رواية غرام السلطان الجزء الثاني2 الفصل التاسع9 والعاشر10 بقلم عادل عبد الله
وبعد اقل من ساعة كانت شيماء قد وصلت الي المستشفي و بعدها بقليل وصلت شهد ومعها سلطان !!!
بمجرد ان رأت جميلة سلطان ابتعدت عن المكان وجلست وحيدة !!!
شعرت جميلة ببعض الارتباك والتوتر فقامت بالاتصال بفارس !!!!!!!!!
جميلة : انت فين يا فارس ؟
فارس : في البيت ، مالك يا جميلة فيه ايه ؟
جميلة : انا بنتي بتولد في المستشفي وخايفة قوي عليها .
فارس : قوليلي اسم المستشفي وحالا اكون عندك .
بمجرد رؤية شهد لجميلة بدأت تركز انتباهها علي سلطان !!!
حينما وصل سلطان كان يعلم بالتأكيد انه سيري جميلة هناك ، لذلك بمجرد دخوله كانت عيناه تبحثان عن جميلة !!
ظل يرمقها بنظراته لكنه انتبه سريعا لتركيز شهد معه !!!
نادي سلطان علي باسل وسأله : ايه الاخبار يا باسل ؟ غرام فين ؟
باسل : الدكتور قال لازم تولد النهاردة ، هي جوه مع الدكاترة .
سلطان : ربنا يقومها بالسلامة ان شاء الله .
شهد : ربنا يقومها بالسلامة يا باسل .
باسل : نور مجاش معاكم ليه ؟
شهد : منار مراته جاية دلوقتي ،وهو هيخرج من الشغل وييجي .
ثم تضحك شهد وتقول : هتبقي جدة يا شيمو .
شيماء " تضحك " : عقبالك يا شوشو .
تبدو علي ملامحها وملامح سلطان الحزن ، ثم تبتسم : ان شاء الله .
شيماء : انا اسفة ، ان شاء الله ربنا يفرحكم بخلفة نور قريب .
شهد : جميلة قاعدة بعيد ليه ؟؟
شيماء : كانت معنا هنا من شوية ، اول لما دخلتم مشيت !!
سلطان : ممكن تكون ....
شهد : انا هقولها تيجي تقعد معنا .
ثم قامت شهد وذهبت اليها وتكلمت معها قليلا ثم عادت اليهم .
شهد : بتقول ان اعصابها تعبانة و عايزة تقعد لوحدها .
شيماء : سيبوها براحتها .
بعد قليل يأتي فارس ويذهب الي جميلة ويسلم عليها ويجلس بجانبها !!!
سلطان " بدهشة " : مين ده ؟
شهد : ده الفنان فارس المصري ، انت متعرفوش ؟!!
سلطان : لأ ، ويعرف جميلة منين ؟
شيماء : ده كان موجود في فرح الاولاد .
شهد : ايوه شوفته في الفرح ، لكن ايه اللي جابه هنا دلوقتي ويعرف جميلة منين ؟؟
سلطان : روح يا باسل شوفه عايز ايه وبيكلم حماتك في ايه ؟؟
يذهب اليهم باسل ويصافحه ويتكلم معهم قليلا ثم يعود .
باسل : طنط جميلة بتقول انه صديق لها و جايلها يطمن علي غرام !!!
حاول سلطان ان يتظاهر بالهدوء وعدم الاهتمام امام شهد ، ولكنه كان يخفي داخله سخطا شديدا خاصة انه كان يحب جميلة ويعدها احدي ممتلكاته !!!
جميلة تحاول تجاهل وجود سلطان وشهد وشيماء تماما وتندمج في الحديث مع فارس !!!
شهد تراقب في صمت عيون سلطان وتصرفات جميلة و صديقها فارس !!!
شيماء تتكلم مع شهد التي تتجاهلها بينما نظراتها تراقب الجميع في ظل دهشتها من علاقة جميلة بالفنان المعروف !!!
باسل يقف توترا في انتظار دخول غرام غرفة العمليات لاجراء عملية الولادة !!
في تلك اللحظات تأتي منار الي المستشفي للأطمئنان علي صديقتها واخت زوجها ...
منار : طمنيني يا طنط غرام ولدت ولا لسه ؟
شهد : لسه ، ادعيلها يا منار بيقولوا ولادتها صعبة قوي .
منار : ربنا يقومها بالسلامة .
تقف جميلة وتحاول تجاهل وجودهم تماما .....
جميلة : مش عارفة اقولك ايه ، انا اسفة اني اتصلت بيك بس كنت محتاجة حد يكون جنبي في الوقت ده .
فارس " يضحك " : ده اسعد يوم في حياتي النهاردة .
جميلة " بدهشة " : ليه ؟!!
فارس : علشان افتكرتيني في الوقت ده بالذات ، احنا بنفتكر الناس القريبين مننا في الاوقات دي .
جميلة " تبتسم " : انا قلقانة قوي علي غرام !!
فارس : ان شاء الله تقوم بالسلامة وتطمني عليها .
بعد ساعتين .....
يخرج الاطباء مبتسمين ... الف مبروك يا جماعة ولد زي القمر .
جميلة : وبنتي عاملة ايه ؟؟
الطبيب : دكتورة غرام كويسة لكن لازم تفضل تحت الملاحظة يومين .
باسل : الحمد لله ، والبيبي كويس ؟؟
الطبيب : ايوه كويس زي الفل .
يسجد باسل شكرا لله ثم ينهض ويدخل الي غرفة غرام مع باقي الموجودين .
جميلة تحمل الطفل وتقبله ودموع الفرح تملأ وجهها ثم تعطي الطفل لباسل وتقول : الف مبروك يا ابني ، خد شيل ابنك .
يبتسم باسل وينظر لغرام ويقول : ما شاء االه ، سلطان الصغير قمر زي مامته بالظبط .
غرام : لأ ، ده كله شبه ماما .
سلطان : انتوا هتسموه سلطان ؟؟
باسل : ايوه يا اونكل ، انا وغرام اتفقنا نسميه سلطان علي اسم حضرتك .
يمسك سلطان الطفل الصغير ويضمه اليه برفق و دموع الفرحة تملأ عينيه .
شيماء : الف مبروك يا باسل يتربي في عزك يا حبيبي .
باسل : الله يبارك فيكي يا ماما .
شهد : الف مبروك يا باسل ، الف مبروك يا غرام ، الف مبروك يا جماعة يتربي في عز ابوه وجده .
ثم تخرج شهد ناسية غيرتها علي سلطان وناسية كل شيئ ، ولا تشعر الا بالحزن علي ابنها !!!!! تنساب دمعاتها ثم تحاول اخفائها وتمسك بهاتفها وتتصل به ...
شهد : حبيبي انت فين ؟
نور : في الشركة ، ليه ؟
شهد : انت مش عارف ان اختك بتولد النهاردة والمفروض تكون جنبها ؟!!
نور : وانا اعملها ايه ؟؟ هو انا اللي هولدها ؟!!!
شهد : يا ابني بردو الاصول كده علشان اختك متزعلش وكمان باباك .
نور : كفاية وجودكم ، مش منار معاكم ؟؟
شهد : ايوه .
نور : خلاص ، هي كفاية ، سلام يا ماما علشان ورايا شغل .
شعرت شهد بحجم المعاناة التي يعانيها نور حزنا والذي تطورت لتصبح اشبه ما يكون بالغل والاحقاد !!!!!
تذكرت شهد وجود جميلة فعادت سريعا الي غرفة غرام .
انصرف الجميع بعد الاطمئنان علي غرام .
انصرفت شهد مع سلطان و حاولت ان تخفي حزنها ...
شهد " تصطنع الابتسامة " : الف مبروك يا جدو .
يضحك سلطان : الله يبارك فيكي يا حبيبتي .
شهد : مفاجأة حلوة انهم سموا الولد سلطان .
سلطان : بصراحة فرحت قوي .
شهد " بمكر " : ايوه فرحتك بسلطان الصغير مسحت غضبك !!
سلطان : غضبي !!! وهغضب ليه ؟؟
شهد : لما شوفت فارس المصري !!
سلطان : مين قالك اني غضبت ؟؟ و هغضب او اتضايق ليه ؟؟
شهد : علشان شوفته واقف مع جميلة .
سلطان : شهد ارجوكي بلاش اوهام ، بلاش تضيعي فرحتي بسلطان الصغير .
شهد : ربنا يفرحك يا حبيبي ، ثم تضحك : يا جدو .
سلطان : والله حلوه كلمة جدو قوي .
شهد : كان نفسي اول ما تسمعها تكون من ابن ابنك اللي يشيل اسمك !!!
سلطان : انا طول عمري عارف انك فرفوشة وقلبك طيب ومش بتحبي النكد ، بلاش تنكدي عليا النهاردة بقي .
شهد : طيب هسيبك تفرح برحتك بس قولي الحقيقة .
سلطان : حقيقة ايه ؟؟
شهد : حسيت بأيه لما شوفت جميلة وخصوصا لما شوفت فارس المصري معها ؟؟
سلطان : كان احساسي اني عايز اسيبك واطلع اقعد في اوضتي لوحدي .
شهد : طيب خلاص يا حبيبي ، بلاش تزعل نفسك .
سلطان : لو عايزة كلام يزعل انا تحت امرك يا حبيبتي ، قوليلي يا هانم نور ابنك فين ؟ وليه مش راح يطمن علي اخته في المستشفي ؟؟!!
خرجت جميلة مع فارس وفي ذهنها صورة سلطان بجوار شهد !!! لقد فازت شهد بحياتها كلها مع حبيبها ، عاشت حياتها كاملة لم ينقصها شعور بالحب او الامان بعكسها تماما فقد عاشت حياتها في ظلم وحرمان !!! ليس فقط الحرمان المادي بل الاقصي هو الحرمان العاطفي !!!
هي ذاتها لاتعرف ان كان شعورها ذاك غيرة او مجرد فقط احساس بالنقص !!
يقطع افكارها صوت فارس الدافئ يسألها : تروحي علطول ولا تحبي نقعد مع بعض شوية ؟؟
شهد : نقعد بس ياربت منتأخرش .
يبتسم فارس : اوكي .
يذهبا الي مكان هادئ ويجلسان ثم يبتسم فارس : مش ناوية تريحي قلبي وتوافقي بقي ؟؟ عمرنا بيمر في الانتظار !!!
جميلة " تبتسم " : انا النهاردة بقيت جدة يا فارس .
فارس " يبتسم " : اصغر واحلي وألذ جده في الدنيا .
جميلة " تضحك " : علفكرة انت كده بتعاكسني بشكل صريح !!!
يمسك فارس يدها دون مقاومة منها ويقول : فيه مجنون يشوف الجمال والرقة والطيبة دي ويقدر يمسك نفسه ؟!!
جميلة تسحب يدها " باحراج ' : احنا قاعدين في مكان عام !!!
فارس " يضحك " : ما انا بقولك نتجوز علشان نقعد في مكان خاص .
جميلة : تعرف ان طول عمري كنت نتخيلة ان اليوم اللي هكون فيه جده هكون خلاص بودع الحياة ، معرفش ان اليوم ده هو نفسه اللي ممكن ابدأ فيه الحياة .
فارس : قصدك انك !!! وافقتي ؟ صح ؟
جميلة تبتسم وتنظر له نظرة حب تمتزج بالخجل .
فارس " يضحك " : يلا بينا علي المأذون حالا .
تضحك جميلة : لأ استني .
فارس : انا استنيت كتير ، يلا بينا .
جميلة : لأ لسه حاجة مهمة .
فارس : ايه ؟؟
جميلة : لما اخد قسيمة طلاقي .
في فيلا سلطان
ينتظر سلطان حتي عودة نور ليلا ثم يسأله : اختك غرام ولدت النهاردة ، روحت اطمنت عليها ؟؟
نور : لأ ماكنش عندي وقت .
سلطان : دي اختك الوحيدة ، وكان لازم تسيب اي حاجة وتقف جنبها في الوقت ده .
نور : مادام كلكم كنتوا معها انا كنت هعملها ايه ؟!!
سلطان : يا نور انت هتبقي راجل العيلة دي بعدي يعني لازم تكون موجود في كل المواقف دي وتكون سند لكل العيلة .
نور : ان شاء الله .
سلطان : فيه موضوع تاني مهم عايز اتكلم معاك فيه .
نور : خير يا بابا ؟
سلطان : اخر مرة كلمتك علشان ترجع كل الاملاك باسمي قولتلي بعد شهرين ودلوقتي عدا اكتر من اربع شهور ومفيش جديد !! بيتهيألي مش من المفروض اني ألح عليك في الموضوع ده اكتر من كده .
نور : فعلا يا بابا ، ياريت منتكلمش في الموضوع ده تاني .
سلطان : يعني ايه ؟
نور : يعني يا بابا مفيش اي فرق بين لما تكون الحاجات دي باسمي او باسمك ، مفيش داعي نغير حاجة !!
(صلي علي رسول الله صلى الله عليه وسلم )
الحلقة ١٠
نور : يعني يا بابا مفيش اي فرق بين لما تكون الحاجات دي باسمي او باسمك ، مفيش داعي نغير حاجة !!
سلطان : وحق اختك ؟
نور : لما تطلبه هبقي ادهولها .
سلطان : لكن انا عايز كل حاجة تبقي باسمي طول ما انا عايش !!
نور : اسمحلي يا بابا حضرتك كبرت و محتاج ترتاح وانا قايم بكل حاجة زي ما حضرتك كنت بتطلب مني زمان ، يعني مفيش داعي نغير الوضع الحالي ، وخليك مرتاح .
سلطان : انا بقولك كلمة واحدة ، لازم ترجعلي كل حاجة زي ما كانت .
نور : لا يا بابا مش هرجع حاجة .
سلطان : انت بتكسر كلامي ؟!!
نور : بعد اذنك انا راجع تعبان من الشغل و هطلع ارتاح .
سلطان : استني لما اخلص كلامي وبعديها امشي .
نور : انا مش هفرط في حاجة تعبت فيها ، مفيش عندي كلام تاني .
سلطان : وانت من النهارده ملكش اي حاجة في الشركة ومش عايزك تدخلها برجلك .
نور : يعني هتمنعني ادخل شركتي ؟!!
سلطان : مش شركتك ، ولو دخلتها هخليكي امن الشركة يطردك في الشارع .
نور : وانا هسيبلك البيت والشركة وكل حاجة كمان .
تنزل شهد علي الصوت العالي وتفاجئ باحتدام الحوار بينهما !!!
شهد : فيه ايه يا سلطان ؟ في ايه يا نور ؟؟ صوتكم عالي ليه ؟؟
يصعد نور الي غرفته سريعا ...
في غرفة نور
نور : يلا بسرعة جهزي كل حاجاتنا علشان هنمشي من هنا حالا .
منار : هنمشي نروح فين ؟؟
نور : هنسيب البيت ونمشي .
منار : ليه ؟؟
نور : من غير اسئلة كتير ، يلا وهبقي افهمك بعدين .
يجمعوا مجوهراتهم واوراقهم في حقائب ويستعدوا للرحيل .
تصعد شهد وتحاول تهدئة نور .....
انت بتعمل ايه يا نور ؟؟
نور : انا همشي خلاص مليش مكان هنا .
شهد : اوعي تقول كده يا نور ، ده بيتك يا حبيبي .
نور : لأ يا ماما ، هو بيقول هيمنعني ادخل شركتي !! يبقي انا هسيب له كل حاجة وامشي انا ومراتي ومش هيشوف وشي تاني .
شهد : متنساش انه ابوك ومهما يعمل معاك لازم تتحمله .
نور : ده عايز ياخد شركتنا وفلوسنا وتعبنا ويديهم لغرام علي الجاهز .
شهد : هو عايز يضمن حقها بس مش اكتر .
نور : وهي ملهاش اي حقوق عندنا ، انتي ناسية انك تعبتي معاه في الشركة سنين طويل !! وانا من سنتين وانا شايل الشركة علي اكتافي !! انا في اخر سنة بس مكسب الشركة اتنين وخمسين مليون جنية وهو نايم في المستشفي ، تيجي الهانم تشاركني في كل ده علي الجاهز !!!!
شهد : طيب اهدي يا نور وانا هقعد مع باباك و نشوف طريقة تريحكم انتوا الاتنين .
نور : لأ انا ماشي ، ده بيقولي متدخلش الشركة تاني و هيخلي امن الشركة يطردوني !!!
شهد : معلش انت عارف باباك عصبي لكن طيب ، كلمتين وقالهم وقت عصبية .
نور : انا ماشي ولو هو حس بغلطته ببقي يتصل بيا .
شهد : لأ مش هتمشي .
يتركها نور ويمشي بسرعه ثم ينادي علي منار ان تلحق به !!!
شهد : خليكي معاه يا منار ، نور دلوقتي متعصب و مش في وعيه خليكي معاه لغاية ما يهدي و ابقي كلميني قوليلي انتوا فين .
تنصرف منار وتلحق به بينما تنزل شهد الي سلطان وتعاتبه .....
شهد : ايه الي انت عملته ده يا سلطان ؟؟!
سلطان : بعد اذنك يا شهد سبيني اصلح الغلطة اللي انتي عملتيها .
شهد : غلطة !!! انا غلطت يا سلطان ؟!! لولا اني كتبت له كل حاجة كان هيفضل بعيد عن الشركة الشغل ، وكان زمان الشركة وقفت وانت تعبان في المستشفي !! متنساش يا سلطان اننا كبرنا وكان لازم ابنك يباشر شغل الشركة بنفسه .
سلطان : وهو علشان ساعدنا في الشركة يستولي عليها ويبعدني انا ذات نفسي عنها !!! وكمان مش عايز اخته تاخد حقها !!!
شهد : يبقي تتفاهم معاه بالهدوء مش بعصبية لدرجة انه يسيب البيت !!!
سلطان : حاولت معاه بهدوء اكتر من مره وهو بيماطل !! واخرها النهاردة بكلمه بهدوء وكانت النتيجة انه كلمني ببجاحة وقلة ادب !!!
شهد : يعني مبسوط دلوقتي انه اخد مراته ومشي ؟!!
سلطان : لما يتعلم يكلم ابوه باحترام يبقي يرجع .
شهد : ده ابننا الوحيد يا سلطان مينفعش تقسي عليه كده !!!
سلطان : انتي مش هتعلميني اعمل ايه مع ابني بعد العمر ده كله !!!
شهد : انت بتكلمني كده ليه ؟
سلطان : ارجوكي يا شهد ابعدي عني دلوقتي علشان منخسرش بعض !!!
تتركه شهد غاضبة وتصعد غرفتها وهي تتعجب بسبب موقفه الغير معتاد معها ومع ابنهما نور .
في الكافيه
جميلة : لما اخد قسيمة طلاقي .
فارس : انتي قايلة انك مطلقة من زمان من ابو غرام ، ازاي مش معاكي قسيمة الطلاق ؟!!!
جميلة : لأني بعد ما سلطان رمي عليا يمين الطلاق اخدت بنتي وهي لسه رضيعة ومشيت و مرت سينين كتير لحد ما بنتي قابلة ابوها صدفة ، لكن عرفنا انه لسه مش طلق رسمي !!!
فارس : معني كلامك انك لسه علي ذمته !!!
جميلة : في الاوراق بس لكن شرعي احنا مطلقين من زمان .
فارس : وطلبتي انه يطلقك رسمي ولا لسه ؟
جميلة : طلبت منه عن طريق بنتي لكنه بيماطل علي امل اني ارجعله .
فارس " بسخط " : وانتي ممكن ترجعيله ؟؟
جميلة : مستحيل .
فارس : للدرجادي بتكرهيه ؟؟
جميلة : مش كره ولا حب ، هو موضوع وانتهي ومستحيل افكر ارجعله تاني ابدا .
فارس : جميلة انا بحبك بجد وهسألك سؤال واحد بس ، بتحبيني ولا لأ ؟؟
جميلة : وموافقتي علي الجواز ده اسمه ايه ؟
فارس : انا عايز اسمعها منك .
جميلة : الكلمة دي بتبقي اجمل ببين اتنين متجوزين .
فارس : وناوية تعملي ايه مع ابو بنتك بالنسبة لقسيمة الطلاق ؟؟
جميلة : انا قولت لغرام لو مش هيطلق رسمي هرفع قضية خلع او طلاق علشان اخلص .
فارس : لو تحبي انا ممكن اتدخل وانهي معاه الموضوع ده .
جميلة : لا لا بلاش .
فارس : ليه لأ ؟ انا لازم اقف جنبك في كل حاجة .
جميلة : لا مش دلوقتي ، لو احتجت انك تتدخل هقولك اكيد .
في غرفة احد افخم فنادق القاهرة
منار تجلس غاضبة وفي الجانب الاخر يجلس نور في قمة الغضب !!!
منار : انا عايزة اعرف ليه نسيب البيت احنا الاتنين ؟؟ لو كتت عايز تظهر له انك زعلان كنت ممكن تسافر يومين وترجع .
نور : احنا مش هنرجع القصر تاني ، علي الاقل دلوقتي .
منار : وهنعيش فين ؟ وازاي ؟
نور : هنشتري شقة ونعيش فيها .
منار : شقة !!! بعد ما كنا عايشين في فيلا هنعيش في شقة ؟!!!
نور : هنشتري شقة محترمة نعيش فيها بشكل مؤقت .
منار : وهنعيش منين ؟؟ هتشتغل حضرتك موظف ولا هتعمل ايه ؟
نور : منار ، كل الكلام ده مش مهم ، انا معايا في حسابي الشخصي خمسة وعشرين مليون جنية ، هنعيش منهم لغاية ما اشوف هنعمل ايه .
منار : وهتعمل ايه في الشركة والفيلا ؟ هترجعهم باسم باباك ؟؟
نور : مستحيل .
منار : صح انت معاك حق ، ده تعبك ومن حقك لوحدك .
نور " بتعجب " : انا كنت متخيل ان موقفك غير كده .
منار : ليه ؟ انا بقول الحقيقة ، ده حقنا .
نور : كنت متوقع انك تحني لصاحبتك و تقولي رجع لاختك حقها .
منار : لا يا حبيبي ، صحبتي وماله لكن مش علي حساب فلوسي وفلوس جوزي .
نور : انتي لسه بتحبيني يا منار ولا موضوع الخلفة ااا.....
منار : اوعي تكمل يا حبيبي ، انا حبي ليك مستحيل اي حاجة تاثر عليه .
صباح اليوم التالي
يذهب سلطان مبكرا الي الشركة ويعطي تعليمات لأفراد امن الشركة بمنع دخول نور الشركة نهائيا !!!
يصعد سلطان الي الشركة بينما يقف العاملون في صدمة من ذلك القرار الغريب !!!
فجميعهم يعلم ان نور هو صاحب ومدير الشركة وان منصب والده الحالي منصب شرفي وصوري فقط ، فما سر هذا القرار العجيب من والده سلطان بيه الان ؟؟!!!
ثم ماذا سيفعلون اذا جاء نور بيه الان الي الشركة ؟؟ هل سيمنعونه حقا ، ام انهم لن يستطيعوا تطبيق هذا القرار ؟؟
لقد اصبحوا الان بين شقي الرحي !!! وظلوا يدعوا ان لا يأتي نور حتي لا يقعوا في هذا الموقف الصعب .
في شقة غرام
تجلس غرام علي فراشها وبجوارها باسل يلاعبون طفلهم حديث الولادة .
تملأ اعينهما السعادة ويملأ وجدانهما الفرح والامل .
صوت جرس الباب ...
غرام : اهلا يا بابا ، تعالي اتفضل .
سلطان : بصراحة انا مش جايلك انتي وباسل ، انا جاي لسلطان الصغير .
تضحك غرام ويضحك باسل ويقول : اتفضل يا اونكل سلطان .
يحمل سلطان حفيده في سعادة وفرح .مرحبا
بعد ما يقارب نصف الساعة ...
سلطان : انا عايزك في موضوع مهم يا غرام .
باسل : طيب بعد اذنكم انا ، استأذن .
سلطان : لأ خليك قاعد يا باسل ، انت دلوقتي مش غريب ومفيش حاجة تتخبي عنك .
غرام : اتفضل يا بابا .