رواية بين قلبين
الفصل الرابع4
بقلم رويدا راشد
"يا قلب يا مهموم سرك دسه واحكيه كان للي يفهمه ويحسه"
صفاء: الكل فرحانين يجهزو وانا جثة بلا روح معاهم كنت نحس بضيقة كنت نشوفلهم وكأني كنت حاسة انه الأيام اهيا معاش تتعوض...
بسمة: خيرك جوك مش عاجبني مفروض تكوني فرحانة.
صفاء: شافتلها ع جنب يفرح للي قلبه مرتاح.
بسمة: وانت خيره قلبك.
صفاء: مش ساد كسرة خاطر أختي ونجبرت نمثل دور مايشبهنيش بكل دور الخاينة الانانية انا مش هكي يابسمة.
بسمة: وشن للي جابرك تكلمي.
صفاء: كيف بتتكلم لين ضبحت وعد ع بسمة.
ناضت بسمة لوعد وسكتت صفاء.
وعد: هيا بنمشوا نديروا التحاليل ع خاطر الفاتحة جهزي روحك.
بسمة: انا فرحانة مش مصدقة روحي .
خيرية: زعمك يامبروكة ضحكتلنا الدنيا .
مبروكة: الحمدلله مابعد الضيق إلا الفرج كنت تفكري في وعد اهو توا بيتزوجو الثلاثة في نفس اليوم.
خيرية: خايفة عليهم من العين ياريت أجلت البنات .
مبروكة: تعوذي من الشيطان وللي كاتبه ربي صاير.
طارق روح لحوشهم ومعاه فلوس واعطاهم لأمه .
حليمة: شن بعث وحدة من كلاويك ولا كيف من وين جبتهم الفلوس اهما..
طارق: عندي واحد صاحب سلفني وقالي اخدم معاي ع الراس بعدين وخلص بالشوية عليك.
سامي: الأولى طلبت من خالك وبعدين ياما عرضت عليك الخدمة معاي وانت رفضت.
طارق: لانه مانبيش نقعد في مشاكل انا وياك ع خاطر الفلوس.
سامي: المهم اي حاجة ناقصة خالك موجود.
طارق: مانستغنوش ياخال.
أمجد: مش عارف علاش مش مرتاحله اهو طارق نحس فيه مش مريح بكل.
وعد: المهم اختك مرتاحة معاه.
بسمة: بعدين الولد مافيه شئ غير انت مركز معاه زايدة ع اللزوم...
أمجد: نتمنى يطلع هكي مش حاجة ثانية.
وعد: اسمع فكنا من النكد وراك تكلم اختك.
أمجد: ساكت لين نشوف وين بتوصل.
بسمة: أمجد طبيعته صاعب يركز هلباع أدق الأمور ...
وعد: نسمع في طارق يكلم في صفاء في الهاتف ويقولها جبت فلوس اشري للي تبيه اصلا كلها بتروحي بيه معاك كثري الذهب...في خاطري
"طلع تمثيل ،كلام ودلال وحن طول الليل ياخسارته كله طلع تمثيل ،ياريتني ماريتك وياريتني بالحب ماوديتك،لكن الغلطة نا للي غاليتك وعانيت واجد لين فاض الكيل" في خاطري للي ماصان عشرة سنين ومواقف بيصون عشرة شهور....تعودت من الشيطان ورقدت.
مهند: عارف روحك شن قاعد ادير ولا،تمشي في طريق وانت مغمض عيونك فيها.
طارق: فكني من جو النصائح اصلا ،تفاهمنا ع كل شئ ...
مهند: ناس زمان قالوا ...
- عوم في بحر غارق ولاتعوم في دموع ولية، كان مالقيتاش في الصحة تلقاه في الدرية..
طارق: معياد كله هم وغم ...
وجاء اليوم للي انقرت فيه الفاتحة ليهم الثلاثة..
سامي: شد الهاتف وبعث رسالة لوعد "ربي يباركلي فيك ياحلالي"
بسمة: شادة الهاتف وتكتب في رسالة لي أمجد
" الحمدلله بعد صبر السنين ربي كتبك من نصيبي"
صفاء: نشوف في عيونهم تضحك وانا لاكلمني ولاعبرني اصلا بالناقص من كلامه.
خيرية:مبارك يابنات بطول عمركم يارب.
مبروكة: هذا وين ارتحت انا.
بدت التجهيزات للعرس والجيران يجتمعوا في الليل ايديرو في حلويات العرس .
تسنيم: لالا الجو تلزمه دربوكة .
بسمة: كان عندك جهد خلي نوض نجيبهالك.
يارا: هاتي انا....وياها نكفو ونوفوا...
ناضت وعد وبسمة جابوا الدربوكة قعمزو البنات ع شكل دائرة ...وبدو يغنوا...
عيني ياعيني ياعيني عيني ع المالح ماتابا
عيني ياعيني ياعيني تنزل علي حلو شرابه
عيني ياعيني ياعيني سلمك راقصة ياوده
عيني ياعيني ياعيني ان شاءالله نمشيلك ونرده.
فاتت الأيام وجاء أسبوع العرس...
وعد: صفاء اضحكي هذا عرسك الناس كلها ملاحظة انك حزينة ومضايقة...
صفاء: نحس في روحي مخنوقة تقول بيرفعوني لقبري...لكن اسمعي ديما تفكري صفاء أختك للي تحبك مش صفاء الخاينة..
وعد: عمري ماشفتك خاينة انت اختي حبيبتي للي مانتمنالها غير الخير.
صفاء: نضت لأمي قلتها من الليلة لين كل وحدة تروح لحوشها ترقدي معانا.
مبروكة: اللطف وهذا شن يسمو فيه سلم بنتي راك كبرتي توا.
صفاء: وين تعرفي بالك معاش نشوفها.
بسمة: بسم الله تحركي من مكانك يقولو الفال تحت اللسان.
صفاء: من قبل مأثرة فيك حناي هلبا الحق شن الفال تحت اللسان اهيا مسكين خوي أمجد قداش بيعاني الحق.
بسمة: قرن حواجبها شن قصدك بيه الكلام اهو هازية عليا.
صفاء: غطيت رأسي بالوشاح وتوسدت رجل أمي ورقدت...
ابوبكر: السنين تمر زي لمح البصر تقول امس كانوا صغار .
عمر: ايه ياخوي كله ايضيع من اعمارنا راهو الحمدلله ان شاء الله نكبروا ع الطاعة...
وجاء اليوم للي مستحيل ايريح من بال حد ركبت وعد مع سامي وصفاء وطارق وبسمة وأمجد...
سامي: طالعة زي الغزالة.
وعد: هههه شن قصدك بلا ستوك شينة ولاكيف.
سامي: هههه بكل من توا بتبدي توقفيلي ع الكلمة.
وعد: تشمحت حسيت روحي زودتها ،مش قصدي نبصر معاك.
سامي: ياستي بصري ع راحتك .
أمجد: شن جوك توا.
بسمة: جو للي واخدة شخص تحبه سبحان للي سخرلنا الحال تقول في حلم قعدا مش مصدقة روحي...
أمجد: مش ديما نقولك كله بتساخير ربي.
بسمة: ونعمة بالله.
أمجد: لكن تعرفي ع كثر فرحتي لكن نحس كأنه جبل ع قلبي .
بسمة: معقولة ليلة عمرنا هكي تقول.
أمجد: مقصد كلامي مش اني مش فرحان توا بنقعد نشرح انا ...
طارق: راك تصدقي روحك اصلا انت ورقة كنت نلعب بيها والليلة بتنحرق...
صفاء: كنت ساكتة دموعي ينزلو بس خايفة لكن عمري ماتوقعت انه يقصد للي صار بكل.
بعد نصف ساعة رن هاتف سامي..
وعد:رد ع هاتفك.
سامي: انا مفروض سكرته الهاتف اصلا ،شد الهاتف شاف اسم المتصل عرف انه الأمر ضروري...
وعد:سامي شن فيه تكلم.
سامي: هاذي حليمة خلي نشوفها شن تبي طلعت بيها برا ...
حليمة: تعالالي ياخوي الحقني الحقني راهو الدنيا مقلوبة...
سامي: شن فيه.....
حليمة: .......
سامي: عمري ماتوقعت في ليلة عمري هكي ايصير كيف بنقولها توا خشيت وانا نحاول نخفي ملامح وجهي وعد البسي عبايتك وخمارك بنطلعوا...
وعد: توا شن فيه.
سامي: حليمة أختي تعبت ولازم نمشيلها نعرف في خاطرك تقولي هذا شن يقول في ليلة زي هاذي ينكد فيها عليا لكن اختي مانقدرش مانمشيلها...
وعد: بلعكس انت هكي تكبر في عيني وللي مافيش خير لاهله مافيش خير لناس لبست عبايتي لكن وضع سامي في الطريق كان يخوف ...فجأة تغيرت الطريق لحوشنا هاذي طريق حوشنا وانت قلت نبو حليمة .
سامي: ماهو حليمة في حوشكم ..
وعد: ياسامي شن فيه تكلم ...وانا في رأس الشارع شفت الزحمة السيارات شفت أمجد ملكبش والشرطة طالعة بيه وعياط نزلت نجري قبل ماتوقف السيارة سامي يعيط عليا وانا في عالم ثاني وصلت لسور متعنا شفت جثة متغطية وامي مغمي عليها في خاطري نقول ياربي لا ياربي مش هيا قمت الغطاء والشرطة يحاولو يمنعوني شفت صفاء ميتة ميتة فيلو الأبيض تغير لونه للأحمر من بياض الفيلو لبياض الكفن .....حسيت الدنيا وقفت تجردت من العالم للي حولي حرفيا لاعاد نتفكر شن درت ولا شن قلت ....
هيا هكي الدنيا دار فناء "اشتقت لوجه لاأدري مافعل التراب به"