدافك وبيخليك تتراجع وبس، وانت مش صغير عشان اللي بتعمله ده، عاملها زيها زي يسرا كنت بتكرها واهو حملت منك
- ياماما بقا.. طيب خلاص سيبيها لظروفها وانا هتصرف، المهم عاوزه ايه
#بسنت
كنت بذاكر في اوضتي لما وصلتني رساله من رقم اخت ياسر بتقولي فيها
- ازيك يا بسنت، انا هدي مش ياسر
رديت فوراً وقولت
- اهلا حبيبتي عامله ايه
- انا الحمدلله وانتي
- تمام
- شوفتي رسالة ياسر ليكي امبارح من الرقم ده؟
- شوفتها
- علشان كده انت بكلمك، حبيت اقولك برافوا عليكي انك مردتيش
- اشمعنا
- هتفهميني لو اتكلمت معاكي بصراحه
- هفهمك، خير
- مفيش حاجه تقلق، انا بس عاوزه اقولك ان هو عاوز يتقدملك، قالي كده بنفسه ودي اول مره يقول عاوز اتقدم لبنت، بس الصراحه هو حياته كلها بنات، بس مش وحش هو غلبان قوي
- ايوه يعني ايه بردو
- يعني لو وافقتي مش هيكون في اسعد منك لكن بلاش كلام لغيت ما يتقدملك رسمي
- فهمتك وحاضر، من غير ما تقولي مكنتش هتكلم معاه
- انا مش بقولك كده علشان اقلقك منه انا بس عاوزاه يعقل ويتجوز، بس لازم عينه تطلع الاول
- طيب مش يمكن يمل ويشيلني من دماغه
- لو معبرتهوش وبطلتي تديله وش مش هيمل
- هههههههه انا مش فهماكي بجد، مش قادره احدد انتي شيفاني ازاي
- يالهوي وربنا ما اقصد حاجه وحشة، وانا متاكده انك لو مش تمام وبنت ناس ياسر عمره ما كان فكر يتقدملك، انا بس بقدملك النصيحة.. "
قبل ما ارد وصلتني رساله من رقم تاني ولكن كتبت الرد الاول وبعدين دخلت علي الرسالة لقيت لينك يخص المادة اللي بذاكر فيها ف جه علي بالي ان ده حد من زمايلي وبعتهولي ومن غير تفكير دخلت عليه فوراً بس مفهمتش حاجه وكان معقد في خرجت ورجعت اكلم هدي وبقينا نتكلم مدة نص ساعه اتعرفنا فيها علي بعض
حازم
- تمام يا نجم دلوقتي كل حاجه بتستقبلها وتبعتها هتلاقيها عندك وعيش وعيشني فين الفلوس
قالهالي صاحبي اللي وكلته يهكرلي تليفون بسنت ف قولت وانا عيني علي الشات اللي عندها وبدور فيه
- واتس بس يابني انا عايز اوصل لكله، صور وصوت وكاميرا
- ياعم بقا بلاش شيطنه الواتس حلو واكيد هتعرف كل بلاويها من كلامها علي الواتس ده.. فين حقي بقا
- طيب ياخويا اما نشوف بتعمل ايه.. "
طلعت 200 جنيه من جيبي حطيتهم قدامه وانا لسه عيني علي الشات اللي عندها وكملت بحث لغيت ما لاحظت ان رقم مروان عندها