رواية منقذي الجزء الثاني2من زواج في الحرب الفصل السادس6بقلم اماني الروح
خالد هو الضربو و وليد عارف المعلومة دي بس هم ماقصرو وملو ليهو راسو بي اوهام وكذب وخلوهو حاقد علي .. سامرين ياستي اتدربت معانا لي مدت ٣ اشهر واثبتت جدارتا في الشغل وانا شخصيا كنت مبسوط من شغلها شديد كانت ذكية وبتتعلم بي سرعة وشربت كل الشغل مني ومن خلالها خالد ومازن اتمكنو من كل شغلي وقدرو يلعبو في الأوراق واخدو قرض من البنك بي ضمان الشركة الاصلآ انا بملك ٥٠%من اسهمها .. في يوم كنت قاعد مع نجلاء في البيت وبنتناقش في موضوع الباب دقة وكان اعلان من البنك بي انهم حيحجزو على الشركة لانو مواعيد السداد جات وما اتسدد اي قسط من اقساط القرض ماكنت مستوعب الحصل ومافاهم اي شي كيف ومتين اخدنا قرض من البنك استلمتا الإعلان واتصلتا على خالد ومازن بس ما ردو علي لبستا ونزلتا الشركة لقيت موظفين من البنك ومعاهم الشرطة بقيمو في أصول الشركة طلبتا منهم يفهموني الحاصل قالو لي نحن بنفذ شغلنا وبس لو عايزة تفهم امشي البنك وقابل المدير فعلا مشيت البنك وراني الأوراق بتاعت القرض والأوراق الضامنة لي القرض وكلها فيها توقيعي وتوقيع الشركاء حاولتا افهمو انو انا ما عندي فكرة اصلا عن الموضوع بس رفض اي تبرير ونهي الموضوع رجعتا البيت وانا في حالة تانية منهار على الآخر وما قادر استوعب هم عملو فيني كدة لي مع دخولي البيت لقيت نجلاء واقعة في الأرض جريت عليها وانا قلبي عايز يقيف نسيت اي حاجة حاصلة معاي وبالي كلو وتفكيري فيها انو ما يكون حاصل ليها حاجة شلتها وعلي أقرب مستشفي كشفو عليهااا وركبوا ليها درب وطلبو كم تحليل انا كنت منتظر برا واعصابي بايظة علي الاخر وبدعي انو تكون كويسة كل شي هين واي شي فدوة ليها ما مهم اخسر شغلي بس المهم تكون هي كويسة بعد نص ساعة نجلاء فاقت جيتا بي لهفة قلتا ليها انتي كويسة والحصل ليك شنو طمنيني عليك قالت لي انا كويسة بس حسيت بي لفة راس وهبوط وما وعيت تاني الا اسي قلتا ليها خير حبيبي اكيد مافي حاجة النتيجة بتظهر اسي والدكتور يطمنا عليك في أثناء كلامنا ناس المعمل ندهو على اسمها مشيت استلمتا النتيجة وسندتها ودخلنا الدكتور شاف التحاليل وقال لي مبروووك المدام حامل في الشهر الثالث انا كنت مبحلق في نجلاء وما مصدق لانو اصلا ما كن مخططين لي بيبي اسي وخصوصا بعد الحصل معاي دا بس من جواي كنت مبسوط جدا بي الخبر نجلاء من سمعت الخبر ما وقفت بكاء حضنتها على شديد وقلتا ليها دا احلي خبر ما تخافي انا معاااك واكيد دا تعويض من ربنا وكل شي بجي في الوقت العايزو ربنا سقتها ورجعنا البيت بقيت ما مهتم بي الحاصل في الشركة ولا بي الإجراءات البعمل فيها البنك وقفلتا تلفوني لي مدة اسبوع كنت بس مهتم بي نجلاء والبيبي لأنها كانت تعبانة شديد ومافيها حيل تعمل اي شي كنت حابي انشغل بيها عن كل حاجة في الدنيا من جمبها ما بمشي وما بخليها تغيب عن عيني ولا لحظة هي كانت مبسوطة جدا بي الاهتمام دا .. لما كانت تحاول تسألني عن الشغل والحصل معاي كنت بقفل الموضوع في لحظتها وبقول ليها خلينا مبسوطين ومع بعض كل شي ملحوق .. بعد اسبوع قررتا امشي اشوف الحاصل شنو اول ما وصلتا الشركة لقيت وليد في مكتبي وكان قاعد في كرسي متحرك ومعاهو مازن وخالد وسامرين كانو تقريبا محتفلين بي الانجاز العملوهو اول ما دخلتا كلهم سكتو وليد اتحرك نحيتي وقال لي باش مهندس مصطفي واخيرا شرفتنا هلا بيك اتفضل شاركنا .. عاينتا لي بي اشمئزاز لانو لهجتو كانت كلها شماتة وحقد قلتا لي أن شاء الله كدة تكون اخدتا حقك مني قال لي ولسة انت ما شفتا حاجة حا اخليك تتمني الموت وما تطولو نحن لسة في البداية .. عمري ما حا انسي العملتو فيني وهروبك زي الجبان وتخليك عني وانا بين الموت والحياة وخيانتك لي قلتا لي لحظة لحظة انت اكيد حصل لي عقلك حاجة انا اصلا ما كنت سبب في حاجة ليك وعمري ما ازيتك بي العكس انتو الكنتو سبب في انحرافي وانا عمري ما كنت كدة بس بي سببك انت والحقيرين المعاك ديل انا بقيت كدة وبعدين انت وخالد أحقر اثنين .. كنتو متنافيسن على سجي ولما هو قدر يسحبها منك اتشاكلتو وضربك في رأسك ولو ناسي اذكرك انا كنت بحاول احجز بينكم وانا الاتصلتا على الحقير مازن وهو جاء اسعفك وهو السبب الخلاني اسافر واتغرب من بلدي حتى دراستي اضطريت انقلها واكمل في بلد تاني بي سبب كلامو وكل مرة كنت بقرر ارجع كان بوقفني وبخوفني انو لو رجعتا مستقبلي حيدمر وشيلني مسؤلية الحصل ليك وكل يوم بمر علي كنت بتقطع علشانك بس اقول ليك حاجة ياخ كويس انك عملتا فيني كدة وبشكرك كتير لانو يدوب ضميري حيرتاح من نحيتك وحا اعتبر انك خلصتا حقك مني بس اقسم بالله تاني تحاول تقرب مني انت ولا واحد من الحشرات الجمبك دي لا أكون دافنك في أرضك يا وليد