منبة القيام ضرب صليت ودعيت كتير إنو ربنا يثبتني، سمعت أذان الفجر صليت وقريت سورة البقرة ونمت ...
بعد ربع ساعة قمت إتجهزت ...
لبست عباية بالزيتي والنقاب والطرحة نص توب كلهم نفس اللون، وأسبورت أبيض وشنطة بيضاء وجونتيات بالأسود طبعاً، بعد خلصت نزلت تحت لي أمي وأبوي ...
أنا: أحم أحم شوفوا الجمال ده🙈
امي: عاد أمك منو ؟!
بقينا نضحك أنا وأبوي😹
امي: ماشاء الله تبارك الله ربنا يثبتك
ابوي: تعالي يا بتي أحصنك ما يسحروكِ الناس
مشيت ليهو حصني ♡
_يلا خلصت ربنا يحفظك
=أمين ويحفظك لي
طلعت لقيت عمو جا، بارك لي النقاب الله يديهو العافية
وصلنا ...
طوالي مشيت الحتة البنقعد فيها دائماً
لقيت الحتة فاضية شكلهم ناس نور ليه ما جوا
قلت المسافة دي أقرأ بقيت أقرأ في الفيزياء أنجزت كتير منها الحمد لله
بعد فترة نور جات سلمت لي وقعدت لكن غيرت صوتي؛ عشان ما تعرفني
ونفس الحاجة يقين جات سلمت وقعدت... وشكلهم حارسني أجي؛ عشان نبدأ الحفظ يا حليلهم ما عارفني قاعدة جنبهم
ومستغربين دي منو البت القاعدة هنا دي
قلت خلاص كفاية ينتظروا أكتر من كدا
رفعت النقاب وعاينت ليهم قلت ليهم أنتوا حارسني أنا ؟!
طبعاً إتخلعوا الاتنين😭😹♡
نور: باسم الله أمل!
يا بت متين وكيف إنتقبتِ ؟!
انا: الليلة إنتقبت وكيف دي شلت النقاب ختيتو في وشي يعني ح يكون كيف بس
نور: أننن ما ظريفة😹، أعذريني دي الصدمة يا بتي
فرحت ليكِ شديددد مُبارك لكِ التشبه بي أمهات المؤمنات ربنا يثبتك يا قلبي
فخورة بيكِ جداَ جداً يا ذات النقاب♡
=بارك الله فيكِ، امين جمعاً يارب♡
يقين :اللهم بارك مُبارك لكِ النقاب ربنا يثبتك
=الله يبارك فيك، وعقبالك كدا يارب
_أمين
بعدين بقينا نحفظ، نور بتقرأ لينا وبعدين نكرر كلنا مع بعض، أنتهينا من وجهين ونص الجرس ضرب ...
دخلت الفصل البنات باركوا لي ناس مزدلفة ولدن ورغد لو متزكرنهم الا سما "دي كانت غايبة وقت أتعرفت عليهم وما حصل أتونسنا أو قعدنا مع بعض"، عاينت لي من فوق لي تحت سبحان الله طوالي إتزكرت موقفي مع نور، وعرفت إنو ربنا ديان، وإنو الدنيا دوارة!
المهم ما أشتغلت بيها كتير وقررت أكتم غيظي
أنا أتعلمت من نور حاجات كتيرة جداً ربنا يحفظها لي ♡
حضرنا الحصص وساعة الفطور صلينا صلاة الضحى وتمينا التكرار، خلصنا كدا الجرس ضرب دخلنا أخدنا 3 حصص وتاني جات فسحة الصلاة ...
دخلنا أخر حصة، واليوم الدراسي خلص.
يوم الخميس ...
نور:يا بنات رايكم شنو يوم السبت تجوني البيت تسردوا الأجزاء الفاتت؛ لانو في المدرسة اليوم ما ح يكفي أسرد ليكم براي الاتنين، ف أختي ح تساعدني
قلنا ليها ما عندنا مشكلة ناخد إذن بس من ناس البيت وأتفقنا على كدا ...
عمو جا ودعتهم وأتحركنا على البيت ...
وصلت أكلت وأرتحت شوية، تاني بديت أقرأ حقات المدرسة دروس اليوم، لمن العصر كدا خلصت أصلاً مواد اليوم الحفظ ما كانت كتيرة أغلبها فهم، جبت المزكرة حليت لي مسائل وإمتحانات قديمة، الأساتذة قالوا ح يساعدونا كتير ونعرف طريقة الإمتحانات، المساء وريت ناس أمي أنو ماشين لي صحبتنا وافقوا لي، ضربت لي يقين قالت وافقوا ليها هي كمان أتفقنا نتلاقى ونمشي سوا، رسلت لي نور في الواتس وأكدت ليها أنو جايين ...
يوم الجمعة عديتو كلو مراجعة للأجزاء الفاتت ...
جا يوم السبت إتلاقينا أنا ويقين في المكان اللي أتفقنا عليهو بعدين إتحركنا على بيت ناس نور ...
طلعنا بعد الفطور؛ عشان اليوم يكفينا نسرد فيهو ...
ضربنا ليها قلنا ليها أنحنا واقفين جنب بقالة"...." قالت قريبة منهم جاتنا هي وإيمان" أختها"، سلمت علينا بي الأحضان كانو بتعرفنا من زمان سبحان الله !♡
وصلنا البيت ...
لقينا أمهم سلمنا عليها شكلها طيبانة شديد "كلهم مُنقبات بي أمهم تبارك الرحمـٰن"
ضيفونا وبقينا نتونس حتى ونستهم حِلوة وما حسينا بي الزمن إلا سمعنا صوت أذان الظهر ! ، قمنا صلينا وبدينا السرد
أنا سمعت لي إيمان، ونور قاعدة تسمع لي يقين ...
خلصت أنا أول في ساعتين ونص من السبع الطوال يعني ذي عشرة جزء الا..
وما عندي حركة 😌
إيمان: اللهم بااااارك مُمتاز جداً حتى مخارجك كويسة
_بارك الله فيكِ
وجزاك الله خير ما قصرتِ ابداً
=وجزاك يارب
بقينا نتونس وأتعرفنا على بعض طلعت بتقرا طب أسنان، قلت ليها أرح نتونس مع خالتو ظريفة اللهم بارك
طلعنا نتونس وبطني وجعتني من الضحك وحكت لي عمائل نور كلها وقت كانت صغيرة، قالت كانت في يوم قاعدة تلعب اليوم كلو لمن تعبت فاتت نامت في الغرفة، ولمن صحت لقت العيلة كلها تحت وقاعدين نفتش عليها ، قايلنها ضاعت وأخوها وأبوها مشوا الجامع وبيندهوا عليها أنو في شافعة ضايعة، و فتشوا في كل مكان في البيت وبعد فترة جات نازلة من السلم وبتمسح في عيونها ولا كأنو في حاجة، بس سمعنا صوت عمها بقول أهدي نور في السلم ولمن سالناها كنت وين ؟!
قالت كانت نايمة على السرير في الأوضة اللي فوق قلنا ليها لكن أنحنا فتشنا فوق عليكِ
طلعت كانت متغطية بالبطانية ولأنو صغيرة خالص ما كان باين أنو في زول نايم ع السرير !
دا أكتر موقف خوفنا عليها، خاصة أنو هي أصغر واحدة في العائلة وليها مكانة خاصة في قلوبنا كلنا ♡
أنا: نور بالجد نور وحتى أنا ليها معزة خاصة في قلبي ربنا يحفظها ♡
و قالت مرة ...
كانت بتلعب بالكبريت في الفصل ما معروف جابتو من وين والمس شغاله تشرح، فجاة واحدة قالت يا مس يا مس نور بتلعب بالكبريت
المس مسكتها وقعدت تفتش في الدرج لقت الكبريت ولقت علبة الاكل فيها محشي
قالت ليها ده شنو يا نور ؟!
أتخيلي قالت ليها : كنت بسخن المحشي
انا بس قعدت أضحك، ما قدرت أوقف ضحك لمن دمعت!😭😹
نور ويقين جونا بعد نص ساعة خلصوا، عندها حركتين لكن قالت ليها تعيد السور ال غلطت فيهم بس
أنا: نور المشاغبة، قلتِ لي عايزة تسخني المحشي 😹؟!
نور: عاد يا أمي وإيمان بالغتوا في حقي
إيمان: إنني برئية، دي أمي أسأليها هناك
نور: لالا أمي شكلها ما قصرت نهائي
خالتو سوسن"أمها" : يقصر الملح يا بتي الله يحفظني لي عمل الخير
يااااخ عسل اللهم باااارك حبيتها يا جماعة😭😹♡
العصر أذن قمنا صلينا وقلنا عايزين نمشي لكن حلفونا إلا نتغدا، قلنا خلاص إلا نساعدهم
خالتو سوسن : أها بالنسبة للبسبوسة كيف ؟!
البت البتساعدنا دي لسه ما جات !
أنا : أنا بعرف بعملها ممكن أعملها ليكم
نور: هيي ما قنعانين من نفسنا
يقين: ياهو ياداب معناتو ح تكون ماف بسبوسة
انا: أصبروا أنتوا بس ضوقوا بعدين أحكموا
دخلنا المطبخ أنا بعمل في البسبوسة ونور ويقين في السلطات وإيمان بتعمل العصير... الخ
لمن خلصنا والبسبوسة طلعت لكن أبيت أخليهم يشوفوها و يضوقوها قلت ليهم سبرايز
جهزنا سفرة الأكل، أكلنا والأكل كان رهيب اللهم بارك، بعد خلصنا نور رفعت الصينية قلنا إلا نغسل العدة ونمشي ...
*ياتُو يوم دبَّرناها نحنا؟!*
*بدبِّرها ربَّنا من فوق سابِع* *سما..اتوكَّل وماتشِيل هَم♡♡.*
*#حوقلوا🌻💛..*