رواية بين قلبين
الفصل السادس6
بقلم رويدا راشد
"فلا تكتموا مشاعركم عبروا عنها،عيشوها
تلذذوا،بها أنتم تحتاجون أن تقدموا الحب بقدار ماتحتاجون أن تأخذوه"
وعد: نزلت نجري خشيت للخيمة نبي نتأكد من للي سمعته أول ماشفتهم حسيت الدنيا وقفت معاش نندري ع روحي شن قلت ولا كيف تصرفت طلعت ع طوري علاش علاش قتلتها باش تعيش انت وانت ياتسنيم هو خاين وانت زيه هاذي نهاية العشرة والعيش والملح ياحقير لكن نوعدك كله يخلص يلف الوقت ونرجع حق اختي منك .
تسنيم: اختك بايعة شرفها مش ملائكة.
وعد: ظلمت قدامي مالقيت روحي إلا منقزة عليها هاذي تنفع وهاذي اضر ريشتها جبدت رموشها شعرها ..
سامي: وعد خلاص وعد اطلقيها .
وعد: وانا شئ مسكرة راسي العاشق الولهان حاول يدخل في الموضوع حصلت فيه خبطة مسحت ع كبدي..بعدها شدني سامي من خصري ورفعني في حضنه باش سلكها مني بعد بعدت من بين الدموع ضحكت لما شفت شكلها كيف ولا....مسحت ايديا من بقايا الزواق
للي ع وجها وامشيت...
سامي: بعد للي صار قبل شوية بديت نخاف راني بجديات معقولة هكي تقول نصارع في جيش بحاله من وين طلعت هالقوة.
وعد: سندت راسها للكرسي وقت تنجرح وتحس بالخونة والغدر من اقرب الناس ع قلبك رح يطلع منك أكثر من هكي بهلبا...
سامي: شديت يدها انا نحبك ياوعد.
وعد: جبدت يدي ونزلت راسي لساني انعقد ماقدرتش نقوله وحتى انا لانه مازال ماوصلتش المرحلة هاذي معاه وماتعودتش نقول كلام من باب المجاملة...تحججت انا تعبانة ياسامي.
سامي: انا مستعد نعرف عليك الحمل هذا كله قوليلي بس شن للي يريحك وانا مستعد نديره.
وعد: تصدق لو نقولك انا بروحي مانعرفش شن للي يريحني...لكن متأكدة مش اقل من دم طارق.
سامي: خليه ياوعد ربي ياخد فيه الحق.
وعد: اصلا شن بتقول ماهو ولد اختك طبيعي بدافع عليه.
سامي: تعرفي لو انا كيف ماتقولي ندافع عليه ولو 1% ماكنتش توا مقعمز معاك...
سية عدوك سيتين فسية
و سية حبيبك نار تشعل حية 🔥
نزلت لحوش أمي خشيت انصدمت ماكانتش تتوقع جيتي...
خيرية: وعد بنتي شن جابك مش قتلك ارتاحي.
وعد: كنت خايفة نشوف للي كانت ترقد معانا للي كانت تغني في عرس صفاء واخدة للي مايتسمى طارق...
خيرية: راك اضايقي روحك بالله عليك.
وعد: انا مافيا شئ وين بوي.
خيرية: في حوش عمك معاش يقعد في الحوش حيرني امره يابنتي لكن نقول الله غالب للي صار معانا مش شوية...
وعد: شوية وجت بسمة لحوشنا.
بسمة: حضنت وعد وبكيت بكيت لين دهشت انا وياها..
وعد: خشيت لدارنا قعمزت بسمة وانا حطيت راسي ع رجليها..علاش أمجد دمر نفسه ودمرنا كلنا معاه....ماحسيتش اني عروسة بكل من يوم العرس وانا من قصة لقصة معاش سلكت بكل .
بسمة: بالك انت مع راجلك شن نقول انا استنيت اسنين وسنين وقت وليت مرته في ليلة عمري نفيق انا راجلي ولا قاتل ومن قاتل اخته ....خالي يبيني نطلق ويعبئ في راس بابا.
وعد: شن هبل خالك بالك يحساب المطلقة مازال في حد بياخدها غير التعبان وخوه.
بسمة: انا قعدا بنت .
وعد: يعني الحقير نكد عليكم حياتكم وربي لما ننتقم منه ومنها الخاينة.
بسمة: من اول ماشفتها ماقدرتش نحبها حسيتها خبيثة ولكن تمثل في دور المسكينة ووو و.
وعد: شوية شوية وتفرجي بس.
بسمة: انت مش قدهم ونصيحة مني ليك خليك بعيدة.
مهند: نحس انه المصايب مازال في اولها.
القط: اصلا الحفلة كيف بدت توا هذا وين يبدأ اللعب ...
مهند: في خاطري ياحليله طارق للي يمد في يده للفلوس مايحسابش كله ليه ضريبة...
القط: خيرك ساكت ولا مش عاجبك الكلام.
مهند: لالا ،غير كنت نفكر في طارق للي مافوتش حتى شهر بعد موت مرته وامشى تزوج ثاني.
القط: شن تبيه يقعد في عدة عليها اصلا هيا من البداية عارفة نهايتها شن .
مهند:ربي يهديه وان شاء الله يعقلك المرة هاذي بجديات.
القط:😏 توا يعقل.
طارق: هيا ألبسي بنمشوا لأمي نبيها تشوف كنتها الجديدة...
تسنيم: تمام لحظات ونطلعوا..
وهما يتكلموا رن جرس الباب طلعت تسنيم تفتح تحساب حد من أهلها ...فتحت الباب لقت القط واقف في الباب.
تسنيم: خشت بسرعة لانها كانت مش لابسة وشاح ..
طارق: اهلا كيف الحال مشرفني اليوم ياريتك اعطيتني علم باش ندير حسابي .
القط: مش غريب انا والكلام هذا مش بينا احنا عيلة خش وفي يده باقة فلوس هاذي هدية العرس ليك ولي المدام ...لكن ذوقك حلو.
طارق: فوتها بضحكة رغم انه فاهم معنى الكلمة الفال ليك نشوفك عريس.
القط: لالا، انا مش ليا الجو اهو هيا توا سلام نخليك مع مرتك.
طارق: قعدت ضيفناك حتى قهوة.
القط: مرة ثانية .
حليمة: مقعمزة لين سمعت صوت السيارة طلعت لقاته طارق ولدها من هاذي للي معاك نحس فيها نعرفها...
تسنيم: انا كنت جارة حوش وعد .
حليمة: ان شاء الله انت بنت جيرانهم اصلا الكناسة مايلم غير الكناسة للي زيه هو كلب تطلعي انت كلبة زيه ....اطلع من حوشي قتلك انساني انا ولدي مات...
طارق: توا ينفعك للي اديري فيه اركبي ياتسنيم حتى انا فاضي للي جايك...
وعد: وانا في الحوش شفت في الكاميرات شخص جاء حط حاجة قدام الباب خليته لين طلع وامشيت جبته باش نشوف شن فيه..
فتحته لقيت فيه كرت مكتوب عليه
"كل سنة وانت عيدي ....عيد ميلاد سعيد "
ومن بين الورد لقيت سلسلة ذهب بإسمي استغربت شديت الهاتف شفته لقيته فعلا عيد ميلادي لكن معقولة سامي يعرفه وقرر ايديرلي مفاجأة حولت البوكس وقعدت نستنى في سامي امتا يروح...
اتصلو من مركز الشرطة بي ابوبكر وسلموه هاتف ولده ....طبعا ابو بكر امشى بدون مايفهم السبب ...روح بيه للحوش شوية وجاته رسالة ع هاتفه..
"تبي تعرف سبب موت بنتك افتح هاتف ولدك تفهم كل شى"
في البداية تردد وقال في خاطره هاتفه في خصوصياته..
في الوقت اهو روح سامي للحوش.
وعد: شن جوك توا.
سامي: تمام شن جو المجرمة متعي للي قطعتهم في العرس.
وعد:هههه يستاهلوا ولا،لا.
سامي: تبي الحق كان خاطري نعطيها طريحة معاك ونعاونك🤣.
وعد: نتفرج ع التلفزيون ....قلت خلي نسأله بطريقة ذكية شوية سامي امتا عيد ميلادك..
سامي : يوم ......لكن خلي نسألك نفس السؤال انت امتا عيد ميلادك.
وعد: هنايا عرفت انه يتكلم بجد جاوبته اليوم .
سامي: سامحيني نوضي ألبسي بنمشي نتعشوا برا وتاخدي اجمل هدية .
وعد: باهي من للي حط البوكس باهي شن بنقوله ولا نسكت وانا كيف لبست رن هاتفي شديته وفتحت الخط
نسمع في عياط وانا نعيط شن فيه بسمة بسمة تكلمي والعياط ايزيد انا معاش قدرت حتى نتكلم .