الفصل التاسع9
بقلم اسرار جمعة
وصلت البيت سلمت على أمي وشربت لي عصير مسكت التلفون؛ عشان أشوف سنن الرسول صل الله عليه وسلم بحثت وجاتني عرفت بعض المعلومات وقفلت التلفون وقلت أنوم حبة
بس غمضت عيني كدا طق إتزكرت حاجة خلتني أقوم أسجد سجدة شكر
ياداب ركزت إنو كنت شايلة هم للمركز، وكنت ماسكة الصلاة الإبراهيمية وسبحان الله فترة أسبوع بس الموضوع أتسهل!
الحمد لله الحمد لله
الحمد لله حمدا كثيرا طيبا مباركا فيه
سجدت سجدة طويلة قاعدة أبكي فيها بس وبشكر ربنا ♡
ياخ ربنا كريم جداً ♡
النومة طارت زاتو، جبت السبحة "اللي هي أصلاَ موجودة في يدي"، بقيت أحمد ربنا، لمن العصر أذن صليت
وبديت أقرأ، بدور أتفوق
قريب للمغرب نزلت سألت أمي إذا عايزة مساعدة أو أي حاجة
أمي: بس جهزي السفرة بتاعت الاكل مسافة أبوكِ يجي؛ عشان ناكل كلنا سوا
=سمح
جهزت السفرة وختيت الموية والعصير
المسافة دي أبوي جا ...
_وين يا أبوي مشتاقين عديل كدا
=بتي السمحة أنا زاتي مشتاق ليكِ
ده شنو المدرسة دستك مننا كدا ؟!
=مضغوطة بس مع الدراسة
_ربنا يوفقك
=امين
قمت ختيت الاكل "عايزة أكسب حسنات"
طبعاَ طبقت سنة الاكل قريتها قبيل وهي "الاكل بي ثلاث أصابع" وبعد محاولات قدرت ليها الحمد لله
بعد إتغدينا رفعت الصينية وغسلت العدة أصلاً كانت بسيطة ،كبيت الشاي جبتو بقينا نتونس ...
ياخ القعدة مع أمي وأبوي دي عندي بالدنيا ربنا يحفظهم لي ويطول في عمرهم ♡
حكيت ليهم انو عايزين نبدأ نحفظ القرآن أنا وصحباتي وكدا يعني
دعوا لينا بالتوفيق وإنو ربنا يسهل لينا
قمت أشرب موية لكن كرسي ماف في المطبخ؛ عشان أطبق سنة الشرب
عبيت الكباية موية ومشيت قعدت في كراسي البرندة قلت بسم الله وشربت بي يدي اليمين طبعاً و على 3 مرات وفي كل مرة ببسمل وبحمد ربنا، وبعد انتهيت قلت الحمد لله
سبحان الله من الحاجة البسيطة حسنات كتيرة !
رجعت الكباية ومشيت غرفتي بديت أقرأ لمن العشاء أذن صليت ومسكت التلفون فتحت الشبكة لقيت رسائل من قروب "إنتقبي حباَ"، ماف حصل دخلتو قلت كدي أقرأ رسائله اليوم...
*أمنية "الادمن" :*
*سبحان الله النقاب راحة نفسية راحة في كل جوانب الحياة. ستر وعفة للمرأة،*
*وحتى الواحدة لمن تلبسو بتكون في جهاد مع النفس والناس الحولها وبكون كل تعامل في حدود بختلف عن فترة ما قبل النقاب*
*الحمدلله احسن قرار أتخذتو ف حياتي♡*
*و بقول ياريتني لو أنتقبت من زمان ♡*
*حرفيا بشجع كل وحدة عايزة تنتقب، النقاب ستر، النقاب عفة، وتشبه ب أمهاتنا المؤمنات♡*
*وأوع تفتكري انو عشان تنتقبي لازم تكوني متفقهة في الدين*!
*النقاب زيو زي اي طاعة تعمليها ما تربطيه بي متطلبات.*
*لوقعدت إتكلم من اسي لبكرة ما ح أنتهى!*
*قبل إنتقب، فكرة النقاب كانت بتستهويني كتيير بس كنت خايفة.. خايفة من عدم الالتزام خايفة تاني ما اقدر ألبس زي ما عاوزة، الفكرة نهائي ما خلتني من فترة لفترة بتزيد !*
*بعد ما خلصت تالت كان عمري ١٨ سنة في الاجازة دخلت مركز تحفيظ قرآن وحرفيا يا بنات* *المركز ده عالم تاني خالص، أغلب الناس الهناك ملتزمين، حتى البنات الصغار الخمار طول العباية والنقاب ما فيه فتحة* *للعين حتى، ده غير تعاملهم الخلوق وكلامهم الكله نصح ديني بأدلة قرآنية وأحاديث، المركز ده غير لي* *حياتي للأفضل والتزمتَ من نواحي كتيرة واكتر♡..*
*لحد ما جاء يوم قررت إني لازم بكرة ألبس النقاب وأمشي بيهو المركز، وأثناء ما أنا بفكر لقيت أغلب الرسائل بتتكلم عن النقاب وقلت لنفسي دي إشارة، وطوالي* *قمت لبست نقابي وإتصورت ورسلت الصورة لصحبتي وفرحتْ لي شديد* *وأنا بعد لبست النقاب عاينت لنفسي في المرايا وبكيت..*
*كلمت أمي وقلت ليها خليها مفاجأة لابوي ومرت أخوي وبالليل غسلت النقاب والطرحة الكبيرة والجونتيات وشريتهم في الديوان عشان ما يشوفوه*، *وبعدها أخوي الصغير فضحني* *ووراهم🙂😹،* *واليوم البعده* *إنتقبت♡*
*لبست النقاب ومشيت المركز وكنت مبسوطة شديد شديد♡..*
_*عايزة اقول لاي بنت نفسها تتنقب وخايفة:*
= *ألبسيه عشان تمنعي نفسك من المعاصي، وعشان تمنعي نفسك من المكياج ومن البناطلين ومن كشف الشعر ومن حاجات كتيرة* *جداً، النقاب بعينك على الالتزام، وما تنتظري لحد ما تجهزي نفسياً وتجهزي نقابات وملابس منقبات* ، *إشتري نقاب واحد وإنتقبي طوالي الباقي بجي براحة، ومن ناحية تجهزي نفسياً زي ما قلت ليك ما تنتظري؛ لأنو* *الشيطان حيعيقك ويوسوس ليكِ؛ لأنو يا غاليتي طريق الالتزام عقباته كتيرة لكن إنتِ قدها و ح* *تتغلبي على العقبات دي كلها، وأدعوا كتير انو ربنا يهديكم إليه ويعينكم على طاعته♡..*
*والسلام عليكم♡.*
_ كلامها عجبني وقصتها حِلوة اللهم بارك ♡
جاني تذكير بي أذكار النوم قريتهم وسورة الملك والكافرون ونمت ...
*أخبروا ذات النقاب التي جاهدت وثبتت في زمن الفتن والمغريات*
*وإتبعت السنه في* *زمن سادت فيه البدع*
*أنّها ستجد جزاءاً عظيماً..*
*وإن ربها كان كريماً..*
*يا ذات النقاب إن القمر ينحني لِجمالك♡♡.*