رحمة
وانا قاعده لوحدي في الاوضة دخلت عليا كاميليا وقالتلي وابتسامة ود علي وشها
- قاعده لوحدك لية
- اهو قاعدة
- حد مزعلك
- لا
- طيب اقدر اقعد معاكي شويه
- اتفضلي اقعدي
قعدت جنبي وقالت
- زعلان من جدك مش كده
- لا
- طيب امال لية بتزعلي لما يكلمك
- هو مش بيكلمني هو بيتهمني، انا معملتلهوش حاجة وقاعدة في حالي بس هو بيعاملني كأني حرامية هغافلكم واسرق البيت واهرب
- محدش يقدر يقول كده، وهو في حد يسرق بيته بردو، بس الا انتي كنتي ساكنة فين يا رحمة
- مطروح
- الله انا بعشق مطروح وروحتها كتير قبل كده ، بس كنتي ساكنة فين بالظبط
- لية
- بدردش معاكي، عاوزاكي تفكي وتختلطي بينا، احنا اهلك ياروحي
- اه
- طيب قوليلي كنتي ساكنة فين في مطروح، اكيد جنب البحر
- لا مش جنب البحر
- امال؟
قولتلها علي المنطقة اللي كنت عايشة فيها وبعدين استمرت في الكلام والاسئلة لغيت ما زهقت بس محبتش اكون قليلة الذوق واقولها تسكت لغيت ما اكتفت وبعدين سابتني وطلعت
#صدام
قالتلي استناها في اوضتها وبعد وقت رجعت وقالتلي اروح مطروح واسأل عن رحمة واشوف يمكن وراها مصيبة او اعرفلها حاجه عنها تخلصنا منها ف قولت حاضر ورجعت اوضتي عشان اغير هدومي واروح ولما دخلت سمعت صوت المية في الحمام ف فهمت ان يسرا بتستحمي ومن ناحية تانية كان تليفونها بيهتز علي التربيزة قربت اشوف مين بيتصل لقيته بحيري المسجل باسم عيسي في البداية استغربت هو متصل بيها لية ولكن مشكتش في حاجه ورديت وقولت
- ايوه يا بحيري
طال سكوتة ف قولت
- الو
جاني صوته متلعثم وهو بيقول
- صدام باشا ازيك
- تمام وانت
- انا الحمدلله
- متصل علي يسرا يعني في حاجه
- لا لا مفيش حاجه.. انا بس تليفوني باظ ومعظم الارقام اتمسحت ف متصل اخد رقمك لو كان لسة معاها.. بس هي رجعت ولا انت اللي عندهم
- اه رجعت، عقبالك انت كمان ماترجع عجبتك القعدة عندك ولا ايه
- بجد رجعت.. الف الف مبروك، ربنا يسعدكم والله يا باشا ، وانا كنت جاي بس قولت اتصل بسعادتك الاول واعرفك
- طيب انا هرنلك من رقمي علشان تعرفوا
- تمام.. في امان الله ياباشا مع السلامه، مع السلامه
- مع السلامه
قفلت معاه وانا بسيب التليفون لقيت يسرا واقفة علي باب الحمام ولافة الفوطة علي جسمها وبتقولي
- بتكلم مين
- بحيري
قولتلها واتجهت ناحية الحمام وقفت قصادها وقولت
- هتعديني ولا هتفضلي واقفة كدة كتير
- اه طيب طيب
#يسرا
كنت هموت من الخوف لما سمعته وهو بيكلمه وقولت هيقوله علي اللي حصل بينا وصدام هيقتلني بس مقالش ولا لمح حتي وصدام مخدش باله من ارتباكي، وبعد ما لبس وخرج من الاوضه قفلت الباب من جوه واتصلت بيه ف رد عليا بصوت مختنق وقالي
- الو
- عيسي
- ازيك يا مدام يسرا
- عيسي انا كنت هقولك بس حصل حاجات كتير وخلتني اتلخمت ونسيت، بس كنت هكلمك واقولك
- يبقي العريس مش جنبك.. بس اتلخمتي ازاي ودي فيها لخمة
تابع بانفعال
- ده لو كنا زي ما احنا ومنمناش مع بعض كنتي افتكرتي تقوليلي، نسيتيني خالص ده حتي عيب في حقي لما تنسي لحظاتنا سوا وانتي معايا كدة بتهنيني .....
- عيسي لو سمحت اهدا هفهمك انا مرجعتش بمزاجي.. انا طلعت حامل وبابا وماما اجبروني اروحله غصب عني، انا مكنتش عاوزة ارجع
- نعم يختي مين دي اللي تجبر، هو انا مش عارفك ولا عارف انك قادرة محدش يقدر عليكي.. طيب وياترا قولتيله نمت في حضنه، قولتيله حصل بيني وبينك ايه.. طيب قولتيله ان احتمال العيل ده ميكونش ابنه
- لا ابنه انا كشفت وقالولي اني دلوقتي في التالت يعني قبل ما اسيبه بشهر وقبل ما يحصل بينا حاجة
- لا وكمان تأكدتي ابن مين، يعني منستنيش اهو، واحترتي شوية وفكرتي وقولتي ياترا ابني ولا ابنه
- ياعيسي براحة ونبي احنا بنتكلم وانا بقولك غصب عني رجعتله انت زعلان لية، وبعدين كنت هعمل ايه ما انا حامل في ابنه هتجوزك ازاي
- ولية جواز
- يعني ايه
- يعني انا راجع تاني اشتغل عنده يا يسرا وغلاوتك عندي اما ندمتك علي عملتك دي ما يبقي اسمي عيسي ، وانتى اللى اخترتي تبقي براجلين
قفل في وشي وسابني هموت من الخوف والتوتر وانا مش عارفه اتوقع ممكن يعمل ايه
#حسن
بعد وقت قضيته في الاوضه لوحدي احتجاج علي اسلوب ماما معايا وهروب من اسئلتها اللي مبتنتهيش دخلت عليا وقالت
- هتفضل حابس نفسك ومش عايز تكلمني كده كتير
- عاوزه ايه يا ماما
- عاوزه اعرف مالك، حالك بقا مايل لية
- نصيب نعمل ايه ربنا يعدله من عنده
- بتتمسخر عليا، اخس عليك يا حسن ده انا امك تتعامل معايا كده
- يا ماما انتي اللي بتتعاملي مش انا، انتي بتقصدي تضايقيني بأي شكل
- ياحبيبي انا بكون عاوزه اطمن عليك وانت مبتتكلمش اعملك ايه
- ما انا اتكلمت وروحتي تحكي قدام الناس وتقولي خط الصعيد وسبع الليل
- طيب مش هقول تاني اي حاجه تقولهالي مش هجيب سيرتها ابداااا
- مش مصدقك
- مش هتصدق امك، اخس عليك
- اخس اخس ومش هحكيلك حاجة تاني ريحي نفسك.."
#صدام
وصلت المكان اللي قالتلي عليه وسيبت العربية في اول الشارع ومشيت في الشوارع هناك مش عارف ابدء منين ولا اسأل مين عنها وبعد وقت وانا لسة بدور في اشكال الناس عن حد اسأله لقيت بنت ماشية ف وقفتها
-لو سمحتي
وقفت وتفحصت شكلي بريبة وبعدين قالت وهي بتبعد عني خطوات للخلف
- عايز ايه
- متخافيش انا بس عايز اسالك عن حد
- مين الحد ده
- بنت اسمها رحمة.. رحمة شاكر سليمان بنت في سنك كده
بصتلي من تحتي لفوقي وقالت
- لا معرفهاش
قالتها ومشيت ف لقيت راجل بيوقف في طريقها كلمها كلمتين وهو باصصلي وبعدين سابها وجاني وقال
- بتدور علي حاجه يا استاذ
- اه بدور عن بنت ساكنة في المنطقه دي
- اسمها ايه
- اسمها رحمة شاكر سليمان
- رحمة شاكر سليمان.. لا مفيش حد هنا بالاسم ده
- متأكد
- اه متاكد انا من أهل المنطقه وعارف كل اهلها وهنا مفيش واحده بالاسم ده
- ماشي شكرا.. "
قولتها ومشيت في طريقي للعربية وانا مش عارف هقول لماما ايه وعارف انها هتديني كلمتين ملهمش لازمة علشان معرفتش عنها حاجه ولكن بعد مسافة انقذني نفس الراجل لما نده عليا وقال
- يا استاذ استنى افتكرت
وقفت استناه لغيت ما وصل عندي وقال
- افتكرت
- افتكرت ايه
- البنت اللي بتسأل عنها مش موجوده هنا دلوقتي، بس هي كانت عايشة هنا صحيح
- طيب حلو
طلعت فلوس من جيبي وقولت وانا بدهالها
- احكيلي كانت عايشة ازاي واهلها فين
- لية ياباشا هي علمت عليكم انتوا كمان
- علمت علينا؟!.. لا لا انا بس بسأل علشان قريبي كان عايز يتجوزها
- طيب وهو عارف طريقها ولا كان شايفها من زمان
- اه كان شايفها من فتره، احكيلي بقا
- والله ما عارف اقولك ايه، بص ياباشا هي تبان بنت غلبانة بس الحقيقه هي مش كده خالص قول لقريبك ينفد بجلده
- لية، هي كانت بتعمل ايه
- هحكيلك.. اصل البت دي يا استاذ طبت علينا من كام سنة هي وابوها وكان معروف باسم صالح عبدالتواب مش شاكر، محدش عرف شاكر ده غير يوم ما مات ونادوا عليه في الجامع، اصله كان متخفي وباين كده والله واعلم ان كان عليه تار او عامل عمله وخايف منها كان طول الوقت تلاقيه مغطي وشه وبيكلمش حد وبنته طلعت العن منه
- يعني ايه العن منه
- طلعت حرامية، عاملة عصابة هي و واد تانى وبيضربوا ويسرقوا
- لا والله.. ضرب وسرق.. انت عارف بتتكلم عن مين
- ايوه ياباشا عارف واهو كلنا مصدقناش زيك كده لانها بنت جسمها صغير كده ويبان عليها رقيقة بس هي مش كده
- طيب واسمه ايه الواد التاني ده
- معروف باسم سيكا
قولت باندهاش
- سيكا؟!!، واد قصير كده واسمر وحجمه صغير، ومعاه كلب
- ايووة عليك نور، هو بعينه، بس الكلب بتاع البت واسمه برق دايما تلاقيها بتنادي عليه وتقول يا برق
- ااالله.. لا هي.. طيب قولي هي سرقت ايه وعلمت علي مين
- كتير الصراحه
بص حوليه وبعدين ميل عليا وقال بخفوت
- بس ان جيت للحق هي مكنتش تعلم غير علي الناس المؤذية كانت عامله بطلة وبترد مظالم وبتاع لغيت ما طمعت وسرقت دهب المعلم كريم الجواهرجي وخدوا منه دهب بالشيء الفلاني، بيقولك المعلم لما دور لقا اللي متاخد باكتر من 500 الف جنية بس بعدين المعلم عتر فيهم وكان هيدبحهم بس بيقولك بقا عصابة كبيره شغالين لحسابهم جت ساعدتهم وخدوهم ومشيوا من هنا خالص
-اية الكلام ده، ياراجل قول كلام يتصدق
- طيب ونعمة ربنا وما اوعا اشوف يا باشا ان هو ده اللي حصل، طيب ده انا خايف المعلم يعرف انك بتسأل عنهم ف يعلقني ويعلقك، ده هيموت ويلاقيهم
- كمان.. طيب وفين المعلم ده
- قاعد في المحل بتاعه.. "
مكنتش مصدقه قوي في اللي قاله ف سألت ناس تانية وحكولي نفس اللي قاله مع اضافة مختلفة من كل واحد فيهم بس الكل اتفق انها كانت عاملة عصابة وسرقت الدهب.. وبعدين اتصلت ب ماما ابلغها باللي اتقال ولما قولتلها قالت
- ولا باين عليها بنت الاية، دي كدة خطر علينا وممكن تسرقنا وتطفش
- مش بعيد.. المهم ارجع كده
- لا لا خليك
- لية
- علشان حاجه هقولك عليها بعدين بس لما اظبط الدنيا هنا
- تظبطيها يعني ايه
- يعني انا في اسورة وسلسلة ضاعوا مني وبكرة هيضيع مني حلق وبعده خاتم ومرة تانية فلوس ومش عارفه الحاجة بقت بتختفي لية الايام دي.. تفتكر بتختفي فين يا صدام
- لا متقوليش انها سرقتهم
- الله اعلم احنا مشوفناش مين سرقهم بس مين المستجد عندنا غيرها
- ايوه يعني انتي عاوزه تتشككيهم ان في حاجات بتتسرق من البيت ومتقوليش مين .. طيب ما فيروز مستجده بردو يا ماما والبت الصغيره والواد اللي اسمه سيكا اشمعنا هيشكوا في دي بذات
- يا واد فتح مخك.. دلوقتي لما اقول ان الحاجه بتضيع وبعدين تجبلنا حد من عندك يشهد انها كانت حرامية هيقولوا هي اللي سرقت
- ايوه فهمتك، بس تفتكري هي سرقت حاجة فعلاً
- لسة بس طالما هي حرامية ف مسيرها تسرق، يلا روح وشوفلنا حد يشهد عليها بس استني مترجعش بيه غير لما اقولك
- طيب ليه ما انا ممكن اجيبه دلوقتي
- يا واد مينفعش اصبر بس لازم تولع هنا الاول وبعدين نجيب دليل عليها
#رقية
كنت بنضف الارضية ورافعة العباية علي وسطي وطرحة يدوب مدارية شعري وانا مطمنة لانه مكنش في البيت ويمكن يتأخر شويه.
وانا بمسح الارض بالممسحة وبدلق المية بصابون فجأة الباب اتفتح اتفزعت وجيت اجري علشان استر نفسي ولكن اتزحلقت و وقعت علي الارض ودماغي اتخبطت خبطة جامدة وحسيت بعدها الدنيا بتلف بيا ومش شايفه حاجة ومبقتش حاسه غير بأيده بترفع دماغي عن الارض وايده التانية علي وشي ، فتحت بصعوبة لقيت قدامي وبيقولي
- انتي كويسه
مكنتش قادره ارد ولسة دماغي بتلف ولكن كنت حاسة بلمسته الدافية علي وشي بشكل عمري ما حسيته، حاولت ابعده عني ولكن مدانيش فرصة شلني ودخلني جوه علي السرير وقعد جنبي يمسح علي شعري ف بعدت ايده عني وقولت وانا بحاول اقوم
- انا تمام
رجعني مكاني تاني وقال
- ارتاحي لما تفوقي كويس، هعمل قهوة، هتفوقك
طلع وسابني ف اعتدلت من نومتي عدلت هدومي كويس ورجعت قعدت مكاني وشعوري بلمسة ايده مش سايبني ف بقيت امسح علي وشي وكاني بشيل اثره عني وبعد دقايق وانا مستمره بمسح وشي جه وفي ايده صينية القهوه قعد جنبي وقال وهو بيديني الفنجان
- اتفضليبس متعيبيش انا خايب في القهوة
مردتش ف قال
- مالك، لسة دايخة
- شويه
- طيب اشربي هتفوقي
اومات إيجابا وشربت شويه وكنت هرجع من طعمها بس مبينتش ف قال وهو مقوس بوقه باشمئزاز
- ايه القرف ده، ميت مجاري
خد مني الفنجان وقال
- هاتي وربنا لا يندلقوا في الحوض
خد الفناجين ومشي وانا خدت نفس وحاولت اتناسا اللي حصل وبعدين قومت غيرت المفرش عشان اتبل وبعدين خرجت عشان اكمل مسح وقبل ما ابدء جاني صوته بيقولي
- خدي
التفت لية لقيته بيقدملي مج نسكافية ف قولت
- لية
- القهوة طلعت مية مجاري ف قولت اعمل نسكافية احلي، تعالي هنشرب قدامه الشاشه، في فيلم دمار هنسمعه سوا
- دمار!
- اه، خدي
خدت منه المج ف قال وهو متجه ناحية الشاشة
- هشغل الفيلم
وصل هناك وانا بقيت واقفة مكاني مش مرتاحة للي بيحصل ولا لتصرفاته معايا وحاسة البيت ده بيضيق عليا لحد ما هيخنقني وبعد ما طالت وقفتي دي جه عندي وقال
- واقفة عندك لية، لسة تعبانه
قولت بحنق
- لا ومبحبش لا نسكافية ولا قهوة متعملش حسابي تاني في حاجه، خد المج بتاعك
- انا عامله عشان الدوخة اللي...
قولت بمقاطعة
- وانا مطلبتش منك تعملي حاجه انا مش صغيرة واقدر اعمل لتفسي، اتفضل ولا اكسره
خده مني وقال
- وعلي ايه هاتي
دخل المطبخ وانا حاولت اكمل اللي انا بعمله ولكن مقدرتش كنت متنرفزة ومش طايقة نفسي ف سيبتهم ورجعت الاوضه وانا حاسة بضيقة صدر وبعد وقت قضيته في العياط بصوت مكتوم عشان ميسمعنيش هديت وبعدين ظبطت نفسي وخرجت عشان اكمل اللي كنت بعمله، ولكن تفاجأت لما لقيته ماسح ومنشف المكان وعادل الكركبة اللي كانت في المكان وقاعد عند الشاشة قدامه طبق فشار وبيسمع فيلم ف قولت وانا بتحاشا النظر ليه
- مكنتش عملت حاجه، انا كنت هلم الدنيا
مردش عليا وكأنه مش سامعني ف سيبته ودخلت الاوضه مسكت التليفون ودخلت علي الواتس لقيت سامح باعتلي من رقم جديد وبيقولي
- عملتي بلوك قبل ما تجاوبيني ناوية تكملي ولا هتطلقي
- وانت مالك
- مش عارفه مالي
- لا مش واخده بالي
- عشان مش هسيبك، بعد ما تطلقي هتجوزك
- عارف لو انت اخر انسان علي وش الارض مش هتجوزك.. انت بعتني وخوفت علي اختك اكتر منى
- لانها اختي يا رقية يعني كنت هعجبك لما يغتصبوها
- تعجبني ولا متعجبنيش بقا متحاولش تكلمني تاني علشان هقوله وهو واهله يتصرفوا معاك.. "
#حمزة
بعد وقت وانا قاعد قدام الشاشة جت قعدت وفضلت ساكته مترددة تقول اللي جاية عشانه ف قولت
- احسن دلوقتي؟
اومأت ايجاباً وقالت
- اسفة على عصبيتي
- مش زعلان بس ممكن اعرف السبب
- مفيش كنت متضايقة شويه بس
- اهاا، لا ولايهمك
- طيب .. هو الاستاذ زيدان عامل ايه
- زي ماهو
- الف سلامه
- الله يسلمك.. ايه رايك تروحي معايا نطمن عليه
- ماشي اروح
- ده بجد، هتروحي معايا
- اه وفيها ايه
- مفهاش حاجه، ماشي شويه ونروح
- طيب.. تاكل
- ماشي ناكل بس سؤال صغير الاول
- ايه
- هتموتيني ازاي
- اية؟!!
- اصل مش طبيعي بعد العصبية بتاعتك دي تيجى تعتذري وكمان تسأليني اكل
- حاسس اني هموتك يعني
- عاوزه الحق من وقت ما بقيتي تمثلي انك لطيفة معايا وانا متاكد ان وراكي مصيبة بس مش قادر اعرف ناوية علي موت ولا خراب ديار
- انا بمثل
- اه بتمثلي بس مبتقدريش تكملي ف بتتعصبي وبتفضحي نفسك
- طيب ولما انت شايف كده بتتكلم معايا لية وتعمل لطيف انت كمان
- لا انا مش بعمل لطيف انا بس اهبل شويه
- يا سلام
- ايوه يابنتي انا بعيش اللحظة زي ماهي يعني لو في رقص بعد عزا هدخل ارقص عادي جداً.. "
#سيكا
كنت واقف بره الاستراحة بشم شويه هوا بعد ما مليت من القعدة في الاستراحة وبعد شويه لقيت الراجل اللي اسمه نبيل خارج من الڤيلا ولما هميت اني ارجع نده عليا وشاورلي علشان اروحله، روحت عنده وقولت
- نعم
- اسمك ايه
- اسمي سيد وبيقولولي يا سيكا
- سيكا... طيب انت هتفضل قاعد كده مبتعملش حاجه
-...
- اعملك شغلانة
- اعمل ايه يعني يا باشا
- رش النجيلة، نضف المية اعمل اي حاجة
- حاضر يا باشا
سيبت وروحت عند الحنفية شغلت الخرطوم وبدات ارش النجيله وانا كارهه وكاره نفسي بسبب الكلمتين دول
#كاميليا
دورت علي نبيل لغيت ما لقيته في الجنينة ف مشيت قدامه ادور في الارض وانا مدعي الحيرة لغيت ما لاحظ وقالي
- بتدوري علي ايه
انتبهت ليه وقولت
- اسورة ضاعت مني وبدور عليها، مشوفتهاش ونبي
- لا مشوفتش، هي وقعت منك فين
- مش عارفه كانت في ايدي، ومش هي بس اللي ضاعت في سلسلة كمان ضايعة دورت البيت كله عليها ملقتهاش
- يكون راحت فين يعني، دورتي كويس
- قلبت البيت عليها وبردو مش لاقياها، شكله حد مد ايده
- مين اللي ممكن يمد ايده
- ونبي ما عارفه امال راحت فين
- حد بيدخل اوضتك
- انا مشوفتش حد دخل بس يمكن دخلوا وانا مخدتش بالي مين عارف
شرد للحظات يفكر ف توقعت انه شك في رحمة زي ما انا عايزة،وانا بصاله ومستنياه خدت بالي من الولد اللي جاي معاها بيتمشي في المكان ولما عينه جت في عيني رجع تاني للاستراحة، مكنتش فاهمه هو بيحوم علي اي بس مريحنيش وقصدت الفت انتباه نبيل ليه وقولت
- مال الولد ده بيحوم كده
التفت ليه وقال
- ماله
- رايح جاي في المكان
- انا قولتله يرش النجيلة واهو يعمل بلقمته
-اه طيب
- المهم، تفتكري مين يكون خد حاجاتك
- ما انا بقولك معرفش، انت شاكك في حد
#رحمة
خرجت من الاوضه روحت على الجنينة بعد ما الدنيا ضاقت بيا واتمنيت معجزة تحصل وتمشيني من البيت وهناك لقيت جدي قاعد ومعاه كاميليا وبيتكلموا ف كنت هرجع واسيبهم علي راحتهم ولكن هو وقفني وقال
- وقفي عندك!
نبرته كان فيها صرامه وكانه بيوقف حرامي ف رجعت بصتله وانا بقول اهو هيبتدي ف قال
- تعالي هنا
تنهدت بزهق روحت عنده وقولت
- افندم
- اقعدي
- لية
- بقولك اقعدي
- حاضر، اديني قعدت، نعم
- راجعة لية
- محبتش اضايقكم وقولت اسيبكم تتكلموا
- اه.. طيب قوليلي، مشوفتيش...
قاطعته كاميليا وقالت
- لحظة ياعمي، هو انتي كنتي عايشة ازاي يا رحمة
- تاني
- بندردش ياحبيبتي في ايه
- في انك سألتيني قبل كدة
قال
- وانتي ايه مزعلك يمكن عاوزاني اسمع ردك
- وانا اية يزعلني انا بس مش برتاح للاسئلة دي.. بس هقول وهو انا كنت عايشة عيشة بطالة علشان مقولش.. كنت عايشة مع بابا لوحدنا، هو بيسافر ويجيب هدوم ويبيعها وانا كنت شغاله في مطعم صغير وكنت الطباخة بتاعت المطعم ده والناس بتيجي تاكل الاكل اللي انا بطبخه، بس كده هي دي كانت حياتي قبل ما اجيلكم
قالت بتعجب مبالغ فيه حسيت من وراه بنبرة خبث
- ياه، وانتي في سنك ده
- اه ما انا في الواحد وعشرين دلوقتي يعني سناني طلعوا وبقدر امدغ لوحدي.. فين المشكله
ضرب بعصايته علي الارض وقال
- اتكلمي كويس مع الاكبر منك
قومت من مكاني وقولت
- جرا يا حج، انا كنت داخلة وسيباكم انت اللي وقفتني، وبس كده مش هستحمل تاني سيبهالكم مخضرة
قولت كده ومشيت ناحية الاستراحة متجاهلة زعيقة فيه وبقيت انادي علي سيكا بعصبية ف طلع من الاستراحة يقولي بقلق
- في ايه يا ابلة
- هات برق وتعاله ورايا
- هنروح فين
- هاته دلوقتي مش وقتك .. يا برق
جه برق يجري ف مشيت وهما جم ورايا ف وقف واحد من الامن في وشي يمنعني قولت
- ابعد عن طريقي
- يا فندم نبيل باشا بيناديكي
- بقولك ابعد
- متاسف
قولت وانا بضم قبضتي واضربها في وشه
- انا اللي متاسفة
مال بدماغه يتحسس فكه ف سيبته يتوجع وخطيت خطوة بشكل اسرع باتجاه الباب وسيكا وبرق لسة ورايا علشان الاقي واحد تاني قصادي بيحاول يمنعني، مثلت الاستسلام ورجعت ابص لسيكا وقولت بهمس
- تعرفي تجري
اومأ ايجاباً في الوقت اللي جدي كان وصلني وهو بيزعق وبيقول
- البنت دي لازم تتربا
تجاهلت كلامه وفجاة ضربت الراجل التاني بركبتي بين رجليه وطلعنا نجري والباقي من الامن ورانا وبعد مسافة صغيره سيكا هدا سرعته وقال
- يا ابلة استني، هنروح فين
- اجري يابن الهرمة هيعلقونا
مسكت ايده وكملنا جري باقسي سرعة ودخلنا في شوارع كتير وهما ورانا لغيت ما اختفينا عنهم وبعد ما اطمنا وقفنا ناخد نفسنا وقولت وانا بنهج من التعب
- كليتي باظت يخربيتهم سراع قوي
قال بتعب
- بياكلوا لحمة ضاني ولاد الكلب
استجمع انفاسه وقال
- بس هنروح فين
- في اي مصيبة المهم مرجعش هناك تاني
- احسن دول ناس عاوزين الحرق، يلا نكمل لو لحقونا هيشلوحونا
#ياسين
في الوقت اللي كنت يدوب بشفي من جرح قديم كلموني وانا في الشغل وقالولي اللي رجع يجددهولي ويوجعني اكتر من الاول قالولي رحمة هربت هي والولد اللي معاها ف رجعت البيت فوراً لقيت عمي وكاميليا وحمزة ومراته وجيهان كلهم هناك وقفت عندهم وقولت
- يعني ايه هربت
قال عمي
- البت دي حرامية يا ياسين سرقت كاميليا وهربت، دي لا يمكن تكون بنت داليا
- مش وقت الكلام ده ياعمي، لازم نلاقيها
رجعت تاني للعربية ف لحقني حمزة وقال
- هاجي معاك
قولت وانا متابع طريقي بخطوات اسرع ناحية العربية
- لا كل واحد فينا يدور في ناحية
ركبت العربيه واتصلت ب لؤي وقولتله
- تاخد رجالتك وتقلب البلد علي رحمة
- لية يا باشا هي راحت فين
- هربت
قولتها وقفلت وشغلت العربية ومشيت وبره البوابة لقيت حسن داخل بعربيته وقفت وقولت
- عرفت اللي حصل
- اه ماما قالتلي، بس هربت ليه
- مش مهم لية دلوقتي المهم نلاقيها ارجع كل واحد يدور في حتة
- طيب..بس متقلقش هنلاقيها.. "
طلعت بالعربية ومشيت في الشوارع لساعات وانا علي تواصل بحسن وحمزة ولؤي أسألهم لقيوها ولا لا وكل اللي اساله يقول ملقهاش لغيت ما صدقت اني مش هلاقيها وعملت معايا نفس اللي امها عملته
#كاميليا
كان قصدي اشكك نبيل انها حرامية بس مجش علي بالي انها تتعصب كده وتهرب ده ولا كأنها لقتها حجة علشان تمشي.
ولكن بردو ادتني فرصة كبيره اني اخلص منها وبعد ما الكل طلع يدور عليها اتصلت بنفس الولد اللي بعته ليها قبل كده وطلبت منه يخلص عليها هي واللي معاها وبعدين نزلت تحت ف لقيت يسرا واقفة بتبص علي البوابة من بعيد ومش علي بعضها قربت منها وقولت
- مالك يا مرات ابني قلقانة لية كدة
- هه.. لا لا مفيش.. طالعه انضف الاوضه.. "
قالتها ومشيت ومهتمتش اعرف مالها وبعد ما فضي المكان حوليا دخلت لزيدان عشان اتفشي فيه وامتع عيني بشكله وهو ميت ولما دخلت ملقتش الممرضة جنبه وهو زي ماهو متحركش ولا فتح عينه ف قعدت جنبه وقولت.. "
- ما حد واجع قلبي غيرك، بيتقطع عليك وانا شيفاك نايم كدة، لا محصل موت ولا حياة اه يا زيدان اااه.. يلا ربنا ياخدك وترتاح من العذاب ده.. "
كنت شمتانة فيه ومنظره وهو بشكل ده كان زي الاكسجين لواحد نفسه اتكتم وبعد ما اتمليت في شكله طلعت وسيبته ف لقيت رقية جاية ناحية الاوضه طالعتها من تحت لفوق وبعدين مشيت ومكلمتهاش
#رقية
تجاهلت اسلوبها وتكبرها عليا ودخلت عنده لقيته مفتح عينيه وباصص لسقف ومش متحرك نهائي يدوب حرك قزحيته بنسبة بسيطة وبس ف قربت منه وقولت وانا بربت علي كتفه
- الف سلامه عليك يا استاذ زيدان، ربنا يشفيك وتقوملنا بالف سلامه.. "
مردش بأي حركة ولا حتي حرك جفن ويدوب بعدت عيني عنه ومررتها علي شكل الاوضه ورجعت ابصله لقيته مغمض ف قولت يمكن نام وبعد دقايق جت فيروز وقالت
- مفيش جديد؟
- انا مشوفتش كان عامل ازاي، ف مش عارفه
- يبقي مفيش ربنا يشفيه يارب
- يارب.. انتي عامله ايه
- الحمدلله حبيبتي بخير
- حد زعلك تاني
- لا مفيش
- امال شكلك زعلانه ليه
- علشان اللي بيحصل، عمي تعبان ورحمة هربت
- ربنا يطمنكم عليها.. بس هي هربت لية
- مش عارفه انا مكنتش معاهم
- ترجع دلوقتي
- ان شاءلله..
بصت لاستاذ زيدان وقالت
- تفتكري ممكن يكون سامعنا
- اكيد
- يعني ممكن لو كلمناه يقوم ويقولنا وقع ازاي
- الحاجات دي بتاخد وقت علشان يقدر يتكلم ويتحرك بس هو اكيد بيشوف وبيسمع
بصتلي باستفهام ف قولت
- ايوه
- يسمع اه لكن يشوف ازاي ده في غيبوبة
- ايه؟
- في غيبوبة.. محدش قالك
رجعت بصتله وانا بفكر ازاي في غيبوبة وفتح عينيه ف بصتلها وقولت
- ده كان مفتح
- مفتح مفتح، انتي متاكده
- اه
قربت منه وقالت وهي بتهز كتفه بخفة
- عمي.. انت سامعني.. عمي
مردش ولا فتح عينه ف قالت
- يمكن بيتهيالك هو في غيبوبة
- والله فاكره اني لقيته فاتح عينيه.. بس ممكن
- عادي بتحصل.. هشوف مرات بابا وارجعلك
قالتها ومشيت وانا فضلت واقفة بصاله وبحك في دماغي واقول بحيرة
- ده كان مفتح يعني انا بحلم
- في حاجه
قالتها الممرضة اثناء دخولها علينا ف قولت
- لا مفيش
طلعت من الاوضه ف لقيت الاستاذ ياسين طالع فوق وهو مش شايف قدامه ومش راضي يرد علي حد من اللي ماشين وراه وبيحاولوا يكلموه
#حسن
لساعات وانا بلف عليهم في الشوارع لغيت ما تعبت ف رجعت تاني لقيت الكل هناك قلقانين ولما شافوني جم ليا وقال جدي
- لقيتها
- لا ملقتلهاش اثر بس هي بخير متقلقوش
- انا مش قلقان عليها هي، البنت كررت عملت امها النهارده
مجاش علي بالي لحظة ان موقف زي ده ممكن يجرح خالي ويفكره بهروب داليا زمان غير لما جدي قال الكلمة دي ف قولت
- خالي فين
قالت كاميليا
- جه زعلان وطلع فوق ومش راضي يكلم حد الله يسامحها هي وامها كسروه
- هشوفه
سيبتهم وطلعت فوق خبطت عليه مردش عليا ف قولت
- خالي افتح.. هترجع، اكيد في حاجه حصلت خلتها تمشي.. افتح لو سمحت خلينا نتكلم.. ياخالي متقلقناش عليك افتح.. خالي
رجعت اخبط واكلمه كتير ومفيش اي رد منه ف نزلت وانا بحلف اني ما هرجع غير لما الاقيها ولما وصلت تحت لقيت حمزة ف جه معايا
#حازم
كل دقيقه افتح واشوف ايه الجديد عندها وبتمني تبعت صور او تكلم حد مكالمة شمال كده ولا كده ولكن مفيش فايده زهقت وانا بدور عندها ومش لاقي حاجه سخنة تنفع، ومن ناحية تانيه كنت شايط من مروان اللي مدنيش رقمه واداه لياسر وبعد وقت وانا بمنع نفسي اني اكلمه علشان مزعلش معاه زعله كبيره كلمني هو وقالي
- انا مخنوق ما تيجي نخرج
- وجايلي انا لية امال ياسر فينه
- هكلمه
- طيب كلمه بقا وروح معاه هو، هو صاحبك وحبيبك
- مالك ياض في ايه، اية النبرة دي
- ومالها النبرة مش ادتله رقمك اللي قعدت تتحجج علشان متدهونيش روحله بقا
- مين قالك انت الكلام ده
- اللي قالي
- يابني ده واطي كنا مع بعض ف عمل بيه واتس، انا مدتهلهوش، هو **** حب يوقعنا في بعض
- هه.. شكرا لظروف.. روح يا مروان
قولت كده وقفلت في وشه
#ياسر
كنت في البيت قاعد مع اهلي لما اتصل عليا مروان مرتين وانا في كل مره كنت بقفل عليه ف بعتلي فويس ولان فويساتهم ملغمة خدت التليفون ودخلت جوه سمعته لقيته بيقولي فيه
- انت عيل **** يلا وانا غلطان اني ساعدتك
رجعت اتصلت بيه ف رد وقال بغضب
- انت لو قدامي دلوقتي ***** رايح تسيحلي عند حازم
- في ايه ياض ما تهدا.. مين ده اللي سيحلك وسيحتلك ب ايه
- بالرقم، انا مش قولتلك متقولش لـ حازم اني ادتهولك علشان رفضت ادهوله
- مين اللي قاله
- امي اللي قالتله
- يابني والنعمة ما حصل انا لا شوفت حازم ولا بينا كلام علشان اقوله حاجة زي دي
- امال عرف منين ماهو محدش يعرف غيرنا احنا.. ماشي يا ياسر انا الغلطان
قال كده وقفل السكة وسابني محتار وبفكر قولتله امته ف اتصلت ب حازم ورد عليا وقال
- اهلا
- مين قالك علي حوار رقم مروان
- اللي قالي
- لا ما انا عايز اعرف، مروان زعل وفاكرني انا اللي قولت
- وانا مقولتلهوش انك قولت
- امال عرفت ازاي
- مش مهم
- عرفت ازاي يا حازم
- ياعم عرفت من مطرح ما عرفت ليك فيه، انا واصل وبنجم يخصك
- اه يخصني لما تعرف حاجه عني يبقي يخصني
- بس ده رقم مروان مش رقمك، فكك ورايا موزه بثبتها
قالها وقفل وسابني افكر ممكن يكون عرف ازاي جه علي بالي بسنت وتخيلت ان ممكن يكون بينهم كلام بس رجعت استبعدتها واحد زي حازم ميعرفش يشغلها
وفضل حوار الرقم سر مقدرتش اعرفه
#سيكا
بعد ليلة قضيناها على الارصفه مش عارفين نعمل ايه طلعت السلسلة وقالت
- باين كده مقدمناش غير اننا نبيع دي ونشوف ممكن نعمل ايه
- هي لسة معاكي
- اه واهي هتنفعنا
- انا مش قادر افهمك، لية لغيت دلوقتي لبساها
- فكك يا سيكا، اهي هتتباع وهنرتاح
- طيب وانا كمان هبيع التليفون
- تمام نبيعهم ونشوف مكان نقعد فيه
- ماشي، بس...
- بس ايه ما تقول
- وياسين يا ابلة، ده ممكن يبلغ
- يبلغ يقول ايه
- يقول مراتي تايهة انتي ناسية انك اسمك مراته
- بلا مراته بلا امه، يطلقني ونخلص مش هرجع عندهم تاني، بس عارف انا متضايقة من نفسي قوي وهتطق من جنابي
- لية
- علشان سكت، كان لازم اقول لراجل ده اللي مخبياه عنه عشان يعرف ان سكوتي خوف عليه
- والله كنتي قولتي لية مخبين عليه
- وفكرك هيستحمل ده يروح فيها
- يبقي هو اللي جني علي نفسه انتي مالك
- معرفش بقا، يلا قوم معايا نشوفلهم بيعه.. "
مشينا في الشوارع ندور علي محلات نبيعهم فيهم
وبعد مسافة شوفت بوكس معدي شديت ايدها ودخلت بيها في مدخل عمارة ف قالت
- في ايه
- البوليس معدي
- ما يعدي واحنا حرامية
- مش يمكن بلغوا وبيدوروا علينا
- حتي لو بلغوا هقول مش عاوزه اقعد عندهم هو غصب
- بردو خلينا في السليم احسن
- طيب ياخويا يلا اهم مشيوا
خرجنا تاني وبعد مسافة شوفت اتنين معديين بعربية ولما شافونا هدوا سرعتهم حسيت بالقلق منهم ف مسكت ايدها وقولت
- امشي
- في ايه يانيلة
- امشي بس
قولتها وانا ببصلهم ف لقيتهم راجعين ورانا بالعربية ف قولت وانا بسرع خطوتي
- دول جيلنا احنا اجري
شدت ايدها مني وقالت بعصبية وهي بتبصلهم
- في ايه يا زفت.. مالهم دول
- زي ما يكون قاصدينا.. "
قولت كده ف لقيتهم بينزلوا من العربية ورحمة وقفت مكانها عيونها بتتسع وبتفتح بوقها بذهول ف قولت
- مش بقولك قاصدينا انا مش مطمن ما تجري واقفة لية
- اه قاصدينا فعلاً، الواد اللي كتم نفسي في شقة ياسين اهو
- طيب قولي والمصحف، يالهووي يانا يامه هنموت يا ابلة
مسكت ايدها علشان نجري ف شدتها مني وقالت
- وسع، ده انا كنت خايفه اموت قبل ما اشوفه واهو جالي لغيت عندي وانا مش هحله
وقفت قدامها وقولت
- مش هتحلي مين انتي فاكره نفسك هتقدري عليهم بلاش زعامة فارغه، يلا نهرب ونبي
- اوعي ده انت دكر البط ارجل منك
زقتني من قدامها وراحتلهم وانا فضلت شويه الطم علي وشي ولما ملقتش فايدة فيها وهي كانت ناوية الشر ومش هتتراجع روحت وراها ولما وصلت قدامهم و وقفت في وشهم بصوا لبعض وضحكوا بسخرية وفجاة واحد منهم طلع مطوة من جيبه و..