رواية غرام السلطان الجزء الثاني2 الفصل الاول1والثاني2 بقلم عادل عبد الله
في السادسة صباحا
يحتضن باسل عروسته غرام بيده اليسري واصابع يده اليمني تمر بين خصلات شعرها وينظر الي عينيها بابتسامة حانية ....
باسل : انا بحبك قوي يا غرام ، انا مش مصدق ان احنا خلاص اتجوزنا و انك بين ايديا و حلمي اخيرا اتحقق !! انا اسعد انسان في الدنيا .
غرام : بتحبني قوي كده يا باسل ؟؟
باسل : واكتر مما تتخيلي يا روح قلب باسل .
غرام : وانا كمان بحبك قوي .
باسل : انا كنت خلاص بدأت ايأس اننا نتجوز ، لكن الحمد لله اننا رغم كل الحواجز اللي كانت بينا قدرنا نعديها ونتجوز .
غرام : بصراحة يا باسل انا كمان كنت متأكدة ان ماما ومامتك مش هيوافقوا ابدا ، لكن الحمد لله حصلت المعجزة ووافقوا هما الاتنين واتجوزنا .
باسل : تعرفي ان انا نفسي نخلف عشر اولاد و يكونوا كلهم شبهك .
غرام " بدهشة " : عشرة ؟!!! ازاي ؟!!!!
باسل : تعالي وانا اقولك ازاي .
في شقة جميلة ...
للمرة الاولي منذ ولادتها تفارقها ابنتها غرام !! لم تكن غرام مجرد ابنة لجميلة !! ولكنها رفيقتها في رحلة حياتها !!! الان وقد اصبح البيت فارغا واصبحت جميلة وحيدة !!!
بدلت جميلة ملابسها وارتدت ملابس نومها ودخلت الي فراشها ودموعها تنساب علي وسادتها !!!
هي ذاتها لا تعرف ان كانت دموع الفرح ام دموع شعور الوحدة ؟!!!
في فيلا سلطان ...
شهد : الف مبروك يا سلطان ، الفرح كان حلو قوي .
سلطان : الله يبارك فيكي يا شهد ، الحمد لله فعلا الفرح كان رائع .
شهد : عقبال فرح نور .
سلطان : يارب ، انا نفسي افرح به ، هو قاعد اهو لو عايز يتجوز يشاور علي اي بنت و في خلال اسبوع اكون جوزتها له .
نور : قريب يا بابا ، قريب قوي .
شهد : قولي يا نور في بنت في دماغك ؟ فرحني يا ولد نفسي افرح بيك .
نور : قريب يا ماما ، قريب قوي ، اتأكد بس من مشاعري الاول وبعدين نتكلم .
شهد : طيب هي مين ؟؟
نور : هقولكم قريب .
صعدت شهد وسلطان الي غرفتهما ...
سلطان : علفكرة اختك شيماء كان واضح عليها قوي انها مش مبسوطة .
شهد : ممكن تكون كانت زعلانة علشان بسام في السجن .
سلطان : لا لا هي كانت غيرانة لما شافت جميلة بقيت سيدة مجتمع و لها اصحاب واصدقاء فنانين وناس مشهورين .
شهد : هتغير من مين !!! اختي شيماء تغير من جميلة ؟!!! مستحيل طبعا .
سلطان : خلاص مش مهم ، المهم ان الفرح خلص علي خير والولاد اتجوزوا .
شهد : علفكرة انا شوفتك كنت بتبص علي جميلة اكتر من مرة !!! ومش رضيت اتكلم علشان الفرح والناس .
سلطان : انا ؟!! لا طبعا .
شهد : يمكن تكون كنت بتفكر ا.....
سلطان : لا يا حبيبتي ، ريحي نفسك انا مبفكرش .
شهد : طيب قولي ايه رأيك بقي ألبسلك ده ولا ده ؟؟؟
سلطان : البسي اي حاجة عليكي بتبقي حلوة .
شهد : لأ ، انت اللي تختار ، انا بصراحة غيرت من الولاد وعايزة اجدد معاك شهر العسل .
سلطان " يضحك " : احنا كبرنا خلاص يا حبيبتي .
شهد : لا يا حبيبي احنا مش كبرنا ، بطل بقي وقولي ألبس ده ولا ده ؟؟
في شقة شيماء
تبدل شيماء ملابسها ولكنها لم تستطيع ان تبدل مشاعر السخط والغضب الشديدين التي تشعر بهما !!!
وتفكر هل هذه حقا هي جميلة تلك الفتاة الصغيرة اليتيمة التي كانت تعمل كخادمة منذ زمن ؟!! كيف استطاعت ان تغير حياتها الي هذا الحد ؟!
و ابنتها المغرورة غرام !!! التي تزوجت ابني باسل رغما عني !!!
لابد وان تدفع هي وابنتها ثمن كل ذلك !!!
قريبا سأبدأ معها خطتي لكسر غرور تلك الفتاة المغرورة !!
ولكن الان اصبحت انا وحيدة في ذلك المنزل الكبير !!!
ماذا سأفعل في وحدتي ؟ لقد اخذت ابني مني !! لابد ان استعيده منها مهما كان الثمن !!!
اليوم التالي
تفتح غرام عينيها لتجد باسل ينظر اليها ويبتسم : صباحية مباركة يا قلبي .
غرام : الله يبارك فيك يا حبيبي صباح الفل ، انت صحيت امتي ؟
باسل : لسه من شوية .
غرام : وليه مش صحيتني اول ما صحيت ؟
باسل : كنت مبسوط وانا بتفرج عليكي وانتي نايمة زي الملايكة .
غرام " تضحك " : بقي كده !! طيب اناكمان بعد كده هتفرج عليك وانت نايم .
باسل : طيب يلا بسرعة عايزين نلبس وننزل بسرعة .
غرام : ننزل !!! ننزل نروح فين ؟؟
باسل : كنت عاملك مفاجأة وحاجز عشر ايام في الساحل الشمالي يبدأوا النهاردة بالليل ، يلا بسرعة بلاش كسل .
غرام " بتعجب " : انت مستعجل كده ليه ؟!!!
باسل : لو قعدنا شوية كمان ، ماما ومامتك اكيد هييجوا يباركولنا ويعطلونا ، عايزين ننزل قبل ما حد يجيلنا .
غرام : لكن ماما زمانها جاية و هتزعل اووي اننا مشينا ومش قولنالها .
باسل : معلش يا قلبي اتصلي بها وقوليلها اني كنت عاملهالك مفاجأة .
غرام : وصحباتي كانوا هيجوا بكره !!
باسل : ابقي اعتزرللهم يا غرام ، يلا يا قلبي بلاش نضيع الوقت .
بعد انصرافهم تتصل غرام بأمها ...
غرام : ازيك يا ماما وحشتيني قوي .
جميلة : انتي وحشتيني اكتر يا قلبي ، عاملة ايه يا غرام ؟؟ مبسوطة يا حبيبتي ؟؟
غرام : الحمد لله مبسوطة قوي يا ماما .
جميلة : انا بغير هدومي اهو علشان اجيلك اباركلك انتي و باسل .
غرام : انا بتصل بيكي علشان اقولك اننا مسافرين الساحل الشمالي دلوقتي نقضي عشر ايام هناك .
جميلة : فجأة كدة ؟!!!
غرام : ايوه يا ماما باسل فاجئني بالسفر لما صحينا .
جميلة : مفاجأة حلوة قوي !!!! طيب يا حبيبتي مادام مبسوطين انا كمان هكون مبسوطة .
غرام : ربنا يخليكي ليا يا ماما يا حبيبتي .
جميلة : ويخليكي يا قلبي ، باسل جنبك ؟
غرام : ايوه .
جميلة : ادهولي ابارك له .
باسل : ازيك يا طنط ؟
جميلة : الله يسلمك يا حبيبي ، خلي بالك من غرام يا باسل ، دي بنت عمري ، غرام كل حاجة في حياتي يا باسل .
باسل : في عينيا يا طنط ، متخافيش علي غرام معايا .
جميلة : طيب يا حبيبي ربنا يسعدكم ربنا يسعدكم يارب .
شيماء من امام شقة باسل وغرام ...
تدق جرس الباب كثيرا دون رد ثم تخرج هاتفها وتتصل بباسل !!!
يرد عليها باسل وتسأله شيماء : ايه يا باسل كل ده نايمين ؟!!!
باسل : لا يا ماما ده انا اخدت غرام وسافرنا .
شيماء : سافرتوا !!! سافرتوا فين يا باسل ؟؟
باسل : نقضي عشر ايام عسل في الساحل .
شيماء : بقي كده يا باسل ؟؟ ده انت عمرك ما عملتها معايا !!!
باسل " يضحك " : علشان انتي امي انما هي عروستي .
شيماء : واضح كده ان عروستك هتنسيك امك يا باسل !!
باسل : لا يا ماما ، مستحيل يا حبيبتي .
شيماء : ما انت بدأت اهو من اول يوم اخدتك و سافرتوا من غير ما تقولي .
باسل : بالله عليكي يا ماما مش عايزك تزعلي ومش عايزك تزعليني انا كمان .
شيماء : طيب يا باسل متزعلش ، انا هقفل معاك علشان متزعلش خالص ، ياريت تبقي تتصل بيا وبلاش تنساني يا باسل .
باسل : عمري ما انساكي يا ست الكل ، هتصل بيكي كل يوم .
شيماء : و"المحروسة" قصدي العروسة عاملة معاك ايه يا واد ؟؟
باسل : كويسين يا ماما .
شيماء : يعني مبسوط يا واد ولا لأ ؟
باسل : ايوه يا ماما مبسوطين قوي .
في المساء
في فيلا سلطان
يقف سلطان امام المرآه ويرتدي ملابسه الانيقة ويبتسم " رغم العمر الكبير الا اني مازلت اتمتع بشئ من الوسامة والجاذبية !! " .
ينتهي سلطان من الاعتناء بنفسه ثم ينزل لتشاهده شهد فتسأله : انت خارج رايح فين يا سلطان ؟
سلطان : رايح ابارك للولاد .
شهد : باسل و غرام سافروا يقضوا شهر العسل .
سلطان : فجأة كده ؟!!
شهد : ايوه ، دي شيماء راحت تباركلهم و عرفت لما مش لقتهم في البيت و اتصلت بباسل .
سلطان : طيب ربنا يسعدهم .
شهد : تعالي بقي يا حبيبي اقعد معايا .
سلطان : مادام لبست أخرج اشم شوية هواء ومش هتأخر .
شهد : استني ألبس واخرج معاك .
سلطان " يشعر بأنه في مأزق ويضطر للموافقة " : حاضر ، متتأخريش .
تخرج شهد مع سلطان يتجولان بسيارتهم الفارهة حتي يمرا من امام احد الفنادق فتقول له : الفندق ده مش بيفكر بحاجة يا حبيبي ؟؟
سلطان " يضحك " : اكيد بيفكرني ، كنا بنيجي نقعد هنا زمان كتير .
شهد : طيب ما توقف وننزل نشرب حاجة ونستعيد ذكريات زمان .
سلطان " يضحك " : يا قلبي احنا عجزنا خلاص وكبرنا علي كده .
شهد : متقولش كده والله ازعل منك بجد .
سلطان : ليه يا قلبي ؟؟
شهد : كلامك ده بيحبطني .
سلطان " يضحك " : مش دي الحقيقة ؟!
شهد : يا روحي خليك متفائل شوية ، فيه ناس اكبر مننا بعشرين سنة وعايشين كويس جدا .
سلطان " يضحك " : خلاص مش هزعلك ، ننزل نشرب حاجة ، بس لو اتريقوا علينا هتبقي انتي السبب .
شهد : ما عاش اللي يتريق علينا ، انت ناسي احنا مين ولا ايه ؟!!!
سلطان : حاضر يا شهد هانم ، اتفضلي انزلي يا برنسيسة .
في منزل جميلة
تمر عليها الساعات ببطئ وملل !!
كانت في السابق تنتظر وتعد الساعات لعودة ابنتها من عملها ومن قبل من جامعتها او مدرستها ، ولكنها الان لا تنتظرها !! ولا يوجد من تنتظره !!!
الصباح صار كالمساء ما هي الا ساعات تمر وياليتها تمر ، بل تسير في بطئ وملل شديدين وكأنها لا تريد ان تتحرك .
حتي عشقها للرسم الان هي لا تشعر بشغف نحوه !!!
لا تنتظر الا اتصال صغير لدقائق معدودة يأتيها من ابنتها كل يوم !!
في فيلا سلطان
يستيقظ نور صباحا ويبتسم قائلا ... وبعدين بقي في البنت دي ، دي مش عايزة تسيبني حتي في الاحلام ، الليلتين اللي فاتوا حلمت بها مرتين !!
ثم ينظر في ساعته ، انا لازم اتصل بها دلوقتي .
يتصل نور مرة ولم يأتيه رد ثم يعاود الاتصال مرة اخري ...
تستيقظ منار علي صوت رنة جرس هاتفها وترد : مين البارد االي بيتصل بدري كده ؟؟؟
نور " يضحك بسخرية " : بارد !!! متشكر قوي يا دكتورة .
منار : انت مين اصلا ؟؟
نور : انا مريض وتعبان .
منار : ماتروح المستشفي !! انت عايز تتعالج في التليفون ؟!!!
نور : حضرتك هتكوني في المستشفي أمتي ؟
منار : روح انت المستشفي و هتلاقي دكاترة كتير هناك .
نور : لكن انا علاجي عندك انتي بس !!
منار : اااه ، ده انت بتستظرف بقي ؟!!
نور : لأ ، ده انا غلبان قوي .
منار " تبتسم بسخرية " : وبتشتكي من ايه يا عم الغلبان ؟؟
نور : قلبي .
منار : ماله قلبك ؟
نور : تعبان قوي .
منار " تضحك " : وجع في قلبك يا بعيد ، انت يا بني معندكش د.م ؟!! بتتصل تعاكس علي الصبح كده ؟!!
نور " يبتسم " : ربنا يسامحك يا دكتورة .
منار : انت مين يا ابني انت يا اللي عامل فيها ظريف ودمك خفيف .
نور : انا نور اخو غرام .
تتعجب منار وتنتبة فجأة وتقول : ازيك يا استاذ نور ، اسفة مش مسجلة رقمك عندي .
نور : اوكي ، بس تعرفي بيبقي دمك خفيف قوي وانتي صاحية من النوم ومتعصبة .
منار " تضحك " : والله انا مش مصدقة !!! اللي يشوفك في الحقيقة مستحيل يصدق ان انت اللي كنت بتهزر في التليفون من شوية !!!
نور : اكيد لما اكون في مكان عام لازم احافظ علي مكانتي الاجتماعية انما مع الناس القريبين مني بتعامل معاهم بطبيعتي .
منار : وانت في طبيعتك بتحب تهزر كده ؟؟
نور : اكيد .
منار : ده مع الناس القريبين منك ، انما معايا بتتعامل كده ليه ؟؟
نور : يعني انتي مش عارفة ؟؟
منار : لأ ، وهعرف ازاي ؟!
نور : طيب ممكن نتقابل كمان ساعة ؟
منار " بتعجب " : ليه ؟!!
نور : علشان اقولك بتعامل معاكي كده ليه .
منار : لكن انا مش بتقابل مع حد غريب .
نور : هستناكي بعد ساعة ، اوعي تتأخري ، باي .
في بيت جميلة
مرت عدة ايام بينما جميلة تكاد لا تأكل الا بعض لقيمات قليلة ، لا تفعل شيئا الا جلوسها في الفراش وتشاهد التلفاز !!!
بينما كانت تمر امام المرآه توقفت للحظات ونظرت الي شعرها البني الذي لم يغزوه الشيب الا قليلا !!! نظرت الي وجهها فبشرتها مازالت تحمل بعضا من النضارة فالتجاعيد لم تغزوها بعد !!
اذن لماذا تشعر بسريان العجز والوهن في جسدها وهي مازالت لم يغادرها شبابها بعد ؟!!!
جلست امامها و بدأت تصفف شعرها وتبتسم بينما تلمع عينيها من اثر الدموع التي تريد لها السماح بالانسياب حزنا علي عمرها الذي مرت سنواته بين طفولة بائسة وشباب ضائع والان الثلث الاخير منه في وحدة وكآبة !!!
وفجأة يقطع كل تلك الافكار صوت هاتفها المحمول .....
جميلة : الو ، مين معايا ؟
المتصل : مساء الخير يا مدام جميلة ، اسف لو اتصلت بدون استئذان .
جميلة : مساء النور ، مين حضرتك ؟
المتصل : انا فارس المصري .
جميلة : استاذ فارس المصري الفنان المعروف ، اهلا وسهلا بحضرتك .
المتصل :اهلا بيكي ، انا بعتذر اني اكون ازعجتك !!!
جميلة : لا ابدا ، اهلا بحضرتك .
فارس : اولا الف مبروك لبنتك .
جميلة : الله يبارك في حضرتك .
فارس : انا كنت عايز اتكلم معاكي ، ممكن ولا اسببلك ازعاج ؟؟
جميلة : لا ابدا ، اتفضل يا استاذ فارس .
فارس : مش هينفع في التليفون ، ياريت لو تسمحيلي اعزمك علي حاجة ونقعد نتكلم ؟؟
الحلقة ٢
فارس : انا كنت عايز اتكلم معاكي ، ممكن ولا اسببلك ازعاج ؟؟
جميلة : لا ابدا ، اتفضل يا استاذ فارس .
فارس : مش هينفع في التليفون ، ياريت لو تسمحيلي اعزمك علي حاجة ونقعد نتكلم ؟؟
جميلة : اسفة جدا يا استاذ فارس مش هقدر .
فارس : ليه يا استاذة جميلة ، احنا هنقعد في مكان عام !!!
" صفحة ألف قصة وقصة صفحة كاتب الرواية "
جميلة : اعذرني انا ست مطلقة وعايشة لوحدي وميصحش اخرج واقعد مع رجل غريب !! انا اسفة جدا .
فارس : صدقيني مفيش فيها اي حاجة !!
جميلة : معلش سامحني ، ممكن حضرتك تقولي الموضوع اللي عايز تتكلم فيه دلوقتي في التليفون .
فارس : قولت لحضرتك مش هينفع في التليفون ، علي العموم فكري لحد بكره وصدقيني مفيش فيها اي حاجة ، هتصل بيكي بكرة وانتظر موافقتك .
جميلة : ممكن تقولي الموضوع اللي هنتكلم فيه بخصوص ايه ؟؟
فارس : صدقيني مش هينفع في التليفون ، هكلمك بكره .
جميلة : تمام .
فارس : ياريت تسجلي رقمي عندك .
جميلة : حاضر .
فارس : هتصل بيكي بكره بعد الضهر .
جميلة : تمام .
تنتهي المكالمة وتجلس جميلة تفكر ... لماذا يريد هذا الرجل الالتقاء بها وماهو الموضوع الملح الذي يريد التحدث فيه معها ؟؟! فعلاقتها به مجرد معرفة سطحية جدا !!
ثم تقوم بتسجيل رقمه علي هاتفها وتضعه بجوارها وتعود للتفكير ، وفجأة يرن هاتفها مرة اخري فتجد المتصل غرام ابنتها ...
جميلة : حبيبتي ، حبيبتي عاملة ايه يا غرام .
غرام : الحمد لله يا ماما ، انتي وحشتيني قوي قوي .
جميلة : وانتي كمان ، متتخيليش يا غرام انتي وحشتيني ازاي يا روحي .
غرام : انا وباسل راجعين بكره ان شاء الله .
جميلة : ترجعوا بالسلامة يا قلبي ، يعني اشوفك بكره ؟؟
غرام : احنا هنوصل بكره بالليل متأخر ، هجيلك انا وباسل بعد بكره الصبح ونقضي اليوم كله معاكي يا احلي ماما في الدنيا .
جميلة : هستناكي من دلوقتي يا قلب ماما .
في الكافيه
يجلس نور و ينظر في ساعته بين الحين والاخر ثم يتصل بها ...
نور : انتي فين يا دكتورة ؟؟
منار : انا خلاص داخلة علي الكافيه .
نور : اوكي ، انا منتظرك .
بعد دقائق تدخل منار وتجلس في مقابلته ...
نور : اتأخرتي قوي يا دكتورة !!!
منار " تضحك " : تعرف ان دي اول مرة اكشف علي عيان في كافيه !!
نور " يبتسم " : وانا كمان اول مرة اكشف عند دكتورة حلوة قوي كده !!!
منار " تبتسم " : انت جاي تكشف ولا تعاكس بقي ؟؟
نور " يضحك " : الصراحة جاي اعاكس .
تقف منار : يبقي المفروض امشي حالا .
نور : استني رايحة فين ؟!!
منار : علفكرة انا مش بقعد مع حد كده ، انا قبلت اجي دلوقتي علشان عارفاك انك اخو غرام صحبتي .
نور : انتي زعلتي ولا ايه ؟! انا لقيت في كيميا بينا علشان كده بهزر معاكي .
منار : اوكي ، قولي بقي يا استاذ نور كنت عايز تكلمني في ايه ؟؟
نور : الحقيقة اني من اول ما شوفتك وانا معجب بيكي .
منار : واااااو ، معجب مرة واحدة ؟!!
نور : يسسس ، انا فعلا من اول ما شوفتك معجب بيكي مش بهزر .
منار : من اول ما شوفتني في الفرح ولا لما شوفتني زمان في الكافية ؟؟
نور : لما شوفتك زمان كانت البداية انما شعوري اتأكد لما شوفتك في فرح غرام .
منار " تبتسم " : والمطلوب يا عم المعجب ؟؟
نور : اولا عايز اعرف انتي مرتبطة ولا لأ ؟؟
منار : ولو مرتبطة يا ذكي كنت هسمحلك تقولي الكلام ده كله ؟!!!!
نور : عندك حق ، طيب يا دكتورة ايه رأيك فيا ؟؟
منار " تضحك " : انسان .
نور " يضحك " : بجد ؟!! اول مرة اعرف !!!
منار " تبتسم " : عايز ايه من الاخر ؟ انت معجب ولا جاي تكشف ولا حكايتك ايه بالظبط ؟؟!!
نور : حكايتي ابتدت يوم ما شوفتك .
منار " تبتسم " : وااااو ، ده انت بتقول شعر كمان !!!
نور " يبتسم " : لما شوفتك بس .
منار : لاااا ، ده انت واضح عليك انك متمكن من الشعر ومتعود تقوله للبنات .
نور : هتصدقيني لو قولتلك عمري ما قولت الكلام ده لأي بنت ؟؟
منار : اشك !!
نور : لأ انا بقولك الحقيقة ، دي اول مرة اتكلم مع بنت الكلام ده .
منار " تضحك " : طيب قولي يا استاذ نور انت عايز ايه ؟ لخص يا عم ده احنا في عصر السرعة !!!
نور : عايز اتجوزك .
منار " يحمر وجهها خجلا " : تتجوزني مرة واحدة كده ؟!!
نور : نتخطب الاول و بعدها نتجوز .
منار : طيب ممكن تديني فرصة افكر ؟؟
نور : اوكي ، هسيبك عشر دقايق فكري برحتك .
منار " تضحك " : عشر دقايق !!!
نور " يضحك " : مش بتقولي اننا في عصر السرعة ؟ يلا لخصي !!
منار : لأ ، اديني فرصة اسبوع وارد عليك .
نور : كتير !!!
منار : لا مش كتير .
نور " يبتسم " : وعلشان خاطري ؟
منار " تضحك " : يبقي شهر .
نور " يضحك " : لأ خلاص ، اسبوع حلو قووي .
اليوم التالي ...
في منزل جميلة
تستيقظ جميلة من نومها علي صوت جرس هاتفهها ...
جميلة " بصوت ناعس " : الوو ، مين ؟؟
فارس : أسف اني ازعجتك .
جميلة " تنتبه " : لا ابدا يا استاذ فارس .
فارس : تقريبا انتي لسه نايمة ، هقفل واكلمك وقت تاني .
جميلة : لا ابدا ، انا صحيت خلاص .
فارس : انا بكرر اسفي .
جميلة : مفيش داعي للأسف يا استاذ فارس .
فارس : طيب يا تري ممكن نتقابل علي الساعة كام ؟
جميلة : اسفة يا استاذ فارس ، انا بجد مش هقدر ، انا عمري ما قابلت حد بالشكل ده !!
فارس : بردو ؟!!!
جميلة : انا اسفة بجد .
فارس : طيب فيه معرض بعد اربع ايام ، ممكن نتقابل فيه ؟؟
جميلة : تمام ، اذا كان كده مفيش مانع .
فارس : كويس جدا ، بس يا ريت وقتها متتشغليش بحاجة وتديني الفرصة علشان نعرف نتكلم .
جميلة : بأذن الله يا استاذ فارس .
فارس " يضحك " : انا هستني اليوم ده من النهارده .
جميلة : طيب ممكن تقولي الموضوع اللي هنتكلم فيه ؟
فارس : لما نتقابل .
في فيلا سلطان
تذهب شيماء لزيارة اختها شهد ...
شهد : اهلا يا شيمو وحشتيني قوي .
شيماء : ازيك انتي يا شهد .
شهد : مالك يا مالك يا شيماء ؟ شكلك زعلانة قوي !!
شيماء : الولد عشر ايام مفكرش يكلمني الا مرتين !!!
شهد : ماهو عريس يا شيمو ومشغول بعروسته .
شيماء : يعني ينساني كده ؟!! ينسي امه اللي ولدته وربته وعاش معها تسعة وعشرين سنة علشان عروسته ؟!!
شهد : لا طبعا ، لكن هما اليومين اللي في الاول فرحان بعروسته بعد كده هتبقي بالنسباله حاجة عادية وهتلاقيه كل يوم يكلمك .
شيماء : سلطان جوزك موجود ؟
شهد : لأ نزل الصبح راح الشركة مع نور .
شيماء : كويس انه مش هنا .
شهد : ليه ؟ في ايه ؟
شيماء : بصراحة انا ندمانة اني جوزت باسل للبنت دي .
شهد " بتعجب " : ليه ؟
شيماء : البنت مغرورة وشايفة نفسها ، نسيت نفسها ونسيت امها !!
شهد : لأ انتي ملكيش حق البنت بصراحة طيبة و متواضعة و مش شوفت عليها اي غرور !!!
شيماء : هتفضلي طيبة وعبيطة طول عمرك .
شهد : انا ؟!! ليه بقي ؟
شيماء : علشان فاكرة الناس كلهم طيبين زيك .
شهد : هي عملت ايه علشان تقولي انها مغرورة ؟؟
شيماء : انا اللي هعمل وهتشوفي .
شهد : هتعملي ايه ؟
شيماء : لازم اعرفها مقامها كويس وتعرف هي متجوزة ابن مين وتعرف حدودها فين .
شهد : شكلك ناوية للبنت علي نية !! لكن خلي بالك سلطان مش هيسمح لحد انه يزعل بنته !!!
شيماء : لما بنته تكون غلطانة مش هيقدر يتكلم .
في اليوم التالي
في منزل جميلة
تستيقظ جميلة علي صوت دقات جرس الباب .
تفتح جميلة الباب فتجد ابنتها غرام وباسل .
جميلة : غرررام ، وحشتيني قوي .
وضمها اليها بقوة وحنان .
غرام : وحشتيني قوي قوي يا ماما .
جميلة : ادخلي يا حبيبتي ، تعالي يا باسل اتفضل يا ابني .
يجلسون جميعا ...
باسل : ازيك يا طنط ، وحشتينا قوي ، غرام طول الوقت مش بتجيب الا سيرتك .
جميلة : غرام مش بنتي بس يا باسل ، غرام بنتي واختي وامي وصحبتي .
باسل : ربنا يخليكوا لبعض يا طنط .
غرام : ماما دي يا باسل اعظم ام ممكن تسمع عنها طول حياتك ، انا متأكدة انك لما تعرفها اكتر هتحبها زي ما انا بحبها واكتر .
باسل " يضحك " : انا كده هبدأ اغير من طنط .
جميلة : لا يا حبيبي ، ربنا يسعدكم ، انا اسعد يوم في حياتي لما اشوفكم مبسوطين وسعداء ومرتاحين .
غرام : ايه رأيك يا باسل نيجي نعيش هنا مع ماما ؟
باسل " باحراج " : مش معقول يا غرام نعيش مع طنط ونضايقها !! اكيد طنط تحتاج تاخد راحتها في بيتها .
غرام : بالعكس ماما هتكون مبسوطة قوي لو عيشنا معها .
باسل " مغيرا للموضوع " : انتي اجازتك من الشغل هتخلص امتي يا حبيبتي ؟
غرام : بعد اربع ايام .
باسل : انا كمان اجازتي هتخلص كمان اربع ايام ، ياااه الايام الحلوة بتمشي بسرعة قوي .
جميلة : ربنا يحلي ايامكم كلها يا ابني .
بعد ثلاثة ايام
في المعرض ...
تذهب جميلة الي المعرض ومازالت الحيرة تتملكها حول فارس المصري !!
بمجرد دخول جميلة ينهض فارس من مقعده ويتجه اليها .
فارس : اهلا وسهلا جميلة هانم .
جميلة : اهلا بيك استاذ فارس .
فارس : تعالي اتفضلي ، انا حاجز المكان ده علشان نقعد فيه في هدوء .
تجلس جميلة ويبدو عليها قليلا من التوتر وتسأله : خير يا استاذ فارس ؟
فارس : تشربي ايه الاول ؟
جميلة " تبتسم " : تصدق يا استاذ فارس ان من يوم ما كلمتني وانا بفكر حضرتك عايز تكلمني في ايه !!!
فارس : ويا تري عرفتي ولا لسه ؟
جميلة : الحقيقة لسه !!
فارس : تحبي تشربي لمون علشان يهدي توترك ؟؟
جميلة " تبتسم " : واضح عليا للدرجادي اني متوترة ؟!!
فارس : يعني ، الي حد ما .
جميلة : يبقي اشرب لمون ، يا تري حضرتك عايز تكلمني في ايه ؟؟
فارس : الحقيقة انا عارف انك متعرفيش عني الا اسمي والاعمال اللي بنفذها مش اكتر .
جميلة : فعلا .
فارس : اسمحيلي اعرفك بنفسي اكتر ، انا عمري دلوقتي اتنين وخمسين سنة وعندي ولدين وبنتين والحمد لله كلهم اتجوزوا واطمنت عليهم .
جميلة : ربنا يبارك في عمرك و يديلك الصحة ويخليلك اولادك .
فارس : والدة الاولاد توفيت من اربع سنين وكان لسه ابني الصغير مش اتجوز ، والحمد لله جوزته من كام شهر واطمنت عليه ، ودلوقتي انا عايش وحيد .
جميلة : دي سنة الحياة واكتر حاجة بتسعدنا لما نطمن علي اولادنا .
فارس : طبعا لكن احساس الوحدة بيكون صعب خصوصا لما الانسان يبتدي يكبر .
جميلة : لكن حضرتك لسه مش كبير للدرجة وممكن تخرج وتنطلق ومع ممارستك للفن اكيد هتلاقي حاجات كتير تشغلك ومش هتحس بالوحدة .
فارس : لكن الانسان بيحتاج لونيس يملا عليه حياته !!
جميلة : ده بيختلف من انسان للتاني .
فارس : لكن انا من يوم ما شوفتك وانا معجب بيكي .
جميلة " يحمر وجهها خجلا " : احم احم ، حضرتك تقصد معجب بلوحاتي .
فارس : لا يا جميلة انا معجب بيكي انتي
يتبع