رواية ابتليت بحبها الجزء الثاني2 الفصل الحادي عشر11 بقلم نجمه براقه
رقية
اثناء تجمع الناس علينا مرر عينه بينهم ورجع بصلي بخذلان وقال
= الفار هيقتلك؟! كنتي مخططة لده من الاول.. "
نظرته ليا وقتها افقدتني لذة الانتصار والانتقام منه، والنتيجة انعكست عليا من منتصر لمهزوم، حسيت اني تسرعت ومش هي دي الطريقة الصح للانتقام منه ولا ده انا .
ومع كدة مبدتيش اي رد فعل ولا منعتهم عنه حتي لما اتجمعوا حوليه وضربوه بقيت واقفة مكاني متلجمة عن فعل اي حاجة لغيت ما شوفته واقع علي الارض ومستمرين في ضربه برجليهم زي الكورة بيشوطوها لبعض وهو بيستقبل الضرب من غير ما يحاول يدافع عن نفسه..
وقتها حسيت بالندم واندفعت بينهم وحاولت ابعادهم عنه بس مقدرتش محدش كان منتبهلي وكلهم كانوا بيتسابقوا علي مين يضربه اكتر، وبعد ما فشلت محاولاتي للوصول لية بسببهم مسكت دراع واحد منهم عضيته بكل عزمي صرخ وشد ايده مني وهو بيزعق ويقولي
= انتى اتجننتي يابت انتى
- اه اوعا بقا
زقيته عن طريقي ودخلت وسطهم ونزلت عنده وقولت وانا ببعدهم عنه
- بس بس!!، سيبوه
قال واحد منهم
- بس ايه يا مجنونة انتي ده كان هيقتلك.. "
تجاهلت كلامه وقولت بصوت مختنق وانا برفع دماغه عن الارض
= قوم معايا.. "
بعد ايدي عنه وقال و وشه بيعتصر من الالم
- شكراً مش عايز منك حاجة. "
بدء يتحامل علي ايديه بجهد كبير عشان يقوم وهو بيبعد ايدي عنه كل ما تحاول مساعدته ف قال واحد من الموجود
- هو ايه اللي بيجرا، يابت انتي مش لسة قايلة هيقتلك ولا انتي بترمي بلاكي عليه.. "
تهربت من نظراته بدون رد ف بدؤا يتجمعوا حوليا كلهم وهما بيقولولي
- تبقي بترمي بلاكي عليا، وهتترني علقة انضف من علقته.. "
تراجعت للخلف وانا بمرر عيني بينهم بخوف وانا فاقدة الامل في النجاة منهم وفجأة حمزة وقف بينا بمساعدة اتنين وقال وهو بيمنعهم عني
- مفيش حاجه يا شباب، حصل لبس، هي بتعمل كده لما تشوف فار
بصلي وقال بخيبة
- دي مراتي مش بترمي بلاها عليا يعني
انسابت دموعي بغزارة وحاولت اتكلم ف رجع بصلهم وقال
- تعيشوا، يلا
مسك ايدي وخرجنا من وسطهم ونظراتهم لسة بتلاحقني ف كلبشت في ايده و وطيت دماغي عشان مشفهمش وبعد ما تجاوزناهم بالكامل ساب ايدي وتابع طريقه ف قولت..
- انا مكنتش عاوزاهم يضربوك، انا فعلاً شوفت فار وخوفت منه.. "
مردش عليا ف قولت
- انت مش بترد لية بقولك شوفت فار.. "
كمل مشي متجاهل كلامي لغيت ما تعب ومقدرش يكمل وكان هيوقع اسرعت بسنده وقولت وانا بحاول اعينه علي صلب طوله
- خلي بالك.. "
- اخلي بالي منك؟ خليكي بعيد عني دلوقتي احسن.. "
بعد عني وقعد علي الرصيف استند بضهره علي شجرة قعدت جنبه وقولت
- وانا اللي هموت علشان اكون جنبك، خليك كدة
مردش عليا وخرج التليفون من جيبه وطلب اوبر وبعد ما رجعنا البيت دخل الاوضة واترما علي السرير وانا طلعت جبت علبة الاسعافات ورجعت قربت منه وقولت بتردد
- انا مليش دعوة بيك بس انت تعبان، ووشك متشلفط، ادي العلبة لو كان هتعالج نفسك
رمقني بنظرة ازدراء وشد اللحاف وغطا نفسه بالكامل
#حسن
كنت قاعد في اوضتي سارح بافكاري بسترجع في مخيلتي الوقت اللي قضيناه سوا انا ورحمة في الجيم وابتسامتي مرسومة علي وشي بدون ادراك مني وفي انعزال تام عن العالم اللي حوليه لغيت ما جاني صوت ماما فوقني من شرودي ورجعني للواقع وهو انها مرات خالي
- حسن!!!
التفت ليها وقولت
- ماما، نعم
- انا بقالي ساعة جنبك بكلمك وانت ولا انت هنا، سرحان في ايه
- في الدنيا، في حاجه؟
- ومالها الدنيا، بتفكر في ايه ياحسن قولي، لتكون لسة مشغول بخط الليل
- لا مش هي، انا خلاص نسيتها
- مش هي يعني سرحان في غيرها
- يعني..
قومت من مكاني وقولت
- بابا نام
- اه واقعد متقولش كلمة وتسكت، مين التانية دي
- بني ادمه يا ماما، بنت زي كل البنات
- لا ياشيخ طيب والعفاريت قصروا معاك في ايه
- مش هنتفق ، هي من نار وانا من طين وبتتخفي بقا وهنفضل ندور ونخض في بعض وانتي فاهمة ، انا جعان هروح اجهز لنفسي
سيبتها وطلعت وانا عارف انها مش هتسكت وبعد ساعة من الف ورايا علشان تعرف الحكاية قولت بزهق
- يا ماما ارحميني، في ايه دي مش كلمة قولتها الله!
- ما انا مش هسيبك غير لما اعرف فيك ايه ومين البنت دي، انا اصلا مش مرتحالك وحساك بتغلوش علي خط الليل بتاعتك
- تاني ياماما، ماشي ياماما هقولك بس متقوليش لحد
- مش هقول، اتكلم
- دي بنت كانت زميلتي في الجامعه رجعت قابلتها وقعدنا مع بعض واتكلمنا بس مشيت ومش عارف اذا هشوفها تاني او لا
- يا واد عليا انا الكلام بردو.. "
- ده اللي عندي، معرفتش اخترع غيره، داخل انام تصبحي على خير.. "
رجعت اوضتي وقفلت علي نفسي علشان متجيش تكمل وبعدين مسكت التليفون اقلب شويه في الانترنت وبعد دقايق وصلتني رسايل من رويدا بتقولي
- عبرنا يا مدمرنا
- مبعبرش بنات
- ولا ولاد وحيات ابوك، زهير قالي انك مبتسالش كمان
- ولا ولاد انا حاليا بتواصل مع فضائيين، ايه الاخبار
- احسن منك
- بردو
- تقدر تنكر
- واحسن مني في ايه، خلصتوا الرساله ولا عملتوا حاجه تذكر يا جرابيع
- بنسأل علي الواطين اللي مبيسألوش، اخبارك ايه ومبتسالش لية لعله خير
- انا الحمدلله، ومبسألش علشان محتاج اللي يسال عليا
- لية يا ضنايا، مين ماتلك
- يخربيت لسانك يا مدب
- ياعم الاعمار بيد الله وكلنا اليه راجعون متبقاش ملحد
- طيب يختي، طمنيني عليكي
- احسن منك
- امممم
- هههههههه بهزر يا حسنولي، قولي عملت ايه مع البت، رجعتلها
- امممم
- ايه
- شكلك جيتي في وقتك
- لية ياحبيبي
- حبك برص يا رويدا احترم نفسك مش هتجوزك
- ونبي تتجوزني ارجوك مش هقدر اعيش لو متجوزتنيش
- أبداً متحاوليش انتي مش ذوقي دلوقتي يجيلك عدلك
- انت هتعيش الدور يا مقشف، في ايه انا الفضول هيقتلني
- طيب بس الكلام اللي هقوله ده ميطلعش بره ولا حتي لزهير
- عيب عليك، رويدا رجوله
- رجولة..
- ايوه احكي بقا، قابلتها
- قابلتها
- طيب وبعدين لقيتها بتحبك ومستنياك وحضن والجو ده
- خيالية قوي انتي، لا ملقتهاش مستنياني ومفيش احضان، بس بيقولوا حباني
- ايه ده، طيب ما تتكلم علي طول
-هتكلم اهو، انا رجعت من الكويت احضر فرح حمزة وكتب كتاب خالي ياسين ومش هتصدقي ايه اللي حصل
- اوعا تقول انها طلعت عروسة حمزة
- لا، عروسة خالي
- حسن متهزرش
- والله ما بهزر، لقيتها هي وخالي بيكتبوا كتابهم
- طيب ازاي، وهي ايه وصلها لخالك
- حكاية طويلة
- طيب قول انا معاك
حكتلها الحكاية كلها ف قالت
- حسن انت معدلتش الجزمة المقلوبة وانت صغير ف ربنا بيعاقبك صح؟
- اه ساعات كنت بسيبها مقلوبة فعلاً، انتي بتهزري يا رويدا
- اقولك ايه مانت نحسك موردش علي حد، يعني يسرا يتجوزها ابن خالك الكبير ودي يتجوزها خالك واللي هو اقرب حد ليك
- ذنب الجزمة المقلوبة
- ده سحر اسود وحياتك، طيب وبعدين مفكرتش تقوله
- اقوله ايه
- اللي حصل
- اقوله بحب مراتك وهي بتحبني زي ما حصل قبل كده مع امها
- مش احسن ما يعيش مخدوع
- ومين هيخدعه
- انت وهي
- انتي هبلة يابت، يعني انتي تتخيلي اني ممكن اقل باصلي معاه واصاحب مراته
- ياحبيبي مانت بتقول اهو بتحبها وهي بتحبك يعني في خداع مش لازم حاجه صريحة يعني
- دي حاجات غصب عني وعنها، بس مش هتطور لاكتر من كده
- بتحلم، هتطور طول مانت بتشوفها
- انتي دماغك بايظة او مش عارفه انا مين ، انا مستحيل اطعن خالي في ضهره حتي لو هموت من غيرها
#رحمة
صحيت تاني يوم لقيت شنطتين هدايا جنبي على السرير، فتحت اول واحده لقيت فستان اسود ولما فتحت الشنطة التانية لقيت جزمة واكسسوارات ف رجعتهم تاني مكانهم وقولت بزهق
- ده بيضحك عليا ولا فاكرني عيلة.. ماشي هات براحتك ولا هتقدر تنسيني
سيبتهم وقومت غيرت هدومي وطلعت من الاوضه غسلت وشي ولما رجعت تاني لقيته هو وجدي قاعدين في الصالة صبحت عليهم ورجعت الاوضه وانا بسرح شعري قدام المرايا وبيمر في بالي وقتنا سوا انا وحسن قطع شرودي صوت ياسين وهو بيقولي
- صاحيه فايقة النهارده
سيبت المشط وقولت وانا بتوجه لية
- شوية
- صباحك ورد
- صباح النور
قال وهو بيشاور على الهدايا
- مقولتيش رايك فى الهدية ولا مشوفتهاش
- شوفتها وعجبتني، بس جبت لية عندي كتير
- واية يعني نزود علشان تكوني مبسوطه
- شكرا بس مكنش لية لازمة
قال اثناء تقدمه
- لية، انا دوري اخليكي مبسوطة ولو هجبلك الدنيا كلها
تابع وهو بيرفع وشي بلطف
- علشان اشوف ابتسامتك اللي حرماني منها
بعدت ايده عني وقولت وانا بديرله ضهري
- لما انسا اللي عملته
رجعني لية وقال وهو بينهي المسافة اللي بيني وبينه
- بتنسي غلطك وبتمسكي ف رد فعلي، بس ماشي، انا اسف عاوزة ايه وانا اجيبهولك
قولت بارتباك
- مش عاوزه حاجه
تراجعت خطوة ف احاط وسطي بدراعه ورجعني ليه وقال
- بتبعدي لية
قولت بارتباك وانا بحاول ابعد عنه
- لو حد شافنا كده هيفهم غلط
- طيب ما يفهموا، واحد ومراته حد ليه حاجة عندنا
- لسة، احنا معملناش فرح
احكم احاطت وسطي وقال وهو بيقربلي
- واذا، ده مش غلط ولا حرام، مش مكتوب كتابنا
- ميصحش، لو سمحت عيب كده، انا مش حابة القربه ده قبل الجواز
افلت ايده بهدؤء وقال
- ماشي، مش هضايقك
قولت وانا بلملم نفسي
- كتر خيرك
- طيب تخرجي نتغدا بره النهارده
- لا تعبانه وجسمي مكسر
- من الجيم
- اه لسة جسمي مخدش علي الحركات اللي عملناها
- دلوقتي تتعودي، بس انا مبسوط انك خرجتي ومفضلتيش قافلة علي نفسك كتير
- انا بحب الرياضة وده انسب مكان اروحة لما اكون زعلانة
- انبسطتي يعني
- اه قوي
- وحسن ضايقك في حاجة لما راح معاكي
- لا يضايقني لية، متكلمش معايا خالص، بتسأل لية؟
- بطمن ان مفيش حاجه ضايقتك
- لا مضايقنيش.. بس انا قولت انك هتزعل اني روحت معاه
- ازعل لية؟
- علشان روحت معاه من غير ما نسألك
- حسن عارف ايه اللي ينفع ومينفعش مكنش هيوديكي لو حس اني مش موافق
- باين عليكم قريبين قوي من بعض
- اه انا وهو مش خال وابن اخته بس وصحاب كمان
- اشمعنا هو مافي ولاد اخوك، ولا مرة اتكلمت عنهم زيه
- حسن غيرهم مبلاقيش صعوبة علشان يفهمني وده غير ان انا اللي مربية
- ربنا يخليكم لبعض
- يارب
ابتسم وقال
- كنتي هتشوفيه قبلي لولا الظروف
- يعني ايه مش فاهمه
- يعني كان علي باب بيتكم وكان هيخبط عليكم بس انا وقفته
- يعني ايه وقفته، ولية
- لما عرف عنوانكم راحلكم وهو على الباب اتصلت بيه قولتله يرجع الكويت في اول طيارة،اصل ابوه تعب ودخل العناية ف كلمته قولتله يسيب كل حاجه ويرجع كنا فكرينه هيموت بس ربنا كتبله عمر جديد
- يعني حسن راح البيت عندنا
- اه ويمكن لو ابوه متعبش كان انقذنا الموقف ومتعرضتيش للي تعرضتيله، كنا كلنا وقفنا معاكي
- اه بس يعني...
- ايه
- لا مفيش انا بس مستغربه اصلي مشفتهوش، يعني هو جه عندنا وسافر علشان ابوه تعبان
- ايوه في ايه
- مفيش اول مره اعرف بس، انا ولا مره شوفته عندنا
- مكنتش اعرف ان حاجه زي كده هتفرق معاكي، في حاجه انا معرفهاش
- لا حاجة اية، مفيش اي حاجة
تابعت بتوتر وانا بتجه ناحية شنط الهدايا
- بس حلو قوي الفستان ده، والون الاسود كمان فظيع انا بحب الاسود
"
كلامه حيرني ومكنتش لاقية تفسير لكدبه عليا، وهل كدب علي سيكا هو كمان ولا الكدبة ابتدت من عند سيكا الاول.
كنت محتاجه اقابل حد فيهم ولكن مقدرتش اقول وفضلت مستنية لحظة تجمعني بيهم علشان افهم
#صدام
- هي موجوده دلوقتي في بيت ناس ميعرفوش حقيقتها وانت ميرضكش يا معلم نسيبهم علي عماهم دي ممكن تسرقهم او تموت حد فيهم..! "
- ميرضنيش طبعاً وانا نفسي اطولها بت الكلب دي واصفي حسابي معاها، بس انا هدب مشوار زي ده لناس معرفهاش ازاي يا استاذ.. "
- تدب ايه يا معلم المشوار ساعتين بالكتير وتكون هناك وانت مش محتاج تعرفهم انت هتقابلهم وتحكيلهم حقيقتها وبس وانا هرضيك ودلوقتي..! "
- ترضيني ازاي عدم الامؤخذه؟.. "
- الفين جنية.. "
- باين عليها علمت عليك انت كمان.. "
- حاجة زي كده، اجيب الالفين ولا؟.. "
- طيب ما تخليهم خمسة.. "
- اتنين ونص واحمد ربنا
- هما شويه بس اللي يجي منك بركة هاتهم
- وهتروح النهارده؟
- لا بكرة النهارده ورايا شويه حاجات مش هقدر اسيبها
- مش مشكله، بكرة بكرة.. "
- طيب قولي اسم حد اكلمه، مش هروح عمياني كده.. "
- انت تقابل الامن وتقول عايز اقابل نبيل وياسين فياض وتطلب منهم يدخلوك جوه.. "
- نبيل ياسين فياض
- لا نبيل و ياسين.. نبيل فياض وياسين فياض.. "
- مفهوم يا استاذ، نبيل فياض واخوه ياسين.. "
قولت بحنق
- يا معلم متجودش من عندك انت هتروح تقابل الامن تطلب منهم يدخلوك ل ياسين ونبيل فياض ولما يدخلوك قولهم اللي رايح عشانه وبس
- مفهوم حاضر ياباشا عيني.. فين التلات الاف بقا.. "
- قولنا الفين ونص
تابعت بزهق
- ماشي تلاتة، تعاله وريني اي مكنة نسحب منها.. "
#كاميليا
رن التليفون وانا مع عز علي السرير مديت ايدي باتجاه الكوميدينو علشان اجيبه ف مسك ايدي وقال
- مش وقته.. "
- هشوف مين يمكن في حاجه مهمة.. "
تنهد بزهق وقال وهو بيجيبه
- هيكون مين يعني.. اهو صدام ابنك..مش الوزير يعني "
- هرد دقيقه واحده.. "
ادهوني وقال
- بسرعه طيب.. "
- ماشي بس ممكن تسيبني دقيقه ارد علشان ميشكش في حاجه.. "
- تؤ
- ياعز ارجوك.. "
تجاهل رجائي واستمر في اللي بيعمله غير مهتم باللي ممكن يحصل لو صدام لاحظ حاجة ف فتحت ورديت وانا بحاول اظبط نبرة صوتي
- اه يا صدام.. "
- عاملة اية.. "
- تمام، في ايه.. "
كتمت الصوت وقولت بحنق
- اصبر شويه مش عارفه اتكلم.. "
مردش عليا ف رجعت رفعت الكتم ورديت علي صدام اللي بيقولي
- لقيت راجل البت كانت بتشتغل عنده وسرقته هو كمان.. "
- ايوه.. "
- وهيجي علي البيت بكرة..! "
- اه تمام
- مالك ياماما.. "
- مفيش حاجه هكلمك تاني.. "
- استني.. "
- ايه يا صدام، في ايه.. "
- كنت عايز اقولك انا خلصت مهمتي ارجع؟!.. "
- ارجع، سلام دلوقتي
- استني بس، مال صوتك
مردتش وقفلت معاه وسيبت التليفون ورجعت بعدت وشه عن رقبتي وقولت بضيقة
- حرام عليك، افرض كان حس بحاجة دلوقتي كنت هقوله ايه
- ما يحس وهو هيعملك ايه، انسيه دلوقتي وخليكي معايا
- انا ملاحظة انك مبتفكرش غير في نفسك يا عز، معقول ميهمكش انا ممكن يحصلي ايه.. "
- وانا علشان مش قادر ابعد عنك ابقا مبفكرش غير في نفسي ده بدل ما تقولي اني بعوضك عن السنين اللي عيشتيهم لوحدك.. "
#فيروز
- ازيك يا بابا.. "
- تمام حبيبتي انتي عامله ايه دلوقتي.. "
- الحمدلله بخير طول ماحضرتك بخير ، بعتلي؟.. "
- اه كنت عاوز اسالك في حاجه معاكي.. "
- حاجة زي اية.. "
- الشيخ اللي بيحفظك متصل وطالب يقابلني
- الشيخ يونس.. "
- اه
- ويقابلك لية.. "
- معرفش قالي عاوز يقابلني وهيجي الصبح.. "
- مش عارفه والله يابابا يمكن عاوزك في شغل.. "
- شغل اية اللي ممكن يعوزني فيه، يلا مش مهم اهو هيجي بكره وهنشوف، انتي هتروحي النهارده؟.."
- لا
- لية
- محفظتش
- وايه مخليكي متحفظيش.. "
- بحفظ بس واخده جزء كبير المرة دي ومش عاوزه اروح قبل ما احفظه.. "
- اها.. صدام كلمك
اومأت بنفي ف قال
- لسة بردو مش مديلك وش.. "
- يهدا دلوقتي وبعدها ننقرر يا بابا، انا مش حابه اتسرع.. "
- مش عاوزه تتسرعي ولا متمسكة بيه
- لا يا بابا، انا بس مش حابه اخد اي قرار في وقت زي ده
- براحتك، انتي حرة انا مش هتدخل تاني، دي حياتك وانتي اللي هتعيشيها"
- وبردو مش عاوزه حضرتك تقلق، هو مش وحش بس الغضب عميه.. "
- عمره ما كان وحش وعارف ان الزعل هو اللي مخليه معوج علينا كده، بس انا مش عايز اشوف قلبك مكسور ولا مركونة علي الرف، وزي البيت الوقف لا متجوزه ولا متطلقة "
- ربنا يهديه يا بابا، مش هيحصل غير كل خير، متشغلش بالك انت.. "
- ربنا يسعدك يابنتي، ويهديه عليكي، انا والله ما وافقت علي جوازه منك غير عشان اموت وانا مطمن عليكي.. "
- بعد الشر عنك متقولش كدة، ربنا يديك طولة العمر.. "
- ربنا يحفظك.. "
ميلت وبوست ايده وقولت
- ويحفظك يا حبيبي، هروح اشوف سحر محتاسة في المطبخ لوحدها.. "
- ماشي حبيبتي.. "
ورجعت وعند دخولي من باب الڤيلا لقيت يسرا نازله من علي السلم تجاهلتها وكملت طريقي للمطبخ وهناك لقيت جني بتكتب الواجب اللي ادتهولها قربت منها وقولت بابتسامة
- اية الشطارة دي كلها بتتعلمي بسرعه اهو، بس هاتي هوريكي طريقة اسهل تكتبي بيها.. "
خدت منها القلم و كتبت قدامها وبعدين ادتهولها وقولت
- اعملي كده هتتعلمي اسرع
قالت بابتسامة
- حفظتهم صم واقدر اقراهملك من غير ما اشوف.."
- مش مصدقاكي
- طيب اسمعي وهتعرفي اني حفظتهم
- ماشي، سمعي يلا
بدات تسميع لغيت ما انتهت ف مسكت وشها بين ايديا بوستها وقولت
- ما شاءلله، شاطرة وبتتعلمي بسرعه ايوه كده عاوزاكي تكوني اشطر بنت في العالم.. "
قالت سحر
- كتر خيرك والله يا انسة فيروز محدش فكر يعملها غيرك
- علي ايه، هي ذكية وبتتعلم بسرعه ومش متعبة وانا متاكدة انه هيجي منها
- صحيح وهي حابه تتعلم قوي
قالت جني
- بس انا مش بعرف اقرا الكلمة، عارفة كل الحروف بس مش عارفه اعمل منهم كلمة
- انا هعلمك بس واحده واحده علشان تقدري تكملي من غير ما تملي
- بتتعبي نفسك على الفاضي..
كانت جملة يسرا من ورانا التفت ليها وانا متوقعه انها حابة تضايقني وتحبط عزيمتي ولكن عكس توقعي لما التفت ليها لقيتها بتتكلم عادي ف قولت
- ولية البنت ذكية وحابة تتعلم وبتتعلم بسرعة اسرع من غيرها كتير.. "
- وهي هتعمل ايه بالتعليم من غير شهادة
- وهما كل اللى معاهم شهايد عملوا بيها اية، كفاية تكون بتعرف تقراء وتكتب ده هيفيدها في حياتها
- براحتك انتي اللي هتصدعي، كباية لبن يا سحر وهاتيهالي فوق.. "
تعجبت علي اسلوبها الجديد معايا ومبقتش فاهمه هي بتمثل ولا لقت ان مفيش فايدة من المناهدة واختارت تعيش في هدؤء من غير صراعات
#رقية
مرت اول ليلة وكل واحد فينا نام في اوضة لوحده والصبح فتحت الباب ببطيء ودخلت اشوف اذا كان عايش ولا ميت ف لقيته نايم نوم عميق و وشه كله كدمات، وقفت مكاني للحظات عيني عليه وبيمر في بالي اللي حصل واحساس بعدم الرضا عن النفس انتباني لما افتكرت دفاعه عني بعد العلقة اللي خدها بسببي، ولكن سريعاً كابرت وقولت محدثه نفسي
- يستاهل ماهو كمان ازاني، خليه يتربا علشان يحرم بعد كده يتطاول عليا.. "
قولت كدة وخرجت تاني وبدات انضف البيت وبعد وقت سمعت رنة تليفونه ف دخلت اوطي الصوت علشان ميصحاش ولكن للاسف لقيته صاحي وبيتكلم في التليفون ويقول
- ما انتي اللي مش راضيه تفهمي يا جيداء انا قولتلك إنـ...
بتر كلامه لما شافني عند الباب وبعدين قال اثناء اعتداله
- هكلمك تاني.. "
ساب التليفون وقال اثناء تقدمه مني
- واقفة عندك لية.. "
- سمعت صوت التليفون جيت اسكته
- تسكتيه؟!
- اه اسكته علشان تنام ومتصحاش تلوي خلقتك عليا.. "
قولتلها واستدرت علشان امشى ف قالي
- استني عندك.. "
رجعت ليه وانا بتجنب النظر لعيونه اللي بتناظرني بغضب وكأنه بيحدث نفسه انه يديني قلم يخلص مني اللي عملته ف قال بعد صمت
- كنتي بتفكري في ايه ساعتها
- يعني ايه
-انتي فاهمة بتكلم عن اية، كنتي عاوزاهم يقتلوني ولا علقة يكسروني فيها علشان ترضي نفسك وتحسي انك خلصتي تارك مني
قولت وانا بتهرب من نظراته
- انا مكنتش عاوزه حاجه، شوفت فار وصرخت وحصل اللي حصل
- كدابة، انتي مخططة لده من الاول من اول ما رجعت البيت لقيتك بتصوتي علشان توهميني باللعبة بتاعتك دي، بس انا عاوز اعرف دلوقتي كنتي عاوزاهم يعملوا فيا ايه، يقتلوني ولا يكسروا فيا حاجه
-...
- القطة كلت لسانك دلوقتي مش قادره تبصيلي حتي
بصتله وقولت
- واية ميقدرنيش، انا لساني لسة في بوقي وعيني مش مكسورة علشان مقدرش اواجهك ، اه انا كنت قاصدة اعمل كده، ومتنساش انك انت اللي بدأت يوم ما بوستني غصب ويوم ما قربتلي في المطبخ
- اه يعني انتي شايفه انك علشان تخلصي حقك في حاجه زي دي تقتليني
- هو فين القتل انا كنت عاوزاك تضرب وبس.. ومتعمليش فيها متأثر ومجروح علشان انا ممكن افكرك باللي عملته وانا بعيط واقطعلك قلبك من التأثر
-...
- ايه معني البصة دي، لا متعش الدور انا مش حاسة ولا هحس اني اذنبت في حقك انت اللي دمرتلي حياتي وكل مصيبة عملتها كانت ابشع من اللي قبلها، مضتني علي عقد جواز بالكدب وجرجرتني لشقتك وحاولت تعتدي عليا، ايدك لمستني وانا اللي اتخطبت اربع سنين مسمحتش لخطيبي يلمس فيهم ايدي ولا يتجاوز معايا في كلامه، انت اللي حبستني وسط المجرمين، وخليت ابويا يرقد في المستشفي وكان ممكن يموت وانت اللي بعتلي ستات بلطجيه يضربوني، اللي حصلك ده ميجيش ربع اللي انت عملته فيا.."
- حصل انا مش بنكر وبحاول اتحمل اسلوبك لغيت ما تحسي نفسك رضيتي، ومش عاتب عليكي علشان خليتي الناس يضربوني حتي لو عجزت مكنش هيكون عندي مشكلة، انا مشكلتي انك كنتي قاصدة تخليني اطمنلك وانتي محضرالي مصيبة.. "
- لا والله، يعني انت مبتحبش تتخذل بعد الثقة وانا اللي بحب اطلع بنت شمال ومتجوزه عرفي من ورا اهلها واطلع رحت معاك الشقة واتحبس واتضرب.. "
- مين اللي يتضرب، انا مبعتلكش حد يضربك.. "
- مفيش حد غيرك يعملها انا مليش مشاكل مع حد.. "
- وانا بقولك مش انا.. "
- تبقي هي دي الحاجه الوحيدة اللي معملتهاش، وتقدر دلوقتي تطلقني وكل واحد يروح لحاله.. "
- لا
- لا ايه، هنكمل في القرف ده لامتي
- لما الجوازة تكمل، ولا عاوزه لو اتجوزتي تاني جوزك يقول عليا عندي مشكله، لو جاهزة قوليلي وبعدها نطلع على المأذون
قالها ورجع روحت وراه وقولت بعصبية
- انت بتساومني علي شرفي
قرب مني وقال بوقاحة
- علي شرفي انا، انتي مش هتخسري حاجة لو لبستيلي حتة قميص احمر وسلمتيلي نفسك انا اللي هخسر لو محصلش
قولت بارتباك وانا بتراجع
- انت انسان وقح
- وانتي الذوق منفعش معاكي، ومن دلوقتي مفيش غير وقاحة.. ولو مخفتيش من خلقتي هوريكي الوقاحة اللي بجد
#حمزة
يمكن لو مكنتش متكسر مكنتش سيبتها غير لما اخد حقي منها واربيها علي اللي عملته معايا، بس للاسف هي غشيمة وممكن تكمل عليا ف قررت اني هنتقم منها بطريقة تانية وبعد ما مشيت رجعت اتصل ب جيداء
#يسرا
مكنتش عارفه انا عاوزه اية ولا عارفه ممكن اتكلم مع مين واكتشفت اني برغم كل اللي حوليا وحيدة ومفيش انسان واحد اروحله حتي عيسي اللي كنت بجري عليه ف اول مشكله راح هو كمان ويمكن اصبح خطر عليا زيه زي كاميليا..
وبعد وقت قضيته في اوضتي مليش نفس اعمل حاجه دخل عليا صدام وقف مكانه يتفحص شكلي وشكل الاوضة الغير منظم وقال
- قاعده كده لية
قومت من مكاني وقولت
- قاعدة
- ايوة ما انا شايف بس لية، تعبانه؟
- لا
- اها.. اوك
قالها ودخل الحمام ورجع بعد دقايق لافف الفوطة علي وسطه وبعد ما غير وقف قدام المرايا يسرح شعره وبعدين التفت ليا من المرايا وقال
- بقلق من سكوتك اكتر من كلامك مالك
- حتي وانا ساكته ومش جاية جنبك، اية يقلق في سكوتي، افهم "
ساب الفرشة جه عندي وقال
- مش سكوتك بس وهدؤك كمان، في ايه مش مظبوطة النهارده
- علي اساس الايام اللي فاتت كنت مظبوطة، مفيش انا تمام متشغلش بالك
زم شفايفه وقال وهو بيحك حاجبه
- طيب عملتي ايه في اليومين اللي فاتوا
- ولا حاجه
حط ايده على بطني وقال
- البيبي عامل ايه اتحرك ولا لسه
- لسة شويه
- هيتحرك امتي
- بيقولوا في الرابع
- يعني باقي شهر وشوية
- اه
- قرب اهو، طيب وامتي نقدر نعرف نوعه
- بيقولوا التالت او الرابع
- هما مين دول اللي بيقولوا
- الدكاترة وجروبات الماميز
- متابعة يعني
- اه
- اه.. طيب انا هروح اطمن علي بابا وارجع، ظبطي المكان.. هنقعد شويه مع بعض
- اشمعنا
- لو مش عاوزه خلاص
- عاوزه..
- طيب شوية وراجع
#صدام
نزلت تحت ودورت بعيني في المكان علي فيروز ملقتهاش ف دخلت اوضة بابا وهناك لقيت الممرضة عنده قربت منه وقولت
- عامل ايه دلوقتي..؟ "
- بخير.. "
- مفيش جديد..؟ "
- لا لسة.. "
- طيب سيبينا شويه.. "
- حاضر
قالتها وطلعت وانا قعدت جنبه وقولت وانا ماسك ايده بين ايديا
- اية يا بابا، نومتك طولت لية، ولا دي تلكيكة عشان متروحش الشغل، لو كده متشلش هم انا هشيله لوحدي، وحشتني قوي يا بابا، كنت متمني ارجع الاقيك اتحسنت وترجع تقعد معانا وتتكلم وتقولي ابن امك زي عادتك
- انت هنا ومفكرتش تعدي عليا.. "
قالتها ماما اثناء دخولها علينا ف التفت ليها وقولت
- كنت هجيلك بس قولت اطمن علي بابا.. "
- طيب عملت ايه.. "
- ما انا قولتلك الراجل هيجي بكره.. "
- متاكد.. "
- اه ادتله العنوان وفلوس وهيجي..؟ "
- حلو وانا بقا هعمل عزومة اجمع فيها الكل هنا علشان الكل يشوف ويسمع.. "
- ماشي وانا هتحجج بأي حجة علشان محضرش.. "
- لا هتحضر بس لما يجي تطلع فوق مش عاوزاهم يشكوا في حاجه.. "
- ماشي اللي تشوفيه
- تمام، انا هروح اكلم جدك وجدتك وعمك واظبط كل حاجه.. "
- تمام.. "
طلعت وانا طلعت وراها ورجعت ادور على فيروز في المكان وبردو ملقتهاش ف رجعت اوضتي لقيت يسرا مرتبة السرير ومغيرة هدومها قربت منها وقولت وانا بقلع الجاكت
- عملتي امتي كل ده.. "
قالت وابتسامة خفيفة علي وشها
- مش محتاجه وقت
حطت ايديها علي صدري وقالت
- هتصدقني لو قولتلك حاجه
- علي حسب
- اممم
- قولي
- كنت واحشني ومحتجالك قوي
رفعت حاجبي بعدم اقتناع ف نزلت ايديها وقالت
- كنت عارفة انك مش هتصدق
- ولو مصدقتش ده مش هياثر علي اللي هنعمله في حاجة
« بعد وقت»
تسطحت جنبها علي السرير ف استندت علي كوعها وقالت وهي بصالي بابتسامة
- من زمان محستش انك حابب قربك مني كده
- ولو مش حابب ده مش بياثر علي حاجه، احنا مش بتفرق معانا مشاعر
تلاشت ابتسامتها وقالت
- ايوه، انتوا كده الدنيا ماشيه معاكم حتي لو كانت جربانه مش شرط المشاعر
- ده الواقع
- اممم، افهم من كده ان حصل مع واحده غيري
- واحده غيرك زي مين يعني
- مش بتكلم عن فيروز، اقصد بره، ممكن تعملها يا صدام
اعتدلت من نومتي وقولت
- اقولك حاجه مقولتهالكش قبل كده
- قول
- انتي حلوه حلاوة متخلنيش ارغب في واحده بره رغبة جنسية
- يعني ايه
- يعني لا.. "
سيبتها ودخلت الحمام وانا مش فاهم تركيبت دماغي اللي خلتني اكون حلو معاها لمجرد ان حسيت ان عندها فراغ عاطفي وبعد ما خلصت استحمام خرجت لقيتها لسة مكانها بتلعب في شعرها ف قولت
- مالك
قالت بابتسامة
- نفسي في حاجه
-تاني، لا انا مش فاضي دلوقتي
- لا مش اللي فهمته، انا نفسي في فرولة
- ايووه، بتتوحمي
- بالظبط
- ماشي نجيب فرولة وكل اللي تعوزيه المهم ميطلعش للبيبي فرولة في وشه
- فرحان بانك هتكون اب
- وهو المفروض اني مفرحش
- لا بس مكنتش متخيلة انك هتفرح بعد ما...
- مكنتش عايز بس لما حصل امبسطت ان هيكونلي ابن
- اها
- طيب قوليلي هو بحيري لسة مجاش
تلاشت ابتسامتها وقالت اثناء اعتدالها
- مجاش
- لية ده قالي انه هيجي
مسكت التليفون واتصلت بيه ف جاني رده بعد ثواني وقال
- زعيم
- فين كل ده مش قولت هتيجي
- جيت وانا دلوقتي في الشقة
- طيب مستني ايه
- بكرة هكون عندك
- تمام بكره تكون هنا
- حاضر
قفلت معاه ف قالت
- هو ايه لزمته معاك ما تسيبه
- وانتي مالك، متبقيش تدخلي تاني
- انا بقول انه بياخد فلوس علي الفاضي
- ما ياخد هو انتي اللي بتديله، يسرا متندمنيش اني تعاملت معاك عدل..
- انت حر
- ايووووه انا حر.. "
#رقية
اثناء صلاتي سمعت صوت ست بتتكلم مع حمزة وبيضحكوا بصوت عالي وبشكل خلاني اخلص صلاتي قوام وقومت من غير ما اردد اذكاري رفعت الاسدال عن الارض وطلعت لقيت البنت اللي جاتلنا في الفرح حضناه وهي لابسه فستان قصير وريحة البرفان هتفطسني من شدتها ومكياج مالي وشها زي البلياتشوا قربت منهم وانا مميل دماغي عشان اشوف الوسع المعدوم اللي بينه وبينها وبعد ما خلصوا احضان بصلي وقال بابتسامة استفزازية وهو محاوط وسطها بايده
- رقية، اعرفك ب جيداء، ماي اكس بس رجعنا وبقت ماااي لاڤ، باركيلنا.. "
قالت وهي بتلتصق بيه اكتر
- اي ميسو اوي يا بيبي، انا كنت بموت وانت مش معايا، متبعدش تاني بليز
- وانا كمان كنت بتعذب وانتي مش جنبي، انتي اللي متبعديش تاني، من وقت ما سيبتك
بصلي باشمئزاز وتابع
- وانا عايش في جحيم
- ياحبيبي، سوري بجد اني محاولتش كفاية اني ارجعك ليا وسيبتك لـ..
بصتلي من فوقي لتحتي وقالت
- ايه المنظر ده عايش معاها ازاي يا بيبي
قال
- عيشة قطران والله يا روحي بس نقول ايه النصيب غلاب ربنا يسامحها مامي اصرت تجوزهاني، تعالي نرتاح شويه في اوضتنا علشان اقولك كلمة في..
همس في ودنها بحاجه ف ضحكت بصوت عالي وقالت
- لسة دمك عسل
بصلي بطرف عين وقال
- وانتي لسة شوفتي دم عسل تعالي هوريكي العسل كله جوه
خدها وراح للاوضه و وقف عند الباب يبصلي شويه وبعدين رزع الباب في وشي فزعت من شدت الخبطة وبعد ما استجمعت نفسي جريت علي هناك وحطيت ودني علي الباب اسمع بيعملوا اية وفجأة اتفتح رجلي اتكعبلت وقعت بين ايديه زقيته عني بسرعه وقولت بعصبية
- ايه اللي بيحصل ده
- ايه اللي انتي بتعمليه ده بتجسسي علينا، شوفتي يا جودي انا عايشة في ضنك ازاي.. "
سندت بايدها علي كتفه وقالت
- ياي يا بيبي انت ازاي عايش معاها، ايه الاخلاق المش كويسة دي
قولت وانا بمسكها من شعرها
- انا اللي اخلاقي مش كويسة يا بنت المش كويسة
صرخت وقالت
- هلب مي يابيبي حوشها عني
حال بيني وبينها وقال وهو بيفك ايدي عن شعرها
- سيبيها شعرها هيطلع في ايدك
قولت وانا بضربه برجلي
- ما انا عاوزاهم يطلعوا في ايدي، وديني ما هعتقها غير لما اوريها مين اخلاقه مش كويس، اوعا انت.. "
قال وسط صرخاتها واستنجادها بيه
- بقولك سيبيها
سيبتها ومسكت دراعه غرزت سناني فيه صرخ من شدت الوجع ف شدتني عنه وقالت
- يا مفوجعة سيبي حبيبي
سيبته وزقيتها عني وبعدين استعدت هدوئي وقولت
- ماشي اينجوي، اسيبكم تاخدوا راحتكم واروح اكمل صلاة
قال وهو بيدلك دراعه
- نعم يختي، اينجوي يعني ايه
- يعني استمتعوا وسهرة سعيدة
جيت اقفل الباب ف وقفني وقال
- استني عندك يعني اية اينجوي، ناوية علي اية
- ولا اي حاجة هسيبك تستمتع مع يور لاف وانا مش هزعجكم علشان تعرف بس انت والبرص واحد، لربما تفتكر انك تهمني.. اينجوي يا قطة، عيشوا مش هزعجكم خالص خالص
قفلت الباب ورجعت اوضتي مسكت التليفون وطلبت رقم وبعدين حطيت التليفون علي ودني ولما رد قولت
- الو، بوليس الاداب ، لو سمحت انا عاوزه ابلغ عن جوزي رجعت الشقة، شقة الزوجية يعني لقيت معاه واحده، اه عشيقته يافندم تعالوا بسرعة
#حمزة
-انتي بتعملي ايه اهمدي، دي بتقولك اينجوي عارفه يعني ايه اينجوي
- يعني استمتعوا واحنا هنستمتع اهو يا بيبي
- جيداء بلاش غباء اهلك ده نستمتع ازاي مش شايفة منظري ده انا حضنتك علشان اتسند عليكي لا اقع علي وشي
- ملكش دعوه انت انا هتصرف
- تتصرفي ايه وهي دي فيها تصرف اخرسي خالص انا قايلك صحاب مستغليش الوضع وتستفرضي بيا،
تابعت وانا بستنط صوت رقية
- هي سكتت لية
بصتلها وقولت
- انا مش مرتاح، احتمال كبير تكون بترش جاز في البيت وهتولع فينا وتمشي، تعملها انا عارفها