رواية دجي القلوب الفصل الثالث3
بقلم رويدا راشد
"مايقعد في الوادي غير احجاره"
كيف مفروض يكون عقلية وتربية الاطفال لو الأم محتاجة التربية....
قمر: جمعت قوتي وقعدت لين كملت امي كلامها وطلع الضيف للي كانت تكلم فيه ...
قداش الناس قاسية قداش قلوبهم ولت حجر لدرجة هاذي توصل ....
طلعت بعدها لعند حوش عمي الله يرحمه ماعرفتش علاش ولا كيف مشيت هل هو شعور بالذنب هل نحاول نكفر ع غلط أمي ومهما حاولت نحس الوسخ للي فيه أمي طايلني حتى انا ....جريت ع حضن دجى وبكيت بكيت بحرقة ممكن هاذي أول مرة نبكي فيها بالشكل هذا....
دجى: خيرك متعاركة انت وامك ولا شن صاير معاك .
قمر: نبي احنينه وين نبي نحكي معاها.
سالمة: خيرك يابنتي شن فيك .
قمر: نبي نحكي معاك وبروحنا معليشى دجى .
دجى: حاضر اصلا بنمشي لعمتي سعيدة قتلي نبيك تساعديني في الحوش.
طلعت دجى رغم انها عندها فضول تعرف شن فيه بين قمر وسالمة ....وفي لحظات يحضر فيها الشيطان يخطر ع الشخص ألف فكرة في اخر لحظة غيرت دجى رأيها ورجعت ولكن بدون ماتخش للحوش قعدت تحت الشباك تسمع في كلام قمر وسالمة.
سالمة: شن فيك ياقمر شغلتيني .
قمر: احلفيلي قولي والله مانحكي لواحد .
سالمة: والله مانحكي قلبي نار راهو تكلمي.
قمر: في خاطري مش زي النار للي في قلبي...
انا عرفت كل شئ عرفت من كان سبب في موت عمي ومرته...
سالمة: من الصدمة وهول للي تسمع فيه لاعرفت تصدق ولاتكذب.
قمر: اليوم كنت بنطلع انا وحور وأمل لكن تعاركت انا وحور وبطلت رجعت للحوش بدون ماتعرف امي وانا فوق حسيت روحي سمعت صوت نزلت لين سمعت للي عمري ماتوقعت نسمعه.
سالمة: شن سمعتي...تكلمي.
قمر: سمعت أمي تكلم في واحد اسمه خالد وتقوله انت للي فسدت السيارة وشاركت في موت اختك وتوا بطنك كبرت ع الفلوس انا نبي نصيبي...
سالمة: حسيت الهواء تم من الغرفة ومعاش قدرت نتنفس معقولة خالد هو السبب في موت
ولدي واخته متأكدة ياقمر من الكلام هذا ولا تتخايلي.
قمر: متأكدة والله سمعتهم يتكلموا .
سالمة: بصوت مليان رعشة خلاص انسي للي قولتيه وانا توا نتصرف...
قمر: راك تقولي انا قتلك والله لما تقتلني لو تعرف .
سالمة: ماتخافيش مش قايلة هذاك اليوم خسيت ولدي كيف مات تفكرت لما حضرت الجنازة هيا وخالد فعلا تقتل القتيل وتمشي في جنازته...
دجى: عرفت من للي كان سبب في موت بوي وأمي وقررت نعيش باش ننتقم وبس طلعت ومشت عند جارتنا سعيدة باش كان احنينه سألتها تقولها عندي من صدمة انه خالي قتل امي كنت نجر في جسمي زي الجثة معقولة الفلوس هكي ادير في الناس لكن رح ايجئ يوم ونرد فيه حق امي وبوي وحقي مش رح نكون الضحية ...
فات يوم بعد للي صار ومازالت سالمة في دوامة لعند قررت تنادي ولدها حسين وتحكيله.
حسين: مستحيل الكلام هذا للي تحكي فيه معقولة مرتي بترديها قاتلة لا وفوقها جايبة راجل للحوش وانا مش قاعد نعرف انك تكرهيها لكن مش لدرجة هاذي.
سالمة: اصحى ياولدي للي قتلت خوك تقتلك حتى انت كيف تغمض في عيونك وتأمن ع نفسك وانت متزوج شيطانة مش بشر.
حسين: يوم للي تقتلني يما مااتجيش لجنازتي انا راضي وبالله عليك الكلام هذا معاش تعوديه.
سالمة: لو انت راضي انا مش راضية ورح نشكي فيها .
حسين: المركز الاول بلغي فيه من بيصدقك عادي امي كبرت وخرفت ...
سالمة: خسارة ماربيت وحملت برا مانبيش ندعي عليك ع خاطر عارفتك مش في وعيك.
روح حسين لحوشه والنار في عيونه خش الحوش وضبح بصوت عالي سعاد.
سعاد: جت وعرفت من نبرة صوته انه صاير شئ شن فيه؟
حسين: شن الكلام للي قالته بنتك لامي.
سعاد: كلام شن
حسين: الحقيني للمكتب وتوا تعرفي كلام شن .
سعاد: واضح عليها الخوف لكن تكابر ماتقدرش تقوله انها العقل المدبر هيا واختها.
حسين: قعمز وقال لسعاد القصة كاملة من طق طق الى السلام عليكم.
سعاد: معقولة هاذي بلوة تبيلها امك عليا ربي يسامحها انا مستعدة نتوضأ ونحلف ع المصحف انه الكلام هذا كله كذب وتبلي .
حسين: بري نادي ع قمر وقتها نعرف من ع حق ومن ع باطل ...
سعاد فرصة وجتها لعندها خشت لقمر وهيا كان تلقى الموت تطلقها عليها اسمعيني كويس تعرفي تقول حرف نقتلك لانه بوك مش رح يحميك مني ومجرد مايلوحنا كلنا بسبب لسانك رح ينسى انك بنته اصلا وقتها نقتلك وندفنك زي عمك سلالة حقيرة وغبية تنزلي وتقولي انه حناك هيا للي قتلك قولي هكي.
قمر: ماكنتش متعودة ع الكذب لكن خوفي من أمي وخدلان حناي ليا بعد قالت كل شئ خلاني نقتنع انه ألزم ماعليا نفسي كنت صغيرة من بيصدقني والأصح من بيحميني ....
نزلت وانا نرعش خايفة من امي وخايفة من الكذب وصلت للمكتب شفت فيه بابا وهو معصب أول مرة نشوف ملامحه هكي.
حسين: قعمزي ياقمر نبي نسألك يابنتي وها راك تنسي للي يكذب مكانه النار...
شن الكلام للي قلتيه لي حناك لما مشتيلها للحوش.
قمر: سامحني يارب هاذي كذبة بيضاء باش ننقد نفسي انا مشيت بنلعب مع دجى وبعدها حناي قتلي قولي لبوك انك سمعتي امك تكلم في واحد اسمه خالد ....وكملت سرد باقي القصة عليه....
كبرت وعرفت انه الكذب كذب مافيش مبرر ليه ومافيش حاجة اسمها كذبة بيضاء وكذبة سوداء ....
سعاد: حست بالانتصار بعد ماخلت حسين يشك في امه ويكذبها....
قتلك وكذبتني تصدق امك وتكذبني انا هكي ايصير فيك قدام اول اختبار شكيت فيا بعقلك انت كيف تفكر ....
حسين: انا انسان وأي انسان يشك ومن حقه يغار ويخاف ع محارمه ...
سعاد: معاش تكلمني لين تردلي حقي انا انضلمت وهاذي مش كذبة بسيطة .
حسين: ساكت شن بيقول لمرته ....وكيف مايقولو كلمة في الصبح وكلمة في الليل تخلي المسلمة يهودية....
قمر: خشيت داري وانا خايفة ..
أمل: خيرها ماما تبيك شن دايرة من عملة .
قمر: شفتلها ع جنب تقدري تسكري فمك للي فيا سادني...
أمل:قليلة أدب وقحة ...
سالمة :كانت ليلة تشبه الليلة للي مات فيها حسن وجميلة مافيش قمر والغيوم مغطية ع ضوء النجوم دجى راقدة وانا نفكر شن بيصر في حسين ومرته العقرب ...
غفيت وخداني نوم نحلم بي سعاد ملامحها متغيرة بين شيطانة وأنسيه تقرب مني لين وصلت فيا وطبقت ايديها ع رقبتي وقالتلي بالحرف الواحد اصلا قريب تلحقي ولدك ومرته سادك ضايقتيني....
فقت وانا خايفة نحس وكأنه اثر ايديها مازال في رقبتي تعودت من الشيطان ونضت توضيت وصليت ركعتين في جوف الليل ...دعيت ربي يحمي هاليتيمة للي مازال ماشافت من الدنيا شئ....
كنت نستنى امتا يطلع الصبح امشيت لجارتي سعيدة ...
سعيدة: هلت وانورت شن فيك اليومين للي فاتوا لاسألتي ولا طليتي ولاتحضري في الذرة.
سالمة: ضحكني كلامها كنت تعبانة ياسعيدة كان هذا راهو جيتك.
سعيدة: اللطف اهو صحتك زي الحصان مافيك شئ.
سالمة: تعب الجسم يهون لكن تعب القلب شن يداويه .
سعيدة: اه مدامه فيها تعب قلب معناها صاير شئ قعمزي.
سالمة: قعمزت وحكيتلها الحلمة...اسمعي ياسعيدة كان متت هالله الله في دجى ديري فيها الخير وراك تخليها للشارع معندها حد للي كانوا سندها توا تحت التراب ....وانا مانعلم ربي شن كاتبلي مرات اليوم معاك وغدوا في قبري...
سعيدة: بعد عمر طويل تحركي من مكانك مازال نبي نكسرلك راسك بكلامي من بيسمعني ودجى ماهيا إلا بنتي حتى توا ويابال هيا زي النسمة ...
سالمة: توا نستأذنك خلي نروح ونحط طنجرتي ع النار هو هذاك وقت ع الغداء...
طلعت سالمة وهيا واقفة في الباب قالت لجارتها توا في حفظ الله...
سعيدة: شن تودعي بري طيبي غداك والعشية الهدرزة عندك بنجيك انا والجارات...
روحت سالمة وهيا اطيب في الكوجينة ع صوت باب الحوش يخبط دجى افتحي الباب.
دجى: حاضر.
حسين: وين حناك خرابت البيوت.
دجى: مستغربة في المطبخ .
خش لامه وهو مشحون ومعبئ .
حسين: معقولة اخر حاجة اديرها تكذبي ع مرتي انت ام انت..
سالمة: وجعها كلام ولدها مش هذا للي كانت تستنى فيه منه في لحظة غضب ضرباته كف اطلع برا انا غاضبة عليك ليوم الدين.
حسين: دف امه بقوة وجاي بيطلع في هديكا اللحظة خبط راسها بزاوية الرخام ومن قوة الضربة للي جتها ع رأسها من الخلف طول طاحت والدم ينزف من راسها...
دجى: شفت اخر انسانة ليا وهيا تموت قدام عيوني ...
حسين: من الصدمة يضحك قتل امه بيده بيده...
وياما من نساوين خلوا الخوت يقتلوا بعض سعاد مثال لهلبا كانين توا قاطعت يدهم من ربي