رواية جمان الفصل الاول1بقلم رويدا راشد
.......قبل ثماني سنوات.....
سالمة :ربي يستر خوك مداير مشكلة مع واحد متع سلاح ومشاكل والكارثة طلعت بنشوفه لقيته مقعمز هو واصحابه بالسلاح...
جمان: بالله يشوف فيها الدنيا ع قرن ثور بلا شئ البلاد الوضع فيها محتقن وحتى للي تقوله
زيد غادي يطلعلك سلاح ع من عابي هوا لاخوت يسندو ظهره ولا صغار عم يحبوه..
سالمة: يما نصحته انت وحيدي للي طلعت بيه من الدنيا اعقل حط عقلك في راسك وهو شئ
يخش من اليمين يطلع من اليسار.
وجدان: ولدك هذا ينطبق عليه مثل اسمع ماتكره ودير ماتحب الكلام معاه زايد ياحليله كان يسمع بوي يحمد ربي انه مسافر.
جمان: كنت خايفة ومتوترة الأمور هاذي صعب الانسان يقدر عواقبها الا بعد ماتصير خليت امي ووجدان داخل طلعت لجنان وانا لابسه المصلي متعي قربت فتحت الباب باش نشوف شن صاير....
شفت محمد وهيثم ونضال أصحابه
ماننكرش اني كنت معجبة بشخصية نضال
وهيبته في كل تصرفاته لكن للي صار يومها كان بدون تخطيط أحداث يقودها القدر فقط.
وانا واقفة مرة نقرب ومرة نرد الباب خايفة محمد يشوفني ويقلبها دراما لين شفت سيارة مظلمة خاشة الشارع ..حسيت قلبي قبضني وكأنه شخص شد قلبي وسكر عليه قبضة يده
وانا نراقب في السيارة كيف تجري وسمعت صوت سحب السلاح ...والله بدون شعور مني طلعت نجري كنت مستعدة نفدي محمد بدمي
ولاينحرق قلب امي وبوي عليه ...
محمد: خشي داخل جمان شن طلعك خشي قربت نبي نفدها بيدي باش ترجع ولا اطيح وهيا تقول واحد انتحاري معاش فكرت ممكن ننصاب ولاغيره في القبى هذيكا جت قدام نضال...في لحظات وقف الرصاص وكأنه العكشة حقق انتصاره.
جمان: حسيت بحاجة نخصتني في كتفي لكن ماتوقعتش تكون رصاصة وبعد دقايق بدأ الوجع تقول سم ينتشر في المنطقة المحيطة
لنخصة...وانا بنلف بنكلم محمد لين حسيت حاجة سخونة نزلت مع يدي ...استغربت شن هذا.
هيثم: جمان انضربت برصاصة ..دم تنزف.
محمد: شن طلعك شن طلعك بس شن علاقتك توا باهي لما تموتي وانا نقول علاش وقف الضرب.
جمان: راهو 🤣🤣 مجرد ماسمعت انضربت وشفت الدم لعبت بيا الصفراء واغمى عليا ع طول...
سالمة: ياحليلي زعمك الرصاص في من جاء نلف في الصالة ماشية جاية وخايفة نطلع نشوف شئ مانبيش نشوفه.
وجدان: عيوني وجعوني وانا نتبع فيك ماشية جاية اصلا الجيران قريب يكتبوا ع حوشنا كتيبة محمد ولد سالمة .
سالمة: من يومك باردة وقلبك ميت زي عماتك تخلا الدنيا وتعمر وانت ولا همك.
وجدان: هو هذا العافن كله حطوه في العمات
شن الخالات مايطلعش عليهم .
سالمة:فقدت جمان مش معانا ...طالعت للجنان نسمع في محمد يقول ولع السيارة قلت معناها
في حد مضروب هاذي ماتبيش كلام ...طلعت
نشوف لقيت جمان في حضن محمد شفت للأرض قطرات الدم بديت نجري ونعيط تقول مذبوحة من الحرارة نقز نحسابها ماتت أصعب
شعور لما الأم تشوف قطعة من روحها وهو ميت ....
هما ركبو السيارة وطلعوا وانا نجري وراهم ع رجليا لين اختفت السيارة ع مرأ النضر...
وجدان: شن العيلة الغريبة طلعت بنشوف الدوشة شن فيه لين فتحت الباب نساوين
الشارع جايبن امي يكرو فيها زي الجثة والعياط ...انا نتفرج تقول لقطة من مسلسل شوية الا وكف جايني ع وجهي ....
نجية: ابكي عيطي ديري ردة فعل اختك ماتت راهو ماتقعديش مصدومة ...
وجدان: شن ماتت اهيا امتا ماتت وهيا قبل دقايق كانت جنبنا ...طبعا نجية مرت عمي وانا في زحمة النساوين وحدة تبكي وحدة تتصل بولدها باش ايجيب الخيمة تقول جيش نمل في اقل من ربع ساعة كانت الخيمة راكبة والناس مقعمزة وبدأ وقت الاحاديث الجانبية
للي تقول قتلها خوها وللي تقول ابصر شن صاير ممكن مذبوحة دمها في الشارع ....
سالمة: ياحليلي ارفعوني لبنتي نبي نقعد جنبها حتى وهيا ميتة ..
وجدان:سهى اخت هيثم صاحب محمد ولد شارعنا خشت مصدومة في المنظر.
سهى: نحاول متصل بهيثم لكن للأسف مايردش ..قعدت نراقب في النساوين كل وحدة شن تقول نجية ع جنب وتسرد في القصص للي من خيلها للناس ...ايه خوها مليشياوي كبير وهيا استغفر الله ربي يستر
عليها وخلاص ربي قال اذكرو محاسن موتاكم..
سهى في خاطري وبتعطي فتاوى في الدين ثاني هذا للي ناقصك انت قعدت زي برج المراقبة كل مرة نسمع وحدة شن تقول كان خاطري نقول بطلوها العادة اهيا للي اديرو فيها تحسهم يمشوا لحالة الوفاة باش يقصقصو ويشدو القصة بعدها شهور ينقلوها في اللمات وهاذي تزيد كلمة وهاذي عشرة وبعدين يحرجوا
لما يقولو النسون كذابات...في عز الدوشة والزحمة ولا مرت عمهم العجلية وصت حتى ع الكفن تقول يستنوا فيها بالساعة والدقيقة لين حسيت بهاتفي يهز شفت المتصل لقيته هيثم فتحت عليه الخط ..وانا نراجع في الذاكرة لموقف مشابه يوم جانا اتصال يبو كتيب العائلة ع خاطر خوي الصغير لما ماتت...راك
تقول تبو تمو الاجراءات ...
هيثم: شن تخرفي وبعدين انت وين صوت دوشة جنبك .
سهى: في حالة الوفاة متع جمان.
هيثم: الحق دراتها امك يامعلم قتلك وقف ارفعها سكرت راسك .
سهى: مافهمت شئ وسكر الخط .
محمد: راك تقول تحسابها ماتت 🤣🤣.
هيثم: الموضوع وصل لخيمة وناس تعزي وتعيط .
نضال: ههه واحتمال كبير تلقى لافتة مدخل النساء ومدخل الرجال...
جمان: نسمع فيهم لاعرفت نضحك ولاعرفت نبكي .
محمد: شن يادكتور وضعها تمام تقدر تطلع.
الدكتور: اصابتها بسيطة غير هيا خوافة وزيدي اطلعي وقت الرصاص.
جمان: الحمدلله يارب فاتت ع خير ..الناس الأولى تقول العمر يعارك مع صاحبه والله لو ساعتي تمت لو نبدأ في حصون مشيدة نموت نموت.
محمد: هيا نوضي توا خلي نمشي نشوف الفالطة للي تستنى فيا في الحوش شن.
وجدان: نشوف في بنات عمي جايبين الحليب والتمر تقول جعانين وانا نتفرج وساكتة امي هاذي زي الجثة كل مرة يغمى عليها واطيح في مكان....
وفي زحمة المشاهد خشت جمان من الباب .
وبدأ العياط وللي داخت واغمى عليها من الصدمة وللي تقول سلاما قول من رب رحيم ..
محمد: انا بنخش معاها باش مايهجموش عليها والجرح قاعد كيف مخيط هدوما همج ..وفعلا زي ماتوقعت ..جوها لكن منعتهم .
سالمة: مش مصدقة عيوني قعدت نزغرت بنتي حية جيت حضنتها نتحسس في وجها بيديا بجديات انت مش ميتة باهي والدم للي شفته في الشارع...
جمان: رصاصة ضربت يدي الحمدلله جت بسيطة ماتخافيش امي من الصدمة تحضن فيا وتبكي وبعدها جتني وجدان وسهى وعمتي كميلة ام سهى ...
سهى: نحسابوا روحنا معاش بنشوفوك .
وجدان: انا عارفة العافن مايموتش لكن مش مصدقني حد نقولك معاش تحضري مسلسلات هندية..
سهى: بعد طلع محمد وقفت في وسط الزحمة وتكلمت بأعلى صوت ...كل واحد قال كلمة تقعد في وجهه ..الكل يسمعو بدون تعليق مستغربين نسمع فيكم تنهشو في لحمها وهيا كانت ميتة بالنسبة ليكم وكيف مدايرين وهيا حية وبديت نسمي فيهم بالإسم وبديت من مرت عمهم اطلعي فلانه وفلانة وفلانة روحوا منافقات سمعتكم بوذني.
كميلة: شن للي اديري فيه تحشمي شن تحسابي روحك في حوشنا .
سالمة: خليها ياكميلة قالت الحق حسبي الله ونعمة الوكيل في كل شخص خاض في عرضي وانا ولا بناتي.
روحو المنافقات وهذاك اليوم انقلب من نكد وحزن لفرح ذبحوا ودارو عشاء ع سلامتها .
جمان: نتفرج ع الناس ونسيت الوجع للي فيا شوية الا وشفت ام نضال واخته خاشين محملين بكل خير.
سالمة: لاه عليك ياصالحة الخير كاثر غير جيتك تكفي.
صالحة: عيب عليك الكلام هذا عاد احنا عيلة وحدة راهو.
جمان: اهلين كيف حالك.
صالحة: الحمدلله ع سلامتك وعمري ماننسى انك فديتي ولدي بروحك
جمان: انا مصدومة في خاطري شن تقول نحمد ربي انه امي من الدوشة ماسمعتهاش شن تقول وجدان وسهى كانوا جنبي.
وجدان: بعد مامشت صالحة ..ايو جو الافلام
بالله من تخايلتي نفسك مثلا وانت تمثلي في المشهد اهو شاروخان لما مات ع خاطر حبيته شانتي 🤣🤣 واك مقيولة فيه للي حطب لريح وفيه للي الريح تحطبله.
جمان: وربي ماصارت انا كنت نبي نوقف قدام محمد لكن خوك الغبي دفني جت الوقفة قدام صاحبه.
سهى: موقف لمرأة تسوى ألف راجل الحمدلله المهم فاتت ع خير ومعاش تعاوديها.
ومن هذاك الموقف للي صار ونضال متوقع اني درتها باش نحميه ساذج غبي وقتها صح عاجبني بس لو يقارنوه بمحمد في ألف داهية نضال أهم شئ خوي.....من هنايا بدت القصة
.