رواية اول مره احب الفصل السابع7والثامن8 بقلم شيماء صبحي
كان باصص عليا وهو مصدوم فقررت اقوم لاني فعلا متضايقه،وخرجت من المطعم دا وانا بحاول اخد نفسي علشان متعبش دماغي بسبب البنت دي، فقررت اتمشي في المزرعة وفعلا اتمشيت لحدما وصلت عند عنبر الخيل اللي ماجد وصفهولي فقربت من مُهرة لسا مولوده ولمستها وبرغم خوفي منها الا اني حسيت احساس حلو وفضلت واقفه المسها بحنيه وانا سرحانه وبفكر لحدما فوقت علي صوت جاي ورايا فبصيت اشوف مين ولقيته مرجان استغربت وسألته بفضول:بتعمل ايه هنا يا مرجان ؟
بصلي وهو مبتسم وقال:مش عارف ليه يا استاذه من اول ما شوفتك وانا نفسي اتعرف عليكي اكتر وانا اسف لتدخلي بس انا لما شوفتك سيبتي الاكل ومشيتي جيت اطمن عليكي!
ضميت حاجبي وقولت:انت كنت مركز معايا ولا ايه يا مرجان؟
مرجان بخجل:لا ابدا انا بس شوفتك وانتي خارجه من المطعم فلما بصيت علي طرابيزه ماجد بيه لقيت نتاشا قاعده وبتاكل بضيق وانتي الطبق بتاعك لسا مليان!
حركت راسي بتفهم وقلت:شكرا علي اهتمامك دا يا مرجان بس هو انا ممكن أسألك سؤال؟
مرحان باهتمام:طبعا اتفضلي انا تحت أمرك'
إبتسمت وحركت راسي وقولت:هي نتاشا دي ايه علاقتها بماجد بيه غير انها السكرتيره بتاعته.
مرجان بصلي وقال:علاقتها بيه ازاي يعني مش فاهم!
ضميت حاجبي وقولت:اقصد يعني في اي علاقه بينهم غير الشغل يعني هل هما مثلا مرتبطين..
-قصدك علاقه حب يعني يا استاذه!! قاطع مرجان كلامي لما قال كده فانا اتوترت جدا اول ما قال كده فحركت راسي بالموافقه وهو ضحك وقالي:بصراحه انا مش عارف من الصح يعني اني اقولك علي حاجه زي دي ولا لأ بس مادام حضرتك صديقة ماجد بيه فهقولك عادي بس متقوليش لحد لان الموضوع دا مش مشهور يعني هنا في المزرعه!
كلام مرجان كان غريب حسسني ان في سر كبير هيقولهولي فانا حركت راسي ليه باهتمام وقولت:متقلقش يا مرجان مستحيل اقول لحد بس انت قولي أيه الموضوع '
مرجان حرك راسه وقرب مني وقال:اصل الانسه نتاشا عينيها من ماجد بيه من زمان ودا من اول ما اشتغلت معاه من اربع سنين فلما اعترفت للبيه رفضها بس هيا مستسلمتش ولسا بتحبه لحد دلوقت وعلشان كده حضرتك هتلاقي انها البنت الوحيده في المزرعه دا غير انها مش بتخلي اي حد يقرب من البيه نهائي!
كلام مرجان صدمني فقولت:قصدك ايه بأنها بتمنع اي حد يقرب من ماجد؟
مرجان :يا استاذه دي مش سهله يعني عندك اول هام انها مسيطرة علي عمال المزرعه جدا وكأن المزرعه بتاعتها وكمان بتعين اي حد بمزاجها ولما كان ماجد بيه بيعين دكاتره بنات كانت بتمشيهم بعدها بكام يوم؟
رفعت حاجبي بضيق وقلت باعتراض:ولي بتمشيهم يعني هيا فكراها مزرعه اهلها!
ضحك مرجان وقالي:هيا عينيها من البيه يعني عاوزه تتجوزة فعلشان كده بتخاف ان اي بنت تقرب منه فبتمشيهم وكل دا علشان تقدر تتحكم فى كل حاجه براحتها،بس ارجع واقول لحضرتك ان ماجد بيه اصلا مش مهتم لكل اللي بتعمله نتاشا وزي متقولي كده..سايبها براحتها علشان اوقات بيكون اختيارها للموظفين كويس ودا غير انها ماسكه كل شغله هنا فهوا سايبها علشان شاطراتها ولاكن ماجد بيه تقريبا عمره ما حبها او حب بنت علي حد علمي ؟
استغربت جرأة مرجان الكبيرة في انه يحكيلي حاجه كبيره زي دي ويدخل في التفاصيل دي كلها فقربت منه وقولت:وانت عرفت كل المعلومات دي ازاي يا مرجان انت كنت بتتصنت عليهم ولا ايه؟
مرجان اتوتر ووشه احمر جدا وقالي:لا يا استاذه انا مش بتاع الحركات دي بس كل الحكايه اني..
حركت راسي باهتمام:انك ايه يا مرجان!
مرجان بصلي والخجل الشديد باين علي وشه وقبل ما ينطق ويقولي السبب اللي خلاه يعرف كل المعلومات دي ماجد كان قرب مننا ولما شافه اتعصب جدا وقال بكل ضيق :انت بتعمل ايه هنا يا مرجان!
مرجان اتوتر وبصلي وبرق وكأنه بيطلب مني انقذه فرديت انا وقلت وانا ببص علي ماجد:مرجان كان بيساعدني اخرج من هنا علشان الباب كان قفل عليا بالغلط؟
ماجد بصلي بشك من كلامي وبص علي مرجان بعصبيه وقاله:وفتحتلها الباب يا مرجان ولا لسا؟
مرجان اتكلم بتوتر شديد وقال :لا فتحته يا ماجد بيه ..بصلي مرجان وقالي:اتفضلي يا استاذه اخرجي!
حركت راسي علشان مسببش لمرجان مشكله وخرجت وقربت من ماجد اللي متعصب وهوا لما لاقاني قربت منه قالي بضيق:تعالي معايا علشان هنرجع البيت عندي تغيري هدومك علشان هرجعك لبيتك النهارده!
حركت راسي ومردتش اعترض ومشيت وهوا ورايا ومرجان جري بسرعه وراح لشغله !
وفضلت انا ماشيه جمب ماجد وانا ساكته ولما رفعت عيني ابصله لاقيت ملامحه لسا حادة وصعب جدا اني أبدأ معاه اي حوار تاني '
كنت عاوزه اساله لو انا عملت حاجه ضايقته بس رجعت في كلامي وقررت التزم الصمت لحدما نوصل .
وبعد مشوار طويل قضيناه مشي خرجنا من المزرعه اخيرا وركبنا عربية ماجد الفخمه والسواق اتحرك بينا للقصر!
______________________
في بيت رحمه !
والدة اروي قالت بضيق:عدي يوم والزفت جوزك ملقاش البنت انا هتجنن ازاي يعني هتكون راحت فين؟
رحمه بقلق:اهدي يا خالتي وان شاء الله عصام وعدني انه مش هيرجع غير وهيا معاه!
والدة اروي بعصبيه زياده :دا اللي لازم يحصل يا رحمه علشان لو مرجعليش بنتي انا هرن علي ابوها وهعرفه كل حاجه وقتها مش هتشوفيه تاني يا حبيبتي..لان جوز خالتك هيخلصك منه ومن مشاكله كلها !
رحمه اتخيلت في لحظة ان كلام خالتها اتحقق فعيونها دمعت وقالت بزعل:حرام عليكي يا خالتي انتي بتقولي ايه دا جوزي؟
والدة اروي بضيق:ودي بنتي وبنت خالتك يا ست رحمه ولا انتي مش واخده بالك انها اختفت بسببك انتي والمحروس جوزك اللي محدش يعرفله لا أصل ولا فصل!
رحمه اتعصبت:ما خلاص بق يا خالتي انتي هتعايريني بيه ..ما تقولي حاجه يا ماما!
والدة رحمه بصت لأختها بتوتر وقالت:خلاص بق يا حبيبتي اهدي وان شاء الله اروي هترجع وهيا بخير!
والدة اروي حركت راسها:اما اشوف يا اختي اما اشوف جوز بنتك هيعمل ايه ولا هيتصرف ازاي بس خلي في علمك هوا معاه كمان يوم لو ملقاش بنتي انا هرن بق علي ابوها وهو هيتصرف معاكوا انتو الثلاثة؟
والدة رحمه خبطت علي كتف اختها علشان تهديها وقالت:معلش يا اختي وان شاء الله اروي هتكون بخير وعصام هيقدر يوصلها بس انتي خليكي متفائلة وبلاش يا اختي تضغطي علي البت بكلامك دا دي مهما كانت لسا عيلة ومتعرفش حاجه وبتحب جوزها!
والدة اروي اتعصبت من كلام اختها وبنتها فقامت من جمبهم وقالت:اما اشوف اخرتها ايه بس خليكوا عارفين ان لو بنتي مرجعتش لحضني كمان يوم هتصرف تصرف ما يعجبكوش ..
قالت والدة اروي كلامها ودخلت غرفه الاطفال وقفلت الباب عليها وفضلت رحمه وامها قاعدين يبصوا لبعض والتوتر باين علي وشهم!
رحمه بخوف علي جوزها:استر يا رب وعدي الموضوع دا علي خير احنا مش قد خالتي ولا قد جوزها ..
والدتها خبطت علي كتفها:اهدي يا حبيبتي وان شاء الله كل حاجه هتتحل!
رحمه بخوف:يارب يا ماما ،انا خايفه علي عصام اوي ،انا عارفه انه متهور وبتاع مشاكل بس والله قلبه طيب وعلي نياته!
والدتها حركت راسها وقالت:علشان كده
ربنا هيبقي معاه وكل حاجه هتتحل ان شاء الله !
رحمه حركت راسها وقامت علشان تتصل علي عصام وتشوفه وصل لحد فين وكانت حاسه بقلبها هيخرج من مكانه !
عصام كان خرج من القريه بعدما لف فيها هو ومرزوق وسألو كل الناس علي اروي..
فبص مرزوق لعصام وقال:بقولك ايه انا تعبت من اللف خلينا نروح ناكل لقمة علي السريع كده ونبق نكمل؟
عصام بصله واعترض علي كلامه وقال:لا لقمة ايه انا لو ملقتش اروي النهارده ليلتي هتبقي سوداء!
مرزوق مسكه من ايديه وقال بصوت واضح:ياجدع فيها اي يعني لما نرتاح نص ساعه هو احنا مش بشر والا ايه تعالي تعالي.
عصام حرك راسه اما اتأكد انه فعلا جعان لانه ماكلش حاجه من امبارح، فمشي ورا مرزوق لحدما وصلوا عند مطعم صغير ومرزوق بص لعصام وقال:اتفضل اطلب لينا اكل!
عصام باستغراب:ما تطلب انت يا مرزوق انا معرفش المطعم دا بيعمل اكل ايه!
مرزوق حرك راسه بالموافقه:خلاص ايدك علي ٢٠٠ جنيه اجيب بيها اكل ليا انا وانت؟
عصام باعتراض وبنبرة سخيره كبيره:ليه٢٠٠ جنيه انا معيش غيرها اصلا هروح بيها امسك كده ادي ٥٠ جنيه اشتريلنا ساندوتشين وخلينا ننخلص.
مرزوق بصله وهو مصدوم فحرك راسه بالرفض:٥٠ جنيه ايه اللي عايز بيها سندوتشات انت فاكرني عيل صغير معاك هات بقولك اجيب اكل يا دوبك يسد جوعي!
عصام خاف منه فحرك راسه بالموافقه وخرج الفلوس من جيبه وقربها من مرزوق اللي اخدها بقوه ودخل المطعم!
رحمه اتصلت علي عصام فاول مشاف اسمها اخد نفسه ورد عليها؟
:خير يا رحمه عاوزه ايه دلوقت؟
رحمت اتكلمت بقلق وخوف عليه:طمني عليك يا عصام عملت ايه لقيت اروي ولا لسه!
عصام وهو بيبص حواليه وبيقول بعصبيه:انا تايه يا رحمه وكعوب رجليا ورمت من اللف عليها ،اديني يا ستي بدور عليها وقالب الدنيا يارب بس الاقيها مش عارف ليه حشرت نفسها في مشاكلي وبهدلتني معاها اكتر منا متبهدل ؟
اتكلمت رحمت بحزن:دي انقذت حياتك يا عصام متقولش كده!
عصام بضيق.انقذت حياتي بس ورطتني فيها هيا كمان واديني عامل زي المجنون وانا ماشي بدور عليها في كل الشوارع..كمل كلامه بتساؤل:قوليلي خالتك اتصلت بجوزها ولا عملت ايه ؟
رحمه باخذ نفس:لا لسا ،بس بتقولك لو ملقتش اروي في خلال يوم هتبلغ جوز خالتي وبتقول انه ممكن..
عصام منعها تقول كلمتها وقال بصراخ:بس بس يا رحمة متقوليش حاجه انا مش ناقص حرقة دم؟
رحمه حركت راسها وقالت بتساؤل:طيب قولي انت فين دلوقت واكلت ولا لسا؟
عصام وهو بيبص علي مرزوق اللي خارج من المطعم وهو شايل صينيه مليانه باكل كتير!
هاكل اهو يا رحمه متقلقيش اهم حاجه حاولي تطمني خالتك دي باني مش هرجع غير وهيا معايا وخليها تبطل تجيب سيرة جوزها دا علشان انا مش ناقص توتر؟
رحمة مسحت دموعها اللي نزلت وحركت راسها بنبرة حزن:حاضر يا عاصم اهم حاجه انت خلي بالك علي نفسك'
عصام رد عليها بالموافقه:ماشي يا رحمه يلا سلام دلوقت؟
رحمه قفلت المكالمه ودخلت اوضتها بسرعه وقفلت علي نفسها الباب وفضلت تبكي بكل حزن ..ياني عليا وعلي سنيني انا مش مكتوبلي افرح ابدا ،حتي ليلة فرحي اتقلبت بغم ونكد يارب بق خليك مع عصام والنبي دا غلبان وعلي نياته وخلصني بق من اللي انا فيه دا وخليني ارتاح!
قالت رحمه كلامها ببكاء وانهيار وفي الوقت دا والدتها خبطت علي الباب وقالت:
افتحي يا رحمه يابنتي متعمليش في نفسك كده!
رحمه بصوت باكي من ورا الباب:هعمل ايه ياعني ياماما ما كل حاجه اتقلبت فوق دماغي؟
والدتها :اهدي يا حبيبتي وكل حاجه هتتحل'
رحمه بزعل: متأكدة انها هتتحل!اما اشوف يا ماما يلا خليني ارتاح شويه لان ضغطي علي عليا؟
والدتها حركت راسها بالموافقه وقالت:ماشي يا بنتي ارتاحي وانا هروح لخالتك واتكلم معاها واهديها!
رحمه سكتت ووالدتها اتحركت لغرفه الاطفال وخبطت علي الباب ودخلت ،لقت اختها قاعده وحاطة ايديها علي خدها وباين علي وشها الحزن الشديد؟
اهدي يا هدى يا اختي متعمليش في نفسك كده والله صدقيني اروي هتبق بخير!
اختها ببكاء:خايفه يا صفاء علي البنت انا محلتيش غيرها وانتي عارفه انها هشه ومش بتاع شارع ولا بهدلة خالص .
صفاء اختها طبطبت عليها:معلش يا حبيبتي والله هتبقي بخير اروي بنت حلال وربنا هينجدها ويحفظها متقلقيش؟
هدى اختها بزعل:قوليلي يا صفاء هو عصام اختفي ليه يوم الفرح ورجع متأخر وهو متوتر كده معقول يكون هو السبب فعلا في اختفاء بنتي ؟
اتوترت صفاء وبان علي وشها الخوف وقالت:معرفش يا هدى انتي عارفه ان رحمه قالتلنا ان بنطلونه اتقطع وكان بيخيطة وبعدين عصام هيضر اروي ليه دا كان بيعتبرها زي اخته؟
هدى بعصبيه:امال اختفت ازاي دي كانت قدام عيني انا وانتي ولما مشيت علشان تدور لبنت خالتها علي عريسها البنت اختفت كأنها فص ملح وداب ياختي.
قالت هدي كلامها وكملت بشك:انتي عارفه يا صفاء لو فعلا شكي طلع صح وعصام كان له يد في اختفاء بنتي انا هعمل فيه ايه؟
صفاء قربت اكتر من اختها واتكلمت بلوم:مش كفايه الضغط اللي انتي حاطه العيال فيه اهدي يا هدى وعصام مش هيرجع غير واروي معاه بس انتي هدي اعصابك وبلاش تضغطي علي حد فينا؟
هدى حركت راسها وبصتلها وقالت:ماشي يا صفاء اديني ههدي بس بنتي ترجع لحضني
رجعنا للقصر وانا كان بالي مشغول جدا بماجد ،مش عارفه ايه اللي حصلي من وقت ما شوفته حسيت فعلا انه مختلف ،من اول نظراته وطريقته غير اي راجل قابلته قبل كده ..لو وصفته مثلا ..فهوا طويل وجسم رياضي بس مش ضخم اوي لون عيونه بني وشعره ناعم جدا وهو مسرحه لورا ،لبسه حلو اوي وكأن الهدوم دي مصممة علشانه هو بس ،ريحته جميله اوي انا اول مرة في حياتي اشوف بني ادم مميز زي ماجد كده!
-هننزل القصر علشان تاخدي هدومك وتجهزي نفسك علشان هوصلك لبيتك؟
فوقت علي كلام ماجد لما قالي كده فبصيتله وحركت راسي بالموافقه وكنت لسا هرد عليه لقيته لف وشه وكأنه بيتجاهل انه يبص في عيني.
العربيه وقفت والحراس فتحوله الباب وهو نزل وفي خلال ثواني فتحولي انا كمان الباب ،فنزلت وانا ببص علي القصر من برا ووقتها كنت واقفه مزهوله!
ماجد دخل للقصر وانا فضلت واقفه ابص علي تفاصيل المكان بتوهان .. كنت رافعه عيني لفوق وفاتحه بوقي وانا مزهوله..
عدي وقت وانا علي نفس الحاله سرحانه لحدما فوقت علي صوت رئيسه وهيا بتنبهني ان ماجد بيه عاوزني جوه .
حركت راسي وانا بمشي قدامها وهيا ورايا لحدما دخلنا احنا الاتنين للقصر ووقتها لقيته قاعد علي كرسي كبير في نص القصر وحواليه كل الخدم اللي في القصر ..رفعت عينيه ابصله لقيته كان مركز جدا معايا ..قربت منه وانا متوتره من نظراته ليا ولحدما وقفت قدامه قولت بتساؤل:نعم!!رئيسة قالتلي انك عاوزني؟
سمع كلامي وفضل يبصلي لكام ثانيه وبعدها رد عليا وقال:موافقه ترجعي بيت ابوكي يا اروي؟
"ايه السؤال الغريب دا أكيد طبعا موافقه دا البيت اللي بحس فيه بالدفاء والأمان والحمايه ازاي يعني مش هرجع " فكرت في كل الكلام دا لما ماجد سألني السؤال دا فأول ما جيت ارد عليه بالموافقه افتكرت الكلام اللي حصل ما بين بابا وجعفر المساعد بتاعه ودراعة اليمين لما كانوا في المزرعه ففضلت ابصله بصدمه وانا مش بنطق!
ماجد أستغرب نظراتها وعدم ردها وفكر ان حصلها حاجه فقبل ما يتحرك من مكانه علشان يطمن عليها ردت اروي علي سؤاله بالموافقه وقالت:موافقه بس أنا عاوزه اروح قرية..قالت اسم القريه اللي عصام اتجوز فيها وهو اول ما سمع اسم القريه حرك راسه بالموافقه وقال:تمام لو جاهزه نتحرك دلوقت يلا بينا!
حركت راسي بالموافقه وهو بص للخدم وقال:رتبوا القصر وغيروا نظامه لان شكله مش عاجبني وانا هرجع في خلال يومين !
كل اللي في القصر حركوا راسهم بالموافقه وهو بصلي شويه كده بتركيز وبعدها قرب مني وقال:اتحركي يلا اروي هنمشي!
هزيت راسي بالموافقه وسألته قبل ما اتحرك:وفستاني اللي انا سيباه فوق؟
ماجد بص علي رئيسه وقال:غسلتي فستان اروي هانم اللي سابته في الاوضه وجففتيه؟
رئيسة حركت راسها وقالت:ايوا يا ماجد بيه غسلته ولاكنه لسا مبلول ؟
استغربت جدا وقولتها:مش مهم اعصريه وهاتيه'
ردت رئيسه باعتراض:انا اسفه يا هانم بس انا كنت نقعاه مع هدوم كتير ومش هعرف اطلعه دلوقت!
حركت راسي وقلت بلامبالاة:خلاص مش مهم اما يبق ينشف خالص ابق ابعتهولي علي نفس العنوان اللي هتوصلني ليه يا ماجد،بس اوعي تنسي يا ماجد اصل دا فستاني المفضل وبحبه جدا!!
قولت كلامي بعشوائية كبيره وانا ببص علي ماجد اللي بيسمع كلامي وساكت .
ماجد اتكلم وهو بيبص لرئيسه:اول ما فستان الانسه ينشف عرفيني'
رئيسة ردت عليه بكل احترام:حاضر يا بيه '
ماجد حرك راسه ليها بالموافقه وبصلي وقالي:يلا يا اروي خلينا نمشي!
حركت راسي بالموافقه ومشيت وهوا ورايا وخرجنا انا وهو من القصر وركبنا عربيته واتحركنا فعلا في طريق القريه اللي في اسيوط لأن ماجد كتب اسمها علي ال جي بي اس واول ما ظهرت اتحركنا علي نفس الطريق !
_________________
في اسكندرية وبالتحديد في منزل اروي!
وصل المعلم رزق بالسلامه واول ما دخل للبيت لقي ان مراته وبنته لسا موصلوش والمفروض ان مراته بلغته انهم هيقعدوا يومين بس لحدما يصبحوا علي رحمة وهيرجعوا الاسكندرية تاني ..فاستغرب جدا انهم اتاخروا فقرر يتصل علي مراته ويعرف ايه المشكله!!
في القريه واول ماشافت هدى اتصال جوزها عليها بصت لاختها اللي قاعده بتشرب العصير بضيق وردت عليه بجديه: ايوا يا رزق؟
اتنفض جسم صفاء اختها بخضه وبصتلها بخوف علي جوز بنتها وقالت بهمس:اوعي يا هدى تقوليله حاجه صدقيني عصام هيتصرف!
تجاهلت هدى كلام اختها لما حست ان عصام مش هيعرف يتصرف ويرجعلها بنتها فاتكلمت وقالت بزعل كبير وغضب من اللي حصل :بنتك اختفت يا رزق وبقالها يومين مش باينه وعصام جوز رحمه راح يدور عليها ولاكنه مرجعش هوا كمان..اتصرف يا اخويا وهاتلي بنتي؟
الفصل الثامن
تجاهلت هدى كلام اختها لما حست ان عصام مش هيعرف يتصرف ويرجعلها بنتها فاتكلمت وقالت بزعل كبير وغضب من اللي حصل :بنتك اختفت يا رزق وبقالها يومين مش باينه وعصام جوز رحمه راح يدور عليها ولاكنه مرجعش هوا كمان..اتصرف يا اخويا وهاتلي بنتي؟
اتنفض رزق من مكانه أول ماسمع كلام مراته وصرخ بغضب فيها:انتي اتجننتي يا هدى،يعني ايه بنتك اختفت وبقالها يومين يعني ايه الكلام دا وازي مخبيين عليا كل دا؟
اتكلمت هدى بتوتر شديد:متأخذنيش يا أخويا بس كان غصب عني المهم دلوقت انا عاوزه بنتي اتصرف يا رزق؟
رزق حرك راسه والخوف والغضب ماليين قلبه :ماشي يا هدى هتصرف بس اهم حاجه خليكي مكانك وانا هجيب جعفر وجاي عندكوا !
هدى حركت راسها بالموافقه وقفلت المكالمه ورزق خرج بسرعه من البيت وقرب من جعفر اللي بيتكلم مع الرجاله وبيزعق فيهم..
نده رزق علي جعفر بصوت عالي:جعفر تعالى هنا بسرعه؟
انتبه جعفر لصوت معلمة وقرب منه بسرعه:خير يا سيد المعلمين!
رزق بجديه:جهز نفسك حالا علشان رايحين أسيوط!
ضم جعفر حاجبه باستغراب وسأل معلمه بفضول:خير يا معلم هنسافر أسيوط ليه داحنا كنا في المنيا ولسا راجعين مكملناش ساعه!
المعلم رزق بص حواليه وقرب اكتر من جعفر وهمس في ودنه:وطي صوتك يا غبي وتعالي معايا وانا هقولك علي كل حاجه؟
جعفر حرك راسه بالموافقه ومشي مع رزق وبعدما بعدوا شويه عن بقيت الرجاله اتكلم رزق وقال:اروي بنتي اختفت من وقت الفرح بتاع بنت خالتها وهما هناك قالبين عليها الدنيا وانا وانت لازم نتحرك وندور عليها هناك لانهم مش لاقينها؟
اتصدم جعفر وحس بوجع في قلبه وبص لمعلمة وقال بصدمه:اختفت!! اختفت ازاي يا معلم واللي هناك دول ازاي مايخدوش بالهم منها؟
اتعصب رزق هو كمان وقال:اروي مش صغيره بس انا مش عارف ايه أصل الحكايه، المهم دلوقت انا وانت لازم نزوح هناك واشوف بنفسي ايه الحكايه علشان لو بنتي حصلها حاجه هخلي عيشتهم هباب المهم دلوقت انا مش بثق غير فيك وبعدين متنساش انها يعتبر خطيبتك ومن واجبك تساعدني!
جعفر بص علي رزق وقال بدهشه:جرا ايه يا معلمي حتي ولو مليش نصيب معاها دي بنتك برضوا يامعلمي وانا اوعدك اني هقلب عليها الدنيا!
خبط رزق علي كتف جعفر وابتسم:أصيل يا جعفر المهم انا هسبقك علي العربيه وانت حصلني بعدما تعرف الرجاله شغلهم كله !
جعفر هز رأسه بالموافقه والمعلم رزق اتحرك من قدامه واتجه جعفر لبقيت الرجاله وقال بصوت خشن ومليان جديه:انا رايح مشوار يا رجاله عارفين هتعملوا ايه!
بصوله الرجاله وحركوا رأسهم وهو قال علشان يأكد عليهم مهمتهم:في عجلين هيطلعوا لله والباقي يتد/بح ويتوزع علي التجار فاهمين!
حركوا الرجاله رأسهم وهو نفض ايديه وقال:موفقين يا رجاله اهم حاجه محدش يتدخل في اي فلوس الحكايه دي بتاعتي وانا اما ارجع هخلصها مع المعلم يلا مع السلامه’
الرجاله وافقت علي كلامه وهو مشي من قدامهم وغير هدوم الشغل وراح للمعلم رزق اللي كان مستنيه في عربيته وواضح قد ايه انه متضايق ومخنوق بسبب اللي حصل لبنته!!
قرب جعفر من رزق وركب في كرسي السواق وقال باستئذان :اتحرك يا معلمي!
المعلم رزق رد عليه وهو بيحط ايديه علي راسه وبيشاورله يتحرك:اتحرك يا جعفر؟
شغل جعفر المحرك بتاع العربيه وبص لمعلمه وقال:اربط الحزام يا معلم علشان الطريق طويل!
ربط رزق الحزام وجعفر ربط حزامه واخد نفس طويل واتحرك بالعربيه!
كنت قاعده ببص علي ماجد اللي سايق العربيه ومستغرباه جدا، ازاي هو سايق بنفسه برغم ان عنده رجاله كتير كان ممكن اي حد منهم يسوق مكانه، فكنت قاعده بتأمله وبفكر لحدما انتبهت علي صوته وهو بيقولي :هي دي القريه؟
كنا وصلنا عند اول القريه فقرأت اليفطة اللي مكتوبه عليها وحركت راسي بالموافقه وقولت بفرحه :ايوا هيا دي يا ماجد!
ماجد بصلي وحرك راسه بجديه وانا خجلت شويه لاني اتحمست بزياده فاتحرك بينا لجوه القريه ووقتها بدات اوصفله الطريق لأن أنا كنت جيت هنا اكتر من مره علشان اساعد رحمه في نقل العفش ورصه في الشقه فعارفه الطريق نوعا ما ..
كانت القرية دي ريفيه وبرغم اسلوب الناس فيها ولغة حياتهم اللي كان غريب عليا طبعا بس منكرش ان فيها الآراضي الزراعيه والاجواء فيها شكلها يجنن ويخطف القلب.
بعد وقت من وصفي لماجد الطريق وصلنا أخيرا قدام شقة رحمه وعصام..بصيت علي ماجد وقولت:خلاص هي دي شقة بنت خالتي واكيد ماما لسا فوق!
حرك راسه وقالي:اطلعي واول ما توصلي بصيلي من البلكونه علشان اطمن انك وصلتي بأمان!
استغربت كلامه لاني كنت بصراحه مستنياه ينزل معايا ويوصلني ويقول قدام أمي وخالتي وعصام ورحمه أنه أنقذني لأن ماجد مش شخص عادي أبدا وكان نفسي أفتخر بيه وأقول إني أعرفه قدام عيلتي..ولاكن هو أكيد عنده حريته في اختيارة وأنا مليش الحق إني أضغط عليه، فحركت راسي علي كلامه وكنت لسا هنزل من العربيه بس رجعت في كلامي علي أخر لحظة وبصيتله وقولت:بس أنا لسا مشوفتش كل القصر بتاعك زي ما طلبت منك وانت وعدتني!
ضم حاجبة ورد عليا بإستغراب:قصر ايه دلوقت اللي عايزه تشوفيه انزلي طمني اهلك عليكي الأول!
بلعت ريقي بخجل وبصيتله بزعل وقولت:يعني مش هشوفك تاني يا ماجد؟
بصلي ودقق في عيوني وأنا من جمال نظرته كان هيجرالي حاجه فاستنيت اسمع رده عليا بكل فضول وكنت متوقعه أنه هيبتسم ويحرك راسه ويقولي لا هنتقابل تاني ،ولاكنه حرك راسه بالرفض وقال:مش عارف بس اتمني انك تكوني بخير ومتضحيش بنفسك وتخاطري بالشكل دا مرة تانيه!
حركت راسي بزعل وقولت:حاضر،انا هنزل دلوقت،شكرا علي انقاذك ليا ورعايتي في الكام يوم دول،كان نفسي اقابلك تاني علشان اردلك ولو جزء بسيط من اللي انت عملته علشاني،بس أكيد القدر ليه رأي تاني ،مع السلامه يا ماجد العربي’
قولت كلامي وأنا مبتسمة ولاكن من جوايا كنت حزينه لأني مش هشوفه تاني..فبسرعه فتحت باب العربيه ونزلت وقفلت ورايا الباب ودخلت من بوابه العماره وانا بتجاهل اني ابص ورايا لاني اتعلقت بماجد جدا لأن ماجد أول راجل غير بابا أقرب منه وأحس اني مرتاحه بوجوده جمبي ومش خايفة لأني بصراحه اول مرة قلبي يدق واول مرة أقابل شخصية زي ماجد ممكن اكون أعجبت بيه لان دا الطبيعي وبرضوا لاني معرفش يعني ايه حب فلو انا حبيت ماجد هعتبر نفسي المرة دي أول مرة أحب..
كنت بجري علي السلم بسرعه وقلبي بيدق بقوة وأول ما وصلت قدام باب الشقه وخبطت علي الباب حسيت فجأة باحساس قوي من الخوف ازاي هقولهم أنا حصل معايا ايه، مش عارفه هل هكدب عليهم ولا هقول الحقيقه، هل هقدر احكيلهم عن ماجد والكام يوم اللي عيشتهم عنده في القصر ولا هقول حكايه تانيه..بس لبسي ،لبسي كان متغير وشكلي مش متبهدل حتي علشان اقول اي حاجه واكدب عليهم فكنت محتارة وقلبي وعقلي مشغولين بالتفكير..
الباب اتفتح وكانت خالتي واللي اول ماشافتني صرحت باسمي بلهفه:أروي!
حركت راسي وانا مبتسمه ووقتها خرجت ماما من الاوضه هيا ورحمة وهما مصدومين ،اول ما شوفت ماما عيوني دمعت وجريت عليها أحضنها بكل اشتياق ..
ماما صرخت بإسمي بلهفه وحضنتني جامد وفضلت تطبطب علي ضهري وهيا بتهتف بإسمي وعيونها مدمعة ،وفضلت انا احاول اهديها لانها بدأت تبكي وبسبب اني دمعتي قريبه بكيت علي بكاءها وفضلت خالتي واقفه بتحاول تهدينا انا وماما!
وبالنسبه لرحمة فأول ماشافت أروي جريت بسرعه علي أوضتها تتواصل مع عصام واللي اول ما سمع كلامها وعرف انها رجعت اتنطط بفرحه وبص علي مرزوق اللي ماشي جمبه وحضنه وقال:رجعت يا مرزوق رجعت!
مرزوق بصله بتساؤل وقال:هيا مين دي اللي رجعت؟
انتبه عصام لكلامه وافتكراتفاقه مع مرزوق فقال بتوتر:فلوسي اللي اتسرقت رجعت علشان كده انا فرحان؟
مرزوق بصلة بشك وقال بضيق: بس انت مقولتش ان فلوسك اتسرقت انت متأكد يا عصام انها فلوسك اللي رجعت !
حرك عصام رأسه بالموافقه ومرزوق مسك الموبايل من ايديه وسمع صوت رحمه وهيا بتقوله:ارجع بق يا عصام ،خلاص اروي رجعت لحضن خالتي وملوش داعي تفضل عندك!
اول ما مرزوق سمع كلام رحمة وعرف ان عصام بيكدب عليه قرب منه والغضب مالي قلبه وقال بضيق شديد:بتكدب عليا يا عصام بق بتحور عليا علشان تنسي اتفاقنا!
خاف عصام وغمض عينه وقال:انا أسف يا مرزوق بس خوفت والله لان اروي دي وراها ناس تقيله لا انا ولا انت قدهم!
مرزوق مسكه من هدومه وقال:لا يا حبيبي انا وانت في بينا اتفاق قدامي يلا علشان نروح ونطمن عليها مع بعض وانا مبخفش من حد علشان ارجع في كلامنا وانسي الاتفاق!
خاف عصام اكتر من اللي بيعمله دا واتخيل اللي هيحصل فيه بعدما يعرف اهل اروي انه اتفق علي جوازها من مرزوق علشان بس يساعده يدوروا عليها ، فبص عصام لمرزوق وقال:ممكن ترجع في كلامك يا مرزوق واللي انت عايزه انا هعملهولك!
مرزوق تجاهل كلامه وقال:حط نفسك مكاني يا عصام انا دلوقت عازب ونفسي اتجوز وفجأة جاتلي فرصه إني أتجوز جميلة الجميلات طبعا فرصة زي دي كان لازم أستغلها وفي المقابل ساعدتك بس ينفع بعدما رسمت احلامي عليها تيجي تحطمها بإيديك يرضيك؟
عصام بخوف من هيئتة:لا طبعا ما يرضنيش بس انا..!
مرزوق وهوا بيديه تيلفونه وبيقطع كلامه :يبق اتحرك قدامي بق بدل ما ازعلك وبطل الحركات بتاعتك دي!
حرك عصام راسه ومشي ووراه مرزوق لحدما خرجوا من القرية اللي كانوا فيها واتجهوا في طريق القريه اللي فيها شقة عصام!
في شقة عصام خرجت رحمة من غرفة نومها بعدما قفل عصام معاها من غير ما يبلغها هيرجع إمتي بس قررت تطلع وتطمن علي اروي وتعرف منها ايه اللي حصلها .
وفي وسط ما كانت رحمة بتقرب منهم علشان تسلم عليها بعدت اروي عن حضن امها وجريت بسرعه علشان تطمن ماجد عليها واول ما قربت من البلكونه وفتحتها وبتبص تحت ملقتش العربيه ضمت حاجبها بزعل وقالت:هو راح فين!
فضلت تبص علي عربيته في كل حته في الشارع لحد ما لقت انه فعلا مشي فرجعت تاني لاهلها وهيا زعلانه فسألتها رحمة بفضول:ايه اللي بيحصل يا اروي كنتي بتشوفي ايه في الشارع!
اروي وهيا بتبصلها وبتقول بزعل منها:بشم هوا حسيت بدوخة فجأة يا رحمة!
حركت رحمة راسها بالموافقه و سألتها تاني بفضول:طيب طمنيني عليكي عامله ايه وازاي اختفيتي يوم الفرح وكنتي فين بقالك ثلاث أيام!
خالة اروي ومامتها ورحمة بصوا عليها بانتباه علشان يسمعوا منها اللي حصل واروي للحظة غمضت عينيها بتفكر هـل هـ تقول الحقيقه او هـ تكدب عليهم واول ما فتحت عينيها وبصتلهم بدأت تحكيلهم عن كل اللي حصل معاها من البداية.
وقالت انها وهيا بتجري من العصابه وقعت في النيل وفي ناس أنقذوها وهيا بسبب الخبطة اللي اتخبطتها لما وقعت مافقتش غير النهارده وكتر خيرهم الناس ساعدوها وجابوها لحد هنا!
اتجننت والدة أروي من اللي حصل لبنتها وقربت من رحمة ومسكتها بقوه وصرخت في وشها: بق كل دا يحصل لبنتي من وراكي انتي وجوزك اللي محدش يعرفله لا اصل ولا فصل هو فين جوزك الواطي اتصلي عليه خليه يجيلي هنا علشان اطين عيشته