رواية منقذي الجزء الثاني2من زواج في الحرب بقلم اماني الروح
الفصل الاول
ريل بتعملي في شنو انا لي ساعة بنادي عليك ردت علي وهي بتحاول تخبي حاجة وراء ضهرها قلتا ليها داسة شنو قالت لي ما حاجة مهمة كنت عاوز شنو احكي سامعاك قلتا ليها جود وجواد ببكو وقدر ما حاولتا اسكتهم ما سكتو تعالي شوفيهم انا جاني تلفون من الشغل لازم امشي قالت لي تمام وما اتحركت من مكانها ما حبيت اضغط عليها نزلتا على الشغل بس بالي كان مشغول جدا بي الحاجة المخبياها مني اول مرة تدس مني حاجة من يوم اتزوجنا قضيت يومي كلو في الشغل ولما رجعتا البيت لقيت ريل حاضنة تالا والتؤام ونايمة اخدتا ليهم صورة لانو شكلهم كان حلو .. وكان في دفتر جمبها لونو بي الوردي ومقفول بي مفتاح شلتا الدفتر وكنت عايز افتحو بس قلتا لو هي عايزاني اعرف الجواهو ما كان قفلتو ختيت الدفتر تحت المخدة ورقدتا جمبهم لاني كنت تعبان شديد حوالي الساعة 3 صباحآ صحيت بي حركة ريل كانت بتمرر يدها في شعري قالت لي لي ما صحيتني لما جيت قلتا ليها كنتي نايمة وشكلك تعبانة ما حبيت ازعجك قالت لي جود وجواد بقو اشقيا وتالا غيورة شديد ماعارفة اعمل شنو يا مصطفي قلتا ليها انتي مدلعة تالا ومقرباها منك وطبيعي جدا انها تغير لما تهتمي بي اخوانها وبعدين شكلها طالعة ليك في الغيرة دي رفعت حاجبها وقالت لي بالله وانت شكلك ناسي نفسك وعمايلك ما رديت عليها لانو اتذكرتا الدفتر سحبتو من تحت المخدة وقلتا ليها لقيت الدفتر دا جمبك وانتي نايمة شالتو وهي بتضحك وقالت لي اكيد نفسك تعرف فيهو شنو قلتا ليها انتي عايزة توريني فيهو شنو ولا لا .. قالت لي اصلا انا كاتباهو علشانك وكنت حا اديك ليهو بكرة بس انت كالعادة ماعندك صبر شلتا منها الدفتر بي لهفة سحبتو من يدي بي سرعة وقالت لي ما حتقراهو اسي حتقراهو بكرة بعد توديني دبي لي ناس خالتو سامية وبعد ترجع البيت اقراهو بي مذاج لانو ما حيخلص في يوم واحد استغل فرصة الجمعة والسبت الحنكون فيهم مافيشين قلتا ليها يعني لازم تمشو تقعدو يومين هناك انا والله ما بقدر ابعد عنكم يومين يا ريل خلينا نمشي الجمعة من الصباح ونرجع نهاية اليوم قالت لي حبيبي انا مشتاقة لي امي واخواتي والتومات وشيماء وخالتو سامية وعمو احمد وطولنا منهم وبعدين كل مرة انت بتوعدني توديني وما بتوفي بي وعدك وبتجيب لي اعزار بس المرة دي مافي عزر ليك بقيت اعاين ليها بي مسكنة علشان تحن علي وما تمشي ختت يدينها في عيوني وقالت لي بلاااش النظرة دي لانو ما في طريقة حنمشي ان شاء الله شلتا يدها من عيوني وعايز اتكلم قالت لي وحيات ريل عندك خلينا نمشي يومين بس وتعال سوقنا قلتا ليهاااا طيب حاااضر يومين بس ما اكتر من كدة قالت لي اتفقنا ياحلو الصباح بدري سقتهم ومشينا بيت اهلي قضيت معاهم اليوم كلو ولما كنت طالع ريل جابت لي الدفتر ومعاهو المفتاح وقدمتني لقايت الباب قلتا ليها ما غيرتي رأيك وترجعي معاي قالت لي ياااريت بس انت شايف عمو احمد حلف انو ما نمشي قربتا منها وبستها في خدها وبقيت حاضنة علي جات امي كابسة ريل من شافتها اتوترت وانسحبت مني انا بقيت اضحك فيها لأنها بدت تاكل في ضوافرها جريتا علي وقلتا ليها ي مجنونة انتي مرتي وغمزتا لي امي وقلتا ليها ولا ما كدة ي حجة ريل حسيت بيها اغمى عليها من الخجل امي قالت لي انت قلة أدبك دي اصلا ما بتخليهاااا وبعدين ليك ساعة من قلتا ماشي اسي انا قايلاك وصلتا بيتك قلتا ليها ماقادر افارق مرتي ي ناااس خلوها لي وبعدين راجلك دا تاني ما اشوفو حلف لاني حا اخلي يطلقك ولا بهمني شي كانت شايلة قارورة مويا في يدها رمتني بيها وقالت لي من يومك مجنون الله يعينك يا ريل بعد مشت ريل قامت علي وحسيتها حتاكلني قلتا ليها انتي مرتي وحر فيك ابوسك واحضنك قدام اي زول ما عندي ليهم حاجة قالت لي امشي ي مصطفي اصلا الكلام ما بنفع فيك سلمتا عليها في راسها ويدينها وودعتها وطلعتا على كدة كنت متشوق اني اعرف المكتوب في الدفتر دا شنو اول ما وصلتا البيت وقبل ما اعمل اي حاجة فتحتا الدفتر مكتوب في اول صفحة سميتو أفراح السنين سماني مصدر فرحتو وفي الصفحة التانية مكتوب فيها (زواج_في_الحرب)