رواية الصحبة الصالحة تصلح
الفصل الرابع4
بقلم اسرار جمعة
المنبه ضرب ...
أنا عاملاهو قبل صلاة الفجر بي ١٥ دقيقة مسافة أقوم وأتجهز للصلاة
مسافة كدا فتحت الشبكة دخلت القروب لقيت المشرفة مرسلة : *قيام الليل يا راغبات الجنة ♡.*
قلت ياربي قيام الليل ده شنو ؟!
رسلت ليها سألتها لكن كانت ما داخلة
قفلت التلفون و أتجهزت للصلاة وفرشت المصلاية، المسافة دي الأذان أذن صليت وجبت المصحف ما متزكرة أخر مرة فتحتو متين !
قريت سورة البقرة، قاومت لمن كملتها كلها ! ، حسيت بي إنجاز عظيم، و فعلاً ما أخدت مني زمن كتير أقل من ساعة ذي 50 دقيقة كدا، بعده مسكت التلفوني لقيتهم مرسلين "ازكار الصباح" قريتهم، وبرضو مرسلين رابط بتاع تطبيق اسمو " *أذكاري"* قالوا حِلو و خاص بي جميع الاذكار"الصباح، المساء، الطعام، الخروج والدخول من المنزل...الخ"، وبرضو فيهو أحاديث وادعية وأسماء الله الحسنى وبرسل إشعار للتذكير وحاجات تانية المهم نزلتو وفعلاً لقيتو رهيب جداً ♡
ومن ضمن البوستات :
1 *_ ح تعملوا شنو الليلة بما أنو الجمعة ؟!*
= *ما نقول جمعة مباركة او جمعة طيبة.... الخ.*
*_عشان شنو ؟!*
= *لأنو بدعة.*
*_خلاص نعمل شنو ؟!*
= *نكثر من الصلاة على النبي.*
*شاطرين والله بارك الله فيكم♡*
أول مرة أعرف انو قول جمعة مباركة بدعة!
2_ *مِن سُننِ يَوم الجُمعة :*
❶ *السِّواک*
*❷ الاغتَسال*
*❸ الـتَّـطـيُّـب*
*❹ لِبس الجَميل*
*❺ التَّبڪير لِلمسجِد*
*❻ الإِڪثَار مِن الدُّعاء؛ لأن في يوم الجمعة ساعة لايرد فيها الدعاء*
❼ *قِراءَة سُورة الڪَهف*
❽ *الصَّلاة علَى حَبيبنا ﷺ*
قفلت التلفون وطلعت برا، لقيت ناس أمي صاحين صبحت عليهم وعملت الشاي، بقينا نشرب مع بعض ياخ أشتقت ليهم وحسيت نفسي طولت ما قعدت معاهم القعدة دي ♡
نضفت البيت وطبعاً لابسة خاتم التسبيح اللي ادتني ليهو نور، طول فترة التنضيف قاعدة أصلي على النبي ♡
لمن خلصت جا زمن الفطور ...
فطرنا وأبوي طلع للصلاة، مشيت أقرا سورة الكهف خلصتها، تاني بديت أقرأ قراية المدرسة .
لمن خلصت الساعة كانت 2 وقفت بقيت أصلي على النبي لمن الساعة 3 العصر أذن صليت، وبقيت أدعي في ساعة الاستجابة إنو ربنا يثبتني و يهديني ويغيرني للأحسن ودعيت لي أمي وأبوي و نور ويقين طبعاً ما نسيتهم ♡
المغرب أذن ...
صليت وقلت كدي أشوف صليت على النبي كم ؟!
لقيت السبحة عاملة 3156 !!
اللهم بارك، قلت معقولة !
انا ليه من زمان مفوتة الحسنات دي كلها وقاعدة أكون ساكتة لمن أنضف و وقت الفراغ!
أخدت عهد جديد أنو تاني ح أجاهد دائماَ انو ما أوقف لساني من الذكر
قعدت إستغفر منتظرة صلاة العشاء
صليت وقلت كدي أشوف المشرفة إذا ردت ...