رواية بين قلبين
الفصل الثالث3بقلم رويدا راشد
"تمرض القلوب كما تمرض الأجسام"
وعلاج أمراض الأجسام أيسر من علاج أمراض القلوب..
وإن من أفتك الأمراض التي تصيب القلب هي موت الضمير...
جاء الوقت للي يبجئ فيه طارق باش يلبس صفاء ....
كانوا الكل موجودين خشيت لبست عباية وخمار ورجعت ...نشوف فيه بياكلني بعيونه في خاطري نقوله والله معاد تشوف وجهي أكثر ماشفت...وانا واقفة وقفت جنبي حليمة.
حليمة: خيرك لابسة خمار مافيش حد غريب هذا طارق زميلك وراجل اختك.
وعد: بكل ثقة ولكن هو مش محرم ليا ويعتبر غريب عليا من حقي نغطي وجهي قدامه.
بسمة: كنت نسمع فيها وهيا تتكلم وفرحانة ع خاطر للي صار معاها مايخليش إلا حاجتين في الإنسان ياأما يخلق انسان قوي أو انسان ضعيف ومحطم...
صفاء: كان القهر بيقتلني خسرت أختي للي عمرها مارح يعوضني عليها حد لاطارق ولاألف من طارق...
روحوا الضيوف وفضت الزحمة وماقعدلي حد غير وعد ....خشيت عليها وهيا تصلي قعمزت جنبها وبديت نبكي انا مش خاينة ياوعد انا مغصوبة صدقيني وربي نعرف انه مهما نحكي صعب تسامحيني ...
وعد: سلمت وقعدت في الأول ساكتة وبعدها شن فيه احكي بالك نقدر نساعدك.
صفاء: مايقدر حد يساعدني لكن والله والله ماني فرحانة اني اخديت الشخص للي تتمنيه لكن مع الوقت رح تعرفي انك ارتحتي منه وربي فكك من شره.
وعد: صح لفت انتباهي كلامها لكن بعد وفات الاوان فهمته بعد فات الفايت...
صفاء: نعرف انه وعد مستحيل تسامحني ولكن المهم انا خففت حمل كبير ع قلبي...
سامي: اسمعي حليمة امتا بتمشي تميلي في وعد ...
حليمة: بجد تتكلم معناها عجباتك.
سامي: عجبتني وخلتني ننسى للي صار قبلها كله..خلتني نقول عفى الله عما سلف ونفتح صفحة جديدة مع انسانة أقل وصف ليها نظيفة حسيت براحة غريبة ليا اسنين معاش حسيته الشعور اهو.
طارق: انا من رأي انه انك تسأل عليها قبل ماتستعجل وتكمل فيها...
سامي : سبحان مغير الأحوال من للي يتكلم اصلا انت للي شجعتني انه ندير الخطوة هاذي بحكم انها قرت معاك..
طارق: الكلام هذا فات عليه اسنين والوضع تغير توا معاش نعرف عليها شي.
حليمة: راك تسمع كلامه سلم خوي شفتلها موقف دارته في الخطوبة مايصدرش إلا من انسانة محترمة وتخاف ربي ...
سامي: شن؟
حليمة: وقت خش طارق بي يلبس صفاء خشت لبست عباية وخمار ووقت سألتها ع السبب وقلتلها طارق مش غريب عليك بيولي راجل اختك وواحد من العيلة ردت عليا بكل أدب وقالت طارق مش محرم ليا ويعتبر غريب عليا...
سامي: شاف لطارق ع جنب وقاله وبعد هذا مازال تبي نسأل عليها هاذي المرأة للي لو نحطها بين ألف راجل يولو ألف وواحد هاذي للي تهنيني ع حوشي وقت الخدمة والسفر تعرفي ياحليمة نبيك تخديلها ذهب مالبساتش مرأة قبلها نبي مهرها يتكلموا عليه الكل ...وخفي روحك مانبيش نطول بالخطوبة.
طارق: طلع من الحوش وهو معصب امشي لحوش صاحبه مهند.
مهند: شن فيه أكيد مداير مصيبة..
طارق: ديرلي حل هذا نهاية للي يتبع كلامك انت والقط خالي بياخدها.
مهند: الموضوع هذا يبي قهوة باش نفهمك لانك متقلب زي موج البحر مش انت للي قلت معاش نبيها وكبيرة.
طارق: لكن مانبيش خالي ياخدها ونبدأ نشوف فيها قدام عيوني.
مهند: مانبيش ناخدها ومانبيش ياخدها غيري ولعبت بأختها وطلعت فيها راجل وع اساس بنستر عليها وبعدين معاك .
طارق: وهو يلف ماشي جاي في المربوعة اتصل بالقط خلي ايجئ بالك عنده رأي ينفع خير منك.
مهند: اهو بنكلمه.
في حوش ابوبكر الساعة 12 في الليل صوت الباب يخبط ...
ابوبكر: من للي ايجينا في الوقت هذا.
خيرية :ربي يستر اطلع شوف.
وعد: صوت الباب وترني خلاني نحس انه فيه مصيبة صايرة.
صفاء: شن فيه...وانا قعدا نتكلم بديت نسمع في أمي تبكي وتقول الحمدلله ع سلامتك انا مصدقة عيوني ...
وعد: طلعت نجري لقيت أمجد خوي واقف قدامي جريت عليه وتعلقت برقبته ماتوقعتش نشوف بعد السنين هاذي كلها..
أمجد: مش مطول بالكثير شهرين وراجع ثاني لكن حبيت نطمن عليكم...
وعد: قربت وشوشت في وذنه علينا ولا ع حبيبت القلب بسمة 😁.
أمجد: ضربني ع كتفي اسكتي خير مايسمعك حد.
وعد: المهم الحمدلله ع سلامتك توا ارتاح وغدوا نكملوا الكلام.
أمجد: صفاء شن هذا للي في يدك امتا كبرتي يافرخة ...دبلة .
خيرية: وهيا تتفرج ع اصغارها وفرحانة معناها لازم تحضر عرس اختك..
أمجد: ع حسب الوضع ياغالية انت فاهمة كل شئ.
ابوبكر: ربي يحميك.
القط: انقولك ع راي مش رح يخطر في بالك تتخلص بيه من مشاكلك كلها.
طارق: وللي هو .
القط: مش قلت خالك مستعجل ع الموضوع متعه خف حتى انت روحك وقولهم نبي نتزوج توا حتى لو في الايجار.
طارق: أكيد تتمهتك انت باش بنأجر من الخدمة متعي ولا حسابي المصرفي للي مليان .
القط: انا يما نصحتك قتلك تعالى اخدم معاي
انت مسكر رأسك فكر لفها في دماغك وبعدها نعطيك التفاصيل...
طلع طارق. معاه مهند برا يوصل فيه لسيارة.
مهند: كل شئ وليه ضريبة والكلام للي قاله القط توا ضريبته كبيرة ياطارق لفها في ذماغك كويس وبعدها قرر.
طارق: كل واحد يرقد ع الجنب للي يريحه ..
مهند: عقلك في راسك تعرف خلاصك..
العرب الاوله قالو:
إلى ماقدر يوصل فيك يحكي عليك
والى ماقدر يدير كيفك يكره الناس فيك
والوذن تسمع والعقول توازن •••و العين تشوف القلوب مخازن''
وقالو اللى ضامن رضاك يزعلك ديما ولى خايف من جفاك يدير لك قيمه👌
فقت ثاني يوم وامشيت نجري لبسمة قولتلها انه أمجد روح....فات اسبوع وانخطبت لي سامي..وبعد الخطوبة وقبل الفاتحة طلب ايجيها ويحكي معاها.
وعد: كنت متحشمة مش متعودة نحكي مع حد خاطي الخاين.
سامي: كيف حالك وحال صحتك .
وعد: الحمدلله .
أمجد: خلاص ابونسيب نخليك تقول شن عندك ع راحتك.
وعد: ماتتسبلش غير الغالية عندنا..بس.
أمجد: هانت اهو بنرتاح منك معاش مازال هلبا.
طلع أمجد .
سامي: ممكن تشوفي فيا لانتصل ولانحكي معاك في الهاتف مش تجاهل ولا اهمال مني ولكن لانه انا مريت بتجربة خلتني نغير نضرتي لكل شئ.
وعد: في خاطري وكان تعرف للي مريت بيه انا تسكت ومعاش تتكلم ،عادي مش مقياس المكالمات.
سامي: انا قبل حبيت انسانة وعشقتها فوق مايتصور عقلك وفي يوم من الايام خوي الكبير قال انه يبي يتزوج ،فرحتله ولكن فرحتي مغصوصة لانه للي خطبها كانت الانسانة الوحيدة للي حبيتها سكتت ماعرفتش ندافع ع حقي ....او بالأصح كانت ماتستاهلش اني نخسر خوي ع خاطرها المرأة تتعوض لكن خوي عمره مارح يتعوض...
وعد: سبحان الله وكأنه توأم لروحي نفس الأحداث ونفس القصة أو لعلها إشارة من الله باش نعرف نتصرف صح .
سامي: تعرفي ياوعد مانبيش نقولك اني انا كنت قوي ونسيت في يوم وليلة لكن الوقت كفيل ينسيك كل شئ ....وديما الانسان لما يخسر شئ يقول الخيره فيما اختاره الله...
انا سيبتها وبعد السنين هاذي كلها ربي رزقني بيك ومتأكد انت العوض للي يليق بصبري.
وعد: زي من غرس موس في قلبي كنت خاطري نحكيله ع ولد أخته ولكن خفت نصدمه وايزيد يكره الزواج سكتت معاش همي في طارق ولا الانتقام منه تفكيري حاليا في سامي وكيف نحافظ ع الثقة للي حطها فيا.
سامي: الاسبوع الجاي نقرو الفاتحة وبعدها نقدر نكلمك ع راحتي .
وعد: وانا في خاطري بالله لو تعرف تموت رديت عليه وقتله للي تشوفه مناسب ديره.
خش بعدها أمجد وانا طلعت...خشيت لدار لقيت صفاء مقعمزة ذبلت ملامحها بعد للي صار قعمزت جنبها وحضنتها سامحتك يابنت أمي هو ربي عوضني بغيره لكن انت لو رحتي معاش تتعوضي ع خشت بسمة زادت حضنتنا.
بسمة: هكي تعودت عليكم فكونا من النكد والهم.
صفاء: سامحيني بالله عليك الدنيا فيها موت وحياة .
وعد: بعد عمر طويل وحتى عرسي بنطلب يكون معاك .
بسمة: ياقعادي غير انا.
صفاء: انت تعرفي وضعه يابسمة.
بسمة: راضية بيه نعيش مع عمي وعمتي خيرية نستناه العمر كله..
وعد: وجعتني بسمة وخصوصا انها زي حالتي قبل وكلمت امي وبوي وقالوا عادي.
أمجد: لا مانقدرش نطلع ونخليها بالسنين.
خيرية: ذنبها في رقبتك البنت .
في الأخير اقتنع ووافق فات علينا اسبوعين معاش يتكرروا ثاني في حياتنا واصلا بعدها تغير كل شئ ....