لمن جينا داخلين الفصل نور شغلتها في المسجل "بعد أخدت إذن من ناس المدرسة"، وبقت تنشد مع المسجل لينا أنا ويقين، و جايبة تورتة كمان ومُزينة المكان بي بالونات وكاتبة عبارات تهنيات
وكاتبة في التورتة "مُبارك لكما السبع الطوال" ♡
الحمد لله حمداً كثيراَ طيبـًا مباركاً فيه
اليوم خلصنا السبع الطوال
بعد مرور شهرين، كل يوم كنا بتأخد 3 أوجه بنجي من الساعة ٧ يعني قبل الجرس بي ساعة بنخلص من وجهين والتالت بنقسمو في ساعة الفطور أو في فسحة الصلاة، شهرين من السهر وتعب وقراية المدرسة لكن قدرنا نوفق بيناتهم الحمد لله ذلك من فضل الله " ما زاحم القرآن شيئاً إلا باركه"
نور:مُبارك و عقبال القرآن كلوو يارب
مشينا حضناها الاتنين ...
نور: هييي خنقتوني براحة😹♡
يقين: ياخ أنا بحبك، بارك الله فيكِ وشكر سعيكِ وجعل عملك خالصاً لوجهه
امل: حتى أنا بحبك، وهسه أنحنا حفظنا السبع الطوال دي بي فضل ربنا ثم فضلك، جزاك الله عنا كل خير وبارك فيك يا شيختنا♡
نور: تحبكم الجنة و خالقها وعباد خالقها يا حبيباتي وربنا يتقبل منكم ويجعلهم سبب لي دخولكم جنة الفردوس الاعلى
أنا ويقين:آمين جمعاَ♡
شغلنا الانشودة تاني وبقينا نغنيها كلنا مع بعض، ونعملها بي الحركات كمان 😹♡
في الشهرين ديل أنا اتغيرت جداً، حرفياً بقيت شخصية تانية خالص!
والفرق واضح شديد حتى أمي وأبوي لاحظوا لي، والسبب في التغيير ده نور ويقين، وخاصة نور ياخ أنا بحس بيها أمي عديل!
دائماَ بتنصحني وبتقيف جنبي
وكل ما يكون عندي مشكلة بجيها ودائماً بلاقى الحل عندها، وبتقول لي يا أمل عندك إي مشكلة أو فضفضة تعالي لي طوالي أنا اصلاً موجودة عشانك وكان ما لقيت ليكِ حل بعيط معاكِ، ولمن أكون زهجانة تقول لي تعالي لي بونسك لمن تفك الزهجة أصلاً أنا في الحي مسمني النينجا الفرفوشة😹
وطبعاً شلنا أرقام بعض؛ لانو يوم السبت كان التسميع بالمكالمة، وعملنا قروب في الواتس أسمو "الثلاثي المرح" ده لقبنا في المدرسة بقى، ودائماً بلقونا قاعدين مع بعض♡
إمتحنا وكلنا كنا في التسعينات اللهم بارك
يعني حتى المستوى الأكاديمي بتاعي إتغير!
وفي الأيام الفاتت كان عندي فكرة إنو إنتقب، ودائماً كنت بدخل القروب بقرأ بوستات عنو وبسال نور برضو عنو لمن حبيتو وحسيت المنتقبات ديل ملكات♡
قلت خلاص لازم أنا بكرة إنتقب أن شاء الله وأعملها مفاجأة لي نور ويقين
نهاية اليوم الدراسي ...
عمو جا أتحركنا على البيت ...
وصلنا... بعد أرتحت شوية مشيت لي أمي وأبوي كان ما مشى الشغل، قلت الحمد لله موجود
حكيت ليهم إنو الليلة ختمنا السبع الطوال باركوا لي
وبقينا نتونس وكل ما أكون عايزة أفتح ليهم الموضوع بسكت
أنا: أمي وأبوي
=نعم
"سكت ما قدرت أتكلم"
أبوي: يا بت مالك ؟!
أمي: أنا زاتي حاسة عندك حاجة عايزة تقوليها من قبيل أحكي
سكتت مسافة ...
_أنا عايزة إنتقب
أبوي: ماشاء الله ماشاء الله
أمي: اللهم بارك طوالي
أبوي:يعني ده الكلام العايزة تقولي من قبيل ومترددة ؟!
=أي
امي: مستحيل أنحنا نمنعك من قرار ذي ده، الستر سمح تتعلي ما تتدلي يارب
=أمين، ربنا يحفظكم لي
وريتهم إني عايزة أمشي السوق؛ عشان إشتري نقابات، أبوي أداني قروش
قلت ليهم ح أمشي مع دعاء "بت جيرانا منتقبة برضو"، ضربت ليها وريتها قالت ما عندها مشكلة ...
أستنيت العصر أذن صليت وبديت إتجهز، خلصت وطلعت عليها "بيتهم يفتح علينا طوالي"
هم بتين "دعاء وسلمى"
سلمى في تالتة الجامعة
ودعاء برلومة.
دقيت الجرس ...
فتحت لي سلمى سلمت عليها، وفضلتني بقينا نتونس
_ كيف عاملة مع الجامعة ؟!
= الحمد لله بس إرهاق
_ربنا يعينك
=أمين
دعاء جات نازلة ...
_المُختفية
=دعوية قلبي الشوق
_بلا دعوية معاكِ المشتاق بسال
= مع المدرسة بس ما عندي وقت أطلع فيهو زاتو مضغوطة جداً غايتو الحمد لله بس
_ فترة وتعدي والإجازة تجي نرجع لي مواضيعنا
=ده كلامك طوالي، أنا من هسه عندي خطط ليها
_كدي أجزوا أول الباقي هين
=أن شاء الله ربنا يسهل، أها إنتِ عاملة كيف مع الجامعة ولقيتيها كيف ؟!
_لا دي عايزة ليها قعدة عديل، الجامعة رهيبة عشرة مراااات والأحلى أنو بنات بس وأغلبهم منتقبات
_على سيرة المنتقبات، هسه أنحنا ماشين السوق؛ عشان نشتري النقاب و من بكرة ح أبقى منهم🙈
سلمي: ..........
*تمضي بنا الأيام نحوَ مصيرنا*
*يا فوز من يمضي بتقوى الله ♡♡!*
*#حوقلوا🌻💛..*