رواية اسود وابيض
الفصل الثالث3
بقلم جمانه السعيدي
خليل ...ثاني يوم وصلت اسيل البيت اهلها لان هي صممت امها الي تأخذها للعياده علمود الفحوصات
واني رحت للعمل
ابد مااتصلت عليه ولا جابت خبر عن روحتها للدكتوره
واني هم انشغلت بلشغل
من رجعت لكيتها مشتريه كومه غراض
ملابس ومكياج وعطور شغلات اكثر من حاجتها
خليل...هلو حبيبتي
اسيل....هلو حبي
خليل....شنو هاي شكد مشتريه
اسيل...اي لكيت شغلات عجبتني وجبت
خليل....رحتي للدكتوره
اسيل...اي رحت كلشي تمام
خليل...هااا خير انشاء الله يعني ماكو ما نع للحمل
اسيل....اصلا الدكتوره تعجبت تكول رحمج كلش نضيف
انتي لازم تحملين من اول شهر
خليل....لعد شنو سبب تأخير الحمل
اسيل...مااعرف عوفنا من موضوع الحمل وتعال شوف اني شجبت وياي شغلات تخبل
خليل..كعدت تشوفين الاشياء الي جابتها واني متعجب من ردة فعلها يعني موضوع الاطفال ماهامه ابد
خليل..عوفي الملابس واحجيلي الدكتوره شكالت بلضبط
اسيل...اهووو ماكالت شي كالت اصبرو شويه وراح يصير حمل الموضوع عادي
خليل...يعني اروح اني احلل
اسيل...على شنو تحلل مو كتلك الدكتوره تكول كلشي تمام
خليل...اي كلشي تمام بلنسبه اللج واني
اسيل...انت شنو ناقصك ليش مستعجل حبيبي اصبر اكيد راح يصير حمل
خليل. ...سكتت كلت ايجوز كلامها صحيح ننتضر واذا ما صار حمل نروح نشوف دكتوره ثانيه جمانه السعيدي
الاسبوع الي بعده طلع اسم اسيل يعني طلع تعيينها
اتصلو عليه وكالو اسمها طالع
خليل....الوووو اسيل
اسيل....هلو حبي
خليل...اسمج طالع بلتعينات
اسيل...اي همزين الحمد لله والشكر
خليل...من باجر نحضر اوارقج ونقدمهن
اسيل....اي فدوه الكلبك
من رجعت للبيت حضنتني حبيبي واخيرا
خليل...مبروك كلتي الاهلي
اسيل....ليش اكللهم شنو علاقتهم بلموضوع شنو اني مزوجتك لو مزوجتهم
خليل...بس احنا عايشين سوا يعني يفرحولج ما بيها شي
اسيل...واذا عايشين سوا اني مااقبل يدخلون بحياتي
خليل...زين اهلج عرفو
اسيل...اكيد بس اتصلت عليه كبل اني اتصلت على امي وبشرتها حتى بابا اتصلت علي
خليل...يعني اهلج عرفو واهلي الي انتي كاعده وياهم بنفس البيت مايعرفون
اسيل....اكيد اهلي هم الي تعبو عليه منا لمن تخرجت
لازم يعرفون اهلك مالهم دخل بهذا الموضوع
خليل...انتي ليش هيج انانيه
اسيل...شنو انانيه لو اخلي حياتي يتحكم بيها كل من هب ودب لو اطلع انانيه
خليل..واني واكف كبالها باوعت عليها كل يوم اكتشف بيها صفه جديده مو حلوه تخليها تنزل من عيني شويه
طلعت من الغرفه وصحت بصوت عالي
خليل...يمه يمه وينج تعاي باركي الاسيل طلع تعيينها
بقت اسيل واكفه بمكانها وتخزر بيه
اجت امي
امي...بلعافيه يمه الف مبروك الحمد لله ماضاع تعبها
خطيه درست وتعبت بلعافيه يمه
حضنتها وباستها
بس خواتي مااجن باركن الها لان هي وياهن العلاقه مو تمام
والسبب منها كلامها مستفز ودائما تتعاند وياهن
من اجا ابوي باركلها وانطها ٣٠٠ تشتري ملابس للدوام
رجعت للغرفه جمانه السعيدي
اسيل...اريد فلوس اشتري ملابس
خليل...قبل اسبوع اخذتي مني ٥٠٠ اشتريتي ملابس
واليوم ابوي انطاج ٣٠٠ بعد شنو
اسيل...انت شنو تحاسبني شنو ٣٠٠ شراح يجيبن
اني لازم من اروح للدوام اانق وارتب وحده
كون الكل يتعجب من ملابسي وشكلي
خليل...ترا انتي ممرضه مو دكتوره
اسيل...واذا ممرضه وشنو بيش الدكتوره احسن مني
خليل...عفتها وطلعت كلش جاي اضوج منها ومن كلامها
متكبره وشايفه نفسها قبل اني جنت اشوفها بغير صوره بس هسه عرفت حقيقتها
بدينا اني وياها نمشي بمعاملة التعيين وانطيتها فلوس تشتري ملابس جديده
بدا الدوام خليتلها خط ياخذها ويرجعها من المستشفى
مااريدها تتبهدل من تروح وترجع للمستشفى
بعد اول اسبوع دوام بدت تهملني ارجع الكا الغرفه هوسه
ملابسي يوم تغسلهن ويوم لا
تتحجج بلدوام تكول جاي اتعب من ترجع كبل تدخل الغرفه وتنام لليل يله تكعد
تطلب اكل جاهز بلمستشفى وتاكل من ترجع تنام بليل تكعد يله تغسل ملابسها الي تروح بيهن للدوام
وتغسل ملابسي وياها
وتتصل تحجي وياا امها وخواتها اكثر من ساعه
وبعدين تنام
علاقتنا صار بيها فتور مو طبيعي ابد ما تهتمي مثل قبل
بلبدايه كلت ايجوز لان جديده على الدوام بس شفت الموضوع طول هواي
قررت افتح موضوع الاطفال مره ثانيه
خليل...اسيل حبيبتي شنو رائيج نروح دكتوره ثانيه
اسيل...علمود شنو
خليل...علمود الاطفال راح يصير سنه ونص واحنا كلشي ماكو
اسيل...اني بلنسبه اليه متاكده من نفسي المشكله مو عندي
خليل..خلاص اني اروح باجر اشوف دكتور
واسوي تحاليل وانتي هم عيدي التحاليل
اسيل...انطيني عينه واني اخذها للمستشفى اكو تحليل حيامل انت ماعليك بس تنطي عينه واني اكمل كلشي
خليل...يصير العينه هنا بلبيت
اسيل...اي يصير الصبح اخذ العينه واخليها بلمختبر واجيبلك النتيجه
لان هيج تحليل يتاخر اكثر من ساعه يله يطلع
خليل...تمام شنو انتي ما شتقيتلي اني مشتاقلج
اسيل...تعبانه اريد انام واكفه بلمستشفى من الصبح لسه
بس الدم والادار ولعبان النفس
وكل الي يجي عبالك مشتريني بس يتآمر عليه
خليل...اني احسج جاي تعبين عوفي الدوام اريد اسيل حبيبتي القديمه ترجع مثل قبل
اسيل...لا ولله اني ماصدكت اطلع من هذا البيت عبالك عايشه بسجن وهسه اعوف الدوام
خليل....ليش سجن لا شغل ولا عمل بس نايمه وكل طلباتج مجابه وين السجن طلبتي اطلعين واني ماقبلت
ردتي شي ومااخذتي
اسيل....لا عيوني الدوام غير طلعه وكشخه وصديقات جدد
سوالف وضحك جمانه السعيدي
خليل...صار ست اشهر من داومتي ووضعنا كله تخربط
غرفتنا هوسه ملابسي مو نضيفات
كل الوقت نايمه وتعبانه
اسيل...اي صير متعاون وياي شيصير اذا تغسل ملابسك
وتراعي ضروفي ترا ٧٥ بلميه من العراقيات موظفات وازواجهم يساعدوهم
بس هذا مو كلامك هذا كلام امك واخواتك جاي يحرضن بيك عليه
ماهاين عليهن اطلع للدوام يردني خدامه بهذا البيت
خليل...لا انتي النقاش وياج مابي فايده ابد
ثاني يوم قبل لا تطلع اخذت عينه علمود التحليل
بقيت منتضرها تتصل عليه بس ماكو
اخر النهار من رجعت لكيتها نايمه
بليل كعدت
خليل....هلو رجعت لكيتج نايمه
اسيل...اي ولله كلش تعبانه
خليل...نتيجه التحليل
اسيل....راح اكولك بس مو اضوج
خليل....ياستار ليش اضوج
اسيل... انت عقيم نسبتك صفر والدكتور يكول حتى ماكو امل بلعلاج
خليل.. جانت تحجي بمنتهى البرود وكانما الموضوع عادي
واني احس نار اشتعلت بجسمي
خليل.....وووين التحليل
اسيل...بجنطتي
خليل..فتحت الجنطه وطلعت التحليل بس اني مااعرف اقرا انكليزي
كعدت على الجربايه دمعتي نزلت من عيني مسحتها
جاي احاول اتماسك
خليل...انتي متاكده
اسيل....اي اي احد يقر هذا التحليل راح يااكدلك كلامي
خليل....استغفر الله العظيم
اسيل...لا اضوج عادي شنو يعني واذا ماصار عدنا اطفال الموضوع كلش عادي
خليل...باوعت عليه مستغرب من كمية البرود الي تحجي بي الموضوع ما يعنيلها اي شي ماهامها
اخذت التحليل وطلعت رحت أقرب صيدليه على بيتنا
بيها ولد صديقي
خليل...السلام عليكم
...عليكم السلام اهلا وسهلا هلو خليل وينك صار هواي ما شايفك
خليل... مشغول ممكن تشوف هذا التحليل وتقرا اليه
فتحه وبدا يقر تغيرت ملامح وجها
...هذا التحليل الك
خليل...اي
...اسف النسبه صفر بالتحليل كاتبين انت ماعندك حيامل
نهائيا
خليل...يعني اكو علاج لو لا
طبعا احجي وياا وجسمي يرجف واحس نفسي صخنت
...لازم تشوف دكتور مختص وهو يشوف اذا اكو حل لو لا
خليل...اخذت التحليل ومشيت حتى ما كتله شكرا
الدنيا ليل امشي على رجليه سيارتي بقت واكفه باب الصيدليه امشي مااعرف وين اروح
معقوله اني مراح يصير عندي اطفال طول عمري
شلون اني مراح اصير اب
مااعرف شكد مشيت لو وين اني عبالك واحد مكسر
رجليه كامن يوجعني
كعدت على الرصيف خليت ايدي على وجهي وكمت ابجي
أصعب خبر سمعته بحياتي
كل شويه جايني واحد خيرك اخي ليش تبجي
شكوووو محتاج شي
حتى مااكدر ارد عليهم ولا عندي جواب السؤالهم
كمت مسحت دموعي اجرت تكسي ورجعت السيارتي
صعدت ورجعت للبيت جمانه السعيدي
ضميت التحليل بجيبي
دخلت واني حالتي حاله اهلي استغربو من وضعي وحالتي
ابوي...ياستار شكووو
خليل...ماكو شي بس شويه تعبان
دخلت غرفتي و امي وابوي يلحون بلسؤال
بس مااكدر ارد عليهم
شراح اكول ابوي وامي كل يوم ينتظرون خبر حمل اسيل
مايعرفون اني عقيم
وصلت يم باب الغرفه اسمع اسيل سولف وتضحك وياا امها
بس دخلت
اسيل...مع سلامه ماما بعدين اتصل عليج
كعدت على الجربايه
اسيل...وين رحت حبيبتي جنت منتضرتك اتصل عليك ماجاوب
خليل...ليش انتي ماهامج الموضوع
اسيل....لان هاي قسمتنا من رب العالمين ومانكدر نعترض
الحزن مراح يغير شي
انت حبيبي وراح تبقى حبيبي طول العمر
ومستحيل اتخلى عنك على مود موضوع الاطفال
مو بس احنا اكو آلاف الحالات مثلنا
الحياة ما تنتهي اذا ماكو اطفال
بعدين اني مراح اسكت باجر اعيد التحليل
وادزه الأكبر مركز تحليل بغداد منا لمن نتأكد من هاي النتيجه
اذا اكو امل خير من رب العالمين
اذا ماكو عادي نقبل بقسمتنا ونرضى
المشكله الدكتور اكد ماكو علاج الهاي الحاله
لان انت غير منتج انت غير منتج للحيامل نهائيا
يعني الحيامل مو ضعيفه ويقويها للعلاج
ولا يكدر ينشطها ويرجع يزرعها داخل الرحم
بس اني مراح اسكت اني راح ارجع ادز العينه الأكبر مركز تحليل واتأكد من كلام الدكتور
لاتزعل حبيبي هذا حضنا من الدنيا
لازم نقبل ونسكت