رواية الصحبة الصالحة تصلح
الفصل السادس6
بقلم اسرار جمعة
منبه القيام ضرب، عملت غفوة لمدة 10 دقائق تاني ضرب كنت عايزة أقفلو وأرجع وأنوم!
لكن فجأة إتزكرت إنو قيام الليل من أسباب رفع الدرجات في الجنة طوالي قمت سريع إتوضيت، صليت ركعتين إتزكرت انو الليلة يوم الاتنين "صيام التطوع" ف ختيت نية الصيام وبقيت إستغفر قبل الفجر بي 5 دقائق مشيت إتسحرت *"تَسَحَّروا فإنَّ في السَّحورِ بَرَكة"*
أكلت لي بلح " *نِعمَ سَحورُ المؤمِنِ التَّمرُ "،* وشربت عصير وموية، الأذان أذن صليت وقريت سورة البقرة وقلت أنوم شوية عشان أقدر أصحصح في الحصة ...
نمت ذي عشرة دقائق كدا وقمت إتجهزت امي نادتني؛ عشان أشرب الشاي
=الليلة يوم الأثنين أنا صايمة
_اللهم بارك ربنا يتقبل
=امين ، يلا مع السلامة أنا طالعة
_أستودعك الله الذي لا تضيع ودائعه
طلعت لقيت عمو واقف سلمت عليهو _لكن بدون ما أصافح_ *"لأن يطعن في رأس أحدكم بمخيط من حديد خير له من أن يمس امرأة لا تحل له"*
ياداب أمبارح عرفت من القروب انو المصافحة حرام ف سبحان الله فجأة لقيت نفسي قررت أتركها اليوم ♡
وصلنا ...
دخلت الفصل لقيت بنات فيهو لكن نور ويقين مافيشين قلت أمشي اتعرف عليهم ...
أنا: السلام عليكم
البنات: وعليكم السلام ورحمة الله
_أنا أمل وحبيت إتعرف عليكم مدام أنحنا في نفس الفصل وكدا يعني
=طوالي إتفضلي
قعدت وعرفوني عليهم ...
كانو 3 " مزدلفة، لدن، رغد "
وتاني عندهم صحبتهم اسمها "سما" لكن لسه ماجات يلا الأربعة هم شلة كدا ، أتونست معاهم طلعوا ظريفات ياخ
رجعت مكاني يقين ونور جوا ...
الجرس ضرب أخدنا 3 حصص وجرس الفطور ضرب، قلت ليهم أرح نقعد برا نشم هوا شوية طلعنا بقينا نتونس.
أنا: ياخ أنا جعت
يقين:هداك البوفي أمشي إشتري
_الليلة صايمة
=اللهم بارك ربنا يتقبل
_لكن مفكرة أفطر؛ لاني جعت خلاص
نور: لا يا بت ما تعمليها يلا دي أسمها "ساعة المجاهدة" ، لمن تكوني عايزة تلتزمي بي عبادة أو خليتِ معصية ربنا بختبرك فيها؛ عشان يشوف صدقك، مثلاً ...
كنتِ قاعدة تتكلمي مع ولد وبعد فترة تبتِ؛ لانو عرفتِ إنو دي علاقة غير شرعية ولا تجوز وحظرتيهو وقلتِ تاني ما ح تتكلمي معاهو، بعد فترة ربنا ح يرسلو ليكِ يعني ح تلقي في الشارع وفي أي مكان ح تلاقي أو تلقي صفحتو في الفيس ! ، أعرفي أنو ده إختبار عشان يشوفك هل صادقة في توبتك أو لا ...
ونفس الشي في الطاعة لمن تكوني صايمة بتظهر كل الأكلات البتحبيها وبعد الإفطار بتختفي! ، وهسه ده إختبار والجوع ده ما ح يدوم فترة طويلة، ربنا عايز يختبرك؛ عشان يشوفك هل ح تفطري ولا تواصلي ؟!
ف أثبتِ يا بطلة💪
=طيب ح أقاوم وأواصل عايزة أنجح في الاختبار
_ايواا دي بتي الشاطرة
=تربيتك يا أمي
بقينا نضحك 😹😹😹
قلت ليهم هيي صلاة الضحى مشينا إتوضينا، نور قالت لينا صلوا أول ركعتين الوضوء بعدين صلوا الضحى
_ركعتين سنة الوضوء !!
= *" ركعتين سُنة الوضوء"*
*قال رسول الله صلى الله عليه وسلم : (مَا مِنْ أَحَدٍ يَتَوَضَّأُ فَيُحْسِنُ الْوُضُوءَ وَيُصَلِّي رَكْعَتَيْنِ يُقْبِل بِقَلْبِهِ وَوَجْهِهِ عَلَيْهِمَا إِلاَّ وَجَبَتْ لَهُ الْجَنَّةُ)*
بأختصار يعني لو توضاتِ وضوء صحيح وكنتِ بتغسلي كل عضو كويس، وبعدين لبستِ إسدالك الجميل وصليتِ ركعتين سُنة الوضوء وما كنتِ سرحانة ولا قلبك مشغول بغير الله، فـ مبارك عليكِ يا عيوني بإذن الله الرحمـٰن ح يغفر ليكِ ذنوبك و ح يجعلك من أهل الجنة ♡.
_ كل ده عشان صليت ركعتين بس بعد الوضوء !!
=أيواا ..أحمدي ربنا إنك مُسلمة
_الحمدلله حمدًا كثيرًا طيبًا مباركًا فيه ♡.
طيب أصليها كيف ؟!
=بكل سهولة ويُسر إنتِ لو قايمة تتوضي عشان ح تصلي صلاة المغرب مثلاً... ف ح تصلي الأول ركعتين سُنة الوضوء وبعدين ح تصلي صلاة المغرب ...
ونفس النظام على كل مرة ح تتوضي فيها سواء صلاة فرض أو نافلة، *وتقري فيها سورة الفاتحة+ما تيسر من القرآن* .
=الحمدلله حمدًا كثيرًا طيبًا مُباركًا فيه على نعمة الإسلام..الحمدلله على نعمة إننا عبادك يارب..الحمدلله على نعمة إن رسولنا وقدوتنا هو الحبيب المصطفى صل الله عليه وسلم الحمدلله
والحمد لله إنك صحبتي ♡.
صلينا ركعتين سنة الوضوء وصلاة الضحى، وسبحان الله لقيت الجوعة راحت !!
فرحت جداً إني واصلت وما فطرت
الجرس ضرب ف دخلنا أخدنا آخر حصة وطلعنا على التراحيل ...
*أن نُغمِض أعيُنِنا*
*فنجد أنفُسنا في الجنَّة سالمين*
*ف يارب من دنيا فانية إلى جنة دائمة♡♡.*
*#أحمدوا🌻💛..*