رواية جمان
الفصل الثاني2بقلم رويدا راشد
محمد: اسمعي يما بالله عليك قبل مايروح بوي
اكذبي عليه أي كذبة لكن قصة السلاح والرصاص ومشكلتي مع العكشة انا مش ناقص توا يبدأ في المحاضرة ومعاش يفوتني.
سالمة: حطتت يدها ع قلبها بإشارة للخلعة نكذب ع بوك ولا تحسابني هبلت لاياولدي مصيره بيسمع من غيري ويسمع مني انا افضل للي صاره كله بنقوله ماليش علاقة بعمايلك للي اختك قريب راحت فيها .
وجدان: متكية ع الباب ايه احصد احصد تستاهل توا ينفعوك اصحابك لما بوي يوصل وتي روحك الغالي عمر في الطريق بإذن الله عياطك يسمعوه الجيران 🤣🤣.
محمد: انا ياقلت شبشب في رجلي كان هذا نجيبه في نص وجهك .
طلع وقرر يهرب من الحوش لانه عارف ردت فعل بوه كيف بتكون .
جمان: خيرك تاخد في ملابسك شن مسافر .
محمد: ماهو كله من تحت راسك انت يابومة كان تمسمرتي في الحوش راني مش مجبور نهرب توا من بوي.
جمان: تستاهل وطلعت وخليته.
محمد: قدام حوش هيثم للي في راس الشارع
يرن في الجرس.
هيثم: شن هذا مسافر ولا كيف.
محمد: لالا جايك لجأ بتقبلني ولا نقلب وجهي لنضال .
هيثم: عيب عليك ياراجل خش عارفك منين هارب.
محمد: شافله ع جنب بتبدأ ادل فيا من توا ولا كيف باش نفهم..
هيثم: خش المربوعة بلا دراما زايدة خلي نخش نجيبلك حاجة تاكلها.
سهى: شن جيته لا جت غذاء ولاعشاء نقعد 24 ساعة وانا زي الطباخة كيف فرحت كملت الحوسة متع الغذاء.
هيثم: راهو مش جاي نشاور فيك طيبي لراجل وسكري هذا للي قعد تحشميني مع صاحبي.
سهى: نطيب ونسمم فيه شن جيبه توا.
عند حوش عمهم.
نجية: حور ياحور
حور: نعم يما خيرك تعيطي.
نجية: تعالي نبي نسألك ع حاجة يوم المهرجان للي صار في حوش عمك عمر.
حور: بهزوة اه قصدك يوم بنت عمي الميتة للي رجعت حية .
نجية: من المرأة هذيكا للي جت هيا وبناته ومحملة بالخير كله واضح عليها اكابر البنت وامها ومااعتقدش انه سالمة مرت عمك تعرف حد من الطبقة الراقية.
حور: هاذي اخت الولد للي الست جمان مرت روحها قدامه باش تحميه.
نجية: بنبرة مليانة خبث وانا نقول شن القصة ومن وين جتها الرصاصة طلع الموضوع فيه حب وغرام فالحات بناويت سالمة ايديروها ويطلعوا منها زي الشعرة من العجينة.
حور: حتى بنتك فالحة سايرت اخت الولد لين عرفت كل شئ.
نجية: ايه هكي نبيك سلم بنتي.
نضال بعد للي صار.
مسرة: انت متأكد انها تحبك ومعجبة بيك ولا الكلام هذا كله من خيالك.
نضال: خيال شن البنت قريب ماتت وانت مازال تسألي .
مسرة: باهي والمطلوب مني توا شن.
نضال: قوليلها خوي يبي يكلمك.
مسرة: عقاب الوقت نقعد مرسول انا خلاص اطلع توا نكلمها .
وصل عمر للحوش..
عمر: جمان جمان تعالي نبيك.
جمان: الحمدلله ع سلامتك ياغالي ..هذا وين نور الحوش.
سالمة: شن قصدك بيه الكلام هذا.
عمر: ماقصدها شى لكن كان بوها قاعد راهو للي صار معاها مايفوتش ع خير وين امشى محمد محمد انت ياولد .
وجدان: ماتعبش روحك لم قشيشه من بكري وطلع.
سالمة: تغمز لوجدان باش تسكت.
عمر: خليه لعند امتا بيقعد هارب مصيره راجع للحوش وقت نحصل عليه توا يشوف.
سالمة: خلاص المهم فاتت ع خير وخلاص.
عمر: خير شن جمان قريب راحت فيها يومها وتليها محشمنا مع الجيران ومسكر الشارع شن هذا يلحقنا من وراه كان اللعنة.
سالمة : ادعيله ربي يهديه .
عمر: الحق ربي يهديك انت وخلاص هذا لو مرة واثنين معاش تكلميه توا يعقل ويحط عقله في راسه لكن طول ماهو مش لاقي من راده بيزيد بيه الحال.
جمان: لقيت الوضع بدأ مشحون خلاص بابا بعد يروح يصير خير.
عمر: والله مااعتقدش بنشوف الخير وخوك مش ناوي يعقل.
نضال: الو محمد انت وين.
محمد: في جزر المالديف ...وين بنكون عند هيثم في حوشه علاش .
نضال: انا للي بنسأل علاش عند هيثم صايرة حاجة.
محمد: لالا ،غير بوي روح واكيد اعمامي قاموا بالواجب قبل مايوصل .
نضال: شوية وجايك عند هيثم نبي نهدرز معاكم في موضوع.
هيثم: اكيد فيه موضوع مدامه قال هكي.
محمد: ابصر شن فيه.
...../ خودي البسيها تنفعك .
جمان: مش لازم {قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ}
...../ لكن ربي قال {وَلاَ تُلْقُواْ بِأَيْدِيكُمْ إِلَى التَّهْلُكَةِ}
جمان: لو الموت بتصيني رح نموت لو كنت في حصون مشيدة ولو ربي عاطيني عمر رح نعيش لو نبدأ في وجه النار.
...../ انا طالع وراكم وربي ينصرك للي صار معاك مش شوية.
جمان: الحمدلله كلها اختبارات من عند الله .
وصل نضال قدام حوش هيثم ونزل .
محمد: ها شن فيه.
نضال: كلمني ويلو قال العكشة يبي ايجئ لمحمد.
هيثم: هههه شن نكتة هاذي ولا شن.
نضال: توا تشوف في وجهي يدل ع انه نبصر ولا نتمهتك.
محمد: ناسي للي داره ولا الحشيش لحس عقله خلاه يتكلم من غير مايفهم وخلاص.
نضال: اسمع منه ماعجبكش الكلام يموت في مكانه ولصقه ع الحيط.
هيثم: فيه وجهة نضر الكلام للي قاله نضال توا حق مش خاسر شئ.
محمد: باهي خلاص عادي نتلاقو.
نضال: توا نربط معاه ع المكان والساعة .
هيثم: خليه مكان عام باش تضمن انه مايغدرش بينا.
نضال: تمام.
سالمة: وجدان وجدان نوضي دخلي الحوايج من ع المنشرة.
وجدان: باهي ارتاحت جمان قعدت انا زي البنقلا وخلاص.
سالمة: شن تقولي.
وجدان: قتلك حاضر...وانا كيف بنطلع لجنان من الخلف سمعت صوت الباب تسكر استغربت وبعدين قلت اكيد بابا طالع لصلاة العشاء لين نزلت وشفت خيال بعيد لابس اسود ماعدلتش دخلتهم وانا نلم فيهم شفت اثر عفسات تحت المنشرة ....
لكن الحق مانحبش نهلوس في الاخير هما ملابس مش فلوس.
من الخيال وشن قصته وشن يبي العكشة