رواية شمعة الحب لا تنطفى الفصل الحادي عشر11والثاني عشر12 بقلم جنات
صباح يوم جديد
كارما صحت وكانت ريم وحياه لسه نايمين
كارما:حياه ... ريم يلا اصحو بقي
حياه وريم صحو وضحكو
حياه:تعرفى وحشنى انى اصحى على صوتك
كارما ضحكت:طب يلا عشان نجهز عشان نروح الشركه
ريم الابتسامه اختفت من على وشها:بابا مش هيوافق
حياه:بس يحيي وزين معاكى
ريم:روحو انتو وبلاش انا مش عايزة اكون سبب مشاكل بين بابا ويحيي وزين
كارما:بس ياريم
ريم:عشان خاطرى روحو انتو
حياه:خلاص مش هنروح
ريم:لو بتحبونى روحو انتو
كارما وحياه بصو لبعض وقامو عشان يروحو اوضهم يجهزو
(بقلم الكاتبه جنات)
==================
الكل كانو متجمعين فى الريسبشن
حياه وكارما نزلو
يحيي:يلا نمشي
زين:فين ريم
حياه بصت لعمها عزام:مش هتيجى
يحيي:ليه مالها
عزام:هو حضرتك ناسي انا قولت ايه امبارح يااستاذ يحيي
زين:يلا نمشي يايحيي
زين مسك ايد كارما وخرجو ويحيي عينه ابوه حياه قربت منه ومسكت ايده:يلا يايحيي
حياه ويحيي خرجوو
===================
فى الشركه وتحديدا فى الفرع الجديد
زين ويحيي وصلو ومعاهم البنات وكل واحد دخل مكتبه
مراد كان شايفهم من شباك مكتبه واستغرب ليه ريم مش معاهم
مراد مسك فونه ورن على زين اللى رد عليه
مراد:هى ريم ماجيتش معاكو ليه
زين ماكنش عارف يتكلم عشان كارما:بعدين يامراد
مراد:بعدين ايه يعنى هى مش هتيجى اصلا
زين:ايوا واحتمال كبير على طول
مراد:ايه السبب مش فاهم
زين:قولتلك بعدين سلام عندى شغل
مراد اتعصب ودخل يشوفها شالت البلوك ولا لأ واتعصب اكتر لما كان لسه زى ماهو وساب الشركه ومشي
=====================
فى مكتب زين اللى كان مضايق من طريقه عزام
كارما شافت انه مضايق:زين .... بلاش تضايق نفسك كل حاجه هتتحل .... وبعدين انت زعلان ليه مش يمكن يكون انسان كويس وريم تحبه
زين:مش كويس ياكارما وده اللى انا مستغربه
كارما:ازاى مش كويس
زين:يعنى بيسهر وبيشرب والله اعلم ممكن يكون بيعمل اكتر من كدا
كارما:طب وليه عمو يوافق عليه لبنته
زين:مش عارف وده اللى هيجننى ولازم اعرفه ومش لازم ريم توافق عليه
كارما:ريم مش هتوافق انا متاكده
زين:ليه متاكده
كارما:بصراحه يعنى انا حساها معجبه بمراد صاحبك
زين:وعرفتى ازاى
كارما:يعنى بتدخل على الاكونت بتاعه وكمان حياه شافت صور لمراد على فونها ولما بتيجى سيرته عينيها بتلمع من الفرحه بتبقي ناقص تتطلع قلوب
زين ضحك:تطلع قلوب .... تمام انا هشوف الموضوع ده
كارما:هنشتغل ولا ايه
زين:ايوا يلا
كارما اخدت الملفات وقعدت تشتغل والباب خبط ودخلت السكرتيرة:مستر زين مدام صوفيا برا وعايزة تقابل حضرتك
زين:خليها تفضل
كارما متابعه اللى بيحصل وشافت بنت جميل شكلها اواخر العشرينات بس كانت لابسه فستان اسود قصير وضيق جدااا وحملات رفيعه
زين قام وقف وسلم عليها:اهلا مدام صوفيا اتفضلى
صوفيا بدلع:عامل ايه يازين
زين:بخير
صوفيا:اكيد مستغرب انا هنا ليه .... بصراحه انا جيت اشوف ايه اخر تطورات الفيلا بتاعتى
زين:المهندسين شغالين وانا قولت لحضرتك اول لما التصميم يخلص هابعته لفاروق بيه
صوفيا:لا الفاروق برا الموضوع كل تواصلك يبقي معايا انا
زين:تمام
صوفيا:وبصراحه كان فى كام حاجه كنت محتاجه ازودهم فجيت بنفسي اعرفك
زين:اتفضلى
كارما كانت متابعه كل كلامهم ومضايقه جدا من طريقه صوفيا اللى بتتكلم بدلع وطريقه مستفزة
زين عينه جت على كارما وشاف نظراتها لصوفيا وابتسم
صوفيا:كدا بس يازين
زين:تمام يامدام صوفيا ... انا هكلم المهندس واخليه يضيف كل طلباتك
صوفيا قامت وقفت:مرسيي يازين بجد انت ذوق جداا
زين:شكراا لحضرتك
صوفيا عينها جت على كارما اللى قاعده على الكنبه:اووه سورى ماكنتش اعرف ان عندك حد يازين
زين قام وقف وقرب من كارما وضمها ليه:دى كارما مراتى
صوفيا:انت متجوز
زين:كتبنا الكتاب والفرح قريب واكيد هتكونى اول المعزومين
صوفيا:اكيد
صوفيا مدت ايدها لكارما:اتشرفت بمعرفتك
كارما:شكراا
صوفيا خرجت وكارما بعدت عن زين وهى مضايقه وقعدت تكمل شغلها
زين ابتسم وقعد جمبها:مالك ياكوكى
كارما:مافيش بتشغل عادى
زين:يعنى مش مضايقه
كارما:وهضايق من ايه
زين:من صوفيا مثلا يعنى غيرانه مثلا
كارما بصتله:اغير من دى طبعاا لا...انا اضايقت من طريقتها المستفزة بس مش اكتر لكن غيره مستحيل لانى عندى ثقه كبيرة فى نفسي
زين:ياواد ياواثق انت ..... وخلى عندك ثقه انى مستحيل اعمل حاجه تضايقك ياكارما
كارما بصتله وابتسمت:نكمل شغل بقي
زين:يلا
(بقلم الكاتبه جنات)
=================
فى مكتب يحيي اللى قاعد سرحان
حياه:يحيي
يحيي.....
حياه هزته وهو بصلها:مالك يايحيي سرحان فى ايه
يحيي:مافيش ياحياه
حياه:موضوع ريم مش كدا
يحيي:بابا مش عارف بيعمل كدا ليه
حياه:هو مروان ده مش كويس
يحيي:معرفوش على المستوى الشخصى بس هو ممتاز فى شغله
حياه:سيبها على الله وان شاء الله خير
يحيي ابتسملها:باذن الله
فون يحيي رن وكان جده
يحيي:ايوا ياجدى.....ليه فى ايه .....حاضر هجيب زين وهنيجى
يحيي قفل مع جده:حياه يلا عشان ترجعو القصر
حياه:ليه فى ايه
يحيي:تعالى بس نروح لزين
حياه اخدت شنطتها وخرجت وراه ويحيي دخل مكتب زين
يحيي:زين يلا هنروح الشركه الام
زين:ليه فى ايه
يحيي:جدك كلمنى ومتعصب جدا وبيقولى هات زين ومراد وتعالو فى اجتماع مهم
زين:اجتماع فجأه كدا
يحيي:معرفش .... كلم مراد وتعالى هنوصل البنات ونروح
زين:طيب يلا
زين خرج هو وكارما وبص لسكرتيرة:امل قولى لمراد ان فى اجتماع فى الشركه الام
امل:مستر مراد خرج من زمان يامستر زين
زين:تمام
يحيي:تعالى نوصل البنات وكلمه فى الطريق
زين:يلا
================
فى الشركه الام فى اوضه الاجتماعات
قاعد توفيق وعزام ومجموعه من المهندسين ورؤساء الاقسام والموظفين ودخل زين ويحيي ومراد وقعدو
زين:ليه الاجتماع المفاجئ ده
عزام:فى كارثه يااستاذ
يحيي:كارثه ايه
توفيق:فى شركه جديده اول مرة تظهر فى نطاق شغلنا حتى منعرفش مين مديرها اخدت المشاريع الجديده اللى كنا هنستلمها
زين:وازاى الكلام ده حصل هو لعب العيال مش الاتفاق كان معانا
توفيق:اكيد قللو الاسعار
يحيي:حتى لو قللو المفروض يكلمونا ويتفاوضو معانا
زين بص لمروان:مش المفروض البيه اللى ماسك الحسابات يكون على علم بكل ده
مروان:الايميل لسه جيلى النهارده يازين
مراد بيسمعلهم ومش فارق معاه كل ده
عزام:دى خسارة كبيرة احنا طلبنا اكتر من شحنه بمواد البناء والمفروض كنا هندفع فلوسهم من الدفعات اللى هناخدها من المشاريع دى
زين بيفكر:والشركه دى اسمها ايه
مروان:مافيش اى معلومات عن الشركه لا اسمها ولا مديرها ولا حتى مكانها
زين بعصبيه:ازاى يعنى الكلام ده .... اومال حضرتك واللى معاك لازمتكو ايه
عزام:زين مش وقته الكلام ده
زين:اومال وقته امته حضرتك عارف حجم الخساير ايه
يحيي:المشاريع دى كانت هى اللى هترفع الفرع الجديد وبكدا الفرع الجديد مالوش اى تلاتين لازمه وكمان داخلين المناقصه الجديده بمبالغ كبيرة ومافيش اى تمويل
توفيق:اهدو عشان نفكر واكيد هنلاقى حل .... وبعدين لازم نركز فى المناقصه لان لو دى راحت مننا يبقي كدا مصيبه فاهمين
زين قام وقف:لو مش عايز تخسر المناقصه ياريت تعتمد على ناس تعرف تشتغل كويس مش بالكوسه هي
زين خرج ومراد خرج ويحيي كمان
عزام:مروان الغلط كله منك انت
مراون:انا هدور واكيد هعرف مين صاحب الشركه
توفيق:تمام روحو انتو واتصرفو
=================
زين ومراد خرجو من الشركه
زين:هتروح فين
مراد:ريم ماجيتش الشركه ليه
زين:تعالى نروح شقتك وهقولك كل حاجه
بعد شويا فى شقه مراد اللى كان متعصب:يعنى هيجوزها ل🐶 ده
زين:انا ماقولتكش عشان تتعصب كدا
مراد:اومال المفروض اعمل ايه
زين:حبيتها
مراد بصله:عشقتها مش حبيتها يازين ومستحيل اخلى ال🐶ده ياخدها منى
زين:مش مصدق بقي مراد بيحب وبيعشق كمان
مراد:مش ناقصاك يازين وبعدين هنروح بعيد ليه مانت متنيل على عينك وبتحب بردو
زين:فى حاجه اكيد بين مراون وعزام عشان يوافق عليه لبنته ولازم نعرفها
مراد:اكيد .... صح فرح مازن بكرة وكلمنى وعازمنى وقالى انه حاول كتير يوصلك مش عارف وقالى اعزمك انت ويحيي.... هنروح
(مازن صاحب مراد وزين ويحيي )
زين:هنروح وهجيب كارما وحياه
مراد:وريم
زين ضحك:وريم ياعم .... همشي انا بقي
مراد:قبل ماتمشي عايز رقم ريم
زين:ليه
مراد:هاته وبطل رخامه بقي
زين:ماشي
(بقلم الكاتبه جنات)
================
زين رجع القصر وقال ليحيي على فرح مازن وعرفو البنات وريم رفضت تروح معاهم
يحيي وزين قالو للبنات انهم هما اللى هيشترو الفساتين ليهم والبنات فرحوو
==================
ريم قاعده فى اوضتها فونها رن برقم غريب كنسلت ومرديتش
بس رن تانى وفى كل مرة تكنسل وبردو يرن
ريم:اوف بقي ده مين الرخم ده
ريم ردت بعصبيه:الو
مراد:اهدى ياوحش مين معصبك
ريم:وحش لما ياكلك انت طالب تستظرف ياعم انت
مراد:عم .... مش عيب كدا ياانسه ريم
ريم:انت مين وعارف اسمى ازاى
مراد:انا اللى هدبسلك وشك
ريم برقت وكتمت ضحكتها:مش تقول انك سياده المقدم مراد
مراد:هو لازم ام اللفه الطويله دى يعنى ... قولنا اسمى مراد بس
ريم:وعايز ايه يامراد بس
مراد ضحك:ماجيتش الشركه ليه النهارده
ريم:عادى يعنى ... وبعدين حضرتك بتسال ليه يعنى
مراد:مش المتدربه بتاعتى
ريم:اااه وهو كل متدربه عند حضرتك مش بتيجى الشركه بتجيب رقمها وتتصل تشوف ماجيتش ليه
مراد:انت غير الكل ياوحش
ريم:بطل تقولى الكلمه دى الله
مراد ضحك اوى:بطلنا ياقمر ... هتيجى الفرح
ريم:فرح مين
مراد:مازن صاحب زين ويحيي
ريم:لا مش هروح
مراد:لا هتيجى ياريم
ريم:نعم وده ليه ان شاء الله
مراد:هو كدا هتيجى يعنى هتيجى
ريم:لا بجد مش هاجى وبعدين انت بتسال ليه اصلا
مراد:عشان انا هروح وعايز اشوفك ياريم
ريم ابتسمت:وتشوفنى ليه ان شاء الله
مراد:ريم انا اجازتى خلصت وعندى مأموريه وهسافر لمده شهر بجد عايز اشوفك واتكلم معاكى قبل مااسافر ... هستناكى سلام
مراد قفل وريم كانت مبسوطه جدااا وقامت وقفت على السرير وفضلت تنطط كتير
الباب اتفتح وريم وقفت والبنات ضحكو عليها
حياه وكارما دخلو وقعدو على السرير وريم كمان قعدت
حياه:احكى
كارما:عايزين نسمع
حياه:سبب الفرحه دى مراد مش كدا
كارما:يلا قولى بقي
ريم:معجبه بيه لالا بصراحه بحبه هو شخصيه حلوة اوى وتشد اى حد
كارما وحياه نطو عليها فجاه وضحكو كتير اوى
كارما:انا فرحانه اوى عشانك ياريموو
حياه:طب والعريس اللى عمو قال عليه
ريم الابتسامه اختفت من على وشها:مش عارفه وخايفه اوى
كارما:انتى تتكلمى مع مراد وخليه يجى يتقدملك
حياه:صح
ريم:ربنا يسهل
حياه:هنام معاكى النهارده كمان
ريم دخلت تحت الغطا:يلاااا
البنات ضحكو ونامو جمبها
(بقلم الكاتبه جنات)
====================
تانى يوم الشباب جابو الفساتين للبنات وكل واحده كانت بتلبس فى اوضتها وبعد وقت كبير زين ويحيي خلصو وكلمو البنات عشان تنزل
البنات خرجو من اوضهم واتفاجأو ان ال٣ فساتين بلون البينك
البنات ضحكو ونزلوو وكانو الشباب كل واحد قدام عربيته وكانو لابسين بدل بلون الاسود
زين فتح الباب لكارما ويحيي نفس الكلام وريم ركبت مع يحيي وحياه
وبعد شويا وصلو الفرح وكان كل البنات لابسين بينك والشباب بدل سودا
والفرح كان حلو جدااا
جه وقت رقصه العريس والعروسه والكابلز وزين ويحيي كل واحد اخد مراته وراحو يرقصو
يحيي:احلى باربي ياحياتى
حياه:يحيي بجد انا بحبك اوى
يحيي:وانا بعشقك ياحياتى
زين عينه على كارما اللى بتبص بعيد عنه ووشها احمر من الخجل
زين:كارما
كارما رفعت وشها وبصتله:زين تعالى نقعد بجد محروجه اوى
زين:تؤ انا عايز ارقص معاكى ياكارما
زين ميل وهمس عند ودنها:عقبال رقصتنا بس وانتى عروستى بالفستان الابيض
كارما ابتسمت ونزلت وشهاا وزين باسها من راسهاا
(بقلم الكاتبه جنات)
==============
عند ريم كانت واقفه زهقانه لوحدها وجرسون ماشي من جمبها الصنيه ميلت منه والعصير وقع وجه على فستان ريم
الجرسون:انا بجد اسف غصبن عنى والله
ريم:خلاص ولايهمك بس الحمام منين معلش
الجرسون شاورلها:هناك
ريم:تمام شكرااا
ريم راحت المكان اللى شاور عليه وماكنش فى حمامات:الغبي ده قالى انه هنا
ريم لسه هتلف تمشي لاقت مراد فى وشها
مراد:تعرفى انك احلى واحده فى الفرح كله
ريم اتبسمت وفكرت شويا:انت اللى قولت للجرسون
مراد:ايوا
ريم كشرت:وقولتله يكب عليا العصير
مراد ضحك:دول نقطتين بس خلى قلبك ابيض
ريم بصت حوليها ماكنش فى حد:انا لازم امشي مش هينفع اقف معاك هنا
مراد:ريم انا هقولك كلمتين وامشي على طول
ريم:بس يحيي
مراد:متخافيش بقي
ريم:حاضر
مراد:ريم انا بحبك واوى كمان
ريم بصتله اوى واتكسفت
مراد:لا ونبي ارجعى ريم قطتى اللى بتخربش
ريم:قطه وبتخربش
مراد:ايوا هى دى ريم اللى عشقتها .... فاكرة اليوم اللى شديتى منى العصير وكبتيها على البت اللى ضايقتك فى الحفله
ريم افتكرت:هو كنت انت
مراد:شوفتى بقي مالحقتش اتهنى بالعصير
ريم ضحكت اوى:بصراحه هى كانت رخمه اوى
مراد:والحمدلله انك خلصتينى منها .... ريم بجد انا بحبك وعايز اكمل حياتى كلها معاكى
ريم افتكرت ابوها والعريس:بس بابا
مراد:عارف زين قالى ... وانا هروحله الشركه بكرة وهطلب ايدك وهاخد منه معاد عشان اجى البيت واطلبك
ريم:بجد
مراد:جد الجد ... انا جبتلك هديه ويارب تعجبك
مراد طلع علبه حجمها وسط وفتحها وكان فيها اسورة وخاتم ومكتوب عليهم مرادى
ريم:مرادى
مراد:طبعاا مرادك اومال مراد الجيران مثلا
ريم ضحكت:حلوين اوى
مراد:ويبقو احلى لما تلبسيهم .... ممكن
ريم هزت راسها ومراد مسك ايدها ولبسهم لها
ريم بصت لاقت الرقصه خلصت قلعت الاسورة والخاتم وحطتيهم فى شنطتها
ريم:عشان مينفعش حد يشوفنى لابساهم
مراد:تمام ... روحى لان هيرجعو التربيزة مش هيلاقوكى وانا هاجيلكو شويا كدا
ريم:حاضر
ريم مشت كام خطوة ووقفت:مراد
مراد لف:عيونه
ريم:انا كمان بحبك
ريم قالت كدا وجرت ومراد كان طاير من الفرحه
ريم رجعت التربيزة كانو الشباب والبنات قاعدين
حياه:كنتى فين
ريم:فى الحمام
مراد جه عليهم:مساء القشطه
زين:مساء النداله
مراد ابتسم لان عارف ان زين فهم ان ريم كانت معاه
مراد:دانا صاحبك حبيبك متخافش
زين ابتسم
يحيي بص لمراد:اتاخرت ليه
مراد:لا كان عندى حاجه مهمه حياه او موت
ريم ابتسمت
فضلو كلهم سواا لحد الفرح ماخلصت وبعدها مشووو
=============
تانى يوم فى الشركه الام
عزام قاعد فى مكتبه والباب خبط ودخلت السكرتيرة:عزام بيه مستر مراد برا وعايز حضرتك
عزام باستغراب:خليه يدخل
مراد دخل:صباح الخير
عزام: اتفضل
مراد قعد
عزام:خير
مراد:لا هو كل خير الصراحه .... عزام بيه انا مش بحب الف وادور بصراحه انا طالب ايد ريم بنت حضرتك
عزام:قولت ايه
مراد:لا ماهو كلامى واضح مش محتاج شرح
عزام:ماعنديش بنات للجواز
مراد بضيق:ليه
عزام:انت طلبت وانا رفضت واتفضل يلا عندى شغل
مراد:لا ماهو الرفض لازم يكون ليه سبب
عزام:الاول لان ريم فى حكم المخطوبه ... ثانيا لان لو انت اخر واحد فى الدنيا مش هجوزك بنتى
مراد:ده اخر كلام عندك
عزام:ايوا
مراد قام وقف:ماشي كلمتين وحطهم حلقه فى ودنك ريم مش هتبقي لحد غيرى ونقطه وخلص الكلام
مراد قال كدا وخرج من المكتب وعزام اتعصب من طريقته
الفصل الثاني عشر
مراد خرج من مكتب عزام وراح لزين وكان متعصب
زين ضحك:قتلته ولا لسه
مراد:كان نفسي والله بس اكيد هتزعل عليه
زين ضحك اوى:رفض صح
مراد:بيقول لو اخر واحد فى الدنيا مش هجوزك بنتى
زين:ناوى على ايه
مراد:مش عارف والمشكله عندى مأموريه مهمه وهسافر شهر او اكتر ... خايف عمك يجوزها اللى اسمه مروان
زين:هتسافر فين
مراد:الغردقه
زين:ركز انت فى الماموريه بتاعتك وسيب موضوع مراون عليا
مراد:تمام همشي انا بقي عشان هجهز نفسي
زين:تمام
================
فى قصر الحديدى
الكل بيجهزو للعزومه اللى عملاها فريده لصحابتها
فريده:داده فاطمه مش عايزة ولا غلطه سمعانى
فاطمه:اكيد ياهانم
فريده:الاكل جاهز
فاطمه:ايوا يافندم
فريده:جهزو كل حاجه يلا وانا هطلع اجهز لانهم على وصول .... واطلعى قولى للبنات يجهزو عشان اعرفهم على الضيوف
فاطمه:حاضر ياهانم
فريده طلعت تجهز وفاطمه طلعت تقول للبنات اللى كانو قاعدين على السطح
ريم:انتو مرحتوش الشركه ليه النهارده
حياه:يحيي وزين قالو مافيش شغل مهم
كارما:واحنا قولنا فرصه نقعد معاكى
دادا فاطمه طلعت:يابنات فريده هانم بتقولكو اجهزو عشان الضيوف اللى جايه
ريم:مش الضيوف دول تبعها احنا مالنا
فاطمه:هى اللى طلبت انى اعرفكو
حياه:حاضر يادادا
فاطمه نزلت
كارما:غريبه اول مرة تطلب اننا نكون موجودين وصحابتها جاين
ريم:اقطع دراعى لو ماكنتش بتخطط لحاجه
حياه:تعالو نلبس عشان لو نزلنا بالاسدالات احتمال تقتلنا
البنات ضحكو وراحو يلبسو
================
فى اوضه ريم لبست وهتخرج من الاوضه فونها رن وابتسمت لما شافت اسم مرادى
ريم:الو
مراد:عامله ايه
ريم:الحمدلله ... مالك يامراد
مراد:روحت النهارده لابوكى
ريم:رفض مش كدا
مراد......
ريم:وانت ناوى تعمل ايه
مراد:مش عارف
ريم:انت هتسافر امته
مراد:الاسبوع الجاى
طال الصمت بينهم
ريم:مراد
مراد:نعم
ريم حست انه مش على طبيعته وانه متغير عن مراد اللى كان بيتكلم معاها فى الفرح
مراد:عايزة ايه ياريم
ريم بصوت مخنوق:ولا حاجه انا لازم اقفل
ريم قفلت المكالمه وقفلت الفون وعيطت ودخلت الحمام غسلت وشها وخرجت
(بقلم الكاتبه جنات)
===============
فى اوضه كارما كانت بتكلم زين
زين:وانتى خايفه من ايه
كارما:مش عارفه قلبي مش مرتاح يازين .... دى اول مرة تطلب اننا نبقي موجودين قدام اصحابها
زين:متخافيش ياكارما وطمنى قلبك ولو حصل اى حاجه رنى عليا وانا اجيلك هوااا
.... انا هقفل عشان عندى اجتماع خدى بالك على نفسك
كارما:حاضر باى
كارما قفلت وخرجت كانو حياه وريم واقفين ونزلو سواا كانو الضيوف وصلو واللى كانو ٣ ستات وشكلهم من عائلات غنيه جدا وفريده وتارا وصفاء قاعدين معاهم
فريده شافتهم:تعالو يابنات .... خلونى اعرفكو على بنات اخواتى ... دى حياه ودى ريم ودى كارما
البنات قربو وسلمو عليهم باحترام
دادا فاطمه جت:السفره جاهزة يافريده هانم
فريده قامت وقفت:اتفضلو على السفره
الكل قعدو على السفرة واكلو سواا وبعد شويا كانو خلصو وقعدو فى الريسبشن وفاطمه كانت بتقدملهم الضيافه
رقيه واحده من الضيوف:وانتو كليات ايه يابنات
حياه:احنا فى كليه هندسه
رحمه واحده من الضيوف:صح نسينا سلو عيله الحديدى الكل لازم يدخل هندسه
رنا واحده من الضيوف:الا تارا
فريده وتارا اضايقووو
رحمه:وعلى كدا بتنزلو الشركات
ريم:ايوا نزلنا الاجازة دى ندرب
رقيه:بس حياه وكارما ماشاء الله قمرات فرحكو هيكون امته
حياه:لسه محددناش المعاد
رنا:اومال ياكارما انتى ساكته ليه مش بتتكلمى
تارا:اصلها خرسه
كارما بصتلها وزعلت
رنا:هى دى بنت اخوكى اللى امها من عيله فقيرة يافريده
فريده:ايوا بنت جمال اخويا
كارما كانت بتحاول تمسك دموعها
بالعافيه والبنات وصفاء خايفين عليها
رقيه:فى ناس كتير كانو بيتكلمو عن اخوكى واللى اتجوزها دى يافريده
فريده:والله ومازالو بيتكلمو يارقيه .... تصدقى انهم بيقولو انه غلط معاها عشان كدا اتجبر انه يتجوزها ماهو اكيد ابن عيله الحديدى مش هيتجوز واحده زى دى
كارما اتعصبت من كلامها وقامت وقفت:كفايه بقي ... انا امى اشرف واحسن من مليون واحده زيكوو
فريده وتارا اتصدمو انها بتتكلم وصفاء فرحت لما سمعت صوت كارما
فريده:صوتك رجعلك يابنت سمر
كارما:ايوا بنت سمر .... اللى وصلت لمكانه انتى معرفتيش توصليلها ابداا
رقيه:الظاهر ان بنت اخوكى نفس تربيه امها يافريده
كارما:اخرسي ... انا متربيه كويسه جداا التربيه اللى حضراتكو متعرفوش عنها حاجه
رنا:كدا كتير يافريدة انتى جيبانا نتهزق فى بيتك
صفاء قربت من كارما:اهدى يابنتى
رحمه:احنا ماشين يافريده ومستحيل نيجى هنا تانى
قامو مشو وهما متعصبين
فريده:ايه اللى عملتيه ده ... ردى عليا مانتى مابقتيش خرسه يابنت سمر
كارما زعقت:اسمى كااااااارماااااا
ريم وحياه كانو واقفين مبسوطين ان كارما بتاخد حقها
فريده قربت منها وضربتها بالقلم:انتى اتجرأتى وعيلتى صوتك عليا وعلى ضيوفى وانا مش هعديها يابنت سمر
كارما:هتعملى ايه اكتر من اللى عملتيه فيا ....
كان باابا بيقول عليكى اطيب قلب لكن لا انتى ظالمه وانا بكرهك
فريده ضربتها قلم تانى ومسكتها من طرحتها وجرتها وراهااا
صفاء:سيبها يافريده هتعملى ايه
حياه جرت عليها:ابعدى عنها
فريده زقت حياه وقعتها وجرت كارما اللى كانت بتحاول تبعد ايدها عنها ومش عارفه
فريده دخلت المطبخ وفتحت باب المخزن اللى موجود فى المطبخ وزقت كارما بقوة وقعت على الارض
فريده:خليكى هنا زى ال🐶 عشان تبقي تتجرأى وتعلى صوتك عليا
فريده خرجت وقفلت الباب والمخزن ماكنش فيه نور وكارما مش شايفه اى حاجه وفضلت تزحف لورا لحد ما وصلت للحيطه وضمت رجليها لصدرها وكان جسمها كله بيترعش وبتعيط فى صمت
=========
برا
حياه زعقت:افتحى الباب جوا مافيش نور ولا شباك حتى
فريده:محدش يدخل
ريم:ازاى يعنى محدش يدخل هاتى المفتاح
فريده:انا هطلع اوضتى وسبوها تموت زى الكلبه جوااا
صفاء:مش كدا يافريده طلعى البنت
فريده:وانا قولت لا
حياه:انا هكلم زين وصدقينى هتندمى
فريده كانت ناسيه زين خالص:يبقي يورينى هيعمل ايه
فريده طلعت وتارا وراها وحياه بتحاول ترن على زين
ريم قربت من الباب:كارما انتى سمعانى ... كارما ردى عليا ونبي
صفاء:كارما يابنتى ردى عليا طمنينى انتى كويسه
حياه:زين مش بيرد ولا حتى يحيي نعمل ايه
ريم:انا خايفه عليها اوى
حياه:دادا فاطمه مافيش مفتاح تانى
فاطمه:لا يابنتى والله
ريم وحياه عيطووو
ريم:رنى على زين تانى يلااا
حياه فضلت ترن كتير اوى
بعد ساعه وحياه بترن على زين مش بيرد وبيحاولو يكملو كارما مش بترد عليهم
ريم:احنا هنفضل واقفين كدا مش هنعرف نعمل حاجه
حياه:طب قوليلى نعمل ايه
فون حياه رن وكان زين
حياه ردت بسرعه:زين انت فين .... تعالى بسرعه الحق كارما .... تعالى وانت هتعرف كل حاجه بس بسرعه ونبي
حياه قفلت:الحمدلله جاى فى الطريق
ريم:كارما ردى علينا ونبي
حياه بخوف:ليكون اغمى عليها
صفاء:ربنا يستر
بعد شويا البنات سمعو صوت زين بينادى:كااارمااا
حياه بصوت عالى:احنا فى المطبخ يازين
زين ويحيي دخلو بسرعه
زين:فى ايه
حياه بتشاور على باب المخزن:كارما جواا
زين بصدمه:جوا ازاى يعنى
ريم:عمتو دخلتها وقفلت عليها
يحيي:طب ماتفتحو الباب
حياه:عمتو اخدت المفتاح وطلعت
زين اتعصب وخبط الباب بكتفه
يحيي:اهدى يازين الباب ده محمل مش هتعرف تكسره تعالى نجيب المفتاح من عمتك
زين خرج من المطبخ بعصبيه وطلع خبط على باب اوضه فريده بقوة
فريده فتحت:ايه الهمجيه دى
زين بغضب:هاتى المفتاح
فريده:لا خليها تتربي بنت سمر
زين بصوت جهورى:قـــولــــت هــاتــى المفتـــاح
فريده:وانا قولت لا
زين بعد فريده من قدامه ودخل الاوضه وبقي يكسر كل حاجه قدامه
فريده:انت مجنون ايه اللى بتعمله ده
عزام وتوفيق وصلو فى الوقت ده القصر وسمعو الصوت وطلعو
توفيق:ايه اللى بيحصل هنا
يحيي:عمتى حبست كارما فى المخزن ورافضه تدى المفتاح لزين
عزام:ماهى اكيد غلطت
زين بعصبيه:وربي ومااعبد لو ماجبتى المفتاح لهدد القصر فوق دماغكوو
توفيق:اديله المفتاح يافريده
فريده:بس يابابا
توفيق بحده:فريده
فريده جابت المفتاح من جيبها ورميته على الارض وزين اخده وبصلها:حسابنا لسه مخلصش يافريده هانم
زين نزل بسرعه ودخل المطبخ وفتح الباب وحياه نورتله بالفلاش الفون
زين وقف مصدوم لما شاف كارما متكومه فى ركن فى المخزن
زين:كارما
كارما رفعت وشها واول ماشافت زين قامت بتعب جرت عليه ودخلت جوا حضنه وعيطت
زين ضمها بقوة وكان حاسس برعشه جسمها:هشش.....انا معاكى اهدى ياحبيبتى
كارما بخوف وعياط:انا .... انا خايفه ... اوى ....متســ....ـبنيش تانى يا...زين
زين:انا معاكى ياقلب زين
زين حس بجسمها تقل
حياه:اغمى عليها يازين
زين شالها وطلع على اوضتها وحياه وريم وصفاء ويحيي راحو وراها زين دخل ونيمها على السرير والبنات وصفاء معاه ويحيي فضل برا الاوضه
صفاء فكتلها الطرحه وحياه جابت برفان وزين رش منه على ايده وقرب ايده من كارماا
ريم:مش بتفوق ليه
صفاء:كلمى الدكتورة ياحياه وقوليلها اللى حصل معاها
حياه رنت على الدكتورة وحكتلها اللى حصل مع كارما والدكتورة ردت عليها
حياه قفلت وبصتلهم:الدكتورة بتقول سبوها بعد الصدمه اللى حصلتلها هتفوق تانى يوم زى كل مرة .... بس
زين:بس ايه ياحياه
حياه:الدكتورة بتقول ان ممكن بعد الصدمه والخوف ده ترجع تفقد صوتها تانى
ريم عيطت:لالا مستحيل ده يحصل احنا ماصدقنا ان صوتها رجع
زين:اهدو .... ان شاء الله هتقوم بسلامه ... روحو اوضكو وانا هفضل معاهااا
صفاء:روح ياحبيبي ارتاح وانا معاها
زين:لا انا اللى هفضل معاها روحو انتو
الكل خرجو من الاوضه وطمنو يحيي وراحو يرتاحو
وزين قعد جمب كارما وفرد رجليه على السرير ومسك ايدهااا
(بقلم الكاتبه جنات)
===============
فى اوضه ريم دخلت وكانت تعبانه جداا دخلت اخدت شاور وصلت ودعت كتير لكارما وبعدها طلعت على السرير ومسكت فونها كان لسه مقفول فتحته ولاقت مسدجات كتير ان مراد حاول يكلمها
ريم افتكرت انه كان متغير معاها وحطت الفون ولسه هتنام الفون رن وكان مراد ردت عليه:الو يامراد
مراد بعصبيه وصوت عالى:انتى قافله ام الزفت ده ليه من الصبح بحاول اوصلك مش عارف .... والبلوك ده تشيله بدل اقسم بالله ياريم هتشوفى منى وش مش هيعجبك
ريم كانت مخضوضه من عصبيته وصوته العالى
مراد زعق:ماتردى عليا ... ريــــم
ريم:نعم
مراد:قافله الفون ليه من الصبح والزفت البلوك ده يشتال سمعانى
ريم اضايقت من طريقته واتكلمت بحده:وافتحه ليه هاا ... مش حضرتك الصبح كنت متغير وبتتكلم معايا بالعافيه ... عايزنى اشيل البلوك واكلمك ليه ياسياده المقدم
مراد:اقسم بربي لو كنتى قدامى كنت كسرت دماغ امك دى
ريم:احترم نفسك لو سمحت ... وبعدين انا مخنوقه وتعبانه ومش قادرة اتكلم لو سمحت اجل اى كلام لوقت تانى
مراد حاول يهدى:مالك ياريم
ريم:لسه فاكر تقولى مالك
مراد:لا ونبي بصي جو القفش وحبيبي زحلانه والمحن ده مش بحبه
ريم بصوت مخنوق:مراد على فكرة انا مش بهزر
مراد:طب اهدى وقوليلى مالك
ريم:النهارده حصل مشكله فى القصر وكارما تعبت وكلنا خايفين عليها
مراد:ان شاء الله هتبقي كويسه اهدى .... وبعدين انا الصبح كنت مضايق من طريقه ابوكى معايا عشان كدا ماكنتش بتكلم .... ريم ابوكى بيقولى لو انت اخر واحد فى الدنيا مش هجوزك بنتى ... انتى عارفه لو ماكنتش متاكد انك هتزعلى عليه كنت قتلته
ريم:سيبها على ربنا يامراد واكيد هيقف معانا ... بس بجد انا خايفه يحاول يجوزنى اللى اسمه مروان وانت مسافر
مراد:على جثتى انها تحصل وبعدين زين هيبقي معاكى وهو عارف كل حاجه متقلقيش
ريم:خير ان شاء الله
مراد:هتنامى
ريم:اليوم كان متعب الصراحه وقلق وخوف وانا تعبانه ونفسي انام
مراد:عقبال يارب كدا ماتنامى فى حضنى
ريم:انت قليل الادب على فكرة
مراد:هو ده اخرك فى قله الادب ياريم دانتى طيبه اوى
ريم:تصدق بالله هقفل فى وشك
مراد:طب ابقي اعمليها عشان اكسرلك وشك
ريم ضحكت:مراد بجد هى دى رومانسيه بتاعتك
مراد:لا متستنيش منى رومانسيه خالص .... احنا نفضل على طيبعتنا كدا حلوين لكن جو المحن ده مياكلوش معايا الصراحه
ريم:طب يلا روح نام بقي واياك تروح تسهر سهرة كدا ولا كدا
مراد:احنا هنبدأها اوامر من اولها ولا ايه
ريم:ايواا عند سيادتك مانع
مراد:سيادتى ممكن يعمل اى حاجه عشان خاطر عيون سيادتك
ريم ضحكت:طب يلا طريقك اخضر تصبح على خير يامراد
مراد:وانتى من اهلى ياقلب مراد
ريم قفلت وكانت فرحانه جداا ونامت
=================
صباح تانى يوم
كارما بدات تتحرك بس لسه مغمضه عينيها وفكرت انها لسه فى المخزن وقامت مفزوعه من الخوف وزين اللى كان نايم وهو قاعد جمبها صحى:كارما انتى كويسه
كارما بصتله وبصت حوليها واتنفست لما لاقت نفسها فى اوضتها وحطت ايدها على وشها وعيطت وزين شدها لحضنه
زين افتكر كلام الدكتورة انها ممكن تفقد صوتها:هششش.....متفكريش فى اى حاجه انا معاكى ... كارما
كارما وهى بتعيط:كنت خايفه اوى يازين اوى
زين اتنهد لما سمع صوتها:حقك عليا ياقلب زين ... احكيلى ايه اللى حصل ياكارما
كارما بدات تحكيله اللى حصل وهى بتعيط
زين بعد عنها ومسك وشها بين ايده ومسح دموعها:كارماا....تتجوزينى
كارما استغربت:ماحنا متجوزين يازين
زين ضحك:مانا عارف ياكارما .... لا نعمل فرحنا
كارما:فرح
زين:اه فرح انا العريس وانتى العروسه واهو نجوز الواد يحيي وحياه معانا
كارما بصتله:بس انت ماكنتش موافق ايه اللى غير رايك
زين:لانك دخلتى قلبي ياكارما وبقيت اغلى حاجه فى حياتى
كارما:بجد
زين حضنها:انا بحبك اوى ياكارما ... مش عارف انا كنت غبي كدا ازاى ماكنتش شايفك
كارما:العتب على النظر نقول ايه بقي
زين ضحك اوى الباب اتفتح وكارما بعدت عن زين
حياه وريم دخلو
حياه:بقي احنا هنموت من القلق عليكى وانتو قاعدين مقضينها رومانسيه وضحك
ريم زقت زين:ابعد كدا يااخ
زين قام من على السرير والبنات حضنو كارماا
ريم:كنا خايفين عليكى اوى ياكارما
حياه:بس يابت ياكوكى كنتى جامده اخر حاجه امبارح عجبتينى الصراحه
البنات وزين ضحكو
زين:ساعدوها تغير وانزلو تحت يلا
حياه:زين انت ناوى على ايه
زين:كل خير ياقلبي ... يلا قومو
(بقلم الكاتبه جنات)
=================
زين نزل وكان توفيق وعزام وفريده قاعدين
زين بصوت عالى:يـــحيــــي
يحيي نزل:فى ايه يازين
زين:عايزك تجهز القصر عشان فرحى انا وانت الاسبوع ده
يحيي:نعم فرح مين
زين:ماتفتح معايا فرحى انا وانت على كارما وحياه
توفيق:انت اتجننت بتاخد قرارات من دماغك
البنات نزلو فى الوقت ده
زين:سمعت انا قولت ايه يايحيي .... والله لو حابب تسمع كلام جدك ومتتجوز معايا براحتك
يحيي:عبيط انا عشان ارفض موافق يامعلم
عزام:يحيي انت هتعصي كلام جدك
يحيي:هعصي كلام جدى .... ليه انا هعمل ايه...دانا هتجوز مش هعمل حاجه لاسمح الله وحشه ..... ولا انتو ناويين تخللونا جمبكوو
عزام:ولد ... انت ازاى ترد عليا كدا
زين:انا هعدى اللى حصل امبارح بمزاجى .... بس قسمابربي لو اتكررت تانى متلموش غير نفسكو سمعانى يافريده هانم ....كارما مراتى وهنتجوز الاسبوع ده ولو حد فكر بس انه يقولها كلمه تزعلها ههد القصر فوق دماغكو
توفيق:انت بتهددنا
زين:سميها زى ماتسميها ياتوفيق بيه .... يلا يايحيي ورانا حاجات كتير
زين بص للبنات:وانتو جهزو كل حاجه محتاجينها .... ولو محتاجين تروحو اى مكان تعرفونا
البنات بفرحه:تمام
زين ويحيي مشوو
توفيق بص لكارما:يعنى صوتك رجعلك واحنا منعرفش
كارما:اظن ده اخر همكو ولا ايه ياجدو
حياه:يلا نطلع ورانا حاجات كتير
البنات طلعو وتارا كانت واقفه على السلم هتنفجر من الغيظ
==============
فى الشركه
زين ويحيي دخلو مكتب مراد
مراد:ده ايه الجمعه الجامده دى
يحيي:انت يابنى مش قولت مش هتيجى الشركه تانى
مراد:جيت اخد كام حاجه بتاعتى وماشي ياعم
زين:جهز نفسك عندك طلعه قبل ماتسافر
مراد:طالعه ايه
زين:فرحنا
مراد:فرح مين لامؤاخذة
زين:هو احنا مش عاجبينك ياحيوان
يحيي ضحك:فرحى انا وزين
مراد:لا والله ... طب ماتجوزونى معاكى
يحيي:مين اللى امها داعيه عليها
مراد:انت ادرى بالست الوالده بقى
زين ضحك
يحيي:مش فاهم قصده ايه الحيوان ده
مراد:هو عزام بيه ماقالكش ولا ايه
يحيي:قالى ايه .... وبعدين انتو الاتنين شكلكو مخبين عنى حاجه
مراد:ولا حاجه ياسيدى انا جيت اتقدمت لاختك وابوك رفض
يحيي:احلف
مراد:اه والله
يحيي:وبابا رفض ليه
مراد:عايز يجوزها للى اسمه مراون
يحيي بضيق:بردو .... وبعدين انت تعرف ريم منين اصلا
زين:ده وقت اسئله يايحيي خلونا نشوف ورانا ايه
يحيي:لا استنى .... انت خلاص يعنى استسلمت قالك لا يبقي لا
مراد:انت تعرف عنى كدا اختك مش هتتجوز حد غيرى ... ارجع انا بس من المأموريه دى وهتبقي حرم المقدم مراد ....بس المهم اوعى ابوك يجوزها للملزق مراوان وانا مسافر ورحمه ابويا اشقك انت وابن عمك
زين:ماشي ياعم الشبح يلا بقي نشوف ورانا ايه
مراد:مش تحجزو القاعه
زين:لا هنعمله فى جنينه القصر
مراد:سهله مهندس ديكور محترم هو هيظبط كل حاجه
يحيي:الواد ده بيفهم
زين:ماشي يحيي شوف مهندس كويس ونشوف البنات عايزين ايه ونقوله
يحيي:قشطاااا
مراد حضنهم:مبروك ياعشرة عمرى
زين ويحيي حضنوه بحب ...