في أوضة ناريمان وصقر
ناريمان قاعدة لوحدها بعد ما صقر مشي وزعلانة وشوية والباب خبط وكانت منال
منال: صباح الخير ياعمتو
ناريمان ضحكت: يابت بلاش كلمة عمتو دي
منال بصتلها وابتسمت: ندمانة؟
ناريمان: على إيه؟
منال: انك طلبتي من عمو صقر يتجوز تقى
ناريمان: عارفة يامنال رغم ان موجوعة أوي انه يكون مع غيري بس والله دا اللي هيريحني في قبري
منال بدموع: بعيد الشر عنك
ناريمان ابتسمت: كلنا هنمشي وكل واحد له معاده وانا معادي خلاص قرب اوي وانا حاسة بدا وكل اللي عاوزاه قبل ما امشي ان صقر يكون مبسوط وعايش حياته مرتاح
منال: طب ممكن بقى تنزلي تفطري معانا دا النهاردة الكل في البيت دا اليوم الاجازة بتاعنا
ناريمان: حاضر هنزل معاكي
في الوقت دا كانت فريدة سمعت كل كلامهم خصوصا ان منال لما دخلت سابت الباب مفتوح وفريدة سمعت كل اللي اتقال وجريت على اخوها علي اللي لسة نايم
فريدة دخلت اوضة علي وبتصحيه بعنف
علي صحي مفزوع: في ايه؟
فريدة: قوم شوف اللي بيحصل من ورانا
علي قام وبصلها: ايه اللي حصل؟
فريدة: مش قولتلك ان ابوك بيخطط لحاجة، ابوك ناوي يجوز صقر لتقى
علي بصلها بصدمة: نعم بتقولي ايه انتي؟
فريدة: هو انا اللي بقول دا انا سمعت بنتك بتقول لمرات اخوك
علي: لا انتي تقعدي بقى وتفهميني سمعتي ايه بالتفصيل
تقى وصقر في الطريق ومافيش حد فيهم بيتكلم مع التاني، تقى ماسكة تليفونها بتقلب فيه وماجد بعتلها رسالة: صباح الورد على كائن التأتأ
تقى ابتسمت على الرسالة وردت عليه: صباح الخير
صقر تقريباً واخد باله من ابتسامتها وتركيزها في التليفون
صقر اتكلم بهدوء: تحبي اشغل اغاني؟
تقى بهدوء: ذي ماتحب
صقر شغل الاغاني بس هي باردوا مركزة في التليفون
صقر قفل الاغاني تاني واتكلم: عاوز اتكلم معاكي
تقى ببرود: تقدر تتكلم
صقر: اتكلم ازاي وانتي مركزة في التليفون كدا
تقى قفلت التليفون وبصتله: اتفضل سامعاك
صقر: انا عارف انك زعلانة مني
تقى: وازعل منك ليه؟
صقر: على كلامي اللي انا قولته ليكي ليلة مارجعت متأخر
تقى: قصدك لما رجعت سكران
صقر: مش هتفرق
تقى اتكلمت من غير ماتبصله: تفرق ولا ماتفرقش دي حاجة ماتخصنيش، وانت ماقولتش حاجة غلط بالعكس انت كدا بتقولي خليكي فاكرة اصلك وماتنسيش نفسك
صقر وقف العربية على جمب وبصلها: تقى انا مش بحب اجرح حد ولا بحب ان أضايق حد، بس انا ساعتها مكنتش في وعيي
تقى: حضرتك مش محتاج تبرر كل دا، وبعدين دا اكتر وقت الناس بتقول فيه كل اللي في قلبها بصراحة
صقر: بس انا مش بفكر بالطريقة دي
تقى دموعها نزلت وبصتله: ليه؟ ما اخواتك مش بيفكروا غير في كدا، فهتيجي عليك انت عادي
صقر اضايق انه خلاها تعيط: تقى انا فعلاً آسف
تقى بصتله وعنيها كلها دموع ومنهارة: حضرتك مش مجبر انك تتأسف لواحدة ذيي، حضرتك فين وانا فين عشان تتأسفلي
صقر لسة هيرد بس هي قاطعته: ياريت مانتكلمش مع بعض انا محتاجة اروح مشواري وارجع من غير اي كلام ولا اي مشاكل
في البلد، وهدان قاعد سرحان وخايف
بدر قعد جمبه: طمن قلبك ياجدي انا عامل كل حاجة اننا نخليها في آمان
وهدان: خايف اوي يا بدر
بدر: لا عاش ولا كان اللي يقدر يخوفك ياجدي، بس انا ممكن اسأل حضرتك سؤال؟
وهدان بصله: اسأل
بدر: ليه حضرتك بتعمل كل دا معاها؟
وهدان ابتسم: اقولك وماتقولش لحد؟
بدر ضحك: اوعدك ياجدي مش هقول لحد
وهدان: جه عليا وقت ان وقعت في حب امها وكان نفسي اوي اتجوزها بس أبويا رفض وقال ان فرق العيلة والعادات والتقاليد وكلام الناس
بدر: يعني ياجدي حضرتك كنت بتحب دادة هانم؟
وهدان بصله: ايوا يابدر ذي ما انت بتحب بنتها
بدر بتوتر: ايه اللي حضرتك بتقوله دا
وهدان ابتسم: انا حاسس بيك من اول مرة نزلت فيها مصر معايا ورحنا ليهم هناك، وانا شايف في عينيك عشق ليها مش بس حب وشفت في عنيك لمعة جميلة اوي ساعة ماشفتها
بدر قام من جمب جده ومشي خطوتين: بس دا حلم بعيد اوي ياجدي
وهدان: ليه بتقول كدا؟
بدر بصله: عشان يمكن هي مش شايفاني وبعدين هتشوفني ازاي وهي مش بتيجي هنا
وهدان: لسة معاك وقت تلحق تحقق حلمك دا، بس عاوز اسألك سؤال
بدر: اتفضل ياجدي
وهدان: طب حافصة بنت عمك؟
بدر: حافصة بنت جميلة وكمان بنت عمي بس انا شايفها اخت ليا وبس وقلبي مش شايف غير تقى، الحورية اللي عيني وقعت عليها وكأنها حورية طلعتلي من البحر عشاني انا وبس، كفاية خضار عنيها ياجدي اللي فيهم صفاء غريب أوي ولون بشرتها المميز اللي مشفتوش على حد
وهدان: دا انت واقع أوي بقى
بدر ابتسم: أوي ياجدي بس انا عارف ومتأكد ان الحلم دا بعيد أوي عليا وصدقني لو ربنا كاتبه ليا هيتحقق ولو مش ليا هرضي بالمكتوب واوعدك يا جدي لو كنت مع اي بنت غيرها هصونها وهدي ليها قلبي وحبي وكل حاجة وعمري ما اجرح بنات الناس معايا
وهدان: ربنا يقدملك الخير كله يا حبيبي
في الڤيلا، اتجمعوا على الفطار
علي بص لأبوه: مش هتقولي باردو يابابا اشمعنا صقر اللي يروح مع تقى
ناريمان هنا ردت قبل عمها: اسمحلي ياعمي اتكلم
مراد: اتفضلي يابنتي
ناريمان بصت لعلي: صقر هيتجوز تقى ياعلي
علي بصلها باستغراب: هو انتي اللي بتقولي كدا؟
ناريمان: أيوا
فريدة: وراح فين حبك لصقر؟
ناريمان: الحب عمره ماينتهي بالعكس دا بيزيد أوي يوم بعد يوم بس انا عايزة دا يحصل، عايزة سعادته عشان يكون له إبن يشيل اسمه ويسنده في حياته
آدم كان لسة فوق ونزل على كلام ناريمان: هو مين اللي هيتجوز؟
فريدة بصت لإبنها عشان عارفة انه بيحب تقى: دا خالك هيتجوز تقى
آدم انصدم صدمة عمره: خالي؟!
مراد: ايوا يا آدم
آدم واقف مكانه وبيبصلهم بصدمة وهيخرج…..مراد: رايح فين مش هتفطر؟
آدم رد من غير مايبصله: انا رايح افطر مع اصحابي
آدم خرج وركب عربيته واتحرك بسرعة وهو مخنوق ومضايق ووصل النادي وكان فريد صاحبه مستنيه
فريد أول ماشاف آدم عرف ان فيه مصيبة
فريد: في ايه؟
آدم شد الكرسي وقعد وهو بينفخ ومضايق….فريد: ما تقول يا ابني في ايه شكلكم مايطمنش خالص
آدم بحزن: يعني من بين كل البنات كلها خالي يختار تقى يتجوزها
فريد: هو مش خالك يا ابني متجوز؟
آدم: ايوا بس مراته تعبانة وعاوزاه يتجوز عشان يخلف
فريد: طب وخالك رأيه إيه؟
آدم: معرفش يافريد انا لسة عارف الموضوع دا لسة قبل ما اجي دلوقتي
فريد: طب مايمكن خالك يرفض
آدم بصله بعيون كلها حزن: حتى لو هو رفض، دكتورها في الجامعة بيحبها
فريد: ماتنساها يا آدم هي مش شايفاك وانت ادامها من سنين
آدم: بقولك ايه ياريت تغير الموضوع دا عشان انا مخنوق اووي وماسك نفسي بالعافية
بعد وقت طويل صقر وتقى وصلوا البلد والكل كان مرحب بيهم جداً
فتحية: حمدلله على سلامتكم
صقر قرب منها وباس إيديها إحتراما لكبر سنها: الله يسلمك ياعمتو
وسلم على وهدان وباس إيديه وتقى سلمت عليهم وكانوا فرحانين بوصولهم جداً
وهدان لفتحية: الاوض جاهزة؟
صقر اللي رد: أوض ايه ياعمي احنا ان شاء الله هنمشي على آخر الليل
بدر: ودا ينفع باردوا يا صقر، وبعدين انتو مش بتيجو هنا كتير فلازم تعوضوا دا
وهدان: انتوا هتطلعوا اواضكم دلوقتي ترتاحوا وتغيروا لبسكم
تقى بتوتر: بس احنا مجبناش لبس
حافصة ابتسمت: عادي ياحبيبتي تعالي معايا وانا اجيبلك لبس من عندنا
بدر: وانت ياصقر تعالى معايا هجيبلك باردوا لبس
طلعوا سوا وتقى كانت فرحانه انها ممكن تقعد هنا لبكرة على عكس صقر اللي كان مضايق وعاوز يروح في نفس اليوم
وهدان دخل اوضته ورن على مراد
وهدان: انا هقعدهم لحد بكرة يامراد
مراد: انا خايف عليهم
وهدان: عيب تقول كدا وهما هنا في حمايتي ماتقلقش محدش عرف بوصولهم، ومافيش اي حد اصلا عارف ان دي بنت هانم واسماعيل
مراد: ماشي ياوهدان انا كنت عاوز اقولك على حاجة
وهدان: خير يا ابن عمي؟
مراد حكاله انه عاوز يجوز تقى لصفر وان ناريمان مرات صقر موافقة عليهم كدا ووهدان اتفاجئ بدا أوي لان كان لسة بيتكلم مع بدر عنها
مراد: ايه ياوهدان رحت فين؟
وهدان: معاك يامراد، طب وصقر موافق؟
مراد: لسة مقالش رده
وهدان: ربنا يقدم اللي فيه الخير يارب
صقر دخل الأوضة اللي هيقعد فيها، وبدر اداله جلابية بيضا ودي أول مرة صقر يلبس فيها جلباب ووقف ادام المرايا يبص لنفسه ويتكلم: والله وجه اليوم اللي تلبس فيه جلابية ياصقر
تقى باردوا في اوضتها وحافصة جابت ليها عبايا باللون الاسود المشجر بالورد الأبيض وكانت جميلة فيها وسابت شعرها نازل من غير اي رباط
صقر خرج من اوضته واتقابل فيها ووقف ثواني يبصلها منبهر بجمالها في اللبس الصعيدي، تقى اتكسفت من نظراته ليها وبصت في الأرض ومشيت من ادامه بهدوء
نزلوا تحت عشان الغدا وبدر أول ماشاف تقى وقف ذي التمثال بيبصلها وبس واللي اخد باله من نظراته هو صقر
وهدان: تعالو اقعدوا يلا
تقى قعدت وصقر قعد جمبها وبدأوا الغدا واللي كانوا قاعدين، ابتسام أم بدر وجوزها عتمان، وثريا أم حافصة وجوزها سامح
فتحية: منورين البلد ياولاد
صقر: البلد منورة بأهلها
عتمان: اخيرا شفناكم ياصقر
صقر ابتسم: معلش بقى الشغل واخد كل وقتنا
(وهدان يكون ابن مراد أبو صقر، فيعتبر عم صقر وولاده يعتبروا ولاد عمه)
صقر عينه على بدر اللي عينه على تقى ومضايق اوي من كدا
صقر بص لعمه: بقول لحضرتك ياعمي، احنا بعد الغدا ان شاء الله هروح انا وتقى للمقابر عشان ان شاء الله بكرة نتحرك للقاهرة
بدر وهو عينه على تقى: ومستعجلين ليه كدا ماتقعدوا اسبوع معانا
تقى ردت: معلش عشان الجامعة بتاعتي
حافصة مضايقة من بدر عشان هي حاسة بحبه لتقى
وهدان: مراد متفق معايا انكم هتيجو هنا في أجازة نص السنة
صقر: ان شاء الله ياعمي
شوية والغدا خلص وخلاص صقر هياخد تقى ويروحوا للمقابر
صقر قرب من تقى: ممكن تلبسي اي حاجة على شعرك
تقى باستغراب: ليه؟
صقر: عشان احنا هنا مش في القاهرة وهنا فيه عادات وتقاليد
تقى: بس انا ما اتعودتش على كدا
صقر: معلش
تقى: مش هعمل كدا
صقر اضايق ومشي خرج الجنينة وهي وقفت ثواني وخرجت وراه
تقى: يلا ممكن نمشي؟
صقر لسة هيرد بس بدر خرج ليهم: تحبوا أجي معاكم؟
صقر بهدوء: تعالى طبعاً
بدر راح معاهم بس صقر كان حاسس إن فيه حاجة وبعد شوية وصلوا عند المقابر وتقى قعدت ادام قبر ابوها وامها ومنهارة وبتتكلم معاهم
صقر وبدر واقفين جمب بعض بعد ماقرأوا الفاتحة لأهل تقى ووقفوا بعيد عنها عشان يسيبوها براحتها
صقر: مش هنفرح بيك قريب ولا ايه
بدر ابتسم وبص على تقى: والله نفسي
صقر: حاطت عينك على حد؟
بدر بصله: هقولك بعدين
تقى خلصت ورجعت ليهم بس وهي ماشية شافت كلب لونه اسود وخافت جداً وجريت استخبت في صقر
بدر بصلها انه هو اللي كان واقف قريب منها بس قال لنفسه انها اكيد اتصرفت كدا عشان صقر طول الوقت معاها لكن هو لا
صقر بصلها: ها نمشي؟
تقى بخوف: اه يلا بسرعة
صقر ضحك ومشيوا راجعين الڤيلا، بدر سابهم وراح مشوار وهما فضلوا يتمشوا شوية بس مع كل خطوة بيمشوها الناس بتبص على تقى وخصوصا انها ماشية سايبة شعرها
صقر بصلها بغضب: عاجبك كدا
تقى: في ايه؟
صقر: انتي مش شايفة الناس بتبصلك كدا ليه
تقى بعصبية: انا مش شايفة نفسي عاملة حاجة غلط
وفي اللحظة دي ظهر كلب تاني لونه اسود وهي استخبت وراه ومسكت دراعه: مشيه بسرعة ياصقر
صقر بصلها وبعد ايديها عنه بعنف: هو انتي كل شوية تقربي مني كدا، ايه انتي عجبك الموضوع ولا ايه
تقى بصتله بدموع وبصت للكلب اللي الحمدلله مشي ودموعها نزلت: عمري مافكرت في اللي بتقول عليه دا واني احب اقرب من اي حد بالطريقة اللي بتفكر فيها دي، انا عندي فوبيا من الكلاب السودا
تقى سابته ومشيت سبقته للبيت وهو فضل بارة يتمشى في البلد
نيجي لبيت الحاجة جليلة، قاعدة في المندرة ودخل عليها همام
همام: إبن مراد الألفي في البلد
جليلة بعيون كلها شر: لوحده؟
همام: لا معاه مراته
جليلة: لازم نوصل لبنت اسماعيل ياهمام
همام: طب اعمل ايه؟
جليلة: عاوزاك تعرف هيرجع على مصر امتى وتروح هناك تراقب البيت كويس أوي عشان تعرف مين هي بنت اسماعيل عشان تعرف شكلها وبعد كدا هقولك هتنفذ ازاي
في مصر في ڤيلا الألفي، ناريمان في اوضتها بس تعبانة أوي وحاسة ان خلاص وقتها جه وبتكلم نفسها بإنهيار: يارب طول في عمري لحد الصبح اشوفه وبعدها انا جاهزة تاخدني عندك
صقر رجع البيت وبيدور بعنيه على تقى
صقر لبدر: فين تقى؟
بدر: فوق في اوضتها
صقر طلع فوق وقف ادام باب اوضتها وكان متردد يخبط ولا لا بس في النهاية خبط وهي فتحت
صقر: عاوز اتكلم معاكي ممكن؟
تقى سابته واقف ودخلت قعدت على السرير، وهو دخل وساب الباب مفتوح وقعد على الكرسي الموجود قصاد السرير
صقر بصلها: انا عارف ان مزودها أوي معاكي، وعارف ان ماكنتش كدا قبل كدا وكلامي ليكي ليلة ماكنت سكران والله ياتقى ماكنت في وعيي ولا بفكر بالطريقة دي خالص، انا عارف باللي طلبته منك ناريمان
تقى بصتله بتوتر……صقر: تقى انا مش قادر استوعب ان ناريمان ممكن تروح مني ولا قادر اتخيل بس ان اكون لواحدة غيرها ومش قادر استوعب كل دا ولا عارف اتعايش مع اللي ممكن يحصل
تقى وقفت ومشيت خطوتين: وانا مش هقبل ان اوافق على حاجة ذي دي وان اكون مع واحد مش عاوزني
صقر: بس انا عاوز
تقى بصتله بصدمة: نعم؟
الفصل السادس
صقر بصلها: انا عاوز انفذ كلام ناريمان وخصوصا لو دا كان آخر طلب ليها……صقر بيتكلم وعيونه كلها دموع: لو سمحتي ياتقى انا بترجاكي توافقي عشان خاطرها هي مش عشاني، جوازنا هيكون بيني وبينك على الورق وبس لكن ادامها وادام الكل جوازنا طبيعي ورسمي
تقى لسة هتتكلم بس هو قاطعها: انا مش عاوز منك أي رد دلوقتي فكري لحد مانيجي ماشيين الصبح وذي ماقولتلك ردك عشانها مش عشاني
صقر خرج وسابها بتفكر في كل كلمة قالها وتليفونها رن وكانت ليلى، وردت بسرعة
ليلى: ايه ياتقى مش تطمنيني عنك
تقى: الحقيني ياليلى
ليلى بقلق: في ايه؟
تقى حكتلها كل اللي حصل بالتفصيل
ليلى: طب هتعملي ايه؟
تقى بإنهيار: مش عارفه والله يا ليلى حاسة اني تايهة وفي نفس الوقت ناريمان صعبانة عليا
ليلى: تقى وافقي عشان ناريمان حالتها الصحية وحشة اوووي وكلنا قاعدين جمبها وخايفين
تقى: ليلى محدش يعرف ان قولتلك ان جوازنا هيكون على الورق بيني وبينه وبس لكن ادامكم جواز رسمي
ليلى: حاضر ياحبيبتي ماتقلقيش
تحت بقى قاعد وهدان وبدر نزل مضايق
بدر: دي مش اصول خالص ياجدي
وهدان: في ايه يابدر؟
بدر: ازاي صقر يقعد مع تقى في اوضتها لوحدهم
حافصة هنا نزلت على كلامه: في ايه يا ابن عمي مالك مضايق اوي ليه كدا، وبعدين انا كنت معدية من ادام الاوضة والباب كان مفتوح وتقى قاعدة على السرير وصقر قصادها على الباب واظن ان كدا مافيش داعي لكلامك وعصبيتك دي، ولا ايه ياجدي؟
وهدان: صح يابنتي، حافصة معلش سبيني شوية مع ابن عمك
حافصة سابتهم وخرجت الجنينة ووهدان بيبص لبدر: اقعد عشان عاوز اتكلم معاك
بدر قعد: خير ياجدي
وهدان: جدك مراد كان بيكلمني من شوية وقالي ان صقر هيتجوز تقى
بدر بصدمة: ايه اللي حضرتك بتقوله دا، طب ازاي ومراته؟
وهدان: انا مفهمتش الموضوع بس كل اللي فهمته ان دا طلب مراد وكمان طلب ناريمان
بدر بحزن: يعني هتروح مني؟
وهدان: بدر فوق وشوف اللي بتحبك ونفسها انك تحس بيها، تقى مش ليك ولا عشانك
جه وقت العشا خلاص وحافصة طلعت تقول لتقى وخبطت ودخلت
حافصة: تقى العشا جاهز يلا عشان تتعشي
تقى: حاضر ياحبيبتي جايا
حافصة نزلت وتقى لسة هتنزل بس تليفونها رن وكان ماجد وردت
ماجد: وحشتيني
تقى بتوتر: عامل ايه؟
ماجد: الحمدلله طمنيني عليكي
تقى: الحمدلله، ماجد محتاجة اتكلم معاك شوية
ماجد ماركزش في اي حاجة غير انها قالت اسمه من غير ألقاب: انتي قولتي ماجد؟
تقى: مش وقته، انا بجد محتاجة اتكلم معاك
ماجد بقلق: في ايه؟
تقى: بكرة هرجع ونتكلم في الجامعة لان مش هينفع كلام في التليفون
صقر قعد ياكل وتقى شوية ونزلت وقعدت جمبه
وهدان: هتمشوا بكرة خلاص؟
صقر: لا هنمشي الليلة ياجدي
وهدان: ليه بس يا ابني النهار له عينين باردو
صقر: معلش لازم نوصل بدري، انا قلقان على ناريمان اوي ولازم امشي
وهدان: هو في ايه ياصقر ناريمان مالها، ابوك اتكلم معايا بس مفهمتش
صقر حكالهم كل حاجة وعيونه كلها دموع: عشان كدا لازم امشي
وهدان زعل على ناريمان لانها طبعاً بنت إبن عمه
صقر خرج الجنينة وتقى خرجت وراه
تقى بتوتر: انا موافقة ياصقر
صقر بصلها: بجد مش عارف اشكرك ازاي
تقى: المهم ناريمان تكون مرتاح ومبسوطة
صقر: يارب، ممكن تجهزي عشان نمشي
تقى: حاضر
تقى طلعت تجهز وصقر دخل يدور على بدر وعرف انه قاعد على سطح البيت بيعزف على الناي وكان اللحن كله حزن
صقر: عاوز اتكلم معاك قبل ما امشي يابدر
بدر بصله ووقف: خير يا ابن عمي
صقر: انا عارف ان انت بتحب تقى
بدر بصله باستغراب بإنه عارف…..صقر: باين عليك اصلا يا ابن عمي، وانا سمعتك وانت بتتكلم مع جدي لما كنت مضايق ان قاعد معاها، بس يابدر انا لازم اعمل دا عشان خاطر مراتي
بدر: يعني انت مش بتحبها؟
صقر: انا مش بحب غير ناريمان عمري ماشفت حد غيرها ولا هشوف ولا هحب حد تاني، انا عاوز امشي وانت مش زعلان مني انا بس حبيت اوضحلك
بدر: عادي ياصقر مش كل واحد بياخد اللي بيحلم بيه
ماجد قاعد يفكر في كلام تقى ويقول ياترى هي هتقول ايه ولا هتتكلم معاه في ايه
صقر خلاص جهز وتقى كمان جهزت واهل البيت جهزوا ليهم أكل بسيط ياكلوه طول الطريق وودعوهم واتحركوا لطريقهم، صقر وصلتله رسالة من ناريمان: انا كلمت الاستاذ صبري المأذون وهيجي يستنى معانا لحد ماترجع وخصوصا انه صاحب عمي أوي يعني هيقضي الليلة معانا عشان وقت ماتوصل يتم الجواز ياصقر
صقر عيونه كلها دموع وحاسس إنه تايه، تقى قاعدة ساكتة ومش بتتكلم معاه خالص والطريق عدا من غير اي كلام مابينهم وبعد ساعات وصلوا القصر، وصقر اول ماوصل طلع جري عليكم اوضته عشان يشوف ناريمان
صقر بيحضنها أوي: وحشتيني
ناريمان بدموع: وانت كمان
صقر بصلها: انتي كويسة؟
ناريمان بتوتر: انا بقيت كويسة لما شفتك، ها جاهز؟
صقر بصلها بيأس: جاهز ياناريمان
ناريمان: وانا كمان جهزت كل حاجة حتي اوضتكم سوا
صقر: مش هقدر على دا
ناريمان: لازم اتأكد قبل ما امشي ان سايباك مع زوجة وجواز حقيقي ياصقر
صقر لسة هيرد بس الباب خبط وكانت جميلة
جميلة: بابا بيقولك انهم كلهم جاهزين تحت
صقر: فين تقى؟
جميلة: في اوضتها وهتنزل دلوقتي
ناريمان: قوليلهم انه نازل ياجميلة
جميلة خرجت وناريمان بصت لصقر: يلا ياصقر
صقر سابها ونزل لتحت عشان ينفذ المطلوب والشهود كان علي وآدم، رغم ان آدم مكانش موافق بس جده هو اللي ضغط عليه
المأذون بدأ يجهز دفتره واوراقه وتقى نزلت وقعدت جمب مراد اللي هيكون وكيلها
صبري بص للعروسة: موافقة على هذا الجواز يابنتي؟
تقى بصت لصقر لثواني وبصت لصبري: ايوا
صبري بص لصقر وسأله نفس السؤال: موافق على هذا الجواز ياصقر؟
صقر بص لفوق وشاف ناريمان واقفة بتبص عليهم ودموعها كلها مغرقة وشها وصقر عينيه كلها دموع، ورد على صبري وقال: ايوا موافق
صبري بدأ يقولهم الكلمات اللي هيقولوها وراه وبعد دقايق تم الجواز، تقى مضت على عقد الجواز وجريت على فوق وصقر مضى على العقد وطلع اوضته عند ناريمان
ناريمان بدموع: يلا على اوضتك التانية
صقر بصلها: صدقيني مش هقدر اعمل دا
ناريمان: لازم ياصقر
صقر: سبيني معاكي النهاردة
ناريمان بانهيار: كل دقيقة بتعدي بتاخد من عمري اسمع كلامي ياصقر وروح لمراتك
تقى قاعدة بتعيط على سريرها ومنهارة وباب الاوضة خبط ودخل مراد، تقى وقفت احتراما له
مراد: يلا على اوضتك مع جوزك
تقى بصتله: انا هفضل هنا مع ليلى
مراد: اسمعي الكلام ياتقى، ناريمان عاوزة دا
تقى بانهيار: ليه انا اللي دايما اعمل كل دا، ليه انا اللي استحمل اللي بيحصل دا
مراد: عشان انتي بتحبي صقر
تقى بصتله بصدمة وتوتر: لا طبعاً مش بحبه
مراد ابتسم: لو كدبتي على الدنيا كلها مش هتقدري تكدبي عليا انا
تقى: ارجوك ياجدو سبني
مراد: من النهاردة كلمة جدو دي لا انا اسمي بابا وبس
تقى: طب فيه اب بيعمل كدا في بنته؟
مراد لف نفسه وضهره ليها: غصب عني يابنتي بس انا عاوز مصلحتك
صقر بعد محايلات من ناريمان راح الاوضة التانية وكان فاكر ان تقى هتكون فيها بس هي مجاتش لسة، وبعد دقايق الباب خبط وراح يفتح وكانت تقى وهي دخلت بهدوء وبتبص للأوضة اللي مترتبة ومتجهزة ليهم كعرسان فعلاً
صقر بيتكلم وضهره ليها: مش عاوزك تنسي اتفاقنا
تقى بدموع: ماتقلقش انا فاكراه كويس أوي
صقر: تمام
صقر بيدور في الادراج على المنديل الابيض واخده وتقى بتبصله بتوتر: ودا لازمته ايه؟
صقر: لازم يتأكده انه جواز حقيقي
تقى بتوتر كبير: يعني ايه؟
صقر: ماتقلقيش انا مش هلغي اتفاقنا بس لازم اعمل حاجة
صقر جرح نفسه من رجله عشان ناريمان ماتاخدش بالها من الجرح لو كان في ايده وجاب المنديل ووضع عليه بقعة دم وبص لتقى: كدا بقى ناريمان هتقتنع
آدم خرج بارة الڤيلا مخنوق وكمان لغي اي مواعيد له في العيادة النهاردة، وراح يقابل صاحبه فريد واول ماشافه جري عليه حضنه
آدم: معقول انا شهدت على جوازهم يافريد
فريد بحزن على حال صاحبه: معلش ياصاحبي لازم حد يضحي
آدم خرج من حضنه وبصله: وليه انا اللي اضحي
فريد: كله خير ليك يا آدم
آدم: خير ليا ازاي وانا هموت من القهرة والوجع
بعد ساعات اليوم خلاص بقى في أخره وماجد كان مستني تقى تروح الجامعة بس لا هي ولا ليلى راحوا
تقى وصقر لسة في الاوضة وكل واحد فيهم قاعد في جمب لوحده
صقر قام: انا رايح لناريمان
صقر خرج وراح اوضته التانية لناريمان اللي كانت مستنياه
ناريمان: حصل؟
صقر: أيوا
ناريمان: وايه الدليل؟
صقر بصلها بنظرات انه فاهمها وحافظها وعارف انها هتطلب دا وخرج من جيبه المنديل ورماه ليها على السرير ودخل ياخد دش
ناريمان دموعها نزلت: صعب عليا تلمس حد غيري بس غصب عني والله ياحبيبي
ناريمان نفسها بيقل خلاص وفجأة اغمى عليها وبعد حوالي دقيقتين صقر خرج وشافها كدا جري عليها وبسرعة لبس اي حاجة وشالها ونقلها المستشفى وكل البيت معاهم، الدكتورة بتكشف عليها وخرجت ليهم بس بتبصلهم بحزن كبير وبصت لصقر بدموع: طالبة تشوفك
صقر جري على جوا ودموعها مالية وشه: ماتسبنيش
ناريمان شالت جهاز الاكسچين وبدأت تتكلم بتعب: جه وقتي خلاص وانا اطمنت عليك، سايباك وانا شايفاك هتحقق حلمك ياصقر، عاوزاك تخلف عيال كتير يشيلوا اسمك ويكونوا سندك في الدنيا، بس عاوزاك توعدني بوعد ياصقر
صقر بانهيار: وعد إيه؟
ناريمان: اوعدني بإنك مش هتطلق تقى
صقر بصلها: لا مش هوعدك بدا
ناريمان: ارجوك دا آخر وعد اطلبه منك اوعدني انك تكمل جوازك منها ياصقر انت فاكرني غبية، الدم اللي انت جبته ريحته دم زفر ياروح قلبي، مش ريحته حلوة عشان خاطري تمم جوازك منها واوعدني بدا واوعدني انك مش هطلقها
صقر مكانش راضي يوعدها بوعد ذي دا بس هي اصرت على كدا وبصلها: اوعدك
ناريمان وكأنها كانت مستنية الوعد دا وروحها خلاص مشيت من الدنيا…..صقر بيهزها بعنف: ناريمان ردي عليا ارجوكي ردي عليا
الدكتورة جريت عليه وبتشوفها وغطت وشها…صقر: انتي بتغطي وشها ليه هي لسة معايا
الدكتورة بحزن: البقاء لله يا استاذ صقر
صقر وقع على الأرض منهار من اللي حصل والباقيين بارة وصلهم الخبر وانهاروا أوي
منال بتتكلم مع البنات بحزن: وكأنها كانت مستنية جوازكم ياتقى
تقى بانهيار: كان طلبها الوحيد واهو اتنفذ بس هي اللي مشيت
صقر مش مستوعب ان ناريمان خلاص ماتت وأبوه بيعمل إجراءات الدفن ومحدش عارف يتكلم مع صقر، بعد حوالي ساعة الاجراءات كلها خلصت وناريمان اخدوها للمقابر اللي ليهم هنا في مصر لان مراد عمل للعيلة مقابر في مصر وتم الدفن وصقر قاعد ادام القبر بيعيط
مراد قرب منه: كفاية ياصقر ماتعملش في نفسك كدا
صقر ساكت ومش بيرد على أي حد ومراد طلب من تقى تطلب منه يقوم
تقى قربت منه: صقر بابا عاوزك تمشي معانا
صقر بصلها ووقف واتكلم بغضب: انتي بالذات ملكيش دعوة بيا نهائي ولا ليكي كلام معايا انتي فاهمة
مراد قرب منه: ايه اللي انت بتقوله دا ياصقر
صقر بعصبية: اللي لازم كلكم تفهموه انا مش عاوز اشوفها ادامي ولا طايق حتى اسمع صوتها، انا مش عاوز اسمع اي كلام من اي حد، اعرفو ان جوازي كان عشان خاطر ناريمان وبس لكن دلوقتي هي مشيت وسابتني يبقى محدش يطلب مني حاجة غير كدا
تقى انصدمت من كلامه رغم انه في حالة محدش ياخد على كلامه فيها بس هي انجرحت بسبب كلامه، مشيت مع الباقيين وساكتة خالص واول ماوصلت وقفت ادام مراد
تقى: اظن المرادي حضرتك مش هتقدر توافق على اني اروح البيت القديم
مراد بحزن: مش هقدر اقولك حاجة يابنتي لان مش هسمح انك تنجرحي بكلامه كل شوية
تقى طلعت على أوضتها عشان تلم هدومها وليلى طلعت وراها
ليلى: انا هاجي معاكي
تقى بانهيار: لا انا عاوزة اكون لوحدي
منه ومنال دخلوا…..منه: مش هينفع تكوني لوحدك
تقى بعصبية: قولتلكم عاوزة اكون لوحدي
منال بصت لليلى ومنه: سيبوني مع تقى شوية
البنات خرجوا ومنال قعدت جمب تقى على سريرها
منال: انا عارفة ان من حقك تقعدي لوحدك شوية عشان تهدي، بس انا عاوزاكي تفكري شوية ياتقى
تقى بصتلها بانهيار: اكبر غلطة عملتها اني وافقت على جوازي من صقر
منال: احنا عارفين ان دا قرار مش سهل ياتقى
تقى: منال انا همشي من هنا واقعد في البيت القديم وهفضل على تواصل معاكي انتي والبنات، ونتقابل بعيد عن هنا لان مش هقدر اتقابل معاه ولا اشوفه ولا هقدر اسمع اي كلام منه تاني بعد اللي حصل
منال: اعملي اللي يريحك لان دي راحتك انتي
مراد طلعلهم ودخل الاوضة: فيه عربية بالسواق هتكون تحت أمرك في اي وقت، ومن بكرة هيكون معاكي واحدة تساعدك وتشوف طلباتك
تقى بدموع: ماتزعلش مني يابابا
مراد بحزن: انا زعلان عليكي يابنتي بس اوعدك ان كل دا هيتغير وهتلاقيني عندك كل يوم
منال: واحنا كمان كل يوم هنجيلك
تقى جهزت نفسها ورتبت شنطة هدومها وودعتهم ونزلت ركبت العربية والسواق اتحرك بيها
تقى: ممكن ياعم جميل توصلني لمكان قبل مانوصل
جميل: تحت امرك ياهانم
تقى: تسلم ياراجل ياطيب وبعدين هانم مين انا ذي بنتك باردوا
جميل ابتسم: الله يبارك فيكي يابنتي
تقى رنت على ماجد وطلبت منه انهم يتقابلوا في كافيه وعرف العنوان وهيقابلها فعلا، وطبعا هي وصلت قبله وهو وصل بعدها بحوالي ربع ساعة
ماجد: اسف على التأخير
تقى: لا أبداً ولا يهمك
ماجد قعد وبصلها: وحشتيني
تقى بكسوف: عاوزة اتكلم معاك في حاجة مهمة
ماجد بصلها بهدوء: طب تشربي ايه الأول
تقى: صدقني مش عاوزة اشرب اي حاجة، انا بس كل اللي عاوزاه انك تسمعني كويس
ماجد: سامعك اتكلمي
تقى بصتله وبدأت تحكيله عن جوازها من صقر وكل اللي حصل معاها في اليومين اللي فاتوا، وماجد انصدم في الأول ورجع هدي شوية بس ساكت
تقى خلصت كلامها: انا خلصت كلامي
ماجد بهدوء: وانا ياتقى؟
تقى بدموع: انت انسان محترم جداً ومش هلاقي حد يحبني ذيك، لان انت حبتني رغم اللي عرفته عني كمان
ماجد: بس انتي بتحبيه
تقى بتوتر: ايه اللي انت بتقوله دا
ماجد: بصي لنفسك وانتي بتتكلمي عنه وحزنك ووجعك منه على الكلام اللي قالوا ليكي شوفي لمعة عينيكي لما بتجيبي اسمه
تقى دموعها نزلت: ماجد انا عارفة ان دا صعب عليك، بس صدقني كنت بحاول اقرب منك وادي لنفسي فرصة معاك بس انا ماشفتش غيره من صغري من يوم ماوعيت على الدنيا وانا شايفاه ادامي حتى لما اتجوز بنت عمه انا كنت ساعتها بموت بس مش قادرة احب حد تاني، حاولت انساه بس مش قادرة بس انا الفترة دي مش قادرة اسامح على كلامه وطلبت ابعد عن البيت واقعد لوحدي لان مش طايقة اشوفه خالص
ماجد مسك ايديها بحب: تعرفي لو ماكنتيش صارحتيني بكل دا كنت فعلاً هزعل منك أوي
تقى ابتسمت: يعني افهم من كدا انك مش زعلان مني؟
ماجد ابتسم: بالعكس ياتقى انا حبيتك اكتر دلوقتي، لانك انسانة مش بتحبي الخداع وصدقيني انا موجود طول الوقت جمبك ولو احتاجتيني في أي وقت هتلاقيني واللي حصل دا مش هيغير حاجة
تقى: طمنت قلبي، انا هقوم امشي
ماجد: تحبي اوصلك؟
تقى: لا انا معايا العربية بالسواق
ماجد: طب تضايقي لو رنيت بعد كدا اطمن عليكي؟
تقى: بالعكس دا هيفرحني جداً
ماجد: وانا اهم حاجة عندي هي فرحتك
تقى ابتسمتله ومشيت وكانت بتقول لنفسها ياريتها حبت ماجد ونست حبها لصقر
في آخر الليل في وقت متأخر، رجع صقر الڤيلا والكل كانوا نايمين بس ابوه كان مستنيه
مراد: عامل ايه دلوقتي ياصقر؟
صقر بصله بعنين كلها دموع وحزن: عامل كويس
مراد بحزن: ادعيلها بالرحمة يا ابني وحاول تعيش حياتك
صقر دموعه نزلت: وحشتني اوي يابابا مش قادر استوعب انها خلاص مابقتش معانا هنا
مراد: كل واحد له يوم وهيمشي فيه فإدعيلها ياصقر
تقى طبعا كانت وصلت البيت ومراد كان كل شهر بيبعت حد ينضف البيت فكان البيت نضيف وهي رتبت هدومها في الدولاب ودخلت اخدت دش وقعدت وشوية وجرس الباب رن وراحت تفتح وكان عم جميل
جميل شايل شنط بلاستيك في ايديه: اتفضلي يابنتي الحاجات دي، مراد باشا طلبها ليكي وفيه كمان اكل جاهز عشان تتعشي
تقى اخدت منه الاكل: شكراً ليك ياراجل ياطيب
تقى اخدت الاكل ودخلت تاكل لانها كانت جعانة فعلاً ودي طبعاً اول ليلة هتنامها بعيد عن العيلة وهتكون لوحدها
صقر دخل اوضته وبيبص لكل ركن فيها وشامم ريحة ناريمان في الاوضة كلها وقعد على السرير ودموعه نزلت
صقر: سبتيني ومشيتي ليه، انا عارف يارب ان دا اقدار بس مش قادر استوعب
صقر لمح ورقة على التسريحة ادامه قام مسكها وفتحها: وقت ماتقرأ الرسالة دي هكون انا مشيت خلاص ياصقر، اوعى تزعل انا كدا في مكان هرتاح فيه أوي والتعب كمان هنساه، عيش حياتك ياصقر، واوعى تطلق تقى عشان انا عاوزة اشوفك فرحان وعندك إبن عارفة انك اكيد مش عاوز تشوفها بس حاول عشان خاطري عشان اكون مرتاحة في مكاني ياصقر
صقر قفل الورقة ونام على ضهره وبيبص لسقف الاوضة وبيكلم نفسه: صعب عليا المس حد غيرك ياناريمان انا مالحقتش اخد وقتي ولا اشوف حد غيرك، اللي ربنا كاتبه اكيد هشوفه واوعدك هتشوفيني مرتاح حتى لو مش معاها ولا مع غيرها