رجعت البيت نمت، صحيت العصر صليت وبقيت إستغفر لمن الساعة 4 ، تاني بقيت أدعي انو ربنا يتقبل مني ويثبتني ودعيت لي أمي وأبوي إنو ربنا يحفظهم لي، ولي يقين ونور حبيبات قلبي♡.
قمت عايزة أجهز الإفطار لقيت أمي جهزتو
_ليه تعبتِ نفسك يا أمي كنت عايزة أجي أعملو هسه
=أجييي يا بتي ما عايزاني أكسب أجر إفطار الصائم ولا شنو ؟! ، صح أنا ما قدرت أصوم الليلة لكن قال رسول ﷺ *: " من فطر صائماً كان له مثل اجره غير انه لاينقص من اجر الصائم شيئاَ "،* ف ما عايزة أفوت الفرصة دي وأغتنمها
_طيب خليتك أعملي العايزاه😹
جزاك الله خير وربنا يتقبل♡
=أمين ويتقبل منك يارب
يلا خلي النضم الكتير، الأذان ده قرب يأذن، وما تنسي دعوة الصائم مُستجابة ف ما تنسيني من دعواتك.
=هو انتِ بتتنسي يا غلاي؟ ♡
ما محتاجة توصية من الناحية دي، إطمئنِ.
بقيت أدعي منتظرة الأذان ...
الأذان أذن لكن انتظرت مسافة لمن إتاكد؛ عشان الرمضان الفات بعد فطرت طلعوا ديل الشفع ف من اليوم داك بقى لي درس وبفطر بعد أسمع من كذا جامع🙂😹.
بعد إتأكدت ياداب قمت أحلل صيامي شربت لي موية وعصير وأكلت بلحة، قلت باكل بعد أصلي عشان كان أكلت ح أكسل ما ح أقدر أقوم ، صليت وجيت أكلت، قلت مسافة صلاة العشاء أمسك التلفون ...
فتحت الشبكة الرسائل نزلت
دخلت الواتساب نزلت لي رسائل من قروب *"إلى الله أقرب"*
دخلت بقيت أقرأ فيهم، قالوا ح يبدوا شرح أسماء الله الحُسنى، وكان منزلين ريكورد لي إسم الله "الحليم" لي راتب النابلسي
قلت بسمعو بعدين
رجعت أقرأ في المنشورات ...
١ *رحيق"الادمن" =*
*ثواب غض البصر ؟ ..*
*تعالوا أقول ليكم ♡..*
= *قـال النبي صلى اللّه عليه وسلم: " من غضَّ بصرهُ أبدلهُ اللّهُ عز وجل حلاوةً فى قلبه " ♡ ..*
*خلاص عارفين عقوبة إطلاق البصر ؟ ..*
*قـال النبي صلى اللّه عليه وسلم: " إن الله كتب على ابن آدم حظه من الزنى مدرك ذلك لا محالة فالعين تزني وزناها النظر .. "*
*زنا يا جماعة !! ، وقال تعالى فى كتابه: " ولا تقربوا الزنا "، يعنى قبل الزنا خطوات مش تقتربوا منها ومن الخطوات دي إطلاق البصر وزنا العين ...*
*^^ فوائد غَضِّ البصر عِدة:*
*• تخليص القلب مِن أَلَمِ الحَسرة*
*• يُورِث القلب نورًا وإشراقًا*
*• يفتح طُرُق العِلم وأبوابه*
*• يُورِث قوة القلب وثَباته*
*• يُورِث القلب سُرورًا وفَرحةً*
*• يُقوِّي العَقل ويَزيده ويُثبِّته.*
*فـ يا أمة الله*
*غضي بصرك*
*غضي بصرك*
*غضي بصرك*
*العين تزني يا أمة الله، العين تزني وزِناها النظَر فلا تُطِلي النظر*!
*إنّ لكِ الأولى وليس لكِ الثانية يا أمة الله*
*غضّي بصرك عن الحرام اتقِ الله الذي رزقكِ البصر ولا تعصيه بنعمته* !
*اتقِ الله فيما أعطاكِ يا أمة الله ♡*
*"وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ"*
*ألستِ من المؤمنات؟*
*٢- رحيق:*
فضل الصلاة على النبي ﷺ♡
معجزة الصلاة الابراهيمية تتكفل بكل الامنيات اللي بصدرك ، إلتزمت بيها زادت اليقين عندي بشكل رهيب وحاجات كثيرة أتحققت دفعة واحدة لدرجة حاجات قديمة جداً نسيتها تحققت لي أنصح فيها وبشدة ، داومت عليها وفي خلال يومين بس ربنا فرج عني هم كنت مفلسة وما عندي قروش لي رسوم الجامعة ف مسكت الصلاة الإبراهيمية ف سبحان الله ربنا فرجها وبرضو كانت لي سبب في شفائي.
٣ *رحيق:*
*ماذا تنتظري ؟!*
*العمر يمضي..*
*هناك من حفظت القرآن كاملا..*
*وهناك من حفظت سنة* *المصطفى في صدرها بفضل الله..*
*وهناك وهناك....*
*وأنتِ ماذا انجزتِ ؟!*
قفلت التلفون وبقيت أفكر
يا ربي أنا أنجزت شنو في حياتي دي؟! ، القران ما قاعدة أحفظو الا السور البيدونا ليها في المدرسة وفي الاجازة بتتنسي زاتو يعني قراية للامتحان بس !
فكرت أنزل مركز تحفيظ لكن مع المدرسة صعب أمشي الاتنين وكدا ما ح أقدر أوفق بيناتهم قلت خلاص أمسك الصلاة الابراهيمية وربنا يسهل ...
قاطع تفكيري صوت الأذان ...
مشيت أتوضيت صليت ركعتين سنة الوضوء وصلاة العشاء قريت أذكار بعد الصلاة، وإتزكرت الريكورد بتاع اسم الله " الحليم" قلت خلاص أسمعو وأمشي انوم ...
شغلت الريكورد ...
يا الله😭♡♡♡
ياخ الريكورد كلو أنا قاعدة أبكي😭♡
عرفت كيف إنو ربنا حليم و ما بسرع لينا بالعقوبة ، وكيف بتجاوز لينا الزلات و يعفو عن السيئات♡
بشوفنا ونحن بنعصيه، ونخالف أمرو وبعد ده حليم ورؤوف بينا وبعفو عننا !♡
رغم معاصينا الكتيرة يحلم عننا ، ويستعتبنا عشان نتوب ، ويمهلنا عشان ننيب اليه♡
بشوف عبادو و هم بكفروا به و يعصونه و هو يحلم ، فيؤخر و ينذر و يؤجل و لا يعجل ، و يستر عليهم و يغفر! ♡
وما بسارع في الإنتقام، مع كمال قدرته وقوته وجبروته، فيؤخّر
و إن الله تعالى لما يؤخّر العذاب عن الطغاة والعصاة، فإن ذلك ليس عن عجزٍ أو ضعف، إنما هو بسبب حِلم الله تعالى وإمهاله، ولحكمة هو أعلم بها، فلو أنه عاجلهم بالعقوبة لما بقي أحد على وجه الأرض !
يا الله يا الله ♡
الله أكبر الله أكبر♡
ياخ ربنا جميل جداً جداً ♡
الريكورد إنتهى إتمنيت أعيدو تاني🥺😹♡
أنا بي طبعي عصبية وأقل شي بعصب، ف قررت من اليوم إنو أتعبد بي اسم الله الحليم عايزة إتخلق بصفة الحِلم، عايزة أضبط نفسي عند الغضب، والخلاني أتشجع أكتر إنو أتخلق بيه؛ لانو ربنا بحب الخلق ده😭♡
صليت على النبي بالصيغة الآبراهيمية لمن الساعة ٧ كدا جاني إشعار في التلفون مشيت شفتو لقيت تطبيق"اذكاري" مرسل لي رسالة للتذكير بأذكار النوم، لا هسه ده طرد يعني ولا كيف ؟! بدل أمي تجي تشاكلني من السهر التطبيق بقى يرسل لي الأشعار وبنوم طوالي غايتو ريحتها من النقة😹، قريت أذكار النوم وسورة الملك والكافرون والنوم جاك زول.