رواية دجي القلوب الفصل الثاني2
بقلم رويدا راشد
"الأيام ستدور،والمشاهد ستعاد، والأدوار ستتبدل
وكل ساقي سيسقى بما سقى"
مانزرعه اليوم هو حصاد الغد…
طلعت جميلة وحسن وماكنتش تعرف إنها طالعة ومعاش راجعة بعد قطعوا نصف المسافة مايقارب
70 كيلو متر طريق صحراوي شبه خالي من السيارات وبسبب غياب اللواحات الإرشادية كان حسن يسوق بسرعة 120 باش يختصر الطريق
وفجاة طلع جمل للطريق حاول حسن حاول لكن السيارة واخدة سرعة وثانيا الفرينو كانّه مش موجود ماهي إلا لحظات وانتقل حسن وجميلة لرحمة الله.
سالمة: يارب فزت مخلوعة من نومها قلب الأم مستحيل يغلط .
دجى: خيرك احنينه شن مفيقك توا.
سالمة: ارتاحي سلم بنتي مافيا شئ غير تعب بس.
دجى: رقدت وأنا نستنى إمتا توصل ماما وبابا
وصل خبر موت حسن وجميلة لخوها خالد وهو وصل الخبر لحسين…خوه.
كان الوقت عصر ويوم إربعاء مقعمزة برا نقول بالك قمر تطلع ونقدر نحكي أنا وياها فجأة سمعنا صوت عياط في حوش عمي.
سالمة: الستر يارب شن فيه .
دجى: أنا نسمع ومش فاهمة شئ شن سبب العياط لين الصوت بدأ يقرب لحوشنا كانت مرت عمي ومعاها الجيران للي فزعو من صوت العياط …
سالمة: خيرك شن فيك.
سعاد: وهيّا في قمة التمثيل البقاء لله مادايم للي هو حسن وجميلة ماتوا..
سالمة: بديت نعيط يارب ماتفجعني في وليدي يارب يارب صبّرني
دجى: أنا كنت ساكتة بدون ردت فعل ممكن وجود قمر معانا لأيام وزحمة الناس نستنى أو أنا كنت صغيرة مازال مانعرفش وطبعا مع سماع الكذبة المتعارف عليها بوك وأمك في الجنة لما تبيهم تقدري تشوفيهم.
حسين: خلاص يما فات ع موتهم توا عشرة ايام شن رأيك أتجى تسكني معاي أنت وبنت خوي.
سالمة: وكلامك هذا منك رأسك ولا بأمر من مرتك .
حسين: شن علاقة مرتي في الموضوع الحوش حوشي أنا .
سالمة: روح ياحسين حوش بوها مايشكي من شئ ويوم نموت أنا ليها رب كريم.
دجى: هما كانوا يتكلموا وأنا وقمر نلعبوا وفرحانة انه عمي يبي يرفعني معاه لحوشه.
تم النقاش بين سالمة وحسين ع أنها بتمشي تطلب فلوس جميلة من خوها وبتصرفهم عليها ماكانتش تعرف شن يستنى فيها من خالد أخ جميلة.
فات الشهر الأول وخفت الزحمة والجارات للي كانوا يجونا كل وحدة رجعت لحياتها الطبيعية حسيت بفراغ كبير فراغ مستحيل يملاه حد إلا بوي وأمي..
كانت وفاة بوي وامي وقت العطلة الصيفية …
سالمة: يادجى تعالي سلم بنتي نبيك شوية.
دجى: نعم بالحنين.
سالمة: أنا كبرت واليوم معاك وغدوا ربي يعلم .
دجى: خنقتني العبرة وبكيت شن فيك احنينه ماتقوليش هكي أنت للي مصبرتني ع فراق بوي وامي.
سالمة: ماهو لازم تسمعي الكلام للي يبكيك لأنه للي يضحكك يضحك عليك كلمت جارتنا سعيدة غدوا بيرفعنا ولدها وائل لخالك باش تجيبو نصيب أمك منه.
دجى: ماكنتش نعرف قيمة الفلوس زي اليوم ماكنتش نعرف للي عنده فلوس يحبوه الكل طلعنا ثاني يوم ووصلنا لعند خالي .
خالد: شرفتوني هو مفروض أنا للي نجيكم.
سعيدة: لكن لما لقيناك ماتعرفش الأصول قلنا نجوك لعندك.
سالمة: فنصت في سعيدة لأنه حست كلامها ثقيل.
نجوى: مرت خالد تفضلو مرحبتين بيكم .
وائل من الصدمة ساكت يشوف لامه وخلاص.
خشو وضيفوهم وبعدها استئذنت سالمة نجوى تكلم خالد باش تتفاهم معاه.
خالد: نعم ياعمتي سالمة.
سالمة: الله ينعم عليك الله الله ع الجد والجد الله الله عليه.
خالد: أكيد.
سالمة: أنا ماجيت من هذيكا الدنيا للي وأنا طامعة في حق هاليتيمة بنت أختك أنا الله غالب عليا ماحيلتي شئ وولدي الثاني مايتفكر في أمه باش يفكر في بنت خوه كان قلت بنعطيها ماهي إلا بنت أختك قلت لا راهو اليوم وراه غدوا.
خالد: ان شاء الله خير ناض من جنبهم جاب معاه خمسة آلاف من أصل 120 ألف روحي بهدوما توا وقت تكمليهم تعالي خودي .
سالمة: انصدمت ولكن سكتت ماعندها ماتقول خذيتهم وقتها كانت الخمسة رقم يعتبر ….الحاجة تخليك تقبل بأي شئ نضت وأنا ساكتة رغم إني نعرف حقها أكثر بهلبا .
سعيدة: طلع طماع وهذا للي تشكري فيه فعلا للي تحسابه موسى يطلع فرعون وقت الاخ ينهش لحم اخته من بيها هالمسكينة ياريتك خليتها مشت معاهم راهي ماتت وارتاحت لاعم يسأل ولا خال يحن.
دجى: نضت بنشرب اميه نسمع في مرت خالي تقوله .
نجوى: مصح وجها جاي تشحت عيني عينك هكي لاتحشمت ولا استحت راك تعطيهم حاجة اختك وماتت وانت أولى بالفلوس .
خالد: اسكتي راهو يسمعنا حد من قلك بنعيطها انا شن تحسابيني هبلت.
دجى: طلعت لي احنينه هيا نروحو ياسرنا.
سالمة: توا ليل الصبح نتوكلوا .
دجى: لالا، نطلعوا توا ولا والله مانقعد لو نطلع ع رجليا.
سعيدة: شن فيك يابنتي.
دجى: سمعتهم وهما يتكلموا علينا روحي يااحنينه للي خلقنا مايفرطش فينا .
سالمة: طلعت كلمت وائل وقتله توا بنطلعوا جهز السيارة .
سعيدة: اه نسيت ياخالد كان ماعندكش علم راهو اليوم وراه غدوا ومرتك هاذي للي تشجع فيك تاكل رزق اليتامى والله لو اطيح ماهي واقفة ع راسك .
خالد: من الصدمة ساكت مش عارف شن يقول كيف عرفت .
وائل: يما اركبي ورانا طريق وللي بيخلص يخلص روحه.
روحو وفاتت الايام تشبه بعضها سعاد عايشة دور الكنة الباهية اطيب وتبعثلهم فعلا تقتل القتيل وتمشي في جنازته…
لعند جاء اليوم للي سمعت فيه قمر كلام مايحمله العقل …
قمر: كنت ناوية نطلع انا وامل ومعانا حور صار ناقش بيني وبين حور بطلت رجعت للحوش وخشيت بدون ماندير دوشة ولا نلفت انتباه حد ومش متقصدة الشئ هذا لكن هكي صار وخلاص.
الحوش كان فاضي مازن ومهاب برا وأمل طالعة مع العقرب حور وخالتي فاطمة ….
حطيت راسي بنرقد طار النوم قلت ننزل ندور حاجة ناكلها نسمع في صوت امي عالي وتتناقش مع حد استغربت وخصوصا انه بابا مسافر….
قربت ونمشي ع راسي صوابعي وقف الدم في عروقي من هول الموقف اخر حاجة كنت نتوقعها امي امي هكي يطلع منها ….
شن سمعت قمر ومن الشخص للي تكلم فيه سعاد وشن علاقته بيها