رواية غرام السلطان الجزء الثاني2 الفصل الثالث3 والرابع4 بقلم عادل عبد الله
جميلة " يحمر وجهها خجلا " : احم احم ، حضرتك تقصد معجب بلوحاتي .
فارس : لا يا جميلة انا معجب بيكي انتي .
جميلة : تقصد ايه ؟
فارس : اقصد اني اكون سعيد جدا لو قبلتي نتجوز .
جميلة " بدهشة ممزوجة بخجل " : نتجوز !!!
فارس : ايوه ، احنا الاتنين بيجمعنا نفس شعور الوحدة بعد جواز بنتك ، ده غير ان اهتمامتنا فنية زي بعض ، اعتقد اننا ممكن يكون بينا توافق ونعيش حياة هادية وسعيدة .
جميلة : لكن انا مبفكرش في الجواز !!
فارس : ياريت تفكري ، صدقيني انا بقدرك جدا واتمني من كل قلبي انك توافقي وتديني الفرصة اسعدك والاقي سعادتي معاكي .
جميلة : انا يا استاذ فارس .....
فارس : ارجوكي يا جميلة فكري قبل ما تردي عليا ، خدي وقتك وفكري برحتك وانا منتظر ردك واكون اسعد انسان في الدنيا لو وافقتي .
في منزل غرام و باسل
يجلس باسل مع زوجته غرام في اجواء رومانسية وسط اضواء الشموع ثم يفاجئ باتصال من والدته ...
شيماء : ازيك يا باسل ؟ كده ياباسل تعدي الايام دي كلها ومسمعش صوتك غير مرتين !!!
باسل : اسف يا حبيبتي حاولت اتصل بيكي كتير لكن الشبكة كانت مش بتجمع .
شيماء: بتضحك عليا يا واد ؟ شبكة ايه اللي مش بتجمع !!
باسل " يضحك " : معلش يا ماما سامحيني ، من هنا وجاي هتزهقي مني اتصالات .
شيماء : رجعتوا من السفر ولا لسه ؟
باسل : ايوه رجعنا يا ماما .
شيماء : انا عازماكم بكره علي الغدا .
باسل : حاضر يا ماما .
يغلق باسل محادثته مع والدته ثم يقول : ماما بتسلم عليكي يا غرام وعزمانا علي الغدا بكره عندها .
غرام " باقتضاب " : لازم نروحلها ؟!
باسل : طبعا يا حبيبتي علشان متزعلش .
غرام : طيب ما تروح انت ؟!!
باسل : مينفعش يا حبيبتي ماما تزعل .
غرام : خلاص روحلها انت .
باسل : واشمعني روحت معاكي عند مامتك ؟؟!!
غرام : خلاص يا باسل هروح معاك وامري لله .
باسل : غرام مش عايزين العلاقات مع اهلنا تكون متوترة كده من اولها !!
غرام : انت مشوفتش مامتك كانت بتبص عليا وعلي ماما ازاي في الفرح ؟
باسل : ياريت بلاش ناخد كل حاجة بحساسية كده علشان زي ما قولتلك علاقتنا بأهلنا متتوترش من اولها .
غرام : حاضر يا باسل انا هعمل اللي يرضيك ، اهم حاجة مامتك تتعامل معايا بشكل طبيعي وتنسي خلافاتها القديمة مع ماما .
في منزل جميلة
تعود جميلة من المعرض بعدما استطاعت لباقته وشياكته في الحديث جذبها اليه كثيرا .
بدلت ملابسها وجلست امام المرآه تفكر جديا في الأمر ...
ماذا عن باقي عمرها ؟ احقا تستطيع ان تعيشه وحيدة ؟!! لقد مر اسبوعان شعرت فيهم بالملل والوحشة كثيرا فماذا لو اطال الله عمرها لثلاثين او اربعين عاما ؟!!!
فارس ذلك الفنان الموهوب الذي لم تعرفه من قبل الا عن بعد ، ياله من رجل يتمتع بالكثير من اللباقة والذكاء والشياكة والاحترام !! هل هو فرصة حقيقية لتعيش المتبقي من حياتها بعد سنوات طويلة من الحرمان ؟ ام سيكون سبب لتحول نظر المحيطين بها واولهم ابنتها غرام لها من امرأة عصامية مكافحة وام مثالية قهرت ظروفها واستطاعت تجاوزها الي نظرة اخري كأمرأة سطحية لا يهمها من حياتها سوي الفوز ببعض المتعة والملذات ؟!!!
وماذا عن سلطان ؟؟ لماذا افكر فيه احيانا الي الان ؟! لماذا عاد الان بعد ما وجدته منه من خذلان ؟؟! ولماذا يتمسك الي الان بي ولا يريد ان يكون الطلاق رسمية ؟؟
وماذا لو علم سلطان بظهور فارس في حياتي ؟؟
في منزل شيماء
تستقبل شيماء ابنها باسل وزوجته غرام ...
شيماء : حبيبي يا باسل اهلا يا حبيبي ، انا زعلانة منك قوي .
باسل : ازيك يا ماما وحشتيني قوي .
شيماء : لااا كداب لو كنت وحشتك حقيقي كنت اتصلت بيا وسألت عني !!
باسل : خلاص يا ماما بقي علشان خاطري .
شيماء : حاضر يا باسل هسامحك المرادي ، لكن بعد كده لو حسيت ان عروستك نسيتك امك هزعل منك بجد ، ازيك يا عروسة ؟
غرام : الله يسلمك يا طنط .
شيماء : اوعي يا عروسة تنسي باسل امه اللي ربته و خلته راجل ملو هدومه !!
غرام : لا يا طنط متخافيش ، مفيش حد بينسي حد اهله .
شيماء : صح عندك حق ، بمناسبتك اهلك زوتي امك ولا لسه ؟
غرام : ايوه زورناها البارح .
شيماء : طبعا لازم تزوري امك الاول ، مش زي البيه ابني اللي راح يزور حماته قبل امه !!!
باسل : هنا او هناك الاول مش هتفرق المهم اني اشوفك يا ست الحبايب ، كفاية عتاب بقي علشان جعان ومش عايز الزعل يسد نفسي .
شيماء : هي العروسة مش بتأكلك ولا ايه يا عريس ؟ مش المفروض تهتمي بغذا عريسك يا عروسة ولا عايزة تخلصي عليه ؟!!
غرام تنظر لها ولباسل بسخط وغضب !!!
باسل : لا يا ماما الحقيقة غرام بتعمل اكل حلو قوي .
شيماء : يعني اكلها احلي من الاكل اللي انا بعملهولك ؟!!!
باسل " بأحراج " : لا طبعا انتوا الاتنين اكلكم يجنن !!
شيماء : طيب انا عملتلك الاكل اللي بتحبه يا حبيبي ، قومي يا عروسة حضري السفرة .
غرام : لكن انا معرفش حاجة في مطبخك يا طنط !!
شيماء : تعالي يا حبيبتي وانا اعرفك .
تنتهي زيارة باسل وغرام لوالدته وبمجرد مغادرتهما منزلها يسألها باسل : مالك يا غرام ؟ شكلك متضايقة !!
غرام : شوفت يا باسل مامتك بتكلمني ازاي !!
باسل : معلش يا قلبي ، ماما طبعها حاد شوية لكن طيبة واكيد مع الوقت هتحبيها .
غرام : انت شايف كده ؟!!
باسل : ايوه يا قلبي .
غرام : الحقيقة انا مش شايفة كده خالص .
باسل : قصدك ايه ؟ يعني انا ماما مش طيبة ؟؟
غرام : بص يا باسل احنا اتجوزنا واحنا عارفين من البداية ان فيه مشاكل عائلية بين الاسرتين وخصوصا بين ماما ووالدتك يبقي الافضل بلاش اختلاط احسن علشان علاقتنا تستمر في هدوء .
بعد عدة ايام ...
نور يتصل بمنار .....
نور : صباح الخير علي اجمل دكتورة .
منار : صباح النور .
نور : اجيب بابا واجيلكم امتي ؟
منار : تشرفوا في اي وقت .
نور : بجد ؟ يعني وافقتي ؟
منار : وافقت علي ايه يا بني ؟ انت ما صدقت !!!
نور : مش لسه بتقولي تشرفوا في اي وقت !! معناه ايه ده يا متعلمة يا بتاعت المدارس .
تضحك منار بصوت عالي وتقول : يا عم انا قصدي ان بيتنا بيت كرم مفتوح لأي حد يدخل وياخد واجبه ويمشي .
نور : لأ انا بقي قصدي اننا نيجي نخطبك .
منار " تضحك " : مش لما اقولك اني وافقت الاول !!
نور " يضحك " : انا عارف انك اكيد هتوافقي ، انا عارف نفسي عريس مترفتش .
منار " تضحك " : ايه يا بني الغرور اللي انت فيه ده ؟!!
نور " يبتسم " : دي ثقة في النفس مش غرور .
منار " تضحك " : طيب يا عم الواثق لسه بفكر ، اتصل بيا بعدين .
نور : ليه يا دكتورة ؟؟
منار : اديني وقتي بليز .
نور : طيب يا دكتور انا مريض وعيان قوي ، ممكن تكشفي عليا ؟
منار : اتفضل روح المستشفي .
نور " يضحك " : لا بعد اذنك يا دكتورة عايز كشف خصوصي .
منار " تضحك " : بطلنا كشوفات خصوصية يا استاذ ، يحنن .
نور : ولو قولتلك علشان خاطري ؟
منار " تبتسم " : افكر .
نور : هستناكي بعد ساعة في نفس الكافيه .
منار : بعد ساعة ايه !! استني .
نور : هستناكي بعد ساعة ، باي .
في الكافيه ...
تذهب منار ولا تجد نور وتظل تتلفت حولها لدقائق حتي يدخل نور من الباب معتذرا لها : اسف اني اتأخرت .
منار : انا لسه جاية حالا وكنت همشي علطول .
نور : كنت هزعل قوي لو عملتي كده .
منار " تضحك " : قول يا مريض تشتكي من ايه علشان مستعجلة .
نور : قلبي .
منار : ماله ؟
نور : تعبان من يوم ما شوفتك .
منار : سلامته .
نور : سلامته كده مش كفاية .
منار : اومال عايز ايه ؟
نور : هاتي ايدك علي قلبي .
منار " بدهشة " : انت اتجننت .
نور : لأ لسه ، بس خلاص قربت اتجنن .
منار : طيب اعقل كده ، بدل ما اسيبك وامشي .
نور : هتمشي قبل ما تكشفي عليا وتعالجيني ؟
منار : انت بتتدلع يا مريض .
نور : لا انا فعلا قلبي واجعني وعلاجه عندك .
منار : علاجه عندي انا ؟!!
نور : ايوه .
منار : انا معرفش علاجه !! لو قولتلي علاجه ايه ممكن اساعدك .
نور : علاجه انك توافقي نتجوز .
منار : هو ده علاجه ؟
نور : ايوه .
منار : طيب يا عم موافقة وامري لله .
نور : بتتكلمي بجد ؟
منار : ايوه .
قام نور واقترب منها وكاد ان يحت.ضنها !!!
منار " بدهشة " : انت اتجننت !! ابعد .
نور : اسف ، انا وبابا هنروح لباباكي النهاردة .
منار : بعيد الشر عنك وعن باباك ، بابا متوفي .
نور : اسف سامحيني .
منار : اوكي ، علفكرة بابا متوفي من زمان .
نور : الله يرحمه ، طيب انا وبابا هنقابل مين ؟؟
منار : تقابلوا عمي ، لكن لازم اقوله واعرفه الاول
نور : تمام ، حددي ميعاد مع عمك وانا هكلم بابا وماما النهاردة
الحلقة ٤
في فيلا سلطان
يعود نور في المساء بينما تبدو عليه علامات السعادة واضحة .
شهد : حمدلله ع السلامة يا حبيبي ، يارب دايما اشوفك فرحان كده .
نور : عرفتي ازاي اني فرحان ؟ انا فعلا فرحان قوي قوي يا ست الكل .
شهد : فرحني معاك يا حبيبي .
نور : انا عايز اتجوز يا ماما .
شهد : يا حبيبي يا نور عيني ، ده اجمل خبر سمعته في حياتي ، ومين العروسة ؟
نور : منار صاحبة غرام .
شهد : انت تعرفها منين ؟
نور : شوفتها في فرح غرام .
شهد : ولحقت تقرر تتجوزها بمجرد انك شوفتها في الفرح ؟!!
نور : فاكرة لما قولتلك انتي وبابا استنوا لما اتأكد من مشاعري كنت اقصد البنت دي ، وكلمتها وعرضت عليها الجواز ووافقت .
شهد : تعرف هي مين واهلها مين ؟
نور : بنت ناس كويسين قوي يا ماما .
شهد : خلاص يا حبيبي ربنا يسعدك ، انا هطلع اقول لباباك دلوقتي ونحدد ميعاد مع اهلها وربنا يتمم بخير .
بعد ايام ...
يتصل سلطان بابنته غرام ويعاتبها ...
سلطان : عاملة ايه يا غرام وجوزك عامل ايه معاكي ؟
غرام : الحمد لله يا بابا كويسين .
سلطان : كده يا غرام مفيش ولا اتصال واحد منك !!!
غرام : حقك عليا يا بابا انا فعلا قصرت في الاتصال بحضرتك .
سلطان : انتي كنتي مهتمية بيا بس في المستشفي انما بعد خروجي من المستشفي مش بشوفك الا في المناسبات زي الاغراب !!!
غرام : ابدا يا بابا ، حضرتك عارف اني محتاجة احساس الابوة ده من زمان وما صدقت اتقابلنا !!
سلطان : طيب هاتي باسل جوزك وتعالوا بكره نتغدا هنا في الفيلا مع بعض .
غرام : سامحني يا بابا خليها وقت تاني ، انا مش عايزة اسبب لطنط شهد ازعاج .
سلطان : مفيش اي ازعاج ، تحبي اخليها هي اللي تكلمك وتعزمك ؟؟
غرام : لا يا بابا من فضلك حضرتك عارف ان الموقف حساس بيني انا وماما من ناحية وطنط شهد و طنط شيماء من ناحية تانية .
سلطان : عايزين ننسي الكلام ده ، المفروض جوازك انتي وباسل يقرب المسافات ويلغي اي اثر للخلافات القديمة .
غرام : معلش يا بابا ، سيبني علي راحتي ، يا ريت حضرتك تيجي تتغدا معايا انا وباسل .
سلطان : موافق بس بشرط تعزمي مامتك كمان .
غرام : ماما !!! ليه ؟
سلطان : علشان تحسي بالجو الاسري اللي اتحرمتي منه من زمان .
غرام : لأ الحقيقة معرفش ظروف ماما هتكون ايه بكره ، تعالي حضرتك بكره وهشوف انا ظروف ماما ايه .
تتصل غرام بجميلة ...
غرام : صباح الخير يا احلي ماما في الدنيا .
جميلة : صباح النور يا حبيبتي ، عاملة ايه يا حبيبتي واخبارك ايه ؟
غرام : الحمد لله بخير يا ماما ، وحشتيني قوي .
جميلة : انتي اكتر يا قلب ماما .
غرام : ايه رأيك تيجي تتغدي عندنا النهاردة ؟
جميلة : مش عارفة يا غرام هعرف ولا لأ .
غرام : انتي وراكي حاجة النهاردة ؟
جميلة : انا مش هخرج ، ورايا بس لوحة لسه مش كملتها .
غرام : يبقي هستناكي النهاردة علي الغدا .
جميلة : طيب هشوف وارد عليكي كمان ساعة .
غرام : علفكرة بابا هيكون موجود .
جميلة : سلطان !!! مش هاجي طبعا .
غرام : ليه يا ماما ؟
جميلة : من غير ليه ، انتي عارفة .
غرام : ده هو اللي طلب مني اعزمك لما عزمته عندي .
جميلة : غرام يا حبيبتي ، انتي عارفة رأيي كويس من قبل ما تقوليلي واكيد كنتي عارفة اني هرفض .
غرام : خلاص يا ماما اللي تشوفيه .
جميلة : يا ريت وهو عندك تفكريه يطلقني رسمي .
غرام : حاضر يا ماما .
في اليوم التالي
يذهب سلطان الي شقة غرام وباسل فلا يجد جميلة !!!!!
سلطان : اخباركم ايه يا عرسان ؟ يارب تكونوا مبسوطين .
غرام : الحمد لله يا بابا مبسوطين قوي ودلوقتي فرحانين اكتر بوجودك وسطنا .
سلطان : مامتك هتيجي ولا لأ ؟؟
غرام : الحقيقة انا قولتلها لكنها اعتذرت .
سلطان " بسخط " : اعتذرت !! ليه ؟؟
غرام : وراها شغل النهاردة .
سلطان : شغل !! انتي قولتلها اني هكون موجود ؟
غرام : هي اعتذرت قبل ما اقولها ولما قولتلها اعتذرت بردو .
سلطان : طيب حصل خير ، المهم اخباركم ايه يا ولاد ؟ هتفرحونا قريب ولا ايه ؟؟ انا نفسي اشوف حد يقولي يا جدو قبل ما امو.ت .
غرام : بعيد الشر عنك يا بابا ، لسه شوية ، طيب يلا جوز نور علشان تفرح باولاده كمان ، منار صاحبتي كلمتني ان نور عايز يتجوزها .
سلطان : ايوه فعلا وكنا لسه عند مامتها وعمها البارح واخوكي لبسها الشبكة والفرح بعد شهرين في نفس الفندق اللي عملنا فيه فرحك انتي وباسل .
باسل : ألف مبروك يا اونكل ربنا يتمم بخير .
سلطان : الله يبارك فيك يا باسل ، ربنا وحده اللي يعلم اني بحبك زي اولادي نور وغرام بالظبط .
باسل : وانا كمان يا اونكل بحب حضرتك زي بابا بالظبط .
غرام : بابا ، حضرتك لغاية دلوقتي لسه مش طلقت ماما رسمي ؟؟
سلطان : ايوه فعلا .
غرام : بعد اذنك يا بابا ياريت حضرتك تطلقها رسمي .
سلطان : وهي محتاجة ورقة الطلاق في ايه ؟
غرام : معرفش ، لكن ده حقها .
سلطان : انا كنت بفكر اننا نلم الشمل ، وبدل ما هي عايشة وحيدة نرجع لبعض .
غرام : حضرتك يا بابا طلبت منها قبل كده وهي قالتلك رأيها .
سلطان : بيتهيألي لو انتي قولتلها ممكن يكون ليكي تأثير عليها وتوافق .
غرام " باحراج " : حاضر يا بابا ، احاول .
بعد انصراف سلطان
تتصل غرام بجميلة...
غرام : ماما ، انا كلمت بابا وقولتله انك عايزة ورقة الطلاق الرسمية ، قالي انه عايز يرجعلك .
جميلة : وانتي قولتيله ايه ؟
غرام : قولتله انك سبق ورفضتي لكنه طلب مني اقولك تاني !!
جميلة : وانا مش هرجعله تاني يا غرام .
غرام : ليه يا ماما ؟! معلش اسمحيلي اقولك رأيي وانتي صاحبة القرار .
جميلة : ارجعله ازاي يا غرام بعد كل اللي انتي تعرفيه ؟!!!
غرام : لكن انتي يا ماما بتحبيه !! انا متأكدة يا ماما من ساعت لما شوفتك خايفة وقلقانة علي بابا في المستشفي !!
جميلة : انا كنت قلقانة بحكم انه باباكي يا غرام ، وبحكم ان فيه عشرة بينا ولو لفترة بسيطة ، انما مستحيل ارجعله يا غرام ، ويا ريت تقوليله يطلق رسمي في اقرب وقت .
بعد عشرة ايام ...
تفاجئ جمبلة باتصال من فارس !!!
فارس : ازيك يا استاذة جميلة ، اسف لو اتصلت في وقت مش مناسب .
جميلة : لا ابدا انا كنت قاعدة برسم .
فارس " يضحك " : ممكن اعرف اخر ابداعات فنانتنا العظيمة ؟ ولا ده سر ؟
جميلة " تضحك " : لا ابدا مش سر ولا حاجة ، انا برسم لوحة و سميتها الشمس .
فارس : حلو الاسم لكن اسم شائع ، و يا تري رسمتي فيها ايه لوحة الشمس ؟ وليه سمتيها الشمس تحديدا ؟
جميلة : اللوحة عبارة عن بنت جميلة لكنها حزينة ووحيدة وضعيفة وبتبص من الشباك علي الشمس وقت الشروق ، سميتها الشمس لأن الشمس بالنسبة للبنت دي هي مصدر القوة والامل والتفاؤل ودي كل الحاجات اللي محتاجاها البنت دي .
فارس : جميلة جدا ، تعرفي اني تخيلت الصورة قدامي كأني شايفها .
جميلة : لما اخلصها ممكن اصورها وابعتهالك .
فارس : ياريت .
جميلة : حاضر يا استاذ فارس تحت امرك .
فارس : يا تري عملتي ايه في الكلام اللي اتكلمنا فيه ؟ وصلتي لقرار ولا لسه ؟
جميلة : الحقيقة انا فكرت كتير يا استاذ فارس ، لكن معلش انا فعلا مش رافضة شخص حضرتك ، حضرتك انسان محترم ومهذب و راقي واي ست لو بتفكر تتجوز هتكون انت انسب حد تربط حياتها به ، لكن انا رافضة الفكرة نفسها مش رافضة حضرتك .
فارس : يعني مفيش امل تعيدي التفكير ؟؟
جميلة : اسفة يا استاذ فارس .
فارس : طيب ممكن نكون اصدقاء ؟
جميلة : اصدقاء !! الحقيقة انا مش بعترف بصداقة بين رجل وست !!!
فارس : ليه ؟ مادام فيه احترام متبادل ليه لأ ؟!!
جميلة : احنا في مجتمع بيرفض صداقة الرجل والست ودايما بيفسرها بمعني واحد ، وانا مقدرش اكون محل شك او اتهام زي ده من اي حد .
فارس : ولو قولتلك اني محتاج صداقتك ليا ؟؟
جميلة : انا ااا..
فارس : انتي مش وافقتي علي اي طلب طلبته منك با مدام جميلة ، ارجوكي نفسي اطلب منك طلب وتوافقي عليه ، ممكن نكون اصدقاء ؟
جميلة : وحضرتك تقبل ان حد يتكلم عني كلام مش كويس ؟؟
فارس : بالتأكيد لأ ، لكن حتي لو علي الاقل نكون اصدقاء ولو بأتصال ولو بسؤال !! ارجوكي بلاش ترفضي طلبي ده .
جميلة تصمت طويلاااااا .
ثم يكمل فارس : استاذة جميلة ، قولتي ايه ؟ هتكسفيني تاني ؟!!!
جميلة " تبتسم " : للأسف مش هقدر .
فارس : وانا اوعدك انك مش هييجي يوم وتندمي انك وافقتي علي صداقتك ليا .
جميلة " تبتسم " : وانا متأكدة من كده
يوم فرح نور ومنار ...
في ذات قاعة فرح غرام وباسل يجتمع الاهل والاصدقاء لتهنئة العروسين .
الموسيقي الصاخبة والشباب والفتيات يرقصون ويتمايلن ويغنون الاغاني الشبابية بينما يقف باسل و غرام في المنتصف بين العريس اخيها نور والعروس صديقتها منار ، ثم تضحك غرام : اظن انا صاحبة الفضل عليكم انتوا الاتنين اليلة دي .
نور " يضحك " : ليه ان شاء الله ؟
غرام " تضحك " : علشان انا السبب انكم عرفتوا بعض .
يضحك باسل ويقول : لأ يا غرام ، الحقيقة ان السبب انهم يعرفوا بعض اخويا بسام !!!!!
يصمتوا جميعا في آن واحد من هول صد.متهم اثر كلمته