بعد مرور شهر ونص ...
اليوم ختمة البنات♡
عاملين ليهم الختمة في الصالة
جينا الصباح بدري جهزنا الضيافة، كان كلهم لابسن عبايات بالأسود وبختلفوا في الطرح، بنات حلقتي طرحهم باللون العنابي و نور شيختي بناتها طرحهم بالأبيض، و بنات يقين باللون الكحلي
ولابسن تيجان وحاجة كدا في مُنتهى الحلاوة ، ما خليتهم يطلعوا قبل يتحصنوا كلهم ♡
العربات وصلت ...
طلعوا من المركز بالصف حسب ألوان الطرح♡، و فاتحين أنشودة "نحنا نحنا الخاتمات، نحنا نحنا الفائزات"، وحاجة كدا في قمة الجمال اللهم بااااارك♡
وصلنا الصالة ...
نزلوا بي نفس الرصة وأصغر خاتمة عمرها بقى 9 سنوات تبارك الرحمـٰن اسمها لين♡
موقفنها أول واحدة😹♡
دخلوا والصالة نساء فقط طبعاً وممنوع التصوير ...
البرنامج بدأ وبعد كذا فقرات، جا موعد الختمة، وكانت أخر آيات من سورة القصص ...
أول خاتمة كانت صفاء بتي♡
طلعت ...
صفاء:
*إِنَّ ٱلَّذِي فَرَضَ عَلَيۡكَ ٱلۡقُرۡءَانَ لَرَآدُّكَ إِلَىٰ مَعَادٖۚ قُل رَّبِّيٓ أَعۡلَمُ مَن جَآءَ بِٱلۡهُدَىٰ وَمَنۡ هُوَ فِي ضَلَٰلٖ مُّبِينٖ (85)* *وَمَا كُنتَ تَرۡجُوٓاْ أَن يُلۡقَىٰٓ إِلَيۡكَ ٱلۡكِتَٰبُ إِلَّا رَحۡمَةٗ مِّن رَّبِّكَۖ فَلَا تَكُونَنَّ ظَهِيرٗا لِّلۡكَٰفِرِينَ* *(86) وَلَا يَصُدُّنَّكَ عَنۡ ءَايَٰتِ ٱللَّهِ بَعۡدَ إِذۡ أُنزِلَتۡ إِلَيۡكَۖ وَٱدۡعُ إِلَىٰ رَبِّكَۖ وَلَا تَكُونَنَّ مِنَ ٱلۡمُشۡرِكِينَ (87* *) وَلَا تَدۡعُ مَعَ ٱللَّهِ إِلَٰهًا ءَاخَرَۘ لَآ إِلَٰهَ إِلَّا هُوَۚ كُلُّ شَيۡءٍ هَالِكٌ إِلَّا وَجۡهَهُۥۚ لَهُ ٱلۡحُكۡمُ وَإِلَيۡهِ تُرۡجَعُونَ (88)*
المقدمة: الخاتمة صفاء الصادق
الناس كلها قالت الله أكبرر بي صوت واحد
وصفاء سجدت سجدة شكر وقاعدة تبكي🥺♡
بعدها أمها طلعت حضنتها طلعت التاج بتاعها لبستو ليها♡
باركنا ليها كلنا♡
*بلسان صفاء:*
لمن نادوني عشان الختمة أنا حاسة نفسي ماشة و ح أقع فجأة، ما عارفة وصلت كيف زاتو😹
والعجب لمن قاعدة أقرأ، شغالة أرجف بس وأبكي بعد بكى كتير قدرت أكمل الايات
أمي تعبت معي جداً كان بطلع المركز من الصباح وبخلي باقي الشغل عليها، وكانت برضو قاعدة تسمع لي ما قصرت معي نهائي ف بحاول أجازيها على كل حاجة عملتها لي وعقبال ألبسها تاج الوقار يوم القيامة يا رب♡
شعور الختمة جميل جداً، أحساس بقرأ أخر آيات من كتاب الله، وقلبي حاوي الثلاثين يا الله♡
خوف، فرح، رهبة مشاعر ملخبطة لكن شعور حِلو شديددد♡
الحمد لله ربنا عوضني تعبي، كان أختي بتحنسني؛ عشان أنوم، كنت بنوم سويعات لانو عندي هدف و كنت مصرة إنو أحفظ كتاب الله والحمد لله تم مناي بفضل الله ثم شيختي أمل♡
الحمد لله حمدا كثيرا طيبا مباركا فيه♡♡.
واصلت الختمة لي باقي البنات، و لمن جا دور لين الصالة دي كلها هاجت عديل شكلهم مصدومين😹♡
بقت تقرأ في الايات دي وصوتها حِلو شديددد اللهم بارك♡
لمن خلصت ناس الصالة كلهم كبروا بي صوت عالي جداً لمن حسيت المكان ح يتهز! 😹♡
بعد خلصت قلت عايزة أقول كلام عن بناتي ...
*بلساني:*
شايفين اللي بي طرف ديك بتي أسمها "توسل"، الناس كلها قبلت عليها
أول يوم لمن جات قالت لي ياشيخة أنا ما عايزة أجي لكن امي جابتني بالغصب ؛ عشان البسها تاج الوقار وبتجيبني وترجعني كمان لكن أنا ما عايزة اجي
"توسل شغالة تأشر لي؛ عشان أسكت و ما أفضحها لكن واصلت ما اشتغلت بيها😹"
وكل يوم بتقول لي يا شيخة امل الليلة ده آخر يوم لي معاكم بكرة أنا ما ح أجي تاني أقعد أحنسها، تاني يوم بلقاها جات أول واحدة😹
والغريبة إنو كانت بتحفظ طوالي، ما بتفرط في الحفظ وبتحفظ سريع اللهم بااارك لكن كانت بتحب الدراما ساي😹♡
بعد خلصت من كلامي كلو قلت ليها خلاص يا توسل سكتت ما ح أتكلم
الناس بقت تضحك😹😹😹
واصلت ...
والجنبها صفاء بتي الهادية الرزينة♡
أكتر واحدة هادية في الحلقة، ولمن تتكلم كلامها بنقط عسل؛ بتحب تجبر بي خاطر الناس ديل كلهم، ولمن واحدة يغلبها الحفظ بتجي تشرح ليها تفسير الأيات وتسهل ليها الحفظ وبتكرر معاها كمان ربنا يحفظها ♡
والواقفة جنب صفاء باليمين شهد المشاغبة، عاملين عصابه في المركز هي ومعاها لجين وملاذ ديل الواقفين جنبها، ملاذ دي ما معروف إذا هادية ولا مشاغبة، يعني مع الهاديين تلقيها هادية، والمشاغبين مشاغبة الخاربنها شهد ولجين ديل، ورغم شغبهم ده هم المُلحين لينا الحلقة♡
وما ننسى حلاوة المركز كلوو بتي لين شافعتنا😹♡
في يوم كان ما جات الحلقة، ف تاني يوم أديتها ليها كان في جزء عم سورة الناس ومعاها تاني سور، المهم لمن قاعدة أحفظها في سورة الناس ...
بقول ليها "قُلۡ أَعُوذُ بِرَبِّ ٱلنَّاسِ"
تقول لي أعوذ برب الناس😹
يا بت "قُلۡ أَعُوذُ بِرَبِّ ٱلنَّاسِ"
ترجع تاني تقول لي أعوذ برب الناس😹
ونفس الشي في سورة الإخلاص والفلق
غايتو اليوم ده تعبتني تعب معاها😹
صح مشاغبة، لكن اللهم بااااارك عاقلة جداً رغم صغر سنها، وكلامها حق شخص كبير، فعلاً القرآن بيربي وبهذب الشخص♡♡
بعده أتكلمت عن الباقين لمن خلصت
رجعنا واصلنا الختمة لي بنات شيختي نور ويقين بنفس الطريقة وكل واحدة أتكلمت عن بناتها وكرمناهم♡...
"صحي يقين إنتقبت♡"
بعده البنات قالوا عايزين يقولوا حاجة
طلعوا المنصة أربعة منهم ...
أول مسكت المايك ريان بت شيختي نور ♡
*بلسان ريان:*
شيختي نور♡
أبدا ليكم من وين ؟!
كل العبارات ما بتوفيها حقها، سبحان الله من أول يوم شفتها دخلت قلبي وحبيتها في الله كِدا بس وحتى البنات قالوا نفس الكلام ده !
فعلاً لمن ربنا بيحب شخص بيقول بي جبريل إني أحب فلان ف بجعل الناس اللي في الأرض بتحبه، ف أحسب إن الله يحبك♡
إنتِ جميلة وتستحقي كل جميل ، وأنا كان أتكلمت لي بكرة ما بوفيكِ حقك
وكلامي ده من القلب ربنا يحفظك ويجعلك من أهل الفردوس الاعلى♡
*بلسان وتين"بت يقين" :*
الليلة أنا جاية أتكلم ليكم عن شيخة يقين♡
جميلة كلحن عُزف ليلاً على اضواء النجوم♡♡
بتعرفوا الزول البتدخل القلب تووش بدون إذن ؟! بس يلا دي هي 😹♡
لطيفة جداً كأنك مواساة الله لنا
طيبة وبتحب الخير، حاجة مميزة ونادرة ♡
ف هنيئا ل روحنا بكِ ♡
بارك الله فيكِ ونفع بكِ الامة♡
*بلسان صفاء بتي:*
هي ملجئي بعد الله، سندي، شيختي حبيبة فؤادي، راحة الاطمئنان التي ابحث عنها عند مخاوفي ♡
شيخة أمل ومن غيرها حبيبة لفؤادي ؟!
شيختي الغالية ♡
وأن إمِتلئت السِطور بالحَديث عَنك هذا لنْ يَكفيك حَقك فَأنتِ لمْ تَكوني شيختي فَقط كُنتِ أُمي وصَديقتي ♡
جبر الله قلبك الجميل ، أتمنى لكِ كل الخير ♡♡
دمتِ بخير غاليتي
و السلام لقلبك النقي ♡
أحبك♡
*بلسان سندس :*
اليوم جاية أحكي ليكم قصتي في الحفظ ومع المركز وعايزة أعمل ليهو دعاية😹♡
يا جماعة الحقوا سجلوا بناتكم فيه، ياخ حلاوة جداً وإهتمام عالي اللهم باااارك♡
الحمد لله أنا الليلة ختمت كتاب الله حفظاً ولله الفضل أولاً ثم لشيخاتي ♡
ما عارفة أقول ليكم شنو انا مبسوطة شديد والحمد لله ومن زمان نفسي أحفظه بس م كنت بفكر في يوم من الأيام أحفظه براي وكدا وأول ما شفت الإعلان حق المركز طوالي سجلت ما صدقت وقلت ان شاء الله بقدر ودخلت ♡.
وكنت لمن أكسل من الحفظ بقول لا لازم؛ عشان شيخاتنا تعبانين وعملوا المركز وسهلوا لينا كل شي بس ما علينا غير نحفظ، هو حفظ القرآن ما صعب بس بي سبب ذنوبنا ببقى لينا صعب ف كان شيخاتنا بقولوا لينا لمن تتحرمي من الحفظ وأيام تكوني ما قادرة تحفظي طوالي إستغفري؛ لانو ده بي سبب الذنوب وربنا حرمك منه؛ عشان ينبهك و تتوبي وفعلاً بعد نطبق نصائحهم طوالي بنرجع للحفظ ونفس الحاجة في كل العبادات، ما قصروا معانا نهائي في ميزان حسناتكم يارب، والحمد لله برضو بي فضل ربنا ثم فضلهم قدرت ألتزم بالنوافل والأذكار وكل يوم بقرأ سورة البقرة من راسي يا الله شعور جميل جداً♡، وحاجات كتيرة وإن شاء الله نلتقي جميعاً في أعلى درجات الجنة ، وربنا يرزقكم الصحة والعافية وطولة العمر في طاعته♡
ياخ كلامهم كان حِلو شديددد وبخلي الزول يبكي غصباً عنو وأنحنا فخورين بيهم جداً😭♡
بعده أنا مسكت المايك قلت ليهم برضو أنا كمان عايزة اتكلم عن شيختي مدام البنات كل واحدة أتكلمت عن شيختها
*بلساني:*
هي شيختي ولها عليّ فضائل وحبيبتي وحبيبة الفتيات ♡
من أحلى الحاجات الحصلت لي فحياتي ولو رجع بي الزمن ألف ولا مليون ولا مليار مره ح أرجع برضو وأختار نكون صحبات ومستحيل في يوم أندم ع أني صحبتك أو طالبتك الحفظتيها كتاب الله🥺♡، ياخ إنتِ انسانة حِلوة جداً تربعتي في قلوبنا ، بقيتِ شي مهم في حياتنا ♡
أنا بكون فخوره على طول إنو عندي صحبة واخت وشيخة زيك؛ لأنك إنتِ حاجة حلوة شديدد♡َ
وحرفياً إنتِ من أحلى وأجمل وألطف شي حصلت في حياتي♡
ما عارفة أوصف شعوري لكن بحبك شديددد ربنا يسعدك وين ما تكوني♡♡
نور بقت تبكي وجاتني في المنصة حضنتني♡
بعده عملنا دائرة أنحنا والبنات كلنا وختينا يدينا فوق بعض وأخدنا عهد وقلنا ...
*بلساننا كلنا :*
نعاهد الله العظيم، إن الناجية منا تأخذ بيد صديقتها إلى الجنة ♡♡
نعاهد الله العظيم، إن الناجية منا تأخذ بيد أختها إلى الجنة ♡♡
وكدا أخدنا العهد، ويا جمال هذا العهد !♡
و خلص اليوم بي الختام الرهيب ده 🔥♡.
*إن الحياة مع أصدقاء حلقات القرآن حياة كلها راحة، وطمأنينة، وسكينة لا يعرفها إلا من عاش هذا الاحساس♡♡.*
*كبروا🌻💛..*