رواية منقذي الجزء الثاني2من زواج في الحرب الفصل الرابع4بقلم اماني الروح
بعد تمينا العرس والجرتق سافرنا في نفس اليوم شهر عسل ماليزيا قضينا اسبوعين ورجعنا السودان اهلي كانو عاملين لينا كرامة وعازمين ناس كتار ومن ضمن المعازيم كانو خالد ومازن .. سلمتا عليهم واخدنا جمب كدة من الناس علشان ناخد راحتنا في الكلام .. قلتا ليهم عرفتو عرسي من وين والجابكم شنو قالو لي عيب عليك ما تنسي انو نحن كن اعزا أصحاب لي خراب الوش دا معانا ومن يوم العرس لاحظنا انك ما مبسوط بي شوفتنا خير يا مصطفيكو في شنو قلتا ليهم مافي حاجة بس اكيد صُحبتنا كانت في السوء وعارفين الطريقة الاتفارقنا بيها .. اكيد اسي حاصلة مصيبة علشان كدة اتذكرتوني وجيتو خير احكو واختصرو لاني مافاضي خالد وقف على حيلو وقال لي مازن ارح من هنا وكفاية اهانة انا كلمتك وقلتا ليك وجودنا ما مرحب بيهو مازن قال ليهو اصبر يا خالد اصلا متوقين انو حيتفاجاة من ظهورنا اقعد خلينا نتفاهم مهما كان دا مصطفي وبينا عشرة عمر خالد قعد وكان صاري وقرفان .. مازن وجه كلامو لي وقال لي الحصل زمان نحن نسيناهو وبالنسبة لي سلوكنا دا كان طيش شباب وربنا هدانا الحمد لله واسي نحن قاصدنك في خير .. قلتا ليهم اتفضلو احكو خالد قال لي حسن اسلوبك لو سمحت نحن اصلا ما ناقصين قلبت وش قلتا لي انا عندي ضيوف برا وما عندي وقت افهموني.. مازن قال لي بي اختصار كدة نحن عندنا شغل بنأسس فيهو عبارة عن شركة وناقصنا مهندس برمجيات وعرفنا بي الصدفة انك مهندس وعايزنك تكون شريك معانا في راس المال وفي الشغل والحصص حتتوزع على حسب مساهمتك في راس المال .. وعرفنا انو وضعك ماشاء الله كويس جدا وفي سنوات قليلة قدرتا تثبت نفسك في مجالك ونحن ما عندنا زول نثق فيهو اكتر منك نحن حاليا عندنا ٥٠% من راس المال وعاملين دراسة جدوى لي المشروع يعني كل شي جاهز منتظرين موافقتك ويا سيدي ما تدينا رايك اسي فكر في الموضوع كويس ونحن منتظرنك والفلاش دا فيهو كل الأوراق والتصاريح والدراسات عن المشروع تقدر تستشير اي خبير إداري وخبير مالي ومحامي وتتأكد من كلامنا ويا مصطفي ما تخلي موضوع وليد الحصل زمان يأثر علي قرارك الموضوع دا انتهينا منو حتى أهل وليد كسرو الحنك وبقو ما سألين عنو في شي يعني صفحتنا نضيفة .. انا وخالد اتواصلنا طول السنين الفاتو ولسة صداقتنا زي ماهي وطوالي بنتذكرك بي الخير نحن حنمشي اسي لينا لقاء تاني .. ودعتهم وانا شوية مطمن من نحيتهم انهم ما جايبن لي مصيبة معاهم .. رجعتا لي ضيوفي وقضيت اليوم كلو معاهم اهلي كانو راجعين الإمارات لانو اصلا نزلو مخصوص علشان العرس .. قضينا الاسبوع مع اهلي وبعد سافرو يادوب فضيت وفتحتا الفلاش اطلعتا على الأوراق الفيهو عملتا كم تلفون استشرتا ناس عندهم خبرة في المشاريع وعندي ولد خالتي محامي رسلتا لي الأوراق أكد لي انها سليمة ١٠٠% اضطريت اسافر يومين علشان اصفي كل شغلي الفي مصر ونجلاء كمان استلمت شهادتها وظبطنا كل أمورنا ورجعنا السودان رجعتا اتصلتا على مازن وطلبتا نتلاقة كلنا علشان نبدأ في تسجيل الشركة ونشوف الحصص حتتوزع كيف وفعلا عملنا الاجتماع وتناقشنا في كل الأمور والإجراءات الحتتعمل وشفنا كم موقع لي الشركة حنختار الأحسن بينهم .. المشروع كان عبارة عن شركة لتصميم المواقع الإلكترونية خلال شهر واحد كان كل شي جاااهز وبدينا شغل طوالي وعلاقتي مع مازن وخالد اتصلحت كتير وتقريبا رجعنا صحبة زي الاول واحسن كمان .. عرفتهم على نجلاء وحبتهم كتير وبقو ليها زي الاخوان في الوقت دا كانت نزلت امتياز وكانت مشغولة كتير وانا كمان انشغلت في الشركة وبقيت مديهو كل اهتمامي والشغل كان ماااشي كويس جدا .. انا ونجلاء كن متفقين انو نأجل موضوع الاولاد دا شويا لقايت ما نأسس أمورنا وانا استغر في الشغل وهي تكون خلصت الامتياز .. حياتنا كانت ماشة طبيعية جدا لقايت مافي يوم خالد جاء داخل ومعاهو وحدة عرفنا عليها كان اسمها سامرين قال لينا حتنزل معانا تدريب من بكرة ولو لقيناها مجتهدة وفاهمة الشغل حتنزل معانا شغل رسمي انا في لحظتها ما ارتحتا ليها ابدا اخدتا خالد على جمب وقلتا لي بتعرفها من وين البت دي ولي ما كلمتنا أول ما كان تختنا قدام الأمر الواقع قال لي انت مكبر الموضوع لي مجرد وحدة بعرفها ومتخرجة قريب وحابة تشتغل وانا قدمتا ليها مساعدة لو الموضوع ما عاجبك ي مدير اسي بمشيها حسيت بيهو زعل قلتا لي خلااص ما مشكلة خليها تنزل تدريب ضربني في كتفي وقال لي ما تخليك شكاك كدة اخد المواضيع بي بساااطة قلتا لي ماااشي يا معلم ..
ريل حبيبي انا تعبتا الصباح بدري عندي شغل نتم الباقي بكرة ان شاء الله بي طريقة طفولية قالت لي طيب حبيبي بس لازم تتم لي الحاصل كلو بكرة ما عندي صبر اكتر من كدة أثناء ما بنتكلم كدة جرس الباب رنة .. قالت لي خيير منو الحيجينا اسي قلتا ليها ربنا يستر ومشيت فتحتا الباب لقيتا دي هالة وكانت شبه باااكية