رواية اسود وابيض الفصل الثامن عشر18بقلم جمانه السعيدي
خليل...رجعت للبيت حتى اباشر علاجي
من داخل البيت
امي المسكينه هي الي شايله مسؤليتي اما اسيل تجي تكعد يمي وسوالفها كلها ماصخه
لو على الملابس لو تسولف على اهلها ادوخني بلحجي
وكل فايده مابيها
اكلها حركيني تكول مااكدر
اكلها شيلي جيس الادرار تكول تلعب نفسي
يله ترتب المكان وتطلع امي وخواتي الي حايرات بيه
يوكلني ويغيرن الجرجف والعلاج ينطنيا بموعده
بس علي من يجيني واشوف ارتاح
اصدقائي يجوني بس اني ارتاح العلي اكثر
من شفته ارتاحيت هو كل يوم يجي بس اكو ناس يمي
مانأخذ راحتنا بلحجي يجي يطمن عليه
مااكدر احجي اني وياا براحتنا هو الصبح بلدوام يرجع تعبان ينام للمغرب بليل من يجيني يلكه المكان متروس ناس ماأخذ راحتي بلكلام ويااا جمانه السعيدي
خليل...باجر جمعه
علي...اي
خليل...اريدك تجيني الصبح اريد احجي وياك احس نفسي مختنك
علي...صار تدلل باجر اني من الصبح يمك اصلا اني اشتاقيت للكلام وياك
بس اريد اسئلك مريم منو يتسوك الها
شلون تطمن عليها
خليل...باجر من تجي
ثاني يوم الساعه عشره الصبح كعدت تريكت وبدلت ملابسي وأخذت علاج اجا علي
علي...صباح الخير شلونك اليوم
خليل...الحمد لله تعال اسندني اريد اكعد
علي...اي يله
خليل...هيج تمام متريك
علي...اي الحمد لله
خليل..... روح سد الباب وتعال اريد احجيلك شي خاص
علي...وهاي الباب سديتها
خليل...اني تعبان علي
علي...اكيد تتعب جلطه وحادث بنفس الوقت
بس ولله عندي سوال محيرني سئلته الاهلك ومحد جاوبني علي
ليش انجلطت شنو السبب انت هسه يله ٣٠ سنه
شلون انجلطت واني الي اعرفه صحتك زينه
خليل...مصيبه وكعت على راسي محد يعرف بيها
علي...الله يستر ليش شكووو
احجي خوفتني
خليل...مريم حامل
علي...شنو مريم حامل شلون يعني شنووو
خليل...هاي انت كلت شلون اني هذا السوال هو الي جلطني شلون مريم حامل واني عقيم
مو عقيم عادي الدكتور اكد مستحيل يصير عندي اطفال
عندي شهاده من اكبر مركز علاج بغداد اني عقيم
الدكتور كال لا تعالج ولا تعب نفسك انت مستحيل يصير عندك اطفال
تاليه ست مريم تطلع حامل
علي.. اهدء وفهمني وحده وحده
خليل...رجعت للبيت لكيتها مريضه وتتقيئ اخذتها للمستشفى الدكتوره طلبت تحليل
طلعت حامل
اتخيل مريم هاي الملاك تخوني
ولك مايبين عليها لاتطلع ولا تدخل ولا عدها طلبات
بلعكس تفرح من تشوفني
عشت احلى ايام حياتي وياها تالي تطلع حامل
اني ليش ماعندي حظ بلنسوان
اسيل تعبد الفلوس وانانيه واني متت عليها
عيشتها احسن عيشه
كلت خلي اسيل تولي مريم فقيره وبسيطه ومطيعه
خل اعيش كم يوم وياها
شبيا اني شبيا شنو ناقصني ليش حظي اسود وياا النسوان
لا وكل وحده حبيتها اكثر من الثانيه
وتسئلني ليش انجلطت اني رجعت من الموت بعجوبه
جمانه السعيدي
كلشي ولا صدمتي بمريم
علي...وبعدين
خليل...رجعتها للبيت ضربتها جان لازم اموتها خلاص
بهيج اللحظه
ماتستاهل تبقى عايشه خاينه
بس ماكدرت احبها علي تعرف شنو احبها
نزلن دموعي ومسحتهن دموعي
اني حبيتها اكثر من نفسي من اروح يمها حتى لووقت قليل
ارتاح ونفسيتي تتحسن
مسحت دموعي اني مجاي اكدر اطلعها من دماغي
اني انجلطت لان مااكدر أتصور الشي الي صار
علي...لا تبجي موزين عليك خلاص كلمن يروح الحال نصيبه اكيد الايام كفيله تنسيك مريم
اني حذرتك من البدايه
وانت بمكان ما تسمع كلامي رحت ازوجتها شتعرف عنها وازوجتها
خليل...مااعتقد اكدر انساها
راسي كام يوجعني
علي...اكيد يوجعك اهدء لا تبجي على شنو تبجي
خليها تولي ما تستاهلك
خليل...تعبت تعبت كلش مااعرف اختار وكلما ادخل بتجربه جدبده اطلع منها مهزوم
كل مره اتعب اكثر
علي...خلاص اعتبرها تجربه وعدة لازم تصير قوي
بعدك شاب والعمر كله كدامك
خليل...كلما اغمض عيني تصير كدامي
معقوله هي هيج ممثله شاطره لو اني هلكد غشيم
وين المشكله اريد افهم مني لو منها وين السبب
ابد ما نقصت عليها شي ليش تخوني
جنت احجي على اسيل على الاقل اسيل صريحه تكول اني احب الفلوس بس ما خانتني
وقبلت تعيش وياي واني عقيم
بس مثل مصيبة مريم ماكوووو
علي....يااخي كافي تحرك بنفسك هسه لو مشلول
لو صاير ببك شي مريم عايشه حياتها وانت تحرك بنفسك
جمانه السعيدي
خليل...باجر يفتحون رجلي وابدي علاج طبيعي
علي...بيش الساعه اجي اساعدك هنا بلبيت العلاج
خليل...اي
علي...اني اجي وياك منو طلع ويا ابوك للشغل
خليل...اخوي ويااا
ابوي حيل تبهذل بسببي وامي تعبانه
علي...اسيل وين
خليل...اسيل تجي شويه وتنهزم مني ما تحب الشغل
والتعب مو كتلك اني ماعندي حظ وياا النسوان
علي...هنا الخسرانات مو انت انت ذهب ما تتعوض
خليل...ثاني يوم الدكتور فك رجلي وحولني للعلاج الطبيعي وكال لازم تعرض جسمك للشمس
لا تخاف بعدك شاب راح تتحسن بسرعه
وبديت العلاج الطبيعي
شويه شويه صار عندي تحسن
اول بدايه امشي قليل على العكاز
بعدين كمت اكدر امشي بس على كيف
بعد شهرين تحسنت حالتي بس ضايج ومالي خلك
المشكله كلما اغمض عيوني تجي الذكريات الحلوه
اني ومريم تصير كدام عيني
مجاي اكدر اطلعها من بالي
رغم اني كلشي مااعرف عنها ولا حاولت اسئل
ومااريد اعرف عنها شي
بلكت اكدر انساها
اسيل رجعت تبتعد عني مثل قبل لا تحاول تجي يمي
ولا تحاول تلطف الجووو لو ترفع معنوياتي
كل الوقت بغرفتها خواتي ازوجن
وكلشي بلبيت على امي اسيل تنزل شويه وتركض تصعد فوك
اني مالي خلك المشاكل بعد وياا اسيل
يمكن هاي حوبت اسيل طلعت بيه
لان هي تحملتني واني عقيم واني رحت ازوجت عليها
واعاملها معامله موزينه
وامي وابوي يكولون عوفها
خليها ساكته
كرهت حياتي قبل من اضوج اروح على مريم اغير جو
هسه وين اروح بعد شهرين ونص قررت ارجع للشغل
اذا اطلع اصير احسن
جمانه السعيدي
طلعت للشغل وياا ابوي
بس هلمره مو اني الي اوكف على تجهيز الطلبات
اخوي اخد هاي المهمه
اني كاعد ورا المكتب اصفي الحسابات
روتين يومي مزعج وملل
حياة بارده ومابيها اي معني
ارجع للبيت اكل لكمه وانام جوه اسيل مااشوفها بس على الاكل ومابينا غير كم كلمه
هي اطمنت اني كبالها ومكسور وحزين وما مني فايده
بعد ما تخاف تاخذني منها وحده
واني قررت اسكت وبعد مااحجي باي موضوع وياها
بعد ٣ اشهر بلضبط من الحادث استعاديت صحتي
بلكامل بس كلبي بقه مريض وما يقبل يتعافى
جرحه جبير وماله اي علاج
رحت للشغل واني امشي بدون روح
بهذا اليوم تحديدا
صار شي كشفلي كلشي صار وياي
اني كاعد بلشغل ورا المكتب
اجت وحده حلوه ومرتبه لابسه ملابس كلش مرتبات
...السلام عليكم
خليل...عليكم السلام
...ممكن احجي وياك بموضوع مهم
خليل...اي احجي
...لا مو هنا
خليل...ليش مو هنا اني مااعرفج اذا كلامج بخصوص الشغل تفضلي احجي
...لا موضوع خاص هنا عمال وهوسه
خليل.. غير اعرف شنو الموضوع يستاهل اعوف شغلي واطلع لولا
اني مااكدر اعوف الشغل واجي وياج اذا تكدرين تحجين هنا
...صدكني راح تشكرني بس تسمع اني على شنو جاي اريد احجي وياك
خليل...بس افتهم شنو الموضوع حتى اطلع وياج
...ارجوك طلب انساني ولله الموضوع كلش مهم
لازم تجي وياي
نص ساعه مو اكثر مراح تتندم طول عمرك
خليل...تمام بس انطي خبر للوالد
خليل...الووو يابه اني راح اطلع نص ساعه وارجع
ابوي...ووين
خليل...من ارجع احجيلك
ابوي....مو تتاخر
خليل...لا نص ساعه وارجع
طلعنا برا المعمل
خليل..عندج سياره لو تجين وياي
...لا ماعندي سياره اجي وياك أقرب كافي او مكان عام
هنا كلمتين وينتهي كلشي
خليل...يله تعاي
صعدنا بلسياره ووصلنا كافي قريب نزلنا اني وياها
دخلنا جوه
طلبت جاي وكتلها تفضلي احجي اسمعج